దేనికైనా 'టైం' రావాలి!!

      ఈ స్పీడ్ యుగంలో మ‌నమంతా వేగానికి బాగా అల‌వాటు ప‌డిపోయాం. ఇంట‌ర్నెట్ క‌నెక్ష‌న్ ఫాస్ట్ గా ఉండాలి. ఫుడ్ ఆర్డ‌ర్ చేస్తే ఫాస్ట్ గా రావాలి. ఫోన్, కంప్యూట‌ర్ ఇలా అన్నీ స్పీడ్ గా ప‌నిచేయాలి. వేగంగా ప‌నులు జ‌ర‌గ‌డం మంచిదే కానీ చిన్న‌ప్ప‌టి నుంచీ ఈ స్పీడ్ అల‌వాటైపోయి, వేచి ఉండ‌టం అన్న‌దే తెలియ‌క‌ ఈ త‌రం విద్యార్ధులు, యువ‌కులు కొన్ని సామాజిక, మాన‌సిక స‌మ‌స్య‌ల‌ను ఎదుర్కొంటున్నారు. మ‌న పెద్ద‌లు త‌రుచుగా ఒక మాట చెపుతూ ఉండ‌టం మ‌నం వినే ఉంటాం. 'దేనికైనా టైం రావాలి' . బాగా లోతుగా విశ్లేషించుకుంటే ఇందులో ఉన్న అస‌లు విష‌యం అవ‌గ‌త‌మ‌వుతుంది. ఒక విత్త‌నాన్ని నాటినప్పుడు అది మొల‌కెత్తి మొక్క‌గా ఎదిగి ఎన్నో ఆప‌ద‌ల‌ను దాటుకుని చెట్టుగా ఎదిగిన‌ప్పుడే మన‌కు నీడ‌ను, ఫ‌లాల‌ను అందించ‌గ‌లుగుతుంది. అప్ప‌టి వ‌ర‌కూ వేచి ఉండే శ‌క్తి, ఓపిక ఉంటేనే ఆ చెట్టు ఇచ్చే మ‌ధుర ఫ‌లాల‌ను ఆస్వాదించ‌గ‌లుగుతాం. అలాగే ఏదైనా ప‌నిని మొద‌లుపెట్ట‌గానే వెంట‌నే ఫ‌లితం రావాలి అంటే కుద‌ర‌దు. క‌ష్ట‌ప‌డి ప‌నిచేస్తూనే దాని ఫ‌లితం వ‌చ్చేవ‌ర‌కూ ఓపిగ్గా, న‌మ్మ‌కంతో ఎదురు చూడాలి. దాన్నే టైం రావ‌డం అంటారు. త‌న‌ టైం వ‌చ్చే వ‌ర‌కూ వేచి ఉండే శ‌క్తిని సంపాదించుకోవడ‌మే నిజ‌మైన విజేత‌కు ఉండాల్సిన ముఖ్య ల‌క్షణం. అలా అని క‌ష్ట‌ప‌డ‌కుండా, గ‌ట్టి ప్ర‌య‌త్నం చేయ‌కుండా దేనికైనా టైం రావాలి, నా టైం వ‌స్తుంది అనుకుంటే ఎప్ప‌టికీ ఆ టైం రాదు. 

ఓపిక‌, స‌హనమే గెలుపుకి త‌లుపు! 

