స్కూళ్లో పిల్లల్ని హింసిస్తే ఏం చేయాలి? చట్టం ఏం చెపుతోంది?

     ఇటీవ‌లి కాలంలో స్కూల్స్ లో పిల్ల‌ల‌పై హింస పెరిగిపోతోంది. పిల్ల‌ల్ని దారుణంగా కొట్ట‌డం, తిట్ట‌డం లాంటి సంఘ‌ట‌న‌లు ఎక్కువ‌గా వెలుగు చూస్తున్నాయి. చిన్న‌పిల్ల‌ల‌పై జ‌రుగుతున్న ఈ హింస వారిని శారీర‌కంగా, మానసికంగా కుంగదీస్తోంది. దీంతో కొంద‌రు పిల్ల‌లు ఆత్మ‌విశ్వాసాన్ని కోల్పోయి మాన‌సికంగా దెబ్బ‌తింటుంటే మ‌రికొంద‌రు పిల్ల‌లు ఏకంగా ఆత్మ‌హ‌త్య‌ల‌కే పాల్ప‌డుతున్నారు. ముఖ్యంగా కొంద‌రు టీచ‌ర్స్ అనుస‌రిస్తున్న హింసాత్మ‌క  వైఖ‌రి ప‌సిపిల్ల‌ల ఉసురు తీస్తోంది. ఇంకా స్కూల్ వాతావ‌ర‌ణానికి స‌రిగ్గా అల‌వాటు ప‌డ‌ని చిన్న పిల్ల‌ల ప‌ట్ల కొంద‌రు ఉపాధ్యాయులు అత్యంత దారుణంగా ప్ర‌వ‌రిస్తున్నారు. మాన‌వ‌త్వాన్ని మ‌రిచి ప‌శు ప్ర‌వృత్తితో ప్ర‌వర్తిస్తూ గొప్ప‌దైన ఉపాధ్యాయ వృత్తి గౌర‌వాన్ని బ‌జారుకీడుస్తున్నారు. పిల్ల‌ల విష‌యంలో ఇంత దారుణంగా ప్ర‌వ‌ర్తిస్తున్న వారిని క‌ట్ట‌డి చేసేందుకు మ‌న‌కు ఎన్నో చ‌ట్టాలున్నాయి. ఈ చ‌ట్టాలను స్కూల్ యాజ‌మాన్యాలు తుంగ‌లో తొక్కిపెడుతుంటే.. వారిని గట్టిగా నిల‌దీయాల్సిన పేరెంట్స్ కు చ‌ట్టంపై అవ‌గాహ‌న కాదు కదా స్కూల్ యాజ‌మాన్యాన్ని గ‌ట్టిగా ప్ర‌శ్నించే చైత‌న్యం కూడా ఉండటం లేదు. 

ప‌సివాళ్ల‌పై హింస క్ష‌మించ‌రాని నేరం! 

     తాజాగా  అటెండెన్స్ ను స‌రిగ్గా చెప్ప‌లేద‌ని ఒక ఏడేళ్ల పిల్ల‌వాడ్ని 3 నిమిషాల వ్య‌వ‌ధిలో 40 సార్లు దారుణంగా కొట్టిన వీడియో ఒక‌టి సోష‌ల్ మీడియాలో వైర‌ల్ గా మారింది. మాట‌లు కూడా స‌రిగా రాని ఒక ఏడేళ్ల పిల్ల‌వాడ్ని అత్యంత అమాన‌వీయంగా కొట్ట‌డం చూప‌రుల‌ను క‌లచివేసింది. పిల్ల‌ల‌ను ఆ విధంగా హింసించి ఆనందం పొందే మాన‌సిక రోగుల‌ను టీచ‌ర్స్ గా నియ‌మించిన స్కూల్ యాజ‌మాన్యం ఇందులో ప్ర‌థ‌మ దోషి. అది ప్ర‌యివేట్ స్కూల్ కావ‌చ్చు ప్ర‌భుత్వ స్కూల్ కావ‌చ్చు. అటువంటి చిన్న‌పిల్ల‌ల్ని హింసించి పైశాచికానందం పొందే వారిని వెంట‌నే క‌ఠినంగా శిక్షించాలి. అలాగే ఓ ప్ర‌భుత్వ పాఠ‌శాల‌లో ఒక 13 ఏళ్ల బాలిక‌ను రుతుక్ర‌మంలో మ‌ర‌క‌లు ప‌డ్డాయ‌ని ఓ టీచ‌ర్ క్లాస్ లో అంద‌రి ముందు అవ‌మానించింది. అబ్బాయిలు మందు టీచ‌ర్ ఆ విధంగా ప్ర‌వ‌ర్తించ‌డంతో మాన‌సిక వేద‌న చెందిన ఆ అమ్మాయి ఆత్మ‌హత్య చేసుకుంది. చిన్న పిల్ల‌ల ప‌ట్ల‌ ఇలా అమాన‌వీయంగా, అత్యంత దారుణంగా  వ్య‌వ‌హ‌రిస్తున్న ఘ‌ట‌న‌లు రోజురోజుకీ పెరిగిపోతున్నాయి. ఘ‌ట‌న జ‌రిగిన త‌ర్వాత‌ రెండు రోజుల ఈ విష‌యం కోసం మాట్లాడుకోవ‌డం త‌ర్వాత దాని గుర్తించి మ‌ర్చిపోవ‌డంతో ఇలాంటి రాక్ష‌స ప్ర‌వృత్తి ఉన్న టీచ‌ర్స్ తమ పైశాచిక‌త్వాన్ని ప్ర‌ద‌ర్శిస్తూనే ఉన్నారు. ప్ర‌భుత్వాలు స్పందించాల‌న్న విష‌యాన్ని ప‌క్క‌న‌పెట్టి పసివాళ్ల‌పై జ‌రుగుతున్న ఈ దారుణాల‌పై త‌ల్లిదండ్రులు పోరాటం చేయాలి. చ‌ట్టంపై నిబంధ‌న‌ల‌పై అవగాహ‌న పెంచుకుని ఎప్ప‌టిక‌ప్పుడు  స్కూల్ లో త‌మ పిల్ల‌ల‌ను ఎలా ట్రీట్ చేస్తున్నారో తెలుసుకోవాలి. 

