స్మశాన నిశ్శబ్దమే నిజమైన క్రమశిక్షణా..??

      జీవితంలో ఉన్నత శిఖ‌రాల‌కు చేరుకోవాలంటే క్ర‌మ‌శిక్ష‌ణ త‌ప్ప‌నిసరి. క్ర‌మ‌శిక్ష‌ణ క‌లిగిన వ్య‌క్తులే వృత్తిగ‌తంగా, వ్యక్తిగ‌తంగా విజేత‌లుగా నిలుస్తారు. అయితే అస‌లు క్ర‌మ‌శిక్ష‌ణ అంటే ఏమిటి? క‌్ర‌మ‌శిక్ష‌ణ అనేది బ‌ల‌వంతంగా నేర్పిస్తే నేర్చుకునే విష‌య‌మా? అస‌లు క్ర‌మ‌శిక్ష‌ణ అంటే ఏమిటో పూర్తిగా తెలీకుండానే చాలా మంది ఉపాధ్యాయులు దాన్ని విద్యార్ధుల‌పై బ‌ల‌వంతంగా రుద్దుతున్నారు. బ‌ల‌వంతంగా, క‌ఠినంగా ఏ ప‌నినైనా చేయిస్తే అది శిక్ష అవుతుంది కానీ క్ర‌మ‌శిక్ష‌ణ ఎలా అవుతుంది?  విద్యార్ధుల‌ విష‌య‌మే కాదు వ్య‌క్తిగ‌తంగా కూడా చాలామందికి క్ర‌మ‌శిక్ష‌ణ అంటే ఏమిటో తెలియ‌డం లేదు. అలారం పెట్టుకుని ప్ర‌తీ రోజూ ఒక నిర్దేశ స‌మ‌యానికి నిద్ర‌లేవ‌డాన్ని క్ర‌మ‌శిక్ష‌ణగా భ్ర‌మ‌ప‌డేవాళ్లు మ‌న‌లో చాలా మంది ఉన్నారు. అస‌లు క్ర‌మ‌శిక్ష‌ణ అంటే అది కాదు. మ‌న‌స్సును, శ‌రీరాన్ని మ‌నం మ‌న మాట వినేలా చేసుకోవ‌డ‌మే క్ర‌మ‌శిక్ష‌ణ‌. ఏదైనా ఒక ప‌నిని చేయాల‌నుకున్న‌ప్పుడు చేసి చేయ‌కూడ‌ద‌నుకున్న‌ప్పుడు దాన్ని వ‌దిలేసే మ‌నఃస్థితిని, సామ‌ర్ధ్యాన్ని సంపాదించుకోవ‌డ‌మే క్ర‌మ‌శిక్ష‌ణ‌తో జీవించ‌డం. అన్నీ వ‌దిలేసి, అన్నింటికి దూరంగా ఒక గిరి గీసుకుని బ‌తుకుతూ దాన్ని క్ర‌మ‌శిక్షణ అనుకుంటే పొర‌పాటు అవుతుంది. జీవితంలోని మ‌జా చేజారిపోతుంది.

సైలెంట్ గా ఉంటే క్ర‌మ‌శిక్ష‌ణతో ఉన్న‌ట్టా?

