24.."టైం మిష‌న్"..!

   స‌మ‌యం చాలా అమూల్య‌మైన‌ది, విలువైన‌ది. విలువ‌లో దీనిక‌న్నా గొప్ప‌ది ప్ర‌పంచంలోనే లేదు. వ‌స్తువు విలువ ఎంత ఖ‌రీదైనా కానీయండి ఒకవేళ దాన్ని  పొగొట్టుకుంటే తిరిగి సంపాదించుకోగ‌లం. కానీ వెళ్లిపోయిన స‌మ‌యాన్ని తిరిగి సంపాదించుకోవ‌డం అసాధ్యం. అందుకే స‌మ‌యం విలువ తెలిసిన వాళ్లు గొప్ప‌వాళ్ల‌వుతారు. స‌మ‌యాన్ని వృధా చేసే వాళ్లు అనామ‌కులుగానే జీవితాల‌ను ముగిస్తారు.  విజ‌య శిఖ‌రాల‌కు చేరుకున్న గొప్ప వ్య‌క్తుల‌ను అడిగి చూడండి. స‌మ‌యం కంటే గొప్ప‌ది ఎక్క‌డా లేద‌ని వాళ్లు బ‌ల్ల‌గుద్ది చెపుతారు. విజ‌యానికి, అప‌జ‌యానికి మ‌ధ్య ఒక స్ప‌ష్ట‌మైన తేడా ఉంటుంది. ఈ తేడానే స‌మ‌య పాల‌న‌. ఎవ‌రైతే స‌మ‌యాన్నిస‌రిగా విభ‌జించుకుని క్ర‌మ బ‌ద్ధంగా ప‌నులు చేస్తారో వాళ్లే విజేతలు. స‌మ‌యాన్ని ప్రాధాన్య‌తాంశాల ప‌రంగా విభ‌జించుకోలేక ఎవ‌రైతే చతికిలప‌డ‌తారో వాళ్లే ప‌రాజితులు. 

బిజీ అంటే లైఫ్ గ‌జిబిజి..! 

     "నేను చాలా బిజీ".."నా వ‌ల్ల కాదు".."నాకు అస‌లు అంత స‌మ‌య‌మే లేదు". ఇటీవ‌లి కాలంలో ఎవ‌రి నోటి నుండి విన్నా ఇవే మాట‌లు. అటు విద్యార్ధులు, ఇటు ఉద్యోగులు ఇలా అంద‌రి ఊత‌ప‌దం నేను చాలా బిజీ. ప్ర‌తీ మ‌నిషికి ఉండేది 24 గంట‌లే. అందులో కొంద‌రు విజ‌యం సాధించి గొప్ప‌వాళ్లుగా మారితే మ‌రికొంద‌రు అపజ‌యంతో కుంగిపోతున్నారు. స‌మ‌స్య ఎక్క‌డ‌ ఉంది?  ప్ర‌ఖ్యాత మాన‌సిక శాస్త్ర‌వేత్త‌ బీ.ఎఫ్. స్కిన్న‌ర్ ప‌రిశోధించి తేల్చి చెప్పిన విష‌యం ఏంటంటే నేను చాలా బిజీ అని చెప్ప‌డం ఒక‌ పెద్ద అబద్దం. అలాగే నాకు టైం లేదు అని చెప్ప‌డం అంటే త‌న‌కు ప‌నిచేసే సామ‌ర్ధ్యం లేద‌ని ప‌రోక్షంగా ఒప్పుకోవ‌డ‌మేన‌ని అత‌ను కుండ‌బ‌ద్ద‌లు కొట్టాడు. ఈ విష‌యాల‌ను ఏదో ఆషామాషీగా చెప్ప‌లేదు. చాలా మంది వ్య‌క్తుల‌ మీద ప‌రిశోధ‌న‌లు చేసి తేల్చాడు. బిజీ అని చెపుతున్న వాళ్ల‌లో 80 శాతం మందికి అస‌లు చేయ‌డానికి స‌రైన ప‌నే లేద‌ని స్కిన్న‌ర్ నిరూపించాడు. స‌మ‌య నిర్వ‌హ‌ణ‌కు చాణ‌క్యుడు చెప్పిన విష‌యాలను ఇప్పుడు మ‌న జీవితాల‌కు అన్వ‌యించుకుంటే మంచి ఫ‌లితాల‌ను సాధించ‌వ‌చ్చు. "ఒక రోజులో 25 శాతం భాగాన్ని మ‌న ఆరోగ్యం, ఆహారం కోసం కేటాయించాలి. 50 శాతం స‌మ‌యాన్ని మ‌న వృత్తి ధ‌ర్మానికి కేటాయించాలి. ఇక 10 శాతం స‌మ‌యాన్ని శ్రేయోభిలాషుల‌తో మాట్లాడేందుకు, 5 శాతం స‌మ‌యాన్ని కొత్త ఆలోచ‌న‌ల‌కు, మిగిలిన 10 శాతం స‌మ‌యాన్ని త‌న అభిరుచుల, త‌న ఆనందం కోసం కేటాయించాల‌ని" చాణ‌క్యుడు చెప్పాడు. ఇది పాటిస్తే చాలు మ‌న‌కు స‌మ‌య నిర్వ‌హ‌ణ‌పై ప‌ట్టు చిక్కిన‌ట్టే. 

