ముఖం చాటేస్తే మార్కెట్లో ఉండ‌రు!

     వ్యాపారానికి న‌మ్మకం మూలాధారం. న‌మ్మ‌కం కొర‌వ‌డిన రోజున ఎంత‌పెద్ద‌ వ్యాపారమైనా నిట్ట‌నిలువునా కుప్ప‌కూలుతుంది. ఒక సంస్థ యొక్క న‌మ్మ‌కం, నాణ్య‌త‌ దాని బ్రాండ్ లో ప్ర‌తిబింబిస్తుంది. మీరు వ్యాపార‌వేత్త‌గా రాణించాలంటే ముందుగా ఈ విష‌యాన్ని గుర్తించాలి. ఒక వేళ కంపెనీకి ఇంకా బ్రాండ్ ఏర్ప‌డ‌కుంటే మీరే ఒక బ్రాండ్. మీ బ్రాండ్ ను కాపాడుకోవాలంటే ముందుగా మీరు న‌మ్మ‌కాన్ని కాపాడుకోవాలి. అలా కాపాడుకోవాలంటే ముందుగా మీ క్ల‌యింట్ల‌తో మీ వెండార్స్ తో మీ క‌స్ట‌మ‌ర్ల‌తో క‌మ్యూనికేష‌న్ గ్యాప్ రాకుండా చూసుకోవాలి. వాళ్ల‌కు ఎట్టి ప‌రిస్థితుల్లోనూ ముఖం చాటేయ‌కూడ‌దు. ఈ విధంగా చేస్తే మీ వ్యాపారం, మీ బ్రాండ్ అంకుర స్థాయిలోనే మ‌ట్టిలో క‌లిసిపోతాయి. స్టార్ట‌ప్ లు పెట్టి వ్యాపార‌వేత్త‌లుగా రాణించాల‌నుకుంటున్న యువ‌తరం ఈ విష‌యాల‌ను స‌రిగ్గా గుర్తించ‌కుంటే ఇబ్బందుల్లో ప‌డ‌తారు. ఇది ఒక్క వ్యాపారంలోనే కాదు  జీవ‌న నైపుణ్యాల్లో కూడా ముఖం చాటేయ‌క‌పోవ‌డం, క‌మ్యూనికేష‌న్ గ్యాప్ లేకుండా చూసుకోవ‌డం అన్న‌ది చాలా ముఖ్య‌మైన విష‌యం. 

మీరే మీ కంపెనీకి బ్రాండ్!

      ఒక రిల‌య‌న్స్ ఇండ‌స్ట్రీస్, ఒక టాటా స‌న్స్ వంటి అత్యున్న‌త సంస్థ‌లు గొప్ప బ్రాండ్స్ ను క్రియేట్ చేసుకున్నాయి. వాళ్ల సంస్థ‌ల్లో కేవ‌లం బ్రాండ్ మాత్ర‌మే మాట్లాడుతుంది. అక్క‌డ ఉద్యోగుల‌తో వ్యాపార లావాదేవీలు నిర్వ‌హించడానికి వచ్చిన వాళ్లు ఆ బ్రాండ్స్ ను చూసి మాత్ర‌మే మాట్లాడ‌తారు.వ్య‌క్తుల‌తో కాదు. ఒక బ్రాండ్ కు  ఉన్న ప‌వ‌ర్ అలా ఉంటుంది. మ‌న వ్యాపారం గూర్చి మార్కెట్లో మ‌న బ్రాండ్ చెప్పాలి. ఒక బ్రాండ్  క్రియేట్ అయ్యాక‌ మ‌నం చిన్న చిన్న పొర‌పాట్లు చేసినా వ్యాపారం న‌డిచిపోతుంది.  అయితే బ్రాండ్ క్రియేట్ కావ‌డం అంత సులువైన విష‌యం కాదు. మీ సంస్థ‌కు బ్రాండ్ క్రియేట్ అయ్యేవ‌ర‌కూ మీరే ఒక బ్రాండ్. మీ కంపెనీ విలువను కాపాడుకోవాలంటే మీ బ్రాండ్ విలువ‌నూ కాపాడుకోవాలి.  మీ వ్య‌క్తిత్వాన్ని నిలుపుకుంటూనే మార్కెట్లో మీ ప‌ర‌ప‌తిని, విలువ‌నూ పెంచుకోవాలి. నీ వ్యాపారానికి నువ్వే బ్రాండ్ వి కాబ‌ట్టి ఎట్టి ప‌రిస్థితుల్లోనూ ముఖం చాటేయ‌కూడ‌దు. క‌మ్యూనికేష‌న్ గ్యాప్ అస్స‌లు ఉండకూడ‌దు. 

వ్యాపారాన్ని నిల‌బెట్టుకోవాలంటే ఈ ప‌నులు చేయాల్సిందే! 