    క్లాస్ రూమ్  లోకి టీచ‌ర్ రాగానే సైలెన్స్ అని అరుస్తారు. దీంతో త‌ర‌గ‌తి గ‌ది మొత్తం నిశ్శ‌బ్దంతో నిండిపోతుంది. అలాగే మ‌నం లైబ్ర‌రీలోకి అడుగుపెట్ట‌గానే అక్క‌డ సైలెన్స్ ప్లీజ్ అన్న బోర్డు క‌నిపిస్తుంది. కోర్టులో గుమ‌స్తా సైలెన్స్ అని అర‌వ‌గానే అక్క‌డ అంద‌రూ నిశ్శ‌బ్దంగా కూర్చుంటారు. ఇప్పుడు మ‌నం చెప్పుకున్న మూడు ప్ర‌దేశాల్లో నిశ్శ‌బ్దంగా ఉండ‌టం చాలా ముఖ్యం కాబ‌ట్టి బ‌ల‌వంతంగా అటువంటి వాతావ‌ర‌ణాన్ని క‌ల్పించారు. అయితే ఈ నిశ్శ‌బ్దాన్నే క్ర‌మ‌శిక్ష‌ణ అని చాలా మంది పొర‌పాటు ప‌డుతున్నారు. తాత్కాలికంగా సైలెంట్ ను పాటిస్తే అది క్ర‌మ‌శిక్ష‌ణ అయిపోతుందా? క‌చ్చితంగా కాదు. అవ‌స‌ర‌మైన స‌మ‌యంలో ఎవ‌రూ ఆదేశించ‌కపోయినా ఆటోమేటిక్ గా సైలెంట్ అయిపోవ‌డం క్ర‌మ‌శిక్ష‌ణ అంటే. క్ర‌మ‌శిక్ష‌ణ అనేది అంత‌ర్గ‌త‌మైన విష‌యం. అటువంటి అంత‌ర్గ‌త క్ర‌మ‌శిక్ష‌ణ‌ను టీచ‌ర్లు పిల్ల‌ల‌కు నేర్పించాలి. అల్ల‌రి చేయాల్సిన టైంలో చేస్తూనే క‌చ్చితంగా నిశ్శ‌బ్దం పాటించాల్సిన స‌మ‌యం ఆస‌న్న‌మైన‌ట్టు అల్ల‌రిని ప‌క్క‌న పెట్టి ఆ ప్ర‌దేశాన్ని, విష‌యాన్ని గౌర‌వించ‌గ‌ల‌గ‌డ‌మే నిజ‌మైన క్ర‌మ‌శిక్ష‌ణ‌.

నిజమైన క్రమశిక్షణ అంటే ఇలా ఉండాలి! 

    క్రమశిక్షణ అంటే మడిగట్టుకుని ఓ మూలన కూర్చోవడం కాదు. అన్ని విషయాలను ఆస్వాదిస్తూనే, ఆనందిస్తూనే అది అతి కాకుండా చూసుకోగలగడమే క్రమశిక్షణ అంటే..

• మద్యం తాగకుండా ఉంటే క్రమశిక్షణతో ఉన్నట్టు కాదు. మద్యం తాగి గొడవలు చేయడం ఎలా అయితే క్రమశిక్షణా రాహిత్యం అవుతుందో  అలానే మద్యం తాగకుండా గొడవలు చేయడం కూడా అంతే క్రమశిక్షణా రాహిత్యం. కాబట్టి క్రమశిక్షణ అనేది అంతర్గత విషయం. దాన్ని పెంపోందించుకోవాలి. మద్యం తాగడం తెలిసినా కూడా తనకు నచ్చినప్పుడు తనకు సౌకర్యంగా ఉన్నప్పుడు, తన వల్ల ఎవరికీ ఇబ్బంది కలగదు అనుకున్నప్పుడు మాత్రమే దాన్ని తాగడం నిజమైన క్రమశిక్షణ. 

• రోల్స్ రాయిస్ కార్స్ ఉన్నా కూడా చిన్న కార్లలో తిరగడం క్రమశిక్షణ అనిపించుకోదు. అవసరమైనప్పుడు రోల్స్ రాయిస్ లో తిరుగుతూనే నడవాల్సిన పరిస్థితి ఏర్పడినప్పుడు ఎటువంటి భేజషాలకు పోకుండా ఉండటమే క్రమశిక్షణ. 

• అమ్మాయిలతో మాట్లాడకపోవడం వాళ్ల సాంగత్యం లేకపోవడం క్రమశిక్షణ అనేందుకు వీలు లేదు. తన చుట్టూ ఎందరో స్త్రీలు ఉన్నా, ఎన్నో అనుకూలతలు ఉన్నా వాళ్లను గౌరవిస్తూ, వాళ్లకు విలువనిస్తూ వాళ్లతో ప్రేమగా ఉండగలగడం క్రమశిక్షణ.