      ఇప్పుడు చ‌దువు, ఉద్యోగం, కెరీర్ ఏదైనా స‌రే ఓపిక ఉంటే గెలుపు త‌లుపు త‌డుతుంది. మ‌నం ముందు చెప్పుకున్న‌ట్టు విత్త‌నం నాటిన‌ వెంట‌నే చెట్టు పెరిగి పెద్ద‌దైపోయి ఫ‌లాల‌ను ఇచ్చేయ‌దు. విత్త‌నం మొల‌కెత్తి చెట్టుగా మారేందుకు దానికి త‌గిన పోష‌ణ అందించి, కాపాడుకుంటే త‌ర్వాత ఫ‌లాల‌ను అందిస్తుంది. ఎందుకంటే మ‌నుష్య జీవితానికి ప్ర‌కృతి కొన్ని నియ‌మాల‌ను విధించింది. ఆ నియ‌మాల‌ను గౌర‌వించి, బాధ్య‌త‌గా మెలిగితే త‌గిన ప్ర‌తిఫలం ల‌భిస్తుంది. అలా కాకుండా ప్ర‌తీది వేగంగా జ‌రిగిపోవాల‌ని ప్ర‌కృతికి విరుద్ధంగా ప్ర‌వ‌ర్తిస్తే ఇబ్బందులపాలు కావాల్సి వ‌స్తుంది. ఇప్పుడు చాలా మంది యువ‌త ఒక ప‌నిని ప్రారంభించి వెంట‌నే ప్ర‌తిఫ‌లం ఆశిస్తున్నారు. దీనికి  కార‌ణాన్ని విశ్లేషిస్తే చిన్న‌త‌నం నుంచి ఏ విష‌యానికి ఓపిగ్గా ఎదురు చూసే ల‌క్ష‌ణం ఈ త‌రంలో క‌నిపించ‌డం లేదు. ప్ర‌తీ విష‌యం స్పీడ్ గా జ‌రిగిపోవ‌డం వాళ్ల‌లో ఈ మాన‌సిక జాడ్యాన్ని జొప్పించింది. 

ఓపికే మీ కెరీర్ గ్రాఫ్ ను నిర్ణ‌యిస్తుంది! 

   ప్ర‌స్తుతం చాలా మంది యువ‌కులు మంచి జీతం వ‌చ్చే ఉద్యోగాన్ని కాదనుకుని సొంతంగా ఎదిగేందుకు స్టార్ట‌ప్ మంత్రం జ‌పిస్తున్నారు. అయితే ప్లానింగ్, నైపుణ్యం అన్నీ ఉన్న‌ప్ప‌టికీ కీల‌కమైన ఓపిక మాత్రం చాలా మందికి ఉండ‌టం లేదు. స్టార్ట‌ప్ లో తొలి ఏడాది కష్టంగా సాగుతుంద‌న్న వాస్త‌వం తెలిసి కూడా చాలా మంది ఓపిక లేక‌ రెండు మూడేళ్ల‌లో స్టార్ట‌ప్ ల‌ను మూసేసిన ఉదంతాలు కూడా ఉన్నాయి. త‌మ ప్లానింగ్ ను న‌మ్ముకుని మ‌రికొన్నాళ్లు ఓపిగ్గా నిరీక్షిస్తే మంచి ఫ‌లితాలు వ‌చ్చేసంద‌ర్భాల్లోనూ చాలా మంది త‌ప్ప‌ట‌డుగులు వేసారు. దానికి కార‌ణం ఫ‌లితం కోసం నిరీక్షించే నైపుణ్యం లేక‌పోవ‌డం. ప్రపంచంలో ఏ విష‌యాన్ని చూసినా ప్ర‌కృతీ ప్ర‌తీదానికి ఒక నిర్దేశిత స‌మయాన్ని నిర్ణ‌యిస్తుంది. ఒక రోజు గ‌డ‌వాలంటే 24 గంట‌లు పూర్తికావాలి. రాత్రి నుంచి మ‌ళ్లీ ప‌గ‌లు రావాలంటే 12 గంట‌లు నిరీక్షించాలి. త‌ల్లి గ‌ర్భంలో బిడ్డ ఎదిగేందుకు కూడా ఒక నిర్దేశిత స‌మ‌యం ఉంటుంది. పంట పండి చేతికి రావాలంటే టైం రావాల్సిందే. కాబ‌ట్టి ఏ ప‌నిచేసినా దాని ఫ‌లితం రావాలంటే కొన్ని రోజులు ఆగాల్సిందే. ఎందుకంటే దేనికైనా టైం కావాలి. 

ఆలోచ‌న‌ల‌ను అమ‌లు చేసేందుకు టైం రావాలి! 

