ప్ర‌తీ విద్యార్ధి 'ఈ వ్య‌క్తి' కి మొక్కాల్సిందే!!

    కొంద‌రు వ్య‌క్తులు పాతుకుపోయిన దురాభిప్రాయాల‌ను ప‌టాపంచ‌లు చేస్తారు...మ‌రికొంద‌రు అసాధ్యమ‌న్న‌దాన్ని సుసాధ్యం చేస్తారు...ఇంకొంద‌రు ఆత్మ‌విశ్వాసానికే ఆత్మ‌విశ్వాస‌మ‌వుతారు. అయితే ఇవ‌న్నీ ఒక్క వ్య‌క్తే సాధిస్తే దాన్ని అద్భుతం అన‌డం త‌ప్ప అత‌న్ని ప్ర‌శంసించేందుకు మ‌న ద‌గ్గ‌ర మాట‌లే ఉండ‌వు. ఆటంకాల‌కు, అవ‌మానాల‌కు, అవ‌హేళ‌న‌ల‌కు  'తిరుగులేని విజ‌యం'తో ఒక సామాన్యుడు ఇచ్చిన‌ స‌మాధానం ఇప్పుడు ఓ సెన్సేష‌న్. ప్ర‌తి విద్యార్ధి త‌ప్ప‌నిసరిగా స్పూర్తిగా తీసుకోవాల్సిన ఆ వ్య‌క్తి పేరు 'రోణంకి గోపాల‌క్రిష్ణ‌', సివిల్స్ లో ఆల్ ఇండియా మూడో ర్యాంక‌ర్. సివిల్స్‌లో ఆల్ ఇండియా మూడో ర్యాంక‌ర్ అయినంత మాత్రాన ఇత‌ని గూర్చి 'కెరీర్ టైమ్స్'‌లో ప్ర‌త్యేకంగా ప్ర‌స్తావించాల్సిన అవ‌స‌రం లేదు. కానీ గోపాలక్రిష్ణ‌ నేప‌థ్యం, చ‌దువు, ప‌రిమితులను ప‌రిశీలిస్తే ఇత‌ను సాధించిన లక్ష్యం సామాన్య‌మైన‌దేమీ కాదు. విద్యార్ధులే కాదు ల‌క్ష్య‌సాధ‌న కోసం కృషి చేస్తున్న‌ ప్ర‌తీ ఒక్క‌రూ ఇత‌ని విజ‌య‌గాథ‌ను స్ఫూర్తిగా తీసుకోవాల‌న్న‌దే మా ఆకాంక్ష‌.

క‌రెంట్ లేని ఇళ్లు..స‌ర్కారీ చ‌దువు!

      రోణంకి గోపాల‌క్రిష్ణ పుట్టింది, పెరిగింది  శ్రీకాకుళం జిల్లా, ప‌లాస మండలంలోని పార‌సంబ అనే చిన్న గ్రామం. ఒక‌టో త‌ర‌గ‌తి నుంచి ఇంట‌ర్ వ‌ర‌కూ ప్ర‌భుత్వ స్కూల్, కాలేజీలోనే చ‌దువుకున్నారు. అదీ తెలుగు మీడియంలోనే. స‌రిగ్గా చ‌దువుకునేందుకు వాళ్ల ఇంటికి అప్ప‌ట్లో క‌రెంట్ స‌దుపాయం కూడా లేదు. ఇంట‌ర్ త‌ర్వాత గోపాలక్రిష్ణ బీఎస్సీ డిగ్రీని ఆంధ్రా యూనివ‌ర్సిటీ నుంచి దూర‌విద్య‌లో పూర్తి చేయడం విశేషం. త‌ర్వాత టీచ‌ర్ ట్రైనింగ్ పూర్తి చేసి 2007 లో టీచ‌ర్ గా మారాడు. కానీ త‌ను క‌ల‌లు కంటోంది మాత్రం సివిల్స్ కోసం. దానికోసం 2006 నుంచి సివిల్స్ కోసం సమాయుత్త‌మ‌వుతున్నాడు. అప్ప‌టి నుంచి ల‌క్ష్య సాధ‌నే ఊపిరిగా బ‌తుకుతున్న గోపాల‌క్రిష్ట ఇప్పుడు సివిల్స్ లో ఆల్ ఇండియాలో థ‌ర్డ్ ర్యాంక‌ర్. ఒక తెలుగు మీడియం విద్యార్ధి, అందులోనూ డిగ్రీ దూర‌విద్య‌లో చ‌దివిన విద్యార్ధి సివిల్స్ లో థ‌ర్డ్  ర్యాంక్ సాధించ‌డం అద్భుతం కాక మ‌రేమిటి?

అప‌జ‌యాలు, అవ‌మానాలు కోకొల్ల‌లు!

      ఓ సాధార‌ణ కుటుంబం, త‌ల్లిదండ్రులిద్ద‌రూ నిర‌క్ష‌రాస్యులు. పైగా సౌక‌ర్యాలు, వ‌స‌తుల లేమితో ఇబ్బందులు. ఇవ‌న్నీ దాటి డిగ్రీ చేయ‌డ‌మే క‌ష్టం. ఎలాగోలా దూర‌విద్య‌లో బీఎస్సీ డిగ్రీ పూర్తిచేసినా కొన్ని అప‌జ‌యాలు మాత్రం వెక్కిరించాయి. 2012 లో టీచ‌ర్ జాబ్ చేస్తూ గ్రూప్ 1 ఇంట‌ర్వ్యూ వ‌ర‌కూ వెళ్లినా కోర్టు తీర్పుతో అది సాధ్యం కాలేదు. ఇక సివిల్స్ కు సీరియ‌స్ గా ప్రిపేర‌వుదామ‌ని హైద‌రాబాద్ కు వ‌స్తే గోపాల‌క్రిష్ణ‌కు ఎదురైన అవ‌మానాలు అన్నీ ఇన్నీ కావు. 'ఏంటి..? డిస్టెన్స్ డిగ్రీతో సివిల్సా?'  'తెలుగు ఆఫ్ష‌న్స్ గా ఎంచుకుని సివిల్స్ ఎలా కొడ‌తావ‌య్యా?' 'అద్దంలో ముఖం చూసుకున్నావా?'  'నిన్ను మా కోచింగ్ సెంట‌ర్ లో జాయిన్ చేసుకోవ‌డం కుద‌ర‌దు' అంటూ ఛీత్కారాలు, ఈస‌డింపులు. అవ‌న్నీ భ‌రించి మాతృభాష‌లోనే చ‌దివి విజ‌యాన్ని సాధించాడు గోపాల‌క్రిష్ణ‌. చిన్న గ‌దిలో నిరంత‌రం చ‌దువుతూ ప‌ద‌కొండేళ్లుగా సివిల్స్ కు ప్రిపేర‌వుతూ నాలుగో ప్ర‌య‌త్నంలో త‌న ల‌క్ష్యాన్ని చేరుకున్నాడు.

తెలుగుకు ద‌క్కిన విజ‌యం

    అస‌లు గోపాల‌క్రిష్ణ... 'తెలుగు మాధ్య‌మంలో సివిల్స్‌కు ప్రిపేర‌వుతా' అన‌గానే చాలా మంది నిరుత్సాహ‌ప‌ర్చారు. తెలుగు ఆప్ష‌న్స్ గా ఎంచుకుని సివిల్స్ ను సాధించడం ఆసాధ్య‌మంటూ తేల్చి ప‌డేశారు. అత‌నికి శిక్ష‌ణ ఇచ్చేందుకు హైద‌రాబాద్ లో ఒక్క కోచింగ్ సెంట‌ర్ కూడా ముందుకు రాలేదు. దీంతో సొంతంగానే ఒక చిన్న గ‌దిని అద్దెకు తీసుకుని ప్రిప‌రేష‌న్ ప్రారంభించాడు. జ‌న‌ర‌ల్ స్టడీస్ కోసం హైద‌రాబాద్ లో సీఎస్‌బీ కేంద్రానికి వెళ్లి అక్క‌డ వాళ్లు ఆంగ్లంలో చెప్పిన‌దాన్ని తెలుగులోకి మార్చి రాసుకునేవాడు. తెలుగు సాహిత్యాన్ని ఆప్ష‌న్స్ గా ఎంచుకుని, ఇంట‌ర్వ్యూను కూడా తెలుగులోనే పూర్తి చేసి గోపాల‌క్రిష్ణ చ‌రిత్ర సృష్టించాడు. ఇంట‌ర్వ్యూలో ట్రాన్స్‌లేట‌ర్ ను పెట్టుకోవ‌చ్చ‌న్న వెసులుబాటును ఉప‌యోగించుకుని విజ‌యం సాధించాడు. '1 వ త‌ర‌గ‌తి నుంచి సివిల్స్ వ‌ర‌కూ తెలుగు మీడియంలోనే చ‌దివి ఆల్ ఇండియా స్థాయిలో థ‌ర్డ్ ర్యాంక్ సాధించ‌డం చరిత్రను సృష్టించ‌డ‌మే'. తెలుగు మీడియం అన‌వ‌స‌రం, దండ‌గ అన్న‌వాళ్ల‌కు గోపాల‌క్రిష్ణ , తాజా విజయం చెంప‌పెట్టులాంటిదే.

ప‌ట్టుద‌ల ఉంటే ఏదైనా సాధ్య‌మే!

      ఉన్న‌త ల‌క్ష్యం కోసం కృషి చేస్తున్న ప్ర‌తీ విద్యార్ధికి ఇప్పుడు గోపాల‌కృష్ణ ఓ రోల్ మోడ‌ల్. ప‌ట్టుద‌ల ఉంటే ఎన్ని అవ‌రోధాలు ఉన్నా గ‌మ్యాన్ని చేరుకోవ‌చ్చ‌ని అత‌ను నిరూపించాడు. 'డిస్టెన్స్ లో డిగ్రీ పూర్తి చేసి, తెలుగు మీడియంలోనే చ‌దివి, సివిల్స్ లో థ‌ర్డ్ ర్యాంక్ సాధించ‌డం' అంటే సామాన్యమైన విష‌యం కాదు. అత‌ని విజ‌యం వెనుక ఎన్ని త్యాగాలు, ఎంత ప‌ట్టుద‌ల, క‌సి ఉన్నాయో అర్ధం చేసుకోవ‌చ్చు. ఇలాంటి వ్య‌క్తుల‌ను స్ఫూర్తిగా తీసుకుంటే ఏ రంగంలో అయినా గెలుపు సాధించ‌డం సాధ్య‌మే అనిపిస్తుంది. ముఖ్యంగా ప్ర‌తీ తెలుగు మీడియం విద్యార్ధి ఇత‌ని విజ‌యాన్ని త‌న విజయంగా భావించొచ్చు. అత్యుత్తమ కోచింగ్ లు తీసుకుని, ఆధునాత‌న స‌దుపాయాలు పొంది తెచ్చుకున్న ర్యాంకుల‌కు ఈ ర్యాంకుకు ఎంతో వ్య‌త్యాసం ఉంది. ఆ వ్య‌త్యాస‌మే గోపాల‌క్రిష్ణ‌ను విద్యార్ధుల‌కు స్ఫూర్తినిచ్చే ఒక ఉన్న‌త‌మైన స్థానంలో కూర్చోబెట్టింది.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com