దెయ్యాల కొంపలో భూతాల 'గీతం'!

      '90 ఏళ్ల ఘ‌న చ‌రిత్ర‌'..'ల‌క్ష‌లాది ప‌రిశోధ‌న‌ల‌కు ప‌ట్టుగొమ్మ‌', 'ఎంద‌రో శాస్త్ర‌వేత్త‌లకు చిరునామా'...ఆంధ్ర విశ్వ క‌ళా ప‌రిష‌త్ కోసం ఈ మూడు మాట‌లే కాదు 30 వేల మాట‌లు కూడా స‌రిపోవు. ఆంధ్రా యూనివ‌ర్సిటీగా ప్ర‌సిద్ధి గాంచిన ఈ విశ్వ‌విద్యాల‌యం దేశంలోనే అతి పురాత‌న‌మైన ఇంజినీరింగ్ క‌ళాశాల‌ల్లో ఒక‌టి. స‌ర్ సీ.ఆర్.రెడ్డి , డాక్ట‌ర్ స‌ర్వేప‌ల్లి రాధాకృష్ణ వంటి మ‌హానుభావుల ఆద్వ‌ర్వంలో త‌న ప్ర‌స్థానం ప్రారంభించిన ఆంధ్రా యూనివ‌ర్సిటీ దేశానికి ఎంద‌రో మేథావులను అందించింది. అయితే ఇంత‌టి ఘ‌న చరిత్ర ఉన్న ఏయూ ఇప్పుడు దెయ్యాల కొంప‌గా మారిపోయిందట‌! అదేంటి అని ఆశ్చ‌ర్య‌పోతున్నారా? అవును ఏయూ దెయ్యాల కొంపగా మారిపోయిందని చెప్పింది సామాన్య‌మైన వ్యక్తి కాదు. ఆంధ్రా యూనివ‌ర్సిటీ కొలువై ఉన్న విశాఖ‌ప‌ట్నానికి గ‌తంలో ఎంపీగా ప‌నిచేసి, ప్ర‌స్తుం ఎమ్మెల్సీగా ఉన్న తెలుగుదేశం నాయ‌కుడు ఎంవీవీఎస్ మూర్తి గారు. అయితే మూర్తి గారి దెయ్యం క‌థ‌లో ఎన్నో మ‌లుపులు మరెన్నో వ్యాపార విరుపులు ఉన్నాయి. ఏయూలో మూర్తిగారికి క‌నిపించిన దెయ్యాలు, త‌న సొంత యూనివ‌ర్సిటీ గీతంలో మాత్రం క‌నిపించడం లేద‌ట‌. ప‌్ర‌తిష్మాత్మ‌క ప్ర‌భుత్వ విద్యా సంస్థ‌ల‌ను సైతం అవ‌మానించి, హేళ‌న చేసి త‌మ వ్యాపారాన్ని పెంచుకునే ఈ బ‌రితెగింపు వ్య‌వ‌హారం, మ‌న వ్య‌వ‌స్థ‌లోని లోపాల‌ను మ‌రోసారి క‌ళ్ల‌కు క‌ట్టింది.

వ్యాపారం కోసం ఏమైనా చేస్తారు!

       విద్యా వ్యాపారం ఏపీ లో జ‌రిగినంత లాభ‌సాటిగా దేశంలో మ‌రెక్క‌డా జ‌ర‌గ‌దు. ఈ లాభ‌సాటి వ్యాపారాన్ని దృష్టిలో పెట్టుకునే ప్ర‌యివేట్ విద్యా సంస్థ‌లు త‌మ వ్యాపార విస్త‌ర‌ణ ప్రణాళిక‌ల్లో భాగంగా ప్ర‌భుత్వ విద్యా సంస్థ‌ల్ని భ్ర‌ష్టు ప‌ట్టించడం అనే ఒక బృహ‌త్త‌ర కార్యాన్ని చేప‌డుతున్నాయి. గ‌ట్టిగా చెప్పాలంటే ఒక ముఠాగా ఏర్ప‌డి ఒక ప‌ద్ధ‌తి ప్ర‌కారం ప్ర‌భుత్వ విద్యా సంస్థ‌ల్ని నిర్వీర్యం చేస్తూ ఉన్నారు. ప్ర‌స్తుతం ఏపీలో  ప్ర‌యివేట్ యూనివ‌ర్సిటీలుగా కార్య‌క‌లాపాలు నిర్వ‌హిస్తున్న‌ కొన్ని సంస్థలు విద్యను కేవ‌లం వ్యాపారం కోణంలోనే చూస్తున్నాయి. ఎంసెట్ ప‌రీక్ష పూర్త‌య్యాక అడ్మిష‌న్స్ కు వెంట‌నే కౌన్సిలింగ్ జ‌ర‌గ‌కుండా వీరు త‌మ రాజ‌కీయ ప‌ర‌ప‌తిని ఉప‌యోగిస్తారు. కౌన్సిలింగ్ ను ఎంత వీలైతే అంత ఆల‌స్యం అయ్యేలా చేస్తారు.  ఫ‌లితాలు వ‌చ్చాక విద్యార్ధి ఎక్క‌డ జాయిన్ కావాలి? ఏం కోర్సు తీసుకోవాలి? అని మ‌థ‌న ప‌డుతున్న టైంలో వీళ్లు ప్ర‌చారం ముమ్మ‌రం చేస్తారు. దీంతో పిల్ల‌లంద‌రూ ప్ర‌భుత్వ కౌన్సిలింగ్ సంగ‌తిని మ‌ర్చిపోయి ఆస్తులు అమ్ముకుని ల‌క్ష‌లాది రూపాయ‌ల‌ను క‌ట్టి వీళ్ల యూనివ‌ర్సిటీల్లో జాయిన్ అవుతారు. ఇది ఒక ప్ర‌ణాళికాబ‌ద్ధంగా, ప్ర‌భుత్వ విద్యా సంస్థ‌ల‌ను దెబ్బ‌తీసి వారి వ్యాపారాన్ని పెంచుకునే ఎత్తుగ‌డ‌,వ్యాపార సామ్రాజ్యాన్ని విస్త‌రించుకునే ప్ర‌ణాళిక.

వ్యాపార‌స్తుల‌కు త‌మ ప్ర‌త్య‌ర్ధులు దెయ్యాలుగానే క‌నిపిస్తారు!

      ఏదైనా ఒక రాజ‌కీయ పార్టీ వ‌ల‌న 100 ఏళ్ల ఘ‌న చ‌రిత్ర క‌లిగిన ఆంధ్రా యూనివ‌ర్సిటీకి ప్ర‌తిష్ఠ పెరుగుతుందా? కానీ కొందరు నాయకులు ఇలానే తలపొగరు వ్యాఖ్యానాలు చేస్తున్నారు. విశ్వ‌విద్యాల‌యాలు దేవాల‌యాల‌తో స‌మానం. అటువంటి విద్యాల‌యాల‌ను రాజ‌కీయ అవ‌స‌రాల‌కు వాడుకోవ‌డ‌మే కాకుండా అవ‌మానించి మాట్లాడ‌టం కొందరి సంస్కారాన్ని, జ్ఞానాన్ని బ‌య‌ట‌పెడుతోంది. గ‌తంలో ఆంధ్రా యూనివ‌ర్సిటీకి భూముల క‌బ్జాలోనూ, విద్యార్ధి సంఘాల గొడ‌వ‌ల్లోనూ కొందరి రాజకీయ నాయకులు పాత్రపై విమ‌ర్శ‌లొచ్చాయి. కొందరు తమ ప్రయివేట్ విద్యా సంస్థల వ్యాపారాన్ని పెంచుకునేందుకు  తొలి నుంచీ ఆంధ్రా యూనివ‌ర్సిటీని భ్ర‌ష్టు ప‌ట్టించేందుకు ప్ర‌య‌త్నిస్తున్నార‌ని ఆరోప‌ణ‌లున్నాయి. ఎందుకంటే ప్ర‌భుత్వ యూనివ‌ర్సిటీలు ప‌త‌నమైతే ప్ర‌యివేట్ యూనివ‌ర్సిటీల‌కు వ్యాపారం పెరుగుతుంది క‌దా? ప‌్ర‌భుత్వ కౌన్సిలింగ్ లో ఒక ఇంజినీరింగ్ సీటు రూ.35 వేలకు దొరుకుతుంది. అదే ప్ర‌యివేట్ యూనివ‌ర్సిటీల్లో అయితే రెండున్న‌ర ల‌క్ష‌లు స‌మ‌ర్పించుకోవాల్సిందే.  ఈ విధంగా ప్ర‌భుత్వ వ్య‌వ‌స్థ‌ను ఛిన్నాభిన్నం చేసి పేద‌వాడు చ‌దువుకోకుండా నాశ‌న‌మ‌వ్వాలి అని కోరుకునే వాళ్ల‌కి ఆంధ్రా యూనివ‌ర్సిటీ దెయ్యాల కొంప‌గా కాక మ‌రెలా క‌నిపిస్తుంది.

మ‌రేదో కొంప అన‌క‌ముందే మేల్కోవాలి!

