ఇలా చేస్తే మీ జీతం పెర‌గడం ఖాయం!
ప్ర‌స్తుత కాలంలో విద్యార్ధికి, ఉద్యోగికి తీసుకునే ప్ర‌తీ నిర్ణ‌యము, వేసే ప్ర‌తీ అడుగు ఒక స‌వాలే. స‌మ‌యానికి త‌గ్గ‌ట్టు తెలివిగా వ్య‌వ‌హ‌రించే ఓర్పు, నేర్పు లేకుంటే రేసులో వెనుక‌బ‌డిపోవ‌డం ఖాయం. ఇటువంటి ఛాలెంజింగ్ ప‌రిస్థితుల్లో యువ‌త‌రం పోటీ, ప‌ని వాతావ‌ర‌ణానికి త‌గ్గ‌ట్టు త‌మను తాము తీర్చిదిద్దుకోవాల్సి ఉంది. ముఖ్యంగా చ‌దువు పూర్తిచేసి ఉద్యోగంలో కుదురుకున్నాక ఇక అంతా అయిపోయింది అని నిమ్మ‌కు నీరెత్తిన‌ట్టు కూర్చుంటే కెరీర్ లో వెనుక‌బడిపోతారు. ముఖ్యంగా ప‌దోన్న‌తుల‌లోనూ, వేత‌నం విష‌యంలోనూ యాక్టివ్ గా లేకుంటే చేదు అనుభ‌వాల‌ను చ‌విచూడాల్సి వ‌స్తుంది. ఎంత టాలెంట్ ఉన్నా బాస్ ద‌గ్గ‌ర త‌న ప‌నిని ప్ర‌మోట్ చేసుకోవ‌డంలోనూ, ఆత్మ‌విశ్వాసాన్ని ప్ర‌ద‌ర్శించ‌డంలోనూ విఫ‌ల‌మైతే జీతం పెంపులో మీకు హ్యాండ్ ఇచ్చేస్తారు. అలా జ‌ర‌గ‌కుండా ఉండేందుకు కెరీర్ లో కొన్ని జాగ్రత్తలు తీసుకోవ‌డం వ‌ల‌న వేత‌న పెంపులో మీదే పైచేయి గా ఉంటుంది.
మీ ప‌నితీరుపై పూర్తి సాధికారిత క‌లిగి ఉండండి
మీరు ఏడాది మొత్తం క‌న‌బర్చిన ప‌నితీరుపై ముందుగా ఒక అంచ‌నాకు రండి. మీ ప‌నితీరును నిజాయితీగా విశ్లేషించుకోవ‌డం వ‌ల‌న మీ ఆత్మ‌విశ్వాసం పెరుగుతుంది. అప్రైజ‌ల్ స‌మావేశానికి వెళ్లాక మీరు చేసిన ప‌నులు, సాధించిన ఘ‌న‌త‌ల‌పై మీ మేనేజ‌ర్ తో సాధికారికంగా మాట్లాడండి. ఈ క్ర‌మంలో త‌డ‌బ‌డ‌కుండా ఏడాది మొత్తంలో మీరు చూపించిన ప‌నితీరును ప్ర‌భావ‌వంతంగా చెప్పండి. మీ ప‌నితీరు గూర్చి చెపుతున్న‌ప్టుడు మ‌ధ్య‌లో త‌డ‌బ‌డితే మీ మేనేజ‌ర్ కు మీమీద స‌ద‌భిప్రాయం క‌లుగ‌దు. ఈ విష‌యంలో త‌గిన జాగ్రత్తలు పాటించండి. ఒకవేళ మీరు ఏమైనా పొర‌పాట్లు చేసి ఉంటే వాటిని కూడా నిజాయితీగా ఒప్పుకొండి. వాటిని మ‌ళ్లీ పునరావృతం చేయ‌న‌ని అవి త‌గిన పాఠాలు నేర్పాయ‌ని మేనేజ్ మెంట్ కు వివ‌రించండి. కంపెనీ యాజమాన్యం ఎప్పుడూ ప‌నితీరు కంటే నిజాయితీకే అధిక ప్రాధాన్య‌మిస్తుంద‌ని గుర్తించండి.అదే విధంగా కొత్త విషయాలను నేర్చుకునేందుకు కూడా సంసిద్ధంగా ఉన్నాన‌ని చెప్ప‌డం మ‌రువ‌కండి.
మీ గురించి మీరు తెలుసుకొండి!
