విద్యార్ధుల మెడపై హాట్ గా నీట్ కత్తి!

అడ్డ‌గోలు నిబంధ‌న‌ల‌తో విద్యార్ధుల భ‌విష్య‌త్ తో ఆట‌లు

ఒకటోసారి...రెండో సారి...మూడో సారి...ఇదేంటి... వేలం పాట‌? అని అనుకుంటున్నారా! అయితే ఇది మామూలు వేలం పాట కాదు  విద్య‌ను మూడే అవ‌కాశాల‌కు కుదించిన  స‌రికొత్త వేలం పాట‌. వైద్య విద్యార్ధుల భ‌విష్య‌త్ కు ఉరి వేసేలా ఉన్న‌ ఈ కొత్త వేలం పాటను నిర్వ‌హిస్తోంది  సీబీఎస్ఈ. ఇంజినీరింగ్ లో ప‌రిమితికి మించి నిపుణులు పెరిగిపోవ‌డంతో ఇప్పుడు విద్యార్ధులు వైద్య విద్య‌పై మ‌క్కువ పెంచుకుంటున్నారు. అవ‌కాశాలకు కొదువ  లేక‌పోవ‌డంతో త‌ల్లిదండ్రులు కూడా ఎన్ని క‌ష్టాలు ప‌డైనా త‌మ పిల్ల‌ల‌ను వైద్య విద్య చ‌దివించేందుకు రెడీ అవుతున్నారు. అయితే జాతీయ స్థాయిలో వైద్య విద్య ప్ర‌వేశ ప‌రీక్ష నీట్ ను నిర్వ‌హిస్తున్న సీబీఎస్ఈ తాజాగా తీసుకున్న ఓ నిర్ణ‌యం విద్యార్ధుల‌ను, త‌ల్లిదండ్రుల‌ను తీవ్రంగా ఆందోళ‌నకు గురిచేస్తోంది.

 దేశ వ్యాప్తంగా ఇప్పుడు విద్యా రంగంలో తీవ్ర చ‌ర్చ‌నీయాంశంగా మారిన ఈ అంశంలో సీబీఎస్ఈ విధించిన నిబంధ‌న‌ల‌పై అన్ని వైపుల నుంచి తీవ్ర అసంతృప్తి వ్య‌క్త‌మ‌వుతోంది. ఇటీవ‌ల విడుద‌ల చేసిన ప్ర‌క‌ట‌న‌లో ముందుగా సీబీఎస్ఈ, ఇప్ప‌టికే ఆల్ ఇండియా ప్రీ మెడిక‌ల్ టెస్ట్ తో పాటు నీట్ ల‌లో ఏదో ఒక ప‌రీక్ష రాసినా దాన్ని కూడా ప‌రిగ‌ణ‌న‌లోకి తీసుకుంటామ‌ని తెలిపింది. అయితే దీనిపై కేంద్ర ఆరోగ్య కుటుంబ మంత్రిత్వ శాఖ‌, భార‌తీయ వైద్య మండ‌లి (ఎంసీఐ) ని ఈ విష‌యంపై వివ‌ర‌ణ కోరింది. ఈ విష‌యంపై స్పందించిన భార‌తీయ వైద్య మండ‌లి ఇప్ప‌టి వ‌ర‌కూ రాసిన ప‌రీక్ష‌లు ప‌రిగ‌ణ‌న‌లోకి తీసుకోవ‌ద్ద‌ని, నీట్ 2017 నుంచి మాత్రమే ఈ కొత్త నిబంధ‌న‌ను అమ‌లు చేయాల‌ని స్ప‌ష్టం చేసింది (అయినా దీని వ‌ల్ల పెద్ద‌గా ప్ర‌యోజ‌నం లేద‌న్న‌ది తెలిసిన విష‌య‌మే).  ఎంసీఐ తాజా ప్ర‌క‌ట‌న‌తో జాతీయ స్థాయిలో వైద్య విద్య ప్ర‌వేశ ప‌రీక్ష రాసే విద్యార్ధులకు తొలి హాజ‌రుగా న‌మోదువుతుంది. ఈ ఏడాది ప‌రీక్ష రాసిన విద్యార్ధులు 2018, 2019 సంవ‌త్సరాల్లో నీట్ ను మాత్ర‌మే రాయ‌గ‌ల‌రు. ఆ త‌ర్వాత వారు నీట్ ప‌రీక్ష రాసేందుకు అన‌ర్హులుగా ప‌రిగ‌ణించ‌బ‌డ‌తారు.  దీంతో పాటు 25 ఏళ్లు దాటిన విద్యార్ధులు కూడా నీట్ రాసేందుకు అర్హ‌త ఉండ‌దు.

 ఇప్ప‌టి వ‌ర‌కూ మ‌న తెలుగు రాష్ట్రాల్లో ఎంబీబీఎస్, బీడీఎస్ కోర్సుల్లో ప్ర‌వేశానికి విద్యార్ధులు ఎన్నిసార్లైనా ప‌రీక్ష రాసుకునే వీలుండేది. అయితే ఇప్పుడు గ‌రిష్ఠంగా మూడు సార్లు మాత్ర‌మే నీట్ రాసేందుకు అవ‌కాశం ఉంది. దీంతో విద్యార్ధుల్లో ఆందోళ‌న వ్య‌క్త‌మ‌వుతోంది. ఈ కొత్త విధానం వ‌ల్ల తాము తీవ్రంగా న‌ష్ట‌పోతామ‌న్న‌ది విద్యార్ధుల భావ‌న‌. అర్హ‌త ప‌రీక్ష రాసేందుకు వ‌య‌స్సు కుదింపు నిబంధ‌న‌తో పెద్ద‌గా బాధ లేద‌ని, అవ‌కాశాల‌ను త‌గ్గించ‌డం మాత్రం క‌చ్చితంగా విద్యార్ధుల‌ను న‌ష్ట‌ప‌ర్చే అంశ‌మేన‌ని విద్యావేత్త‌లు కూడా అభిప్రాయ‌ప‌డుతున్నారు. ఈ అడ్డ‌గోలు నిబంధ‌న‌ల‌తో విద్యార్ధుల‌కు తీవ్రంగా న‌ష్టం జ‌రుగుతుంద‌ని ముఖ్యంగా గ్రామీణ ప్రాంత విద్యార్ధులు వైద్య విద్య‌కు దూర‌మ‌వుతార‌ని నిపుణులు చెపుతున్నారు.

నీట్ కొత్త నిబంధ‌న‌లు విద్యార్ధుల పాలిట శాపాలు!

Ø  గ‌తంలో వైద్య విద్య చ‌దివేందుకు దేశ వ్యాప్తంగా 40 కి పైగా అర్హ‌త ప‌రీక్ష‌లు ఉండేవి. దీని వ‌ల‌న విద్యార్ధుల‌కు మంచి అవ‌కాశం ఉండేది. ఇప్పుడు ఒక్క నీట్ అర్హ‌త‌ ప‌రీక్ష ద్వారానే వైద్య విద్య‌లో ప్ర‌వేశం పొందాలి. అదీ కూడా మూడే అవ‌కాశాలు. ఈ నిబంధ‌న విద్యార్ధుల‌పై తీవ్ర‌మైన మాన‌సిక ఒత్తిడిని పెంచుతుంది.

Ø  సివిల్స్, యూపీపీఎస్సీ వంటి అత్యున్న‌త ప‌రీక్ష‌లు రాసే వారికి పెట్టాల్సిన నిబంధ‌న‌ల‌ను ఇంట‌ర్మీడియ‌ట్ చ‌దివే పిల్ల‌ల‌కు పెట్ట‌డం ఎంత వ‌ర‌కూ స‌మంజసం. యూపీపీఎస్సీ వంటి ప‌రీక్ష‌లు రాసే విద్యార్ధులు మాన‌సికంగా మంచి ప‌రిణితి ఉంటుంది. ఇంట‌ర్ చ‌దివే పిల్ల‌ల‌పై నీకు మూడే అవ‌కాశాలు అంటూ వారిని ఒత్తిడికి గురిచేయడం  మంచి ప‌ద్ధ‌తి కాదు.

Ø  3 సార్లే నీట్ ప‌రీక్ష రాయాలి అని నిబంధ‌న‌లు పెట్టిన‌పుడు కొన్ని మిన‌హాయింపులు ఇస్తే విద్యార్ధుల‌కు కాస్త ఉప‌శ‌మ‌నంగా ఉండేది. నీట్ ప‌రీక్షలో నెగెటివ్ మార్కింగ్ తీసేసి, అదే విధంగా క‌టాఫ్ మార్కుల‌కు త‌గ్గిస్తే వాళ్లు కొద్దిగా ఊపిరి పీల్చుకునే వారు. క‌నీసం అది కూడా చేయ‌లేదు.

