ప్ర‌తీ పేరెంట్స్ త‌మ పిల్ల‌ల కోసం చేయాల్సిన 5 ముఖ్య‌మైన ప‌నులు!

        త‌ల్లిదండ్రులు త‌మ పిల్ల‌లకు మంచి భవిష్య‌త్ ను అందించ‌డం కోస‌మే అహ‌ర్నిశ‌లు శ్ర‌మిస్తారు. వాళ్లకు సుఖ‌వంత‌మైన జీవితాన్ని అందించేందుకు ఎన్నో త్యాగాలు చేస్తారు. ప్ర‌స్తుత కాలంలో పిల్లల‌కు మంచి, నాణ్య‌మైన చ‌దువును అందించ‌డ‌మే ప్ర‌తీ పేరెంట్ త‌మ పిల్ల‌ల‌కు ఇచ్చే అద్భుత‌మైన బ‌హుమతి. ఇలా అందించాలంటే పిల్ల‌ల పెంప‌కంలో త‌ల్లిదండ్రులు ఎన్నో జాగ్ర‌త్త‌లు తీసుకోవాల్సి ఉంటుంది. ఆ జాగ్ర‌త్త‌ల‌తో పాటు ప‌క్కా ప్ర‌ణాళిక వేసుకుంటే తమ పిల్ల‌ల‌కు ఏం చేయాల‌నుకుంటున్నారో అవ‌న్నీ చేయ‌గ‌లుగుతారు. ముఖ్యంగా ఆర్థిక ప్ర‌ణాళిక‌, కెరీర్ ప్ర‌ణాళిక ఉంటే పేరెంట్స్ నెర‌వేర్చాల్సిన ఈ బృహ‌త్త‌ర బాధ్య‌త కాస్త సులువవుతుంది. త‌మ పిల్ల‌ల‌కు బంగారు భ‌విష్య‌త్ ను అందించేందుకు పేరెంట్స్ తీసుకోవాల్సిన కొన్ని ముఖ్య‌మైన విష‌యాల‌ను 'కెరీర్ టైమ్స్' లో ఇప్పుడు తెలుసుకుందాం.  

1. పిల్ల‌లకై పొదుపు ప్ర‌ణాళిక 

     ప్ర‌స్తుతం మ‌న దేశంలో విద్య అనేది చాలా ఖ‌రీదైన వ్య‌వ‌హారంగా మారిపోయింది. ఒక పిల్లవాడికి న‌ర్స‌రీ నుంచి డిగ్రీ వ‌ర‌కూ నాణ్య‌మైన విద్య‌ను అందించాలంటే మ‌న దేశంలో 30 నుంచి 40 ల‌క్ష‌ల వ‌ర‌కూ ఖ‌ర్చ‌వుతోంది. ద్ర‌వ్యోల్బ‌ణం ఆధారంగా ఇది ప్ర‌తీ సంవ‌త్స‌రం పెరుగుతూనే ఉంటుంది. రెండు ద‌శాబ్దాల క్రితం విద్యకు అయిన ఖ‌ర్చును ఇప్పుడు అవుతున్న ఖ‌ర్చును స‌రిపోల్చి చూసుకుంటే విద్య ఎంత ఖ‌దీరుగా మారిందో అర్ధ‌మ‌వుతుంది. ఇటువంటి ప‌రిస్థితుల్లో మీ పిల్ల‌ల‌కు నాణ్య‌మైన విద్యను అందించాలంటే పెద్ద మొత్తంలో డ‌బ్బు అవ‌స‌ర‌మ‌వుతుంది. అంత పెద్ద మొత్తాన్ని స‌మ‌కూర్చుకోవాలంటే మ‌ధ్య త‌ర‌గ‌తి వారికి భారంగా ఉంటుంది. అందుక‌ని పిల్ల‌ల చ‌దువు కోసం ముందు నుంచీ ఒక ప్ర‌ణాళిక వేసుకుంటే ఇటువంటి భారాన్ని త‌ట్టుకునే శ‌క్తి స‌మ‌కూరుతుంది. ప్ర‌తీ నెలా కొంత మొత్తాన్ని పొదుపు చేస్తూ ద్ర‌వ్యోల్బ‌ణానికి అనుగుణంగా మీ ఆర్థిక ప్ర‌ణాళిక ఉంటే మీ పిల్ల‌ల‌కు ఉన్న‌త చ‌దువుల‌కు ఎటువంటి ఆర్థిక ఇబ్బందీ త‌లెత్త‌దు. 

2. కెరీర్ కు దిశా నిర్దేశం 

      ఇప్ప‌టికీ చాలా మంది త‌ల్లిదండ్రులు త‌మ పిల్ల‌ల‌ను కుదిరితే మెడిసిన్ లేదంటే ఇంజినీరింగ్ చ‌దివించేందుకే ఇష్ట‌ప‌డుతూ ఉంటారు. కానీ ఇది స‌రైన ప‌ద్ధ‌తి కాదు. పిల్ల‌ల ఆకాంక్ష‌లు వాళ్ల అభిరుచుల ఆధారంగా ఎంచుకునే చ‌దువుకు పేరెంట్స్ ప్రోత్సాహం ఇవ్వాలి. అలా అని వాళ్లు ఏది చ‌దువుతా అంటే దానికి గుడ్డిగా త‌ల ఊప‌డం కాదు. కెరీర్ కు ఎటువంటి చ‌దువు ఉప‌యోగ‌ప‌డుతుంద‌న్న సందర్భం వ‌చ్చిన‌ప్పుడు త‌ల్లిదండ్రులు చాలా జాగ్ర‌త్త‌గా వ్య‌వ‌హించాలి. పిల్ల‌లు ఆస‌క్తితో ఎంచుకున్న కోర్సులో ఉన్న అనుకూల‌త‌ల‌తో పాటు ప్ర‌తికూల‌త‌ల‌ను కూడా వాళ్ల‌కు అర్ధ‌మ‌య్యేలా వివ‌రించాలి. కెరీర్ అంటే ఇష్టం కాదు బాధ్య‌త‌, జీవితం అని వాళ్ల‌కు తెలియ‌జెప్పాలి. ఢోకా లేని కెరీర్ కు ఊతిమిచ్చే కోర్సుల ఎంపిక‌లో పిల్ల‌ల‌కు స‌హాయం చేయాలి. పిల్ల‌ల అభిరుచుల‌ను, వాళ్ల ఆస‌క్తుల‌ను గౌర‌విస్తూనే అదే స‌మ‌యంలో వాళ్లు త‌ప్ప‌ట‌డుగులు వేయకుండా కేర్ తీసుకోవాలి. 

3. ల‌క్ష్యాల‌ను నిర్దేశించుకోవ‌డంలో స‌హాయం 

     కొంద‌రు త‌ల్లిదండ్రులు త‌మ క‌ల‌ల‌ను, ఆకాంక్ష‌ల‌ను పిల్ల‌ల‌పై రుద్దేందుకు ప్ర‌య‌త్నం చేస్తూ ఉంటారు. పిల్ల‌ల క‌ల‌ల వేరు త‌ల్లిదండ్రుల క‌ల‌లు వేరు. ఈ రెండింటికి మ‌ధ్య సంఘ‌ర్ష‌ణ త‌లెత్త‌కూడ‌దు అనుకుంటే త‌ల్లిదండ్రులు,  పిల్ల‌ల ఆకాంక్ష‌ల‌కు, వాళ్ల ల‌క్ష్యాలకు స‌హాయం చేయాలి. ఒక పెద్ద ల‌క్ష్యాన్ని నిర్దేశించుకుని దాన్ని సాధించేందుకు ఉండాల్సిన స‌మ‌గ్ర ప్ర‌ణాళిక‌ను త‌యారుచేసుకోవ‌డంలో పిల్ల‌ల‌కు పేరెంట్స్ హెల్ప్ చేయాలి. ఈ క్ర‌మంలో పిల్ల‌ల‌కు ఎదురయ్యే స‌వాళ్ల‌ను, సందేహాల‌ను ఎప్ప‌టిక‌ప్పుడు తొలిగిస్తూ వాళ్ల ల‌క్ష్య సాధ‌న‌లో మిత్రునిలా తొడుండాలి. కొన్నిసార్లు విప‌రీత‌మైన చ‌దువు ఒత్తిడితో పిల్ల‌లు అస‌హ‌నానికి గురైన‌ప్పుడు వాళ్ల‌ను స్థిమితంగా ఉంచాలి. ఇలాంటి ఒత్తిళ్లు తాత్కాలిక‌మైన‌వ‌వి చెప్పి గొప్ప ల‌క్ష్యం చేధించాలంటే ఇలాంటివి ఎన్నింటినో ఎదుర్కోవాల్సి వ‌స్తుంద‌ని వాళ్ల‌కు ధైర్యం ఇచ్చి ముందుండి న‌డిపించాలి. 