చ‌ట్టం ఏం చెపుతోంది? 

     రైట్ ఆఫ్ చిల్డ్ర‌న్ టు ఫ్రీ అండ్ కంప‌ల్స‌రీ ఎడ్యుకేష‌న్ ( ఆర్టీఈ) యాక్ట్ 2009 ప్ర‌కారం..పిల్ల‌ల‌ను శారీరకంగా శిక్షించ‌డం, మాన‌సికంగా వేధించ‌డం శిక్షార్హం. అలా ప్ర‌వ‌ర్తించిన వారికి సెక్ష‌న్ 17(2) ప్రకారం శిక్ష ప‌డుతుంది. నేష‌న‌ల్ క‌మీష‌న్ ఫ‌ర్ చైల్డ్ రైట్స్ వారు ఇప్ప‌టికే అన్ని స్కూల్ యాజ‌మాన్యాల‌కు ఆర్టీఈ గైడ్ లైన్స్ ను ఇష్యూ చేసారు. ఇందులో కేవ‌లం శారీర‌క హింస మాత్ర‌మే కాదు మాన‌సిక హింస‌, వివ‌క్ష కూడా శిక్షార్హ‌మైనవ‌ని అందులో వెల్ల‌డించారు. ఇక స్కూల్స్ లో కౌన్సిల‌ర్స్ నియామ‌కాన్ని త‌ప్ప‌నిస‌రి చేయాల‌న్న ప్ర‌తిపాద‌న  కూడా ఉంది. ఇప్ప‌టికే కొన్ని స్కూల్స్ లో స్టూడెంట్స్ కౌన్సిల‌ర్స్ ఉన్నారు. వీళ్లు విద్యార్ధుల‌కు కౌన్సిలింగ్ ఇవ్వ‌డంతో అవ‌స‌ర‌మైన స‌లహాలు కూడా ఇస్తారు. దీని వ‌ల‌న విద్యార్ధుల ఆత్మ‌హ‌త్య‌లు, కుంగుబాటు త‌గ్గేందుకు అవ‌కాశం ఏర్ప‌డుతోంది. అదే విధంగా ప్ర‌భుత్వ పాఠ‌శాల‌ల‌కు కూడా కౌన్సిల‌ర్స్ ను నియ‌మిస్తే మంచి ఫ‌లితాలు వ‌స్తాయి. విద్యార్ధుల ప్ర‌తినిధిగా వాళ్ల సాద‌క బాధ‌కాలు తెలుసుకుంటూ త‌గిని ప‌రిష్కార మార్గాలు చూపేందుకు వీలు క‌లుగుతుంది. ఇటువంటి కౌన్సిల‌ర్లు పిల్ల‌ల మ‌న‌స్త‌త్వాన్ని అంచనా వేయ‌గ‌లిగే నిపుణులు అయితే మ‌రిన్ని ప్ర‌యోజ‌నాలు చేకూరుతాయి. 

పిల్ల‌లకి ఆత్మ‌విశ్వాసంతో మాట్లాడేలా త‌ర్ఫీదు ఇవ్వండి! 

