ఆత్మసంతృప్తి, ఆర్థిక స్థిరత్వం అందించే కెరీర్స్ ఏంటో తెలుసా?

      ఇది పోటీ ప్రపంచం. రేస్ లో నిలవాలంటే కెరీర్ ప్లాన్ పక్కా ఉండాలి..ఆరోగ్యంగా, ఆర్థికంగా  ఫిట్ గా ఉండాలి. ఇవన్నీ ఉన్నప్పుడే జీవితం అనే పరుగుపందెంలో విజేతలుగా నిలుస్తాం. ప్రతీ రోజూ సాగే ఈ పరుగులో ఒక్క క్షణం ఆగితే మనల్ని దాటుకుని వెళ్లిపోయేందుకు వందల మంది రెడీగా ఉంటారు. చక్కటి ప్లానింగ్ కు తోడు వాటిని సక్రమంగా అమల్లో పెట్టే క్రమశిక్షణ ఉన్నవాళ్లే విజేతలుగా నిలుస్తారు. అయితే ఈ ప్రణాళిక అనేది అంత సులువైన విషయం ఏమాత్రం కాదు. జీవితాన్ని డిసైడ్ చేసే ఈ ముఖ్యమైన విషయాల్లో ఎవరికి వారు స్వంతంగా సరైన నిర్ణయాలు తీసుకోలేరు. అటువంటి సమయంలో మంచి సలహాలు, సూచనలు ఇచ్చే నిపుణులు అవసరం కలుగుతుంది. చదువు దగ్గర్నుంచి ఉద్యోగం వరకూ, ఆరోగ్యం నుంచి ఆర్థికం వరకూ ఇలా ముఖ్యమైన విషయాల్లో సలహాలు ఇచ్చే నిపుణులకు ఇప్పుడు చాలా డిమాండ్ ఉంది. ఆసక్తి , అనుభవం, నమ్మకం ఉంటే చాలు వీళ్ల సలహాల కోసం క్యూలు కడతారు. ఎందుకంటే ఇప్పుడు అందరికీ కావాల్సింది తమను సరైన దారిలో నడిపించే మంచి సలహా. ప్రారంభంలో కాస్త కష్టపడితే ఆత్మసంతృప్తితో పాటు ఆర్థికంగా కూడా మంచి స్థిరత్వం అందించే అటువంటి కెరీర్స్ పై ఇప్పుడు ