మాల్యాకో లెక్క...మాకో లెక్కా??

      కొన్ని 'అనాలోచిత' నిర్ణ‌యాలు మొత్తం వ్య‌వ‌స్థ‌నే ఇబ్బందుల్లో ప‌డేస్తాయి. మ‌రికొన్ని దుందుడుకు చ‌ర్య‌ల‌కు అమాయ‌కులు బ‌ల‌వుతారు. ఇప్పుడు మ‌నం చెప్పుకున్న ఈ రెండు విష‌యాలు సెంట్ర‌ల్ బోర్డ్ ఆఫ్ సెకండ‌రీ ఎడ్యుకేష‌న్ (సీబీఎస్ఈ)  తాజా పరిస్థితికి అతికిన‌ట్టు సరిపోతాయి. విద్యా వ్యవస్థలో విప్లవాత్మక మార్పులు చేపడాతమని చెపుతున్న సీబీఎస్ఈ , ఇటీవలి కాలంలో తీసుకుంటున్న కొన్ని నిర్ణయాలు వాస్తవ పరిస్థితికి విరుద్ధంగా ఉంటున్నాయి. అలాంటి ఓ నిర్ణయమే గ్రేస్ మార్కుల తొలిగింపు. గ్రేస్ మార్కుల వలన ప్రతిభావంతులకు అన్యాయం జరుగుతుందని ఆందోళనపడుతున్న సీబీఎస్ఈ, సామాన్య విద్యార్ధిని గాలికొదిలేసింది. సౌకర్యాల లేమితో ఆర్థిక, సామాజిక పరిస్థితులు అనుకూలించకపోయినా చదువుకునేందుకు పోరాటం చేస్తున్న విద్యార్ధులకు గ్రేస్ మార్కుల తొలిగింపు పెద్ద దెబ్బే. ఒక విద్యార్ధికి టెన్త్ అనేది ఒక టర్నింగ్ పాయింట్  లాంటిది. అటువంటి కీలక మలుపులో అతన్ని ఆపేస్తే అతని భవిష్యత్ ఏం కావాలి? వేలాది కోట్లు రుణాలు తీసుకుని ఎగ్గొట్టిన విజయ్ మాల్యా లాంటి వ్యాపారవేత్తలకు మినహాయింపులు ఇస్తున్నారు. అలాంటి దేశ భవిష్యత్ ఆశా కిరణాలైన విద్యార్ధులను ప్రొత్సహించేందుకు గ్రేస్ మార్కులు ఇస్తే తప్పేంటి? 

గ్రేస్ మార్కులు క‌థా క‌మామిషు! 

      సీబీఎస్ఈ నిర్వ‌హిస్తున్న టెన్త్, ఇంట‌ర్మీడియ‌ట్ ప‌రీక్ష‌లో గ‌డిచిన కొన్నాళ్లుగా గ్రేస్ మార్కుల విధానాన్ని అమ‌లు చేస్తున్నారు. దీని ప్ర‌కారం విద్యార్ధులు సంక్లిష్ట‌మైన ప్ర‌శ్న‌ల‌ను ఎదుర్కొన్న‌ప్పుడు వాళ్ల‌కు అన్యాయం జ‌ర‌గ‌కుండా ఉండేందుకు వారికి అద‌నంగా కొన్ని మార్కులు ఇస్తున్నారు. అయితే ఇటీవ‌ల కాలంలో గ్రేస్ మార్కుల‌పై కొన్ని విమ‌ర్శలు చెల‌రేగాయి. ఇలా మార్కులు ఇవ్వడం వ‌ల‌న నిజ‌మైన ప్ర‌తిభావంతులు న‌ష్ట‌పోతున్నార‌ని కొంద‌రు వాదిస్తున్నారు. ముఖ్యంగా ఇంట‌ర్, డిగ్రీ ప్ర‌వేశాల స‌మ‌యంలో కొన్ని స‌మ‌స్య‌లు త‌లెత్తుతున్నాయ‌ని చెపుతున్నారు . దీంతో ఈ విద్యా సంవ‌త్స‌రం నుంచి గ్రేస్ మార్కుల విధానాన్ని తొలిగిస్తున్న‌ట్టు సీబీఎస్ఈ ప్ర‌క‌టించింది. అయితే అనూహ్యంగా సీబీఎస్ఈకి ఢిల్లీ హైకోర్టు రూపంలో ఎదురుదెబ్బ త‌గిలింది. సీబీఎస్ఈ నిర్ణ‌యం వెలువ‌రించే నాటికే టెన్త్, ఇంట‌ర్ విద్యార్ధులు ప‌రీక్ష రాసినందున ఈ ఏడాది కూడా గ్రేస్ మార్కుల విధానాన్ని కొన‌సాగించాలని ఢిల్లీ హైకోర్టు సీబీఎస్ఈ ని ఆదేశించింది.

సామాన్య విద్యార్ధిని గాలికొదిలేస్తారా? 

    ఒక కోర్సు చదవడానికి ఆ కోర్సు పూర్తయ్యాక పరీక్ష రాయడానికి మధ్య విభిన్న విషయాలు ప్రముఖ పాత్ర వహిస్తాయి.  తరగతి గదిలో నేర్చుకున్న విషయాన్ని పేపర్ పై ప్రజంట్ చేసేటప్పుడు విద్యార్ధి మానసిక, ఆర్థిక, సామాజిక, కుటుంబ పరిస్థితులు ఇవన్నీ ప్రభావం చూపుతాయి.  35 మార్కులు వస్తేనే పరీక్ష పాస్ అయినట్టు, 50 మార్కులు వస్తే సెకండ్ క్లాస్, 60 మార్కులు వస్తే ఫస్ట్ క్లాస్ అని విభజించడం మంచిదే. ఎందుకంటే ఇది విద్యార్ధిలో పోటీతత్వాన్ని పెంచుతుంది. కానీ ఇక్కడ ఒక ముఖ్యమైన విషయాన్ని విస్మరిస్తున్నారు.  విద్యార్ధి నేర్చుకున్న విషయాల్లో పరీక్ష పెడుతున్నారా? లేక సిలబస్ మొత్తం పరీక్ష పెడుతున్నారా? విద్యార్ధుల్లో విభిన్న రకాలు ఉంటారు. కఠినమైన ప్రశ్నల్ని ఎదుర్కొనే వారు, సులభమైన ప్రశ్నల్ని ఎదుర్కొనే వారు.అతికఠిన మైన ప్రశ్నల్ని ఎదుర్కొనే వారు. ఈ విభిన్న రకాల విద్యార్ధుల్లో ఎవరికీ అన్యాయం జరగకూడదనే గ్రేస్ మార్కులు విధానాన్ని ప్రవేశపెట్టారు. గతంలో అప్పటి ముఖ్యమంత్రి చెన్నారెడ్డి హయాంలో కూడా ఉమ్మడి ఆంధ్రప్రదేశ్ లో గ్రేస్ మార్కుల వ్యవస్థను ప్రవేశపెట్టారు. ఇప్పుడు సీబీఎస్ఈ కూడా ఇదే విధమైన పద్ధతిని అమలు చేస్తూ వస్తోంది. కానీ వసతులు పెంచకుండా, నాణ్యత పెంచకుండా ఇప్పుడు  గ్రేస్ మార్కులు తొలిగిస్తామని చెప్పడం సీబీఎస్ఈ పనితీరును ప్రశ్నించేలా చేస్తోంది. 

ఆ 'మలుపు'లో అతన్ని వదిలేయకండి! 

        ఒక విద్యార్ధికి పదో, పన్నెండో తరగతి అనేది అతని కెరీర్ కు టర్నింగ్ పాయింట్ లాంటిది. అటువంటి కీలక మలుపు లో అతన్ని నిరుత్సాహపరిచి, ఆటంకాలు సృష్టిస్తే అతని భవిష్యత్ ఏమవుతుంది?  ఆ మలుపులో కూర్చుని ఏం చేయాలో తెలియక సంఘ వ్యతిరేక శక్తిగా తయారైతే లేక వేరే విధంగా తయారైతే దానికి ఎవరు భాధ్యత వహిస్తారు? ఇలాంటి విపరిణామాలు జరగకూడదంటే  వాళ్లను ప్రోత్సహించి వాళ్లు ముందుకు వెళ్లేలా చూడాలి. దీని వలన వాళ్లలో ఉత్తేజం పెరిగి ఎదైనా సాధించాలన్న పట్టుదల పెరుగుతుంది. విద్యార్ధుల భవిష్యత్ , ఆర్థిక , సామాజిక స్థితిగతులు ఆధారంగా చూస్తే గ్రేస్ మార్కులు ఇవ్వడం అనేది తప్పనిసరి. గతంలో మన ఉమ్మడి రాష్ట్రంలో ఇంటర్ లో నాలుగు సబ్జెక్ట్ లో పాస్ అయి ఒక సబ్జెక్ట్ లో ఫెయిల్ అయితే ఆ విద్యార్ధిని అన్ని సబ్జెక్ట్ లలో పాస్ చేసేవారు. ఏదైనా ఒక నిబంధనను ఎందుకు పెడతారు? ఎటువంటి పొరపాట్లు జరగకుండా  అందరూ సక్రమమైన మార్గంలో వెళ్లాలనే కదా? అసలు  ఆ మార్గంలోకే వెళ్లకుండా దారులు మూసేస్తే ఎలా?

విద్య అందరికీ..కొందరికే కాదు!

    విభిన్న సామాజిక పరిస్థితులు ఉన్న మన దేశంలో భిన్న వర్గాలు విద్యార్ధులు ఉంటారు. ఇందులో ఉన్నత వర్గాల విద్యార్థులు మంచి సదుపాయాలు, మంచి ఆహారం ఉండటం బాగా చదువగలుగుతాడు. అదే ఒక పేద విద్యార్ధి అతనితో సమానంగా చదవలేకపోవచ్చు. దానికి మంచి పౌష్టికాహారం, సదుపాయాలు ఇలా ఎన్నో కారణాలు ఉంటాయి. ఈ విషయాలను పరిగణనలోకి తీసుకునే సంక్లిష్టమైన ప్రశ్నాపత్రం వచ్చినప్పుడు కొన్ని మినహాంపులు ఇచ్చి అందరికీ గ్రేసు మార్కులు ఇస్తున్నారు. ఇప్పుడు దాన్ని కూడా తొలిగిస్తామంటే ఉన్నత వర్గ విద్యార్ధితో పేద విద్యార్ధి ఎలా పోటీపడగలుగుతాడు. ఏది ఏమైనా గ్రేస్ మార్కులు తొలిగిస్తామని సీబీఎస్ఈ నిర్ణయిస్తే దానిని ఎవరూ అడ్డగించలేరు. కానీ అంతకంటే ముందుగా విద్యా వ్యవస్థలో నాణ్యతను పెంచి ప్రమాణాలు పెంచి ఇలాంటి విప్లవాత్మక మార్పులు చేస్తే ఎవరైనా హర్షిస్తారు. లేకుంటే మీరు తీసుకున్న నిర్ణయాలు వ్యవస్థలో వైరుధ్యాలను మరింత పెంచడం ఖాయం. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com