కేస్ స్టడీ : ప్రణాళిక లేని 'కెరీర్ ఛేంజ్' ఓ ప్రమాదం!

       టెక్నాలజీ వినియోగం పెరగడం ఇప్పుడు కొత్త కెరీర్ లకు దారులు పరిచింది. దీంతో కెరీర్ లను ఎంచుకునేందుకు ఆష్షన్లు కూడా బాగా పెరిగాయి. ఒక కెరీర్ లో ఉన్న సానుకూలతలు, ఆదాయం వంటి వాటికి ప్రభావితమై చాలా మంది తాము ఉన్న కెరీర్ నుంచి కొత్త కెరీర్  లోకి అడుగుపెట్టేందుకు ఆసక్తి చూపిస్తున్నారు. అయితే ఈ కెరీర్ ఛేంజ్ అనేది సరైన ప్రణాళికతో, దీర్ఘకాలిక ఆలోచనతో చేయకంటే దానికి చెల్లించాల్సిన మూల్యం భారీగానే ఉంటుంది. కెరీర్ ఛేంజ్ ను ఏదో సామాన్య విషయంగా తీసుకుంటే కొత్త కెరీర్ లో ఇమడలేక అప్పటివరకూ నిర్మించుకున్న పాత కెరీర్ లోకి తిరిగి వెళ్లలేక జీవితం ఒక్కసారిగా సందిగ్దంలో పడిపోతుంది. కెరీర్ ఛేంజ్ లో చేయకూడని తప్పులు, తప్పనిసరిగా తీసుకోవాల్సిన జాగ్రత్తలను నిశితంగా గమనిస్తే ఎన్నో విషయాలు అవగతమవుతాయి. 

'కెరీర్ మార్పు' అంత ఈజీ కాదు!

        సుబ్బారావు ఓ స్కూల్ లో టీచర్ గా పనిచేస్తున్నారు. గణితం భోధించడంలో సుబ్బారావుకు సుబ్బారావే సాటి. పాఠశాల ముగిసాక ఆయన దగ్గర గణితం నేర్చుకునేందుకు విద్యార్ధులు క్యూ కట్టేవారు. దీంతో సుబ్బారావు ఆదాయం ఓ మోస్తరుగా బాగానే ఉండేది. అయితే ప్రస్తుతం డిజిటల్ మార్కెటింగ్ లో మంచి ఆదాయం వస్తోందని, డిజిటల్ మార్కెటింగ్ నేర్చుకుంటే తిరుగుండని కొందరు సన్నిహితులు సుబ్బారావుకు చెప్పారు. దీంతో సుబ్బారావులో కొత్త ఆలోచన సుడులు తిరిగింది. 15 ఏళ్లుగా టీచర్ గా పనిచేస్తున్నా పెద్దగా సంపాదించింది లేదు. అదే డిజిటల్ మార్కెటింగ్ లోకి వెళితే నెలకు 5 లక్షల వరకూ సంపాదించవచ్చని చెపుతున్నారు. నేను ఎందుకు డిజిటల్ మార్కెటింగ్ లోకి వెళ్లకూడదు. అని తనలో తాను అనుకున్నాడు. అనుకున్నదే తడువుగా నలుగైదుగురు సన్నిహితులకు ఈ విషయం చెప్పి టీచర్ ఉద్యోగం వదిలేసి డిజిటల్ మార్కెటింగ్ కోర్సులో జాయిన్ అయిపోయారు. మూడు నాలుగు నెలల పాటు ఆ కోర్సు నేర్చుకున్నాక ఇక సొంతంగా పని మొదలుపెట్టేందుకు సమాయుత్తమయ్యాడు. తెలిసిన వాళ్ల దగ్గరకు వెళ్లి ప్రాజెక్ట్ లు ఇవ్వమని అడిగాడు. ప్రారంభంలో ఒకటి రెండు ప్రాజెక్టులు చాలా వేగంగా వచ్చాయి. ఆ తర్వాత సుబ్బారావుకు ప్రాజెక్ట్ లు రావడం ఆగిపోయింది. దీంతో అతను దిక్కుతోచని స్థితిలో పడ్డాడు. ఆదాయం పడిపోయింది. కెరీర్ ప్రమాదంలో పడింది. 

అసలు సుబ్బారావు కెరీర్ ఎందుకు ప్రమాదంలో పడింది? 