• మంచి సౌకర్యాలతో అద్దాల మేడలో సౌకర్యంగా జీవించడం మంచిదే. ఆ స్థాయిని క్రమశిక్షణ ద్వారా సంపాదించుకున్నప్పటికీ అవసరమైతే ఇప్పటికీ నేలపై పడుకునేందుకు ఇబ్బందిపడకపోవడమే క్రమశిక్షణ. 

• ఫైవ్ స్టార్ హోట‌ల్ లో భోజ‌నం చేయ‌గ‌లిగే స్థాయిలో ఉండి కూడా అవ‌స‌ర‌మైతే రొడ్డు ప‌క్క‌న చిన్న కొట్టులో భోజ‌నం చేయ‌గ‌ల‌గాలి. అదీ క్రమశిక్షణ. 

• ఖ‌రీదైన బ‌ట్టలు వేసుకోగ‌లిగే స్తోమ‌త ఉండి కూడా కొన్ని సంద‌ర్భాల్లో ప‌రిస్థితుల‌కు త‌గ్గ‌ట్టు చౌక బ‌ట్టలు అయినా వేసుకుని తిర‌గ్గ‌ల‌గ‌డ‌మే క్ర‌మశిక్ష‌ణ. 

• జేబు నిండా డబ్బులు ఉండి విలాసవంతమైన జీవితాన్ని గడిపే సందర్భాలు క్రమశిక్షణ అనిపించుకోవు. అవసరమైతే జేబులో రూపాయి లేకున్నా అంతే ఆనందంగా, అంతే సౌకర్యంగా బతకగలిగే మానసిక స్థితిని సాధించడమే క్రమశిక్షణ అంటే. 

         ఇప్పుడు మనం చెప్పుకున్నటువంటి  మాన‌సిక క్ర‌మ‌శిక్ష‌ణే  మ‌న‌కు కావాల్సింది. కానీ మ‌న‌కు చిన్న‌ప్ప‌టి నుంచి మ‌ద్యం సేవించ‌క‌పోవ‌డం, డ‌బ్బులు దుబారా చేయ‌క‌పోవ‌డం, స్త్రీలోల‌త్వం లేక‌పోవ‌డం, జూదం ఆడ‌క‌పోవ‌డం వీటినే క్ర‌మ‌శిక్ష‌ణ అన్నవిధంగా నూరిపోస్తారు. ఇప్పుడు మ‌నం చెప్పుకున్న దుర‌ల‌వాట్లు లేక‌పోవ‌డం చాలా మంచిదే. అయితే దానికి క్ర‌మ‌శిక్ష‌ణ అన్న పేరు పెట్ట‌డ‌మే కాస్త‌ విడ్డూరంగా ఉంటుంది. మాన‌సిక స్వీయ నియంత్ర‌ణ ఉండ‌ట‌మే నిజ‌మైన క్ర‌మ‌శిక్ష‌ణ‌. నిజానికి మ‌ద్యం తాగ‌ని వ్య‌క్తి క‌న్నా మ‌ద్యం తాగ‌డం తెలిసి ఉండి కూడా త‌న‌కు తోచిన‌ప్పుడు మాత్ర‌మే మ‌ద్యం తాగ‌గ‌లిగే వ్య‌క్తి  మంచి నియంత్ర‌ణ‌తో మాన‌సికంగా ఆరోగ్యంగా ఉన్న‌ట్టు లెక్క‌.

ఓడిపోవ‌డం అంటే క్ర‌మ‌శిక్ష‌ణ త‌ప్పిన‌ట్టు కాదు!