Ø  నీట్ కొత్త నిబంధ‌న‌ల‌తో గ్రామీణ ప్రాంత విద్యార్ధులు తీవ్రంగా న‌ష్ట‌పోతారు. మంచి నాణ్య‌మైన కోచింగ్ తీసుకునే ప‌ట్ట‌ణ ప్రాంత విద్యార్ధుల‌తో మూడే అవ‌కాశాల‌తో గ్రామీణ ప్రాంత విద్యార్ధులు ఎలా పోటీప‌డ‌తారు? ముఖ్యంగా  ఈ ఏడాది నుంచి ఆన్ లైన్ లో ప‌రీక్ష రాయ‌డం కూడా గ్రామీణ ప్రాంత విద్యార్ధుల‌కు పెద్ద దెబ్బ‌. దేశంలో డిజిట‌ల్ అక్ష‌రాస్య‌త ఇప్ప‌టికీ తీసిక‌ట్టుగానే ఉన్న స‌య‌యంలో గ్రామీణ విద్యార్ధులు ఒక్క‌సారిగా అత్యున్న‌త ప‌రీక్ష‌ను ఆన్ లైన్ లో ఎలా రాయ‌గ‌లుగుతారు. గ్రామ ప్రాంతాల నుంచి వ‌చ్చే పేద విద్యార్ధులు క‌ష్ట‌ప‌డి డిజిట‌ల్ విధానాన్ని నేర్చుకున్నా వారి మెడ‌పై ఉన్న మూడే ఛాన్సులు అన్న క‌త్తి తీవ్ర ఒత్తిడికి గురి చేస్తుంది.

Ø  ఇక నీట్ నోటిఫికేష‌న్ లో సీబీఎస్ఈ సుప్రీం కోర్టు ఆదేశాల‌ను కూడా తుంగ‌లో తొక్కింది. ఇంట‌ర్ లో విద్యార్ధికి వ‌చ్చిన మార్కుల‌ను నీట్ అర్హ‌త ప‌రీక్ష‌లో ప‌రిగ‌ణ‌న‌లోకి తీసుకోవాల‌ని అత్యున్న‌త న్యాయ‌స్థానం స్ప‌ష్టం చెప్పినా సీబీఎస్ఈ ప‌ట్టించుకోలేదు. ఇది కూడా ఇంట‌ర్ లో మంచి ప్ర‌తిభ క‌న‌బ‌ర్చిన విద్యార్ధుల‌కు న‌ష్టం చేసే అంశం. జేఈఈ ఐఐటీ వంటి ప‌రీక్ష‌ల్లో కూడా ఇంట‌ర్ లో వ‌చ్చిన మార్కుల‌ను ప‌రిగ‌ణ‌న‌లోకి తీసుకుంటున్నారు. నీట్ లో మాత్రం అది జ‌ర‌గ‌డం లేదు.

Ø  దేశ వ్యాప్తంగా అన్ని అర్హ‌త ప‌రీక్ష‌ల‌ను తీసేసి కేవ‌లం మూడే అవ‌కాశాల్లో విద్యార్ధుల‌ను త‌మ ప్ర‌తిభ‌ను నిరూపించుకోవాల‌ని చెప్ప‌డం భావ్యంగా లేద‌ని విద్యా వేత్త‌లు చెపుతున్నారు. గ‌తంలో బీఎస్సీ, ఎమ్మెస్సీ చ‌దివాక డాక్ట‌ర్లు అయిన వారు చాలా మంది ఉన్నారు. ఇక ప్ర‌స్తుతం ప్ర‌ముఖ వైద్యులుగా పేరుగాంచిన వారు కూడా ఐదో ప్ర‌యత్నం, ఆరో ప్ర‌య‌త్నంలో మాత్రమే డాక్ట‌ర్ సీటు సంపాదించారు. కేవ‌లం మూడు అవ‌కాశాల‌తోనే విద్యార్ధుల ప్ర‌తిభ‌ను నిర్ధారించ‌డం అన్యాయం.

Ø  ఇక ఎన్ సీఆర్ టీ బుక్స్ మార్కెట్ లో ఎక్క‌డా దొర‌క‌డం లేదు. బ్లాక్ మార్కెట్లో అధిక ధ‌ర‌కు దొరుకుతున్నాయి. ఇది పేద విద్యార్ధుల‌ను వైద్య విద్య‌కు దూరం చేయ‌డ‌మే అవుతుంది. పేద విద్యార్ధుల‌ను, సామాజికంగా వెన‌క‌బడిన వారిని మ‌రింత అణ‌గ‌దొక్కేలా ఈ నిర్ణ‌యం ఉంద‌ని ఇప్ప‌టికే కొంద‌రు నిర‌స‌న వ్య‌క్తం చేస్తున్నారు.

Ø  కొత్త నిబంధ‌న‌ల ప్ర‌కారం పాకిస్థాన్, బంగ్లాదేశ్ విద్యార్ధుల‌తో పాటు ఎన్ఆర్ఐ విద్యార్ధులు కూడా నీట్ ప‌రీక్ష రాయొచ్చు. ఎన్ఆర్ఐ కోటాను కూడా నీట్ ద్వారానే భ‌ర్తీ చేస్తారు. ఇది కాలేజీ యాజ‌మాన్యాల‌కు ల‌బ్ది చేకూర్చే విధంగా ఉంద‌న్న‌ది కొంద‌రి వాద‌న‌.

Ø  2013 లో రూపుదాల్చిన నీట్ అర్హ‌త ప‌రీక్ష ఆది నుంచి వివాదాస్పదంగానే ఉంది. కొన్ని కోర్టులు నీట్ కు బ్రేక్ కు కూడా వేశాయి. విద్యావ్య‌వ‌స్థ‌ను ప్ర‌క్షాళ‌న చేయాల్సింది పోయి విద్యార్ధుల‌కు న‌ష్టం క‌లిగించే విధంగా ప‌రీక్షా విధానంలో ప్ర‌క్షాళ‌న‌లు చేస్తున్నార‌ని ఎన్నో విమ‌ర్శలు వ‌చ్చాయి. అయినా ఎవ‌రికి ల‌బ్ది చేకూర్చ‌డానికి ఇలా ముందుకు వెళ్తుందో, సీబీఎస్ఈ కే తెలియాలి. 

Ø  రాజ్యాంగంలో విద్య అనేది ఉమ్మ‌డి జాబితాలో ఉంది. అయినా దాన్ని తుంగ‌లో తొక్కుతూ కేంద్రం వ్య‌వ‌హ‌రిస్తోంది. రాష్ట్రాల‌కు ఉన్న హ‌క్కుల‌ను హ‌రిస్తూ ఇష్టారాజ్యంగా నిబంధ‌న‌లు మారుస్తూ వ‌స్తోంది. ఇప్ప‌టికే నీట్ ప‌రీక్ష‌ను నిలిపివేయాల‌ని కోరుతూ త‌మిళ‌నాడు ప్ర‌భుత్వం ఒక ఆర్డినెన్స్ ను కూడా తెచ్చింది. అయినా సీబీఎస్ఈ మాత్రం త‌న నిర్ణ‌యాన్ని స‌మ‌ర్ధించుకుంటోంది.

 వైద్య విద్య ప్ర‌వేశ ప‌రీక్ష నీట్ రాసేందుకు విద్యార్ధుల‌కు మూడే అవ‌కాశాలు క‌ల్పించ‌డం వారిపై మాన‌సిన ఒత్తిడిని పెంచుతుంది. దీంతో ప‌రీక్ష‌ల్లో వారు స‌రైన ప్ర‌తిభ చూపించ‌లేక‌పోయే అవ‌కాశాలు కూడా ఉన్నాయి. ఇటు విద్యార్ధులు, వాళ్ల త‌ల్లిదండ్రులు అటు విద్యావేత్త‌లు ఈ కొత్త విధానాన్ని వ్య‌తిరేకిస్తున్నా సీబీఎస్ఈ మాత్రం త‌న నిర్ణ‌యాన్ని స‌మ‌ర్ధించుకుంటోంది. ఈ కొత్త నిబంధ‌న వ‌ల‌న వైద్య విద్యలోకి నాణ్య‌మైన, అర్హులైన విద్యార్ధులు మాత్ర‌మే వ‌స్తార‌ని త‌న వాద‌నను వినిపిస్తోంది. మొత్తానికి నీట్ ప్ర‌వేశ‌ప‌రీక్ష‌కు మూడే అవ‌కాశాలు అన్న కొత్త నిజాన్ని విద్యార్ధులు జీర్ణించుకోవాల్సి ఉంటుంది.

ఇక ఆయుష్ సీట్లు కూడా నీట్ ద్వారానే భ‌ర్తీ

       

 ప్ర‌స్తుతం ఎంబీబీఎస్, బీడీఎస్ సీట్ల‌ను నీట్ అర్హ‌త ప‌రీక్ష ఆధారంగా భ‌ర్తీ చేస్తున్నారు. ఇకపై ఆయుష్ సీట్ల‌ను కూడా నీట్ ద్వారానే భ‌ర్తీ చేస్తామ‌ని కేంద్ర ప్ర‌భుత్వం స్ప‌ష్టం చేసింది. చాలా మంది విద్యావేత్త‌ల అభిప్రాయాల‌ను ప‌రిగ‌ణ‌న‌లోకి తీసుకుని ఈ నిర్ణ‌యం తీసుకున్నామ‌ని ప్ర‌భుత్వం వెల్ల‌డించింది.  ఎంబీబీఎస్, బీడీఎస్ సీట్ల భ‌ర్తీ కోస‌మే నీట్ ను ఉద్దేశించిన‌ప్ప‌టికీ, ఇక‌పై నీట్ ర్యాంకుల ఆధారంగానే హోమియో, ఆయుర్వేద‌, యునాని, సిద్ధ‌, యోగా, నేచురోప‌తి సీట్ల‌ను భ‌ర్తీ చేస్తామ‌ని ఆయుష్ మంత్రిత్వ శాఖ వెల్ల‌డించింది.

NEET పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

You can send your Educational related articles to  careertimes.online1@gmail.com