టైం సెన్స్ లేకుంటే సెన్స్ లెస్ అయిపోతారు!

    ప్ర‌స్తుత పోటీ ప్ర‌పంచంలో అత్యుత్త‌మ పనితీరు క‌న‌బ‌ర్చిన వారే విజేత‌లు. పోటీలో మ‌నం కాస్త వెన‌క‌బ‌డితే మ‌న అవ‌కాశాల‌ను అందిపుచ్చుకునేందుకు, మ‌న‌ల్ని వెనక్కు నెట్టేసి వెళ్లిపోయేందుకు వేలాది మంది రెడీగా ఉంటారు . ఇలాంటి ప‌రిస్థితుల్లో  టైం సెన్స్ లేకుంటే రేస్ లో ఓట‌మి త‌ప్ప‌దు. ల‌క్ష్యం ఉండాలి గురి ఉండాలి, బాణం వేసే నేర్పు ఉండాలి. ఇవ‌న్నీ ఉన్నాయి కాబ‌ట్టే అర్జునుడు విజ‌య‌వంత‌మైన విలుకాడు కాగ‌లిగాడు.  మ‌న విద్యార్ధులు, యువ‌త‌రం ల‌క్ష్యం పెట్టుకుంటున్నారు. కానీ గురి, నేర్పు కూడా ముఖ్య‌మ‌న్న విష‌యాన్ని విస్మ‌రిస్తున్నారు. దీంతో అనుకున్న ల‌క్ష్యాల‌ను సాధించ‌లేక చతికిల‌ప‌డుతున్నారు. ఇలాంటి వారు మ‌న‌కు ప్ర‌తీరోజూ తార‌స‌ప‌డుతూనే ఉంటారు. ఇంట‌ర్వ్యూలో విజ‌యం సాధించేందుకు క‌మ్యూనికేష‌న్స్ స్కిల్స్ నేర్చుకోవాల‌నుకుంటున్న విద్యార్ధి దాన్ని ఎప్పూడూ అమ‌లు చేయ‌డు. ఎందుకు అని అడిగితే ఉద‌యం కాలేజీ, సాయింత్రం స్పెష‌ల్ క్లాసెస్ ఇలా ఒక చిట్టా విప్పుతాడు. అదే విద్యార్ధికి సినిమాలు చూసేందుకు స్నేహితుల‌తో గంట‌ల కొద్దీ మొబైల్ ఛాటింగ్ చేసేందుకు మాత్రం స‌మ‌యం దొరుకుతుంది. అదే ఆ విద్యార్ధి ల‌క్ష్య సాధ‌న‌కు స‌రైన స‌మ‌య ప్ర‌ణాళిక వేసుకుంటే క‌చ్చితంగా క‌మ్యూనికేష‌న్స్ స్కిల్స్ నేర్చుకోవ‌డంలో విజయం సాధించేవాడు. 

ల‌క్ష్యాన్ని ప్రేమించాలి 

    క‌చ్చిత‌మైన ల‌క్ష్యం పెట్టుకుని నిరంతరం దాన్ని సాధించేందుకు ఆలోచిస్తే మ‌న మెద‌డు కూడా అదే ర‌క‌మైన సానుకూల సంకేతాల‌ను ఇస్తుంద‌ని మాన‌సిక శాస్త్ర‌వేత్త‌లు చెపుతున్నారు. మ‌న మెద‌డు ఒక విష‌యాన్ని రెండు ర‌కాలుగా నియ‌త్రించేందుకు ప్ర‌య‌త్నం చేస్తుంది. మ‌నం ల‌క్ష్యం పెట్టుకుని సానుకూలంగా, ప‌ట్టుద‌ల‌గా ఉన్న‌ప్పుడు మన మెద‌డు జ‌ర‌గ‌బోయే ప‌రిణామాల‌కు ఒక రూపం క‌ల్పిస్తుంది. మ‌న‌ల్ని అన్ని విధాలుగా సిద్ధం చేస్తుంది. దీనినే చేత‌న స్థితి అంటారు. ఇక అచేత‌న స్థితిలో మ‌న ల‌క్ష్యం ఉన్నాసీరియ‌స్ నెస్ లేకుంటే మ‌న మెద‌డు కూడా వెంట‌నే సిద్ధ‌మైపోతుంది. నేను బిజీ, నాకు చాలా ప‌నులున్నాయి అని బ‌ద్ధ‌క‌పు మాట‌లు మాట్లాడిస్తుంది. ఇలా సాకులు వెతుక్కోవ‌డం వ‌ల‌న మ‌నం ఎప్ప‌టికీ ల‌క్ష్యాన్ని సాధించ‌డంలో విజయం సాధించ‌లేము. ఇలా అస్త‌మానం నేను బిజీ అని అన‌డాన్ని అవ‌త‌లి వ్య‌క్తులు నిశితంగా గ‌మ‌నిస్తారు. మ‌నం ప‌నిని త‌ప్పించుకోవ‌డానికి ఇలా చెపుతున్నాం అని తెలిస్తే మ‌న‌పై చుల‌క‌న భావం ఏర్పడుతుంది. మ‌న‌ల్ని న‌మ్మ‌డం మానేస్తారు. ఇది దీర్ఘ‌కాలం మ‌న సంబంధాల‌పైనా, మ‌న కెరీర్ పైనా ప్ర‌భావం చూపుతుంది. 

ప‌ని చేయండి..ఫ‌లితం ఆలోచించ‌కండి!

• విద్యార్ధులు ఒక ల‌క్ష్యం ఎంచుకోవాలి. దాని కోసం నిరంత‌రం ఆలోచిస్తూ, శ్ర‌మించాలి. ఫ‌లితం కోసం మాత్రం ఆలోచించొద్దు. అది లక్ష్యాన్ని దెబ్బ‌తీస్తుంది. 
• ఒక టైమ్ టేబుల్ త‌యారు చేసుకొండి. ఏ రోజు చేయాల్సిన ప‌నుల‌ను ఆ రోజు ప్రాధాన్య‌తా క్ర‌మంలో విభజించుకోండి. ముఖ్య‌మైన ప‌నుల‌ను వెంట‌నే చేసేయండి. స‌మ‌యం వృధా చేసే ప‌నుల‌ను వ‌దిలేయండి. 
• అంద‌రి ద‌గ్గ‌ర మెప్పు పొందాల‌ని ప్ర‌తీ దానికీ ఎస్ అని చెప్ప‌కండి. ఇది మీ స‌మ‌యాన్ని వృధా చేస్తుంది అలాగే మీ పనితీరును ప్ర‌భావితం చేస్తుంది. కొన్ని చేయ‌లేని ప‌నుల‌కు నో చెప్ప‌డం నేర్చుకొండి. 
• ఆత్మీయుల‌తో ఫోన్ మాట్లాడ‌టం, ఈమెయిళ్లు చూడ‌టం, ఛాటింగ్ చేయ‌డం ఇలాంటి ప‌నుల‌కు ఒక ప్ర‌త్యేకమైన స‌మ‌యం కేటాయిస్తే దాదాపు ఎన‌భై శాతం స‌మ‌యాన్ని ఆదా చేయ‌వ‌చ్చ‌ని నిపుణులు చెపుతున్నారు. 
• బిజీగా ఉన్నాన‌ని చెప్పేముందు ఒకసారి పూర్తిగా ఆత్మ పరిశీల‌న చేసుకోవాలి. అంత‌గా ఫ‌లితాలను ఇవ్వ‌ని ప‌నుల‌ను వ‌దిలించుకోవ‌డ‌మే ఉత్త‌మ‌మైన మార్గం. 
• ఎక్కువ ప‌నులను నెత్తిన పెట్టుకోకుండా ప్రాధాన్య‌త ఉన్న‌వాటినే ఎంచుకుని వాటిపైనే ఎక్కువ శ్ర‌ద్ధ పెట్టి ఫ‌లితం సాధించాలి. 

బిజీ సిండ్రోమ్ బారిన ప‌డ‌కండి 

   విద్యార్ధి అయినా ఉద్యోగి అయినా ముందుగా త‌న సామ‌ర్ధ్యంపై త‌న‌కు ఒక అంచనా ఉండాలి.  చేస్తున్న ప‌నిపై ల‌క్ష్యంపై స్ప‌ష్ట‌త ఉండాలి. అలా కాకుండా స‌మ‌యం నిర్వ‌హ‌ణను చేసుకోలేక నేను చాలా బిజీ, నాకు తీరిక లేదు అంటే అది త‌ప్పించుకు తిరిగే మ‌న‌స్త‌త్వానికి బీజం వేస్తుంది. చేస్తున్న ప‌నిపై ఆస‌క్తి లేక‌పోవ‌డం, ఆత్మ‌న్యూన‌త‌, బ‌ద్ధ‌కం, స‌మ‌య నిర్వ‌హ‌ణ చేసులేక‌పోవ‌డం వంటి ప్ర‌తికూల‌త‌లు బిజీ సిండ్రోల్ వ్య‌క్తుల‌ను త‌యారు చేస్తాయి.  స‌రిగ్గా స‌మ‌యాన్ని విభజించుకుంటే ఎన్ని ప‌నులు చేసినా ఇంకా స‌మ‌యం మిగిలే ఉంటుంది. అదే విధంగా చేసే ప‌ని ప‌ట్ల అంకిత భావం ఉంటే అందులో ఆనందం దొరుకుతుంది. ఇక బిజీ అన్న మాటే వినిపించ‌దు. స‌మ‌య నిర్వ‌హ‌ణ‌, పాజిటివ్ ఆలోచ‌న‌లు, మంచి వ్య‌క్తిత్వం ఇవే విద్యార్ధుల‌ను త‌మ కెరీర్ లో ఉన్న‌త స్థితిలో నిల‌బెడ‌తాయి. కాబట్టి ఈరోజు నుంచి మీ డిక్ష‌నరీ లోంచి నేను బిజీ అనే ప‌దాన్ని తీసేయండి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com