    మొదట్లో బాగా పరిచయమున్న వ్యక్తుల నుంచే సుబ్బారావుకు ప్రాజెక్టులు వచ్చాయి. ముఖం పరిచయం వలన ఆ ప్రాజెక్టులు ఇచ్చారు కానీ సుబ్బారావు సామర్ధ్యం మీద నమ్మకంతో కాదు. అయితే వాస్తవానికి ఆ ప్రాజెక్టులు ఫెయిల్ అయ్యా యి! మొహమాటం కారణంగా ఆ విషయం వాళ్లు సుబ్బారావుకు చెప్పలేదు. ఇక సుబ్బరావు కూడా ప్రాజెక్టు హ్యాండిల్ చేసాక అది ఫెయిల్ అయిందా? ఎంత బాగా చేసాను? అన్న విషయాలను అసలు పట్టించుకోలేదు. దీంతో అతని కొత్త కెరీర్ పరిచయాలతో వచ్చిన రెండు ప్రాజెక్ట్ ల దగ్గరే ఆగిపోయింది. అతను హ్యాండిల్ చేసిన రెండు ప్రాజెక్ట్ లు అంతగా విజయవంతం కాలేదన్న విషయం మార్కెట్లో బాగా పాకిపోయింది. ఈ విషయాన్ని సుబ్బారావు గ్రహించలేకపోయాడు. మార్కెట్లో క్రెడిబిలిటీ చాలా ముఖ్యం. ఒక్కసారి చెడ్డపేరు వస్తే దాన్ని తొలిగించడం అసాధ్యం. ప్రాజెక్టులు రాక సుబ్బారావుకు ఆర్థిక ఇబ్బందులు మొదలయ్యాయి. సుబ్బారావు డిజిటల్ మార్కెటింగ్ కెరీర్ ఈ విధంగా ప్రమాదంలో పడ్డాక అతను తిరిగి తన పాత కెరీర్ లోకి వెళ్లాలని భావించాడు. కానీ అప్పటికే అతని స్థానాన్ని వేరొకరు ఆక్రమించారు. అతని దగ్గర ట్యూషన్ కు వచ్చిన స్టూడెంట్స్ అందరూ మరో కొత్త టీచర్ ను వెతుక్కున్నారు. దీంతో ఇటు డిజిటల్ మార్కెటింగ్ లో కొనసాగలేక అటు తన పాత టీచింగ్ కెరీర్ లోకి వెళ్లలేక సుబ్బారావు కెరీర్ సంక్షోభంలో చిక్కుకుంది. 

సుబ్బారావు కెరీర్ ఛేంజ్ విఫలం కావడానికి కారణాలు:

• సుబ్బారావు వయస్సు 40 ఏళ్లు. డిజిటల్ మార్కెటింగ్ మొదలై నాలుగైదేళ్లు అవుతోంది. 

• డిజిటల్ మార్కెటింగ్ లో చాలా వేగంగా పనిచేయాల్సి ఉంటుంది. 40 ఏళ్ల సుబ్బారావుకు అది అసాధ్యం.

• సుబ్బారావుకు టీచింగ్ లో 15 ఏళ్ల అనుభవం ఉన్నా డిజిటల్ మార్కెటింగ్ లో కేవలం 6 నెలల అనుభవం మాత్రమే ఉంది. 

• కొత్త తరం కుర్రాళ్లు ప్రస్తుత ట్రెండ్ కు తగ్గట్టు అప్‌ డేట్ అవుతూ వేగంగా ప్రాజెక్టులు పూర్తి చేయగలరు. 

• ఇలా ఎప్పటికప్పుడు టెక్నాలజీ విషయంలో అప్‌డేట్ అవుతూ కుర్రాళ్లలా వేగంగా పనిచేయడం సుబ్బారావుకు సాధ్యం కాదు. 

ఏం చేస్తే సుబ్బారావు కెరీర్ వెలిగిపోయేది!

• సుబ్బారావు ఎంఎస్సీ మ్యాథ్స్ పూర్తి చేసారు కాబట్టి భోధనలోనే తన కెరీర్ ను కొనసాగించి ఉంటే బాగుండేది. 

• ఆదాయం కాస్త తక్కువ ఉన్నప్పుడు దాన్ని పెంచుకునే మార్గాలను అన్వేషించాలి. 

• ఆయన ఎంఎస్సీ మ్యాథ్స్ కు అదనంగా పీహెచ్‌డీ, ఎంఫిల్ లు చేసుంటే అతనికి మరిన్ని అవకాశాలు తలుపు తట్టేవి.  

• ఇలా చేయడం వలన చాలా మంది స్కాలర్స్ తో పరిచయాలు పెరిగి ఉండేవి. అతని నైపుణ్యాలు కూడా పెరిగేవి. 

• పీహెచ్‌డీ పూర్తి చేయడం మంచి హోదాతో పాటు విద్యార్ధులకు గైడ్ గా పనిచేసే అవకాశం వచ్చి ఉండేది. దీని వలన అదనపు రాబడికి అవకాశం కలిగేది.

• దీంతో పాటు తన ఫీల్డ్ లో డిజిటల్ టెక్నాలజీకి అనుగుణంగా భోధనలో అవకాశాలను ఒడిసిపట్టుకుంటే వ్యాపారవేత్తగా రాణించేందుకు కూడా అవకాశం వచ్చేది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com