స్టార్ట‌ప్..ఉద్యోగం..రెండింటిలో ఏది బెస్ట్??

     ఒక‌ప్పుడు మంచి కంపెనీలో ఉద్యోగం సంపాదించ‌డ‌మే ప్ర‌తీ విద్యార్ధి ల‌క్ష్యంగా ఉండేది. కానీ ఇప్పుడు ట్రెండ్ మారింది. మ‌న‌మెందుకు వేరే కంపెనీలో ప‌నిచేయ‌డం..మ‌న‌మే ఒక కంపెనీ పెట్టుకుంటే పోలా.. అన్న‌ది ఈత‌రం విద్యార్ధుల ఆలోచ‌న‌. మారిన సామాజిక‌, ఆర్థిక ప‌రిస్థితుల నేప‌థ్యంలో విద్యార్ధులు స్వ‌తంత్ర నిర్ణ‌యాలు తీసుకుంటున్నారు. అయితే స్టార్ట‌ప్ పెట్ట‌డం దాన్ని న‌డ‌ప‌డం అన్న‌ది మామూలు విష‌యం కాదు. దానికి చాలా నేర్పు, ఓర్పు కావాలి. అలా అని ఆకాంక్ష‌ల‌ను, ఉత్సాహాన్ని చంపుకొని వేరే కంపెనీలో ప‌నిచేయ‌డం అన్న‌ది ఇప్ప‌టి యువ‌త‌రానికి  న‌చ్చ‌ని ప‌ని. అయితే చిన్న చిన్న ప్ర‌తికూల ప‌రిస్థితుల వ‌ల‌న‌ మ‌నసు చంపుకుని ఉద్యోగం చేసుకోవాలా?  లేక తెగించి స్టార్ట‌ప్ పెట్లాలా? అన్న‌దానిపై చాలా మంది యువ‌కులు త‌ర్జ‌న భ‌ర్జ‌న ప‌డుతుంటారు. ఉద్యోగం చేయ‌డం వ‌ల‌న క‌లిగే ప్ర‌యోజ‌నాలేంటి? స‌్టార్ట‌ప్ పెట్ట‌డం వల‌న క‌లిగే ప్ర‌యోజ‌నాలేంటి? అన్న‌విష‌యాల‌తో పాటు త‌న మాన‌సిక శ‌క్తి సామ‌ర్ధ్యాలు ఏంటి? త‌న కుటుంబం, అవ‌స‌రాలు ఇలా విభిన్న విష‌యాల‌ను ప‌రిగ‌ణ‌న‌లోకి తీసుకోవాల్సి ఉంటుంది. ఉద్యోగం చేస్తే ఏం లాభాలున్నాయి? ఏం న‌ష్టాలున్నాయి? స‌్టార్ట‌ప్ తో ప్ర‌యోజ‌నాలేంటి? ప‌్ర‌తికూల‌త‌లేంటి? అన్న విష‌యాల‌ను 'కెరీర్ టైమ్స్' మీకు వివ‌రించే ప్ర‌యత్నం చేస్తుంది. ఆ త‌ర్వాత రెండింటిలో ఏది ఎంచుకోవాల‌న్న‌ది మీ ఛాయిస్. 

ఉద్యోగంతో లాభాలు 

• ఆర్థికంగా కాస్త స్థిర‌ప‌డేందుకు ఉప‌యోగ‌ప‌డుతుంది. 

• నిర్దేశిత స‌మ‌యాలు ఉండ‌టం వ‌ల‌న కుటుంబంతో కాస్త ఎక్కువ స‌మ‌యం గ‌డిపే వీలు 

• మంచి నైపుణ్యం చూపించి క‌ష్టించి ప‌నిచేస్తే ఉన్న‌త స్థానానికి వెళ్లే వీలు 

• ప్ర‌తీ రోజూ కొత్త విష‌యం నేర్చుకునేందుకు వీలు చిక్కుతుంది. 

• ఉద్యోగ జీవితంలో భాగంగా వివిధ వ్యక్తుల‌ను, వారి మ‌న‌స్త‌త్వాల‌ను నిశితంగా ప‌రిశీలించే అవ‌కాశం

ఉద్యోగంతో న‌ష్టాలు

• సంస్థ కోసం త‌ప్పితే త‌న సొంత అభివృద్ధికై ఆలోచించే వీలు చిక్క‌క‌పోవ‌డం.

• బాస్ , పై అధికారుల నుంచి వ‌చ్చే ప‌ని ఒత్తిడి.

• ఎంత క‌ష్ట‌ప‌డ‌తున్నా ఆర్థికంగా ఇంకా స్థిర‌ప‌డ‌లేద‌నే భావ‌న‌.

• జీతం ఎంత వ‌స్తున్నా ఈఎమ్ఐలు, ఖ‌ర్చుల‌కే పోయి ఒక పెద్ద మొత్తం దాచుకునే వీలు లేక‌పోవ‌డం.

• ప‌ని ఒత్తిడి వ‌ల‌న ఏర్ప‌డే శారీర‌క, మాన‌సిక అనారోగ్యాలు 

స్టార్ట‌ప్‌తో లాభాలు 

• ఒక సుదీర్ఘ లక్ష్యం కోసం పనిచేస్తున్నామన్న ఆశ మిమ్మల్ని ఉత్సాహంగా ఉంచుతుంది.

• ఒక బాస్ కింద పనిచేస్తూ ఒత్తిడిని అనుభవిస్తూ పనిచేయాల్సిన అవసరం  ఉండదు.

• ఒక వేళ ఒత్తిడిని అనుభవించినా అది తన కోసమే అన్న భావన రిలీఫ్ ను ఇస్తుంది.

• ఒక సొంత కంపెనీకి అధిపతిగా మీరు సంపాదించుకునే అనుభవం ఎంతో విలువైనదిగా ఉంటుంది. 

• ముఖ్యంగా స్వేచ్ఛ అనేది ఉంటుంది. ఉద్యోగం చేసేటప్పుడు తీసుకోలేని సొంత నిర్ణయాలు ఇక్కడ తీసుకోవచ్చు. 

• మీరే సొంతంగా ఒక కంపెనీ నిర్మించి దానికి సారధ్యం వహించడం ఆత్మవిశ్వాసాన్ని పెంచుతుంది. 

స్పార్టప్ తో నష్టాలు 

• స్టార్టప్స్ లో రిస్క్ చాలా ఎక్కువగా ఉంటుంది. అసలు ఏ వస్తువు అందుబాటు లేని చోట మీరు ఓ మహా భవనాన్ని నిర్మించాల్సి ఉంటుంది. 

• అనుకున్న సమయానికి ఫండింగ్స్ రాకపోతే సంస్థ మనుగడ ప్రశ్నార్ధకంలో పడుతుంది. 

• స్టార్టప్ లో స్టాఫ్ ను సరిగ్గా కుదుర్చుకోకపోతే దెబ్బతినేందుకు అవకాశం ఉంటుంది. 

• ప్రారంభంలో ఎన్నో కష్ట నష్టాలకు ఓర్చుకోవాలి. ఒక్కోసారి తప్పుడు నిర్ణయం తీసుకున్నామా అన్న అనుమానం కూడా రావచ్చు. 

• నమ్మకం పెట్టుకున్నవారు సమయానికి హ్యాండ్ ఇవ్వొచ్చు. 

         ఒక సాధారణ లైఫ్ స్టైల్ కు అలవాటు పడి ఉదయం నుంచి సాయింత్రం వరకూ పనిచేసి వచ్చిన డబ్బులతో ఒక సౌకర్యవంతమైన జీవితం కోరుకునే వారు ఉద్యోగం చేస్తున్నారు. అలా కాకుండా నలుగురిలా కాకుండా తాను ప్రత్యేకంగా ఉండి ఒక లక్ష్యం పెట్టుకుని దానికోసం నిరంతరం శ్రమించే వాళ్లు మరికొందరు. వీళ్లేఇప్పుడు స్టార్టప్ మంత్రం జపిస్తున్నారు. మరి మీరు ఏ కేటగిరీయో మీరే తేల్చుకోండి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                                  You can send your Educational related articles to  careertimes.online1@gmail.com