     వ్యాపారంలో అన్నింటిక‌న్నా ముఖ్యం న‌మ్మకం. ఒక్కసారి న‌మ్మ‌కం చెదిరిపోతే తిరిగి దాన్ని సంపాదించుకోవ‌డం క‌ష్ట‌సాధ్యంగా మారుతుంది. మ‌నం ముందు చెప్పుకున్న‌ట్టు మీ సంస్థ‌కు ఒక  బ్రాండ్ ను క్రియేట్ చేసుకునే క్ర‌మంలో ప్రారంభంలో మీరే ఒక బ్రాండ్. వెండార్స్ అయినా క్ల‌యింట్స్ అయినా మిగిలిన ఎవ‌రైనా మీపై ఉన్న న‌మ్మ‌కంతోనే మీతో లావాదేవీలు నిర్వ‌హిస్తారు. అటువంటి స‌మ‌యంలో ఎట్టి ప‌రిస్థితుల్లోనూ నిర్ల‌క్ష్యంగా వ్య‌వ‌హ‌రించ‌కూడ‌దు. ఇబ్బందులు వ‌చ్చిన‌ప్పుడు ప్ర‌త్య‌క్షంగా ఆయా వ్య‌క్తుల‌తో మాట్లాడాలి. ప‌రిస్థితిని వాళ్ల‌కు వివ‌రించే ప్ర‌య‌త్నం చేయాలి. అంతేకానీ ముఖం చాటేస్తే వాళ్ల‌తో మీ సంబంధం చెడిపోతుంది. అదే స‌మయంలో మీ వ్యాపారం  కూడా ఇబ్బందుల్లో ప‌డుతుంది. ఉదాహ‌ర‌ణకు మీరు ఒక నెల ఆఫీస్ రెంట్ ఇవ్వ‌లేని ప‌రిస్థితి ఎదురైంది అనుకోండి . ఆ విష‌యాన్ని ప్రాప‌ర్టీ ఓన‌ర్ కు క్లియ‌ర్ గా వివ‌రించండి. అత‌ను క‌చ్చితంగా అర్ధం చేసుకుంటాడు. అలా కాకుండా అత‌నికి ముఖం చాటేస్తూ వేరే వాళ్ల‌తో ఆ విష‌యాన్ని చెప్పిస్తే అత‌నికి మీకు మ‌ధ్య దూరం పెరిగిపోతుంది. మీరే కంపెనీకి బ్రాండ్ కాబ‌ట్టి అత‌నితో నేరుగా మీరే మాట్లాడి విష‌యాన్ని వివ‌రిస్తే మీ కంపెనీ మ‌నుగ‌డ‌కు న‌ష్టం వాటిల్ల‌కుండా ఉంటుంది. 

అహాన్ని సంతృప్తి ప‌ర్చ‌డం నేర్చుకున్నారా? 

      మీరు నేరుగా ఒక వ్య‌క్తితో మాట్లాడాల్సిన విష‌యంలో మూడో వ్య‌క్తిని తీసుకురావ‌డం వ‌ల‌న అవ‌త‌లి వాళ్ల అహం దెబ్బ‌తింటుంది. అస‌లు వాస్త‌వానికి వ్యక్తులు అహాన్ని సంతృప్తి ప‌రిచే కిటుకు తెలియ‌డ‌మే వ్యాపారంలో అత్యంత కీల‌కమైన విష‌యం. మీరు ఒక వ్య‌క్తికి కొంత మొత్తం బాకీ ఉన్నారు అనుకుందాం. డబ్బు తిరిగి చెల్లించ‌డంలో కాస్త ఆల‌స్య‌మ‌య్యే ప‌రిస్థితులు ఉన్నాయి. అటువంటి స‌మ‌యంలో మీరే నేరుగా అత‌నితో మాట్లాడి ఇప్పుడు డ‌బ్బులు ఇవ్వ‌లేను సార్..కొంచెం స‌మ‌యం కావాలి అని చెపితే అత‌ను క‌చ్చితంగా మిమ్మ‌ల్ని విశ్వ‌సిస్తాడు. ఎందుకంటే మ‌నిషి త‌నం అహం దెబ్బ‌తింటే ఊరుకోడు. ఆ అహాన్ని సంతృప్తి ప‌రిస్తే చాలా అత‌ను మనకు ఎన్ని అవ‌కాశాలు అయినా ఇస్తాడు. ఈ విష‌యాన్ని ఔత్సాహిక వ్యాపార‌వేత్త‌లు గుర్తించాలి. అవ‌త‌లి వాళ్ల‌ అహాన్ని సంతృప్తి ప‌ర్చ‌కుండా, క‌మ్యూనికేష‌న్ గ్యాప్ ను సృష్టించుకుంటూ ఉంటే త‌న వ్య‌క్తిగ‌త ఇమేజ్ తో పాటు వ్యాపారం కూడా ఇబ్బందుల్లో ప‌డుతుంది.  

క‌మిట్‌మెంట్ బ్రాండ్ కు వెలుగునిస్తుంది! 

      వ్యాపారాన్ని ప్రారంభించి ఒక బ్రాండ్ ను నిర్మించుకునే క్ర‌మంలో క‌మిట్‌మెంట్ అనేది చాలా ముఖ్యం. చెప్పిన టైం కు చెప్పిన ప‌నిని ప‌క్కాగా చేయ‌డం మీ వ్యాపారానికి చాలా ముఖ్యం.ఇది ఒక్క క్ల‌యింట్ల‌తోనే కాదు వెండార్స్ , రుణ‌దాత‌లతో కూడా ఇదే విధమైన కమిట్‌మెంట్ ను ప్ర‌ద‌ర్శించాలి. అనుకున్న స‌మ‌యానికి చెల్లింపులు చేయ‌డం మీ క్రెడిబిలిటీని పెంచుతుంది. ఒక వేళ ఒక‌టీ ఆరా సంద‌ర్భాల్లో చెల్లింపులు ఆల‌స్య‌మైనా వాళ్లు మీ బ్రాండ్ ఇమేజ్ ను కాపాడుతారు. ఇది కేవ‌లం క‌మిట్‌మెంట్ ద్వారానే సాధ్య‌మ‌వుతుంది. బ్రాండ్ ఇమేజ్ పెంచుకునే క్ర‌మంలో వ్య‌క్తిగ‌త ఇమేజ్ ను పెంచుకుంటూ దాన్ని నీ సంస్థ బ్రాండ్ కు బ‌దిలీ చేయాలి. అప్పుడే ఒక విజ‌య‌వంత‌మైన వ్యాపార సంస్థ‌, ఒక విజ‌య‌వంత‌మైన బ్రాండ్ క్రియేట్ అవుతాయి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com