ప్ర‌తీ ఒక్క‌రికి కొన్ని బ‌లాలు, అలాగే కొన్ని బ‌ల‌హీన‌త‌లు కూడా ఉంటాయి. వ్య‌క్తిగ‌త ప‌నితీరు కూడా దీనికి మిన‌హాయింపేమీ కాదు. ఒక ఉద్యోగి ఒక ప‌నిని చాలా బాగా చేయ‌గ‌లిగితే మ‌రో ప‌నిని అంత‌లా చేయ‌లేక‌పోవ‌చ్చు. బ‌లాలు, బ‌ల‌హీన‌త‌లు అనేవి ఆసక్తులు, శ‌క్తిసామ‌ర్ధ్యాలు మీద ఆధార‌ప‌డి ఉంటాయి. కెరీర్ లో ప్ర‌తీ ఉద్యోగి త‌న బ‌లాలు, బ‌ల‌హీన‌త‌ల గూర్చి క‌చ్చితంగా తెలుసుకోవాలి. అలా తెలుసుకోవ‌డం వ‌ల‌న ఏ విభాగంలో తాను అభివృద్ధి సాధించాలో అన్న‌దానిపై ఒక స్ప‌ష్ట‌త వ‌స్తుంది. ఇక ప‌నితీరు మదింపు స‌మావేశంలో యాజమాన్యం ముందు అవ‌స‌ర‌మైతే మీ బ‌ల‌హీన‌త‌ల‌ను, పొర‌పాట్ల‌ను ఒప్పుకునేందుకు సిగ్గుప‌డ‌కండి. పూర్తి విశ్వాసంతో మీ బ‌ల‌హీన‌త‌ను ఒప్పుకొండి. అదే సమయంలో ఆ బ‌ల‌హీన‌త‌ను అధిగ‌మించేందుకు చేస్తున్న ప్ర‌యత్నాల‌ను కూడా వివ‌రించండి. ఇలా చేయ‌డం వ‌ల‌న మీ నిజాయితీని, మీ ప‌ట్టుద‌ల‌ను కంపెనీ గుర్తిస్తుంది.
కెరీర్ పై మీ మేనేజ‌ర్ తో చ‌ర్చించండి!
కెరీర్ ఉన్న‌తిలో మీకున్న దీర్ఘ‌కాలిక లక్ష్యాలను, ప్ర‌ణాళిక‌ల‌ను ప‌నితీరు మదింపు స‌మావేశంలో మీ మేనేజ‌ర్ తో చ‌ర్చించండి. త‌న కెరీర్ ఉన్న‌తికి త‌న ప‌రిధిలో స‌హాయ స‌హాకారాలు అందించ‌మ‌ని కోరండి. కెరీర్ లో కొత్త ఎత్తులు చేరుకునేందుకు ఎంత క‌ష్ట‌మైనా ప‌డేందుకు సిద్దంగా ఉన్నాన‌ని, అదే సమయంలో కంపెనీ త‌రుపున మీరు కూడా స‌హ‌క‌రించమ‌ని అడ‌గండి. మేనేజ‌ర్ తో కెరీర్ ప్లాన్స్ కు సంబంధించిన వివ‌రాల‌ను స్వేచ్ఛ‌గా పంచుకోక‌పోతే, పార‌ద‌ర్శ‌కంగా ఉండ‌క‌పోతే అత‌ను మీపై అనుమానాస్ప‌ద వైఖ‌రిని పెంచుకుంటాడు. ఇది మీ ప‌దోన్న‌తి, వేత‌న పెంపుపై ప్ర‌భావం చూపుతుంది. దీంతో పాటు ఒక్కోసారి మీ ప‌నితీరుపై మీరు సంతృప్తిగా ఉండ‌వ‌చ్చు కానీ మిగిలిన వాళ్లు అసంతృప్తితో ఉండ‌వ‌చ్చు. అలా జ‌ర‌గ‌కుండా ఉండాలంటే మీ టీమ్ తో పాటు స‌హోద్యుగులను మీ ప‌నితీరు, వైఖ‌రి గురించి అడిగి తెలుసుకొండి. అతి విశ్వాసంతో వ్య‌వ‌హ‌రించకుండా మీ లోపాల‌ను తెలుసుకునేందుకు ఇది ఉప‌యోగ‌ప‌డుతుంది.
సానుకూల దృక్ఫ‌థంతో ఉండండి
వార్షిక ప‌నితీరు మ‌దింపులో మీ ప‌నితీరును, లక్ష్యాలను నిజాయితీగా చెప్పాక మిగ‌తా విషయాలను మేనేజ‌ర్ కు వ‌దిలేయాలి. స‌మావేశంలో గ‌ట్టిగా మాట్లాడ‌టం కానీ, త‌ల‌బిరుసుగా వ్య‌వ‌హ‌రించ‌డం కానీ అస్స‌లు చేయ‌కూడ‌దు. ఇలాంటి ప్ర‌వ‌ర్త‌న మీ ప‌దోన్న‌తిని, వేత‌న పెంపును ప్ర‌భావితం చేస్తుంది. స‌మావేశం ఆద్యంతం చాలా ప్ర‌శాంతంగా ఉండి మీ ప‌నితీరును నిజాయితీగా వివ‌రించి సానుకూల దృక్ఫ‌థంతో ఉండాలి. మీ ప‌నితీరుపై యాజమాన్యం సంతృప్తి చెందితే మీకు క‌చ్చితంగా ప‌దోన్న‌తితో పాటు వేత‌నం కూడా పెరుగుతుంది. వార్షిక వేత‌న మదింపు స‌మావేశంలో త‌గిన జాగ్రత్తలు తీసుకుంటే కెరీర్ లో ఎటువంటి వివాదాలు లేకుండా ముందుకు వెళ్ల‌వ‌చ్చు. కెరీర్ లో ఎన్నో ఉన్న‌త శిఖ‌రాల‌ను, లక్ష్యాలను అధిగ‌మించాల‌ని భావిస్తున్న ఉద్యోగులు ఈ జాగ్రత్తలు క‌చ్చితంగా పాటించాల్సిందే.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
You can send your Educational related articles to careertimes.online1@gmail.com
Comments
Post a Comment