తల్లిదండ్రులు పోరాడాల్సింది ఫీజులు తగ్గించమని కాదు..!

త‌మ నిజ‌మైన బాధ్య‌త‌ల నుంచి దూరంగా పారిపోతున్న పేరెంట్స్

ఇప్పుడు దేశ‌వ్యాప్తంగా ఒక్క‌టే చ‌ర్చ‌. స్కూళ్ల‌లో ఫీజులను యాజ‌మాన్యాలు ఇష్టారాజ్యంగా పెంచుకుంటూ పోతున్నాయ‌న్న‌దే ఆ చ‌ర్చ‌. ఫీజుల‌ను భారీగా పెంచుతూ త‌మ‌ను  దోచుకుంటున్నార‌ని త‌ల్లిదండ్రులు  ఆరోపిస్తున్నారు. వీటిని నియంత్రించాల్సిన ప్ర‌భుత్వాలు నిమ్మ‌కు నీరెత్తిన‌ట్టు వ్య‌వ‌హ‌రిస్తున్నాయ‌న్న‌ది వారి ప్ర‌ధాన ఆరోప‌ణ‌. మ‌న రెండు తెలుగు రాష్ట్రాల్లో ఈ ఫీజుల పంచాయితీ మరికాస్త ఎక్కువ‌గానే ఉంది. విద్యా సంవ‌త్స‌రం ప్రారంభం కాగానే చ‌ర్చ‌నీయాంశంగా మారే ఈ విష‌యం చాలా రోజుల నుంచి హాట్ టాపిక్ గానే ఉంది. తాజాగా తెలంగాణా ప్ర‌భుత్వం ప్ర‌యివేట్ స్కూళ్ల‌లో ఫీజుల నియంత్ర‌ణ‌కు ప్ర‌త్యేక జీవో తెస్తామ‌ని ప్ర‌క‌టించ‌డంతో ఈ విష‌యం మ‌రోసారి వార్త‌ల్లోకెక్కింది. అయితే ఈ విష‌యంలో విభిన్న కోణాలు దాగున్నాయ‌ని విద్యావేత్త‌లు చెపుతున్నారు. ఫీజులు అదుపులేకుండా పెంచ‌డంపై విద్యార్ధుల త‌ల్లిదండ్రులు ఆగ్ర‌హం వ్య‌క్తం చేస్తుంటే, తాము న్యాయంగానే వాటిని వ‌సూలు చేస్తున్నామ‌ని ఆయా స్కూళ్ల యాజ‌మాన్యాలు చెపుతున్నాయి.

వీరిద్ద‌రి ప‌ర‌స్ప‌ర వాద‌న‌లు కాస్త ప‌క్క‌న పెడితే ఈ విష‌యంలో విద్యార్ధుల త‌ల్లిదండ్రుల త‌ప్పు కూడా ఉంద‌ని విద్యావేత్త‌లు అంటున్నారు. స్కూల్ చ‌రిత్ర గురించి, అందులో భోధించే విష‌యాల‌పై కానీ స‌రైన అవ‌గాహ‌న తెచ్చుకోకుండా పేరేంట్స్ గుడ్డిగా వ్య‌వ‌హ‌రిస్తున్నార‌ని, ఇది మంచి ప‌ద్ధ‌తి కాద‌ని విశ్లేషిస్తున్నారు. ఎక్కువ ఫీజు చెల్లిస్తున్నాం క‌దా మా పిల్లాడికి నాణ్య‌మైన విద్య దొరికిపోతుంది అనుకునే కొంద‌రి పేరెంట్స్ వ‌ల్ల‌నే ఈ ప‌రిస్థితి దాపురించింద‌ని విద్యావేత్త‌లు చెపుతున్నారు. ఈ విష‌యంలో త‌ల్లిదండ్రులు స‌రైన అవ‌గాహ‌న తెచ్చుకోకుంటే ఎంత భారీ ఫీజులు క‌ట్టినా వారి పిల్ల‌ల‌కు స‌రైన విద్య‌ను అందించ‌లేర‌ని గుర్తించాల‌ని హెచ్చ‌రిస్తున్నారు. ఫీజుల విష‌యం కాస్త ప‌క్క‌న పెట్టి విద్యార్ధుల త‌ల్లిదండ్రులు కొన్ని విష‌యాల్లో క‌నీస అవ‌గాహ‌న‌ను తెచ్చుకొని, మ‌రింత బాధ్య‌త‌గా వ్య‌వ‌హ‌రించాల‌ని విద్యావేత్త‌లు సూచిస్తున్నారు.

త‌ల్లిదండ్రులు పోరాటం చేయాల్సింది వీటికోసం...

Ø  మీ పిల్ల‌లు చ‌దువుతున్న స్కూల్ చ‌రిత్ర కోసం క్షుణ్ణంగా తెలుసుకోండి. ఆ స్కూల్ యాజ‌మాని వ్య‌క్తిత్వాన్ని, నైతిక‌త‌ను అంచ‌నా వేయండి. స‌రైన నైతిక విలువ‌లు లేని వ్య‌క్తులు స్కూళ్ల‌ను న‌డిపితే వాళ్లకు ఇది కూడా ఒక వ్యాపారంగానే క‌నిపిస్తుంది. స‌మాజం ప‌ట్ల‌, విద్యార్ధుల ప‌ట్ల ప్రేమ‌, బాధ్య‌త ఉన్న‌వారి ఆధ్వ‌ర్యంలో న‌డిచే స్కూళ్ల‌నే ఎంచుకొండి.

Ø  పిల్ల‌ల‌కు పాఠాలు భోధించే టీచ‌ర్ల అర్హ‌త‌ల‌ను తెలుసుకోండి. స్కూల్ యాజ‌మాన్యాన్ని టీచ‌ర్ల‌ అర్హ‌త‌ల‌ను చూపించ‌మ‌ని అడ‌గండి. స‌రైన అర్హ‌త‌లు లేని వాళ్లే అధికంగా ఉన్నారు. అలాంటి వ్య‌క్తుల చేతుల్లో మీ పిల్ల‌ల‌ను పెట్ట‌కండి. టీచ‌ర్ల క్యారెక్ట‌ర్ కూడా ముఖ్య‌మేన‌ని గుర్తించండి.

Ø  స్కూల్ యాజ‌మాన్యం త‌రచుగా టీచ‌ర్ల‌ను మారుస్తుంటే ..ఎందుకు ఇలా జ‌రుగుతొంది అని ప్ర‌శ్నించండి. టీచ‌ర్ల‌కు ఎంత జీతాలు ఇస్తున్నార‌ని అడ‌గండి. ఎక్కువ మొత్తంలో ఫీజులు తీసుకున్న‌ప్పుడు అన్ని అర్హ‌త‌లు ఉన్న నాణ్య‌మైన టీచ‌ర్ల‌ను నియమించ‌మ‌ని యాజ‌మాన్యాన్ని నిల‌దీయండి.

Ø  మీ స్కూల్ కు ఆట స్థ‌లం ఉందా? అని ప్ర‌శ్నించండి. పిల్ల‌ల‌కు శారీర‌క వికాసానికి ఏమి చేస్తున్నారో అడ‌గండి. త‌గినంత‌ ఆట స్థ‌లం లేకుండా ప్ర‌మాద‌క‌ర‌మైన భ‌వంతుల్లో న‌డుపుతున్న స్కూళ్ల‌లో మీ పిల్ల‌ల‌ను జాయిన్ చేయ‌కండి.

Ø  టీచ‌ర్ స‌మ‌యానికి వ‌స్తున్నారా? క‌్లాస్ ఎలా చెప్తున్నార‌న్న విష‌యంపై దృష్టి పెట్టండి.

Ø  మీ పిల్ల‌లు చ‌దివే స్కూల్ లో లైబ్ర‌రీ ఉందా? అని అడ‌గండి. ఉంటే ఏయే పుస్త‌కాలు ఉన్నాయో ప‌రిశీలించండి. క‌నీసం డిజిట‌ల్ లైబ్ర‌రీ అయినా ఉండేట‌ట్టు చూసుకొండి. లైబ్ర‌రీ లేని స్కూళ్ల‌లో మీ పిల్ల‌ల‌ను జాయిన్ చేయ‌కండి.

Ø  పిల్ల‌ల‌కు సామాజిక బాధ్య‌త నేర్పేందుకు స్కూల్ యాజ‌మాన్యం ఏమి చేస్తుందో అడ‌గండి. సేవా కార్య‌క్ర‌మాలు నేర్పించే స్కూళ్ల‌ను ఎంచుకొండి.

Ø  పిల్ల‌ల మాన‌సిక, శారీర‌క వికాసానికి ప్రాధాన్య‌త‌నిస్తున్నారా అని స్కూల్ యాజ‌మాన్యాన్ని ప్ర‌శ్నించండి.

Ø  మీ పిల్లల‌ను జాయిన్ చేయాల‌నుకుంటున్న స్కూల్, సినిమా థియేట‌ర్, బార్, క్ల‌బ్బులు, వైన్ షాపుల‌కు దూరంగా ఉండేలా చూసుకొండి. ఇలాంటి ప్రాంతాల్లో స్కూళ్లు ఉంటే ఆ వాతావ‌ర‌ణం మీ పిల్ల‌ల‌పై ప్ర‌తికూల ప్ర‌భావం చూపుతుంది. ఈ విష‌యంలో స్కూల్ యాజ‌మాన్యాల‌ను గ‌ట్టిగా నిల‌దీయండి.

  

   ఇన్ని ముఖ్య‌మైన విష‌యాల‌ను ప్ర‌శ్నించ‌డం మానేసి ఫీజులు త‌గ్గించాల‌ని పోరాటం చేస్తే అది స‌రైన ఫ‌లితాల‌ను ఇవ్వ‌ద‌ని విద్యావేత్త‌లు, నిపుణులు సూచిస్తున్నారు. ఆయా స్కూళ్ల‌లో ఉన్న స‌దుపాయాల‌ను బ‌ట్టి మీ పిల్ల‌ల‌ను చేర్పించాలా వ‌ద్దా అన్న‌ది నిర్ణ‌యించుకోవాల‌ని, స‌దుపాయాలు లేని స్కూళ్ల‌కు ఎక్కువ మొత్తంలో ఫీజులు క‌ట్టాల్సిన అవ‌స‌రం లేద‌ని, ఈ విష‌యంలో త‌ల్లిదండ్రుల‌దే ఎక్కువ బాధ్య‌త అని వారు విశ్లేషిస్తున్నారు. కాబ‌ట్టి త‌ల్లిదండ్రుల్లారా...మీ పిల్ల‌ల‌ను స‌రైన స్కూళ్ల‌లో చేర్పించ‌డంలో మీ నేర్ప‌రిత‌నాన్ని ఉప‌యోగించండి.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

You can send your Educational related articles to  careertimes.online1@gmail.com