        'కెరీర్ టైమ్స్' ఇప్ప‌టి వ‌ర‌కూ విద్యార్ధులు స‌మ‌స్య‌లు, విద్యా వ్య‌వ‌స్థ‌లోని లోపాలు, కెరీర్ ఇలాంటి విష‌యాల‌నే చెపుతూ వ‌స్తోంది. కానీ ఒక ప్ర‌తిష్టాత్మ‌క సంస్థ ఔన్న‌త్యాన్ని, ప్ర‌తిష్ఠ‌ను, వ్యాపారం కోసం మంట‌గ‌లప‌డాన్ని భ‌రించ‌లేక దాన్ని యువ‌త‌రానికి తెలియ‌జేయాల‌నే ఉద్దేశ్యంలో ఈ విష‌యంపై స్పందిస్తోంది. ప్ర‌భుత్వాలు ఇప్ప‌టికైనా క‌ళ్లు తెరిచి విశ్వ‌విద్యాల‌యాల గౌర‌వాన్ని కాపాడి, వాటి అభివృద్ధికి చ‌ర్య‌లు తీసుకోవాలి. దీనిపై విద్యార్ధులు కూడా వాస్త‌వ పరిస్థితుల‌ను అవ‌గాహ‌న చేసుకుని విశ్వ‌విద్యాల‌యాల‌ను అంత‌ర్జాతీయ ప్ర‌మాణాల‌కు అనుగుణంగా తీర్చిదిద్దే చ‌ర్య‌ల‌కు స‌హ‌కారం అందించాలి. గ‌తంలో ఏయూ వైస్ ఛాన్సెల‌ర్ గా ప‌నిచేసిన సింహాద్రి , యూనివ‌ర్సిటీని ఐఐటీ స్థాయికి తీసుకెళ్లేందుకు ప్ర‌ణాళిక వేసారు. దాని కోసం కొన్ని సంస్క‌ర‌ణ‌ల‌కు తెర‌తీసారు. అయితే ఇది త‌ట్టుకోలేని శ‌క్తులు ఆ మార్పును అంగీక‌రించ‌లేక‌పోయాయి. కొన్ని ప్ర‌యివేట్ విద్యా సంస్థ‌లే అప్పుడే తెర వెనుక ఆందోళ‌న‌ల‌ను న‌డిపించి సింహాద్రి ప్ర‌య‌త్నాల‌ను అడ్డుకున్నార‌నే విమ‌ర్శులు కూడా ఉన్నాయి. పేద‌ల‌కు విద్య అందుబాటులోకి రావాలంటే, నాణ్య‌మైన విద్య నేర్చుకోవాలంటే యూనివ‌ర్సిటీల‌ను కాపాడుకోవాలి. ఈ విష‌యంలో విద్యార్ధుల సంఘ‌టితంగా నిల‌బ‌డి వ్యాపార‌స్తుల కుయుక్తుల‌ను అడ్డుకున్న‌ప్పుడే ఇది సాధ్య‌మ‌వుతుంది.

రాజ‌కీయ జోక్యం పోవాలి!

        ఆంధ్రా యూనివ‌ర్సిటీ ఎంద‌రో మేధావుల‌ను, శాస్త్ర‌వేత్త‌ల‌ను అందించిన స‌రస్వ‌తీ నిల‌యం. అలాంటి స‌రస్వ‌తీ నిల‌యాన్ని దెయ్యాల కొంప‌గా మార్చే స్వార్ధాన్ని విద్యార్ధులు స‌మ‌ష్టిగా అడ్డుకోవాలి. ముఖ్యంగా విశ్వ‌విద్యాల‌యాల్లో రాజ‌కీయ జోక్యాన్ని నిరోధించిన‌ప్పుడే ఇది సాధ్య‌మ‌వుతుంది. ఇటీవ‌లే ఉస్మానియా యూనివ‌ర్సిటీ శ‌తాబ్ది ఉత్సావాల‌ను ఘ‌నంగా జ‌రుపుకొంది. ఏయూ కూడా ఉస్మానియా అంత‌టి ఘ‌నచ‌రిత్ర క‌లిగిన యూనివ‌ర్సిటీయే. కానీ పాల‌కుల నిర్ల‌క్ష్యం, అతి జోక్యం వ‌ల‌న కొన్ని విష‌యాల్లో ఇంకా వెనుక‌బ‌డి ఉంది. ఎందుకంటే ఏపీలో కొన్ని ప్ర‌యివేట్ రాజ‌కీయ శ‌క్తులు ఏయూని అడ్డ‌గించి త‌మ వ్యాపారాన్ని విస్త‌రించుకోవాల‌ని భావించ‌డ‌మే ఇందుకు కార‌ణం. ఎందుకంటే వాళ్ల యూనివ‌ర్సిటీలు రాజ‌భ‌వ‌నాలుగా వెలిగిపోవాలంటే ఆంధ్రా యూనివ‌ర్సిటీ దెయ్యాల కొంప‌గా మారిపోవాలి క‌దా!

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com