       ముందుగా ప్లాన్ చేసుకున్నా ఒకటి రెండు సార్లు మ‌నం కొన్ని ప‌నులు చేయ‌డంలో మ‌నం విఫ‌ల‌మ‌వుతూ ఉంటాం. అంత మాత్రం చేత మ‌నం క్ర‌మ‌శిక్ష‌ణ త‌ప్పిన‌ట్టు కాదు. ఆ పనిని పూర్తి చేసే సామ‌ర్ధ్యం నాకుంద‌ని న‌మ్మి మ‌ళ్లీ రెట్టించిన ఉత్సాహంతో ప‌నిచేసి స‌క్సెస్ కావ‌డం క్ర‌మ‌శిక్ష‌ణ అనిపించుకుంటుంది. ఓషో చెప్పిన‌ట్టు మ‌నం ఏ విష‌యాన్నైనా గ‌ట్టిగా అదిమిపెడితే అది మ‌రింత ఒత్తిడితో పైకి లేచి మ‌న‌లో అల‌జ‌డిని రేపుతుంది. ఫ‌లానా విష‌యం విన‌కూడ‌దు, ఫ‌లానా ప‌ని చేయకూడ‌దు, చూడ‌కూడ‌దు అని మ‌నం అనుకున్న‌ప్పుడు మ‌న‌కు తెలీకుండానే దానిపై మ‌న‌కు ఆస‌క్తి పెరిగిపోతుంది. దాని వ‌ల‌న మ‌న‌స్సు ఆ ఫ‌లానా విష‌యం చుట్టూనే ప‌రిభ్ర‌మిస్తూ ఉంటుంది. ఆ చూడ‌కూడ‌ని, చేయ‌కూడని విష‌యాన్ని ఒకసారి అనుభ‌వంలోకి తెచ్చుకోగ‌లిగితే ఓస్ ఇంతేనా అనిపిస్తుంది. అప్పుడు దాన్ని అక్క‌డే వ‌దిలేసి జీవితంలో ముందుకు సాగిపోయేందుకు వీలు క‌లుగుతుంది.

త‌ప్పొప్పులను విశ్లేషించుకునే సామ‌ర్ధ్యం సాధించాలి!

      క్ర‌మ‌శిక్ష‌ణ‌కు ఒక్కొక్క‌రు ఒక్కో ర‌క‌మైన విశ్లేష‌ణ‌లు ఇచ్చినా స్వీయ నియంత్ర‌ణే నిజ‌మైన క్ర‌మ‌శిక్ష‌ణ అవుతుంది. అంతేకానీ మ‌ద్యం తాగ‌క‌పోతేనో, స్త్రీల‌తో మాట్లాడ‌క‌పోతేనో, డ‌బ్బు బాగా దాచిపెడితేనో  క్ర‌మ‌శిక్ష‌ణ ఉన్న‌ట్టు కాదు. అది సామాజిక క్ర‌మ‌శిక్ష‌ణ మాత్ర‌మే. అంత‌ర్గ‌త క్ర‌మ‌శిక్ష‌ణ అంటే దేన్నైనా మ‌న‌సుకు తీసుకోకుండా  చేయాల‌నుకున్న‌ప్పుడు చేస్తూ చేయొద్దు అనుకున్న‌ప్పుడు దాని ఊసే లేని మాన‌సిక దృఢ‌త్వ‌మే నిజ‌మైన క్ర‌మ‌శిక్ష‌ణ‌. ఇంకా చెప్పాలంటే సోసైటీలో క్ర‌మ‌శిక్ష‌ణ క‌ల్గిన మ‌నిషిగా గుర్తింపు పొందేందుకే ప్ర‌తీ ప‌నిని చేస్తూ అంత‌ర్గ‌తంగా అటువంటి వాటిపై మోజు పెంచుకోవ‌డం క్ర‌మ‌శిక్ష‌ణ అనిపించుకోదు. మీ ఒరిజినాలిటీని కోల్పోకుండా అదే స‌మ‌యంలో మిమ్మ‌ల్ని ప‌త‌నం చేసే దుర‌ల‌వాట్లను అదుపులో ఉంచుకోవ‌డ‌మే మీరు మ‌నిషిగా క్ర‌మ‌శిక్ష‌ణ‌తో ఎదుగుతున్నార‌న‌డానికి నిద‌ర్శ‌నం.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com