      పిల్ల‌లు ఎప్పుడూ చాలా విష‌యాల్లో త‌మ అభిప్రాయాలు వెల్ల‌డించకుండా నిశ్శ‌బ్దంగా ఉంటారు. ఎందుకంటే మ‌నం చిన్న‌త‌నం నుంచి పెద్ద‌ల‌కు ఎదురు చెప్పొద్దు అన్న విష‌యాన్ని వాళ్ల‌కు బాగా నూరిపోస్తాం. దీని వ‌ల‌న వాళ్లు త‌మ కంటే పెద్ద‌వాళ్ల ప‌ట్ల గౌర‌వంగా ఉంటారు. ఇది మంచి విష‌యమే. కానీ ఈ మంచి విష‌య‌మే ఒక్కోసారి వాళ్ల‌కు ఇబ్బందిక‌రంగా మారుతుంది. ముఖ్యంగా లైంగిక వేధింపులు వంటి విషయాల్లో పిల్ల‌లు త‌మకు జ‌రిగిన అనుభ‌వాల‌ను బ‌య‌టికి చెప్పుకోలేరు. స‌రిగ్గా ఇక్క‌డే పిల్ల‌ల‌కు త‌ల్లిదండ్రులు త‌గిన విధంగా శిక్ష‌ణ ఇవ్వాలి. పెద్ద‌ల‌ను గౌర‌వించడం నేర్పిస్తూనే అదే స‌మ‌యంలో త‌ప్పుగా ప్ర‌వ‌ర్తించిన‌ప్పుడు పెద్ద‌వాళ్ల‌ను అయినా స‌రే నిల‌దీసే ధైర్యాన్ని వారికి నూరిపోయాలి. ముఖ్యంగా ప్ర‌శ్నించే త‌త్వాన్ని వారిలో పెంపోందించాలి. త‌ప్పు, ఒప్పు మ‌ధ్య ఉన్న తేడాను గుర్తించేలా త‌ప్పు చేస్తే ఎవ‌రినైనా ఎదిరించే గుణాన్ని వారికి క‌లిగించాలి. ఇలా చేస్తే వాళ్లు త‌మ‌కు ఏదైనా వివ‌క్ష‌, వేధింపులు ఎదురైన‌ప్పుడు ధైర్యంగా ముందుకు వ‌చ్చి మాట్లాడ‌తారు. 

ఫిర్యాదు చేసేందుకు సంశ‌యించ‌కండి! 

     ఒక‌ విద్యార్ధి ప‌ట్ల టీచ‌ర్ అమాన‌వీయంగా ప్ర‌వ‌ర్తించిన‌ప్పుడు ఫిర్యాదు చేసేందుకు పేరెంట్స్ ఎప్పుడూ వెన‌కాడ‌కూడ‌దు. విద్యార్ధి, త‌ల్లిదండ్రులు ఫిర్యాదు చేసిన‌ప్పుడు స‌మ‌స్య తీవ్ర‌త‌ను బ‌ట్టి కొన్ని యాజ‌మాన్యాలు టీచ‌ర్స్ ను తొలిగించాలి. అలా చేయ‌కుండా నిర్ల‌క్ష్యం వ‌హిస్తే వెంట‌నే స‌ద‌రు స్కూల్ పై కేసు ఫైల్ చేయండి. ఏ స్కూల్ కూడా త‌న గుర్తింపును, ప్ర‌తిష్ట‌ను పొగొట్టుకునేందుకు ప్ర‌య‌త్నించ‌దు. కాబ‌ట్టి పిల్ల‌ల ప‌ట్ల టీచ‌ర్ ప్ర‌వ‌ర్త‌న  స‌రిగా లేన‌ప్పుడు వెంట‌నే ఆ విష‌యాన్ని స్కూల్ యాజ‌మాన్యం దృష్టికి తీసుకువెళ్లండి. ఈ విష‌యంలో స‌ర్దుకుపోయేందుకు కానీ పిల్ల‌వాడిపై కక్ష పెట్టుకుంటార‌ని భ‌య‌ప‌డ‌టం కానీ ఎట్టి ప‌రిస్థితుల్లోనూ చేయొద్దు. మీ పిల్ల‌వాడిపై అమాన‌వీయ ప్ర‌వ‌ర్త‌నను మీర ప్రారంభంలో అడ్డుకోకుంటే త‌ర్వాత మీరే న‌ష్ట‌పోతారు. ఎందుకంటే మీకు కావాల్సింది. మీ పిల్ల‌వాని భ‌విష్య‌త్, అత‌ని సంక్షేమం. ఆ విష‌యంలో ఎప్పుడూ రాజీప‌డ‌కండి. స‌దుపాయాలు, సౌక‌ర్యాలు, టీచ‌ర్స్ ఇలా ఏం బాగాలేక‌పోయినా వెంట‌నే నిల‌దీయండి. మీ చైత‌న్య‌మే మీ పిల్ల‌వానికి శ్రీరామ‌ర‌క్ష‌గా నిలుస్తుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com