మంచి చేసే చెడు..'స‌క్సెస్ హాలిజం'!!

        అస‌లు గెలుపంటే ఏమిటి?  రాతి యుగం నుంచి రాకెట్ యుగం వ‌ర‌కూ ఈ ప్ర‌శ్న‌కు స‌రైన స‌మాధానమే లేదు. దేన్ని అయినా గెలుపు అనుకుంటే ఆ ప్ర‌యాణం అక్క‌డితో ముగిసిపోయిన‌ట్టే. అలా అని గెలుపు కోసం ప‌రిగెడుతూనే పోతే చివ‌రికి వెనుతిరిగి చూసుకుంటే అసంతృప్తి, అభ‌ద్ర‌త‌ వెక్కిరిస్తూ క‌నిపిస్తాయి. 'వ‌ర్క్ హాలిజం' అనే  ప‌దం మీరు వినే ఉంటారు.ఎప్పుడూ ఏదో ఒక పని చేసుకుంటూ ఆ పనిలోనే ఆనందాన్ని పొంద‌డం 'వ‌ర్క్ హాలిజం'. ఇది మంచిదే. అయితే ఇప్ప‌డు 'వ‌ర్క్ హాలిజం' కాస్తా 'స‌క్సెస్ హాలిజం'గా మారిపోయింది. 'స‌క్సెస్ హాలిజం' అంటే ఎప్పుడూ ఏదో ఒక విజయాన్ని సాధించుకోవ‌డాన్ని ప‌నిగా పెట్టుకోవ‌డం. మ‌నం ఆనందంగా ఉంటేనే ఏ ప‌నిని అయినా స‌మ‌ర్ధ‌వంతంగా ప‌నిచేయ‌గ‌లం. కానీ స‌క్సెస్ హాలిజం వ‌ల‌న ఏదైనా సాధిస్తేనే ఆనందంగా ఉండ‌గ‌లుగుతున్నారు. దీని వ‌ల‌న సాధించిన విజయాన్ని పూర్తిగా ఆస్వాదించ‌కుండానే మ‌రో కొత్త ప‌నిని నెత్తిన పెట్టుకుంటున్నారు. దీంతో స‌క్సెస్ హాలిజం కాస్తా ఆనందాన్ని హ‌రించే మాన‌సిక స‌మ‌స్య‌గా మారుతోంది. 

ఎప్ప‌టికీ ఆగ‌ని ప‌రుగుతో ప‌రేషాన్! 

      స‌క్సెస్ హాలిజం అనేది ఇప్పుడు యువ‌త‌కు స‌మ‌స్య‌గా మారుతోంది. చాలా మంది యువ‌కులు చేస్తున్న ప‌నిలో స‌క్సెస్ ను అన్వేషిస్తూ, ప‌రిత‌పిస్తూ ప‌నిచేస్తున్నారు. తీరా స‌క్సెస్ వ‌చ్చాక ఆ ఆనందాన్ని అనుభ‌వించ‌కుండానే కొత్త ప‌నిని నెత్తిపై వేసుకుంటున్నారు. ఇలా ఈ స‌క్సెస్ ప‌రుగుకు అంతూ పొంతూ లేకుండా పోతోంది. దీని వ‌ల‌న త‌ర్వాత వ‌చ్చే స‌క్సెస్ తో ఆనందాన్ని అనుభ‌విద్దామ‌నుకునుకున్నా స‌క్సెస్ హాలిజంతో బాధ‌ప‌డుతున్న వాళ్లు ఆ ప‌ని చేయ‌లేక‌పోతున్నారు.  ప‌రిస్థితి ఇలానే కొన‌సాగ‌డం వ‌ల‌న కొద్ది రోజుల త‌ర్వాత జీవితంపై ఆస‌క్తి కోల్పోయి ప‌ని సామ‌ర్ధ్యం తీవ్రంగా మంద‌గించే ప్ర‌మాదముంది. 

'స‌క్సెస్ హాలిజం' కు ప్రొత్సాహం ఎక్కువ‌! 