     మ‌నకు ఒక ఆలోచ‌న వ‌చ్చిందంటే దాన్ని వెంట‌నే అమ‌లు చేయ‌డం అన్ని సంద‌ర్భాల్లోనూ స‌త్ఫ‌లితాల‌నివ్వ‌దు. విభిన్న ఆలోచ‌న‌ల‌కు ఒక రూపం ఇచ్చి స‌మ‌యం, సంద‌ర్భం వ‌చ్చిన‌ప్పుడు వాటి అమ‌ల్లో పెడితే త‌గిన ఫ‌లితాలు వ‌స్తాయి. అంటే టైం కోసం ఎదురు చూడాలి. కేసీఆర్ తెలంగాణా ఉద్య‌మం మొద‌లుపెట్టిన‌ప్పుడు అంత‌గా ఆద‌ర‌ణ రాలేదు. కానీ ఆయ‌న ఓపిగ్గా వెయిట్ చేసి స‌మ‌యం ఆస‌న్న‌మైన‌ప్పుడు త‌న పోరాటాన్ని ఉదృతం చేసాడు. ఫ‌లితం తెలంగాణా రాష్ట్రం ఏర్ప‌డింది. దాదాపు ప‌న్నెండేళ్ల పాటు అత‌ను ఓపిగ్గా ఎదురు చూసి, ఫ‌లితాన్ని న‌మ్మి ప‌నిచేసాడు కాబ‌ట్టే అనుకున్న‌ది సాధించ‌గ‌లిగాడు. అక్క‌డ టైమింగ్ మాత్రమే కీల‌క పాత్ర పోషిస్తుంది. స‌మ‌యం అనుకూలించ‌న‌ప్పుడు బ‌లంగా కృషి చేసినా ఫ‌లితం శూన్యంగానే ఉంటుంది. అలాగే స్వాతంత్ర ఉద్య‌మాన్ని న‌డిపించిన గాంధీజీ, ఇత‌ర ప్ర‌పంచ నేత‌లు, యుద్ధ‌వీరులు ఇలా అంతా ఓపిగ్గా ఎదురుచూసే విజ‌యాలు సాధించ‌గ‌లిగారు. 

స‌మ‌యం, సంద‌ర్భం చాలా ముఖ్యం! 

      ఓపిగ్గా మ‌న టైం కోసం నిరీక్షించ‌డ‌మే కాదు సంద‌ర్భాన్ని గుర్తించ‌డం కూడా చాలా ముఖ్యం. మ‌న‌లో చాలా మంది స‌మ‌యం, సంద‌ర్భం గుర్తించ‌లేక వాళ్లు ఇబ్బందిప‌డుతూ ఎదుటి వాళ్ల‌ను ఇబ్బంది పెడుతూ ఉంటారు. మ‌నం ఒక వ్య‌క్తిని ఫోన్ లో సంప్ర‌దించాలి అనుకున్న‌ప్పుడు త‌గిన స‌మ‌యం చూసి ఫోన్ చేయాలి. అలాగే వాళ్ల‌తో స‌మావేశమైన‌ప్పుడు. వాళ్ల‌ను కలుసుకున్న‌ప్పుడు సంద‌ర్భం చూసుకోవాలి. దీని వ‌ల‌న అవ‌త‌లి వాళ్లు మీ ఇంపార్టెన్స్ ను గుర్తిస్తారు. మ‌నకు స‌హాయ‌ప‌డ‌తారు. అలాకాకుండా స‌మ‌యం, సంద‌ర్భం లేకుండా వాళ్ల‌కు ఫోన్లు చేసి విసిగించ‌డం, అసంద‌ర్భ వ్యాఖ్య‌లు చేయడం వ‌ల‌న మ‌న‌కు రిలేష‌న్స్ ను దూరం చేస్తాయి. కాబ‌ట్టి దేనికైనా టైం రావాలి. అంత‌వ‌ర‌కూ వెయిట్ చేయాలి. అలా నిరీక్షించినప్పుడు ఫ‌లితాలూ వ‌స్తాయి. పరిచ‌యాలూ బాగుంటాయి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                   You can send your Educational related articles to  careertimes.online1@gmail.com