4. స్వ‌తంత్రంగా ఆలోచించేందుకు వీలు క‌ల్పించండి

         మ‌నం ముందు చెప్పుకున్న‌ట్టు మీ పిల్ల‌ల కెరీర్ ప్ర‌ణాళిక‌ల‌ను మీ క‌ల‌ల పేరుతో దారి త‌ప్పేలా చేయ‌కండి. మీ పిల్ల‌వాడికి డాక్ట‌ర్ చ‌ద‌వడం ఇష్టం లేక‌పోతే మీరు త‌ల‌కిందులుగా త‌ప‌స్సు చేసినా అత‌న్ని మంచి డాక్ట‌ర్ చేయ‌లేరు. వాళ్ల కెరీర్ పై భ‌విష్య‌త్ పై సొంతంగా ఆలోచించుకునేలా మీ పిల్ల‌ల‌కు స్వ‌తంత్రం ఇవ్వండి. వాళ్లు ఎంచుకున్న గ‌మ్యం, న‌డ‌వాల్సిన దారిలో ఒకవేళ ఏమైనా స‌మ‌స్య‌లు ఉంటే వాళ్ల‌కి అర్ధ‌మ‌య్యే రీతిలో వాళ్ల‌కు వివ‌రించే ప్ర‌య‌త్నం చేయండి. అలా కాకుండా మీరే చేయి ప‌ట్టుకుని న‌డిపించి గ‌మ్యం స్థానం చేర్చేస్తాన‌నుకుంటే వాళ్లు ఎప్ప‌టికీ స్వంతంగా ఆలోచించే శ‌క్తిని సంపాదించుకోలేరు. అనుభ‌వ‌పూర్వ‌కంగా తెలుసుకున్న‌దానికే విలువ ఉంటుంది. వాళ్ల సృజ‌నాత్మ‌క‌త‌ను, కొత్త‌గా ఆలోచించే శ‌క్తిని పెంపోదించుకునే క్ర‌మంలో ఎక్కువ  త‌ప్పులు , పెద్ద పొర‌పాట్లు దొర్ల‌కుండా జాగ్ర‌త్తగా ప‌ర్య‌వేక్షించండి. 

5. విప‌త్తులను ఎదుర్కొనే స‌త్తా నేర్పించండి

        జీవితంలో ప్ర‌తీ విష‌యం క‌ష్టంతో ముడిప‌డి ఉంటుంది. క‌ష్ట‌ప‌డ‌కుండా, ఎదురుదెబ్బ‌లు తిన‌కుండా దేన్నీ సుల‌భంగా సొంతం చేసుకోవ‌డం సాధ్యం కాదు. మనం ఎన్ని ప్ర‌ణాళిక‌లు వేసినా, ప్ర‌ణాళికాబ‌ద్ధంగా ముందుకెళ్లినా ఒక్కోసారి ప‌రిస్థితులు ఎదురు తిరుగుతాయి. ఇటువంటి స‌మ‌యంలో మీ పిల్ల‌ల‌కు మీరు ఎటువంటి స‌ల‌హాలు, సూచ‌న‌లు చేస్తార‌న్న‌ది చాలా ముఖ్యం. ఒక ప్ర‌ణాళిక తాత్కాలికంగా లేదా శాశ్వ‌తంగా విఫ‌ల‌మైన‌ప్పుడు మీ పిల్ల‌ల‌కు మీ నైతిక మ‌ద్ధ‌తు చాలా అవ‌స‌రం. ఉదాహ‌ర‌ణ‌కు మీ అబ్బాయి జాతీయ స్థాయి క్రీడాకారునిగా ఎదగాల‌ని ప్ర‌య‌త్నం చేసిన‌ప్పుడు కొన్ని కార‌ణాల వ‌ల‌న అత‌ను ఎంపిక కాలేద‌నుకోండి. వ‌చ్చే ఏడాది వ‌ర‌కు అత‌ను జాతీయ జ‌ట్టులో ఎంపిక‌కు ప్ర‌య‌త్నం చేస్తూనే అదే స‌మ‌యంలో జీవితంలో ఆర్థిక స్వాతంత్రం సాధించేందుకు ఏదైనా ప‌నిచేయ‌మ‌ని అత‌న్ని మీరు ప్రోత్సాహించాలి. దీనివ‌ల‌న క‌ష్టంలో ఉండే శ్ర‌మ‌,త‌న ఖ‌ర్చుల‌కు తానే డ‌బ్బులు సంపాదించుకోవాల‌న్న స్వ‌తంత్ర భావ‌న అత‌నిలో క‌లుగుతుంది.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                   You can send your Educational related articles to  careertimes.online1@gmail.com