     ప‌రిమితికి మించి ప‌నిచేస్తానంటే ఏం సంస్థ అయినా వ‌ద్దంటుందా? త‌న పూర్తి సామ‌ర్ధ్యాన్ని వినియోగిస్తూ కంపెనీకి మేలు చేసే ఉద్యోగికి మ‌రిన్ని ప్రోత్సాహ‌కాలు, ప్ర‌మోష‌న్ల‌ను ప్ర‌క‌టిస్తుంది. మ‌రోవైపు సాటి కోలీగ్స్, ఫ్రెండ్స్ ఇలా అంతా స‌పోర్ట్ చేయ‌డంతో స‌క్సెస్ హాలిజం ఉన్న‌వాళ్లు మ‌రింత విజ‌యవంతంగా ప‌నిచేయాల‌నుకుంటారు. వీరికి అన్నివైపుల నుంచి ప్ర‌శంస‌లు, ప్రోత్సాహ‌కాలు ల‌భిస్తుండ‌టంతో త‌మ‌ను ప‌ట్టి పీడిస్తున్న స‌మ‌స్య‌త‌ను వీళ్లు గుర్తించే అవ‌కాశం కూడా ఉండ‌దు. ఆనందాన్ని అనుభ‌వించ‌కుండా కొద్ది కాలానికి జీవితం నిస్సారంగా మారిన‌ప్పుడు మాత్రమే వీళ్లు జ‌రిగిపోయిన న‌ష్టాన్ని గుర్తిస్తారు దీని వ‌ల‌న అన్ని ఘ‌న‌తలు సాధించి సంతృప్తిగా ఉండ‌వ‌ల్సిన ప‌రిస్థితుల్లో స‌క్సెస్ హాలిజం ఉన్న‌వాళ్లు అసంతృప్తిని మూట‌గ‌ట్టుకుంటారు. 

ధీర్ఘకాలంలో ఆరోగ్యం హుష్ కాకి! 

       మ‌న ఒక ప‌నిని విజ‌యవంతం చేసిన‌ప్పుడు థ్రిల్ క‌లిగి మెద‌డు మ‌న శ‌రీరానికి సానుకూల సంకేతాలు పంపుతుంది. దీని వ‌ల‌న మ‌న‌కు మేలు చేసే ర‌సాయ‌నాలు విడుద‌ల‌వుతాయి. అయితే ఇక్క‌డ వ‌ర‌కూ బాగానే ఉంది. కానీ ఆ విజ‌యాన్ని పూర్తిగా అనుభ‌వించ‌కుండా ఆ మెద‌డుపై కొత్త ప‌నిని చేయాల‌న్న ఒక ఒత్తిడిని రుద్దితే, సాధించిన విజ‌యాల‌ను ఆస్వాదించే గుణాన్ని కోల్పోతాం. ఇదే ఇప్పుడు స‌మ‌స్య‌గా మారింది.చుట్టు ఉన్న ప్ర‌పంచాన్ని మ‌ర్చిపోయి అప్పటివ‌ర‌కూ వ‌చ్చిన విజ‌యాల‌ను కూడా సెల‌బ్రేట్ చేసుకోవ‌డం మ‌ర్చిపోయి స‌క్సెస్ కోం వెంప‌ర్లాడే స‌క్సెస్ హాలిజంతో ఆరోగ్యం చెడిపోవ‌డమే కాదు చుట్టు బంధాలు కూడా దూర‌మ‌వుతాయి. ఎవ‌ర్నీ ప‌ట్టించుకోకుండా నిరంత‌రం వ‌ర్క్ లో మునిగిపోవ‌డం బంధాల‌ను బీట‌లు వారేలా చేస్తుంది. 

'స‌క్సెస్ హాలిజం'ను ఇలా ఎదుర్కోండి! 

1. ఒక స‌క్సెస్ వ‌చ్చాక బ్రేక్ తీసుకుని బాగా రిలాక్స్ అయ్యాకే కొత్త ప‌నిని ప్రారంభించాలి. 

2. స‌క్సెస్ ను స్నేహితుల‌తో, స‌న్నిహితుల‌తో సెల‌బ్రేట్ చేసుకోవాలి. 

3. వృత్తి, వ్య‌క్తిగ‌త జీవితాల‌ను ప్రాధాన్య‌త‌ల ప‌రంగా విభజించుకుని దేనికివ్వాల్సిన ప్ర‌యాటిరీ దానికి ఇవ్వాలి. 

4. చేస్తున్న ప‌ని మీద మ‌నసును ఫోక‌స్ చేయ‌డానికి టైమ‌ర్ పెట్టుకుని ప‌నిచేయాలి. అప్ప‌టివ‌ర‌కూ సెల్ ఫోన్ ను సైలెంట్ లో పెట్టుకుంటే కాస్త ఫ‌లితం ఉంటుంది. 

5. ఒకేసారి ఒకే ప‌నిని టేక‌ప్ చేసి దానిపై పూర్తిగా మ‌న‌సు పెట్టి విజ‌యవంతం చేయాలి. అది పూర్తయిన త‌ర్వాతే కొత్త ప్రాజెక్ట్ ను చేప‌ట్టాలి.  

'కెరీర్ టైమ్స్' 175 ఆర్టిక‌ల్స్ ప‌బ్లిష్ చేసిన‌ సంద‌ర్భంగా ఆత్మీయ వేడుక‌

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                   You can send your Educational related articles to  careertimes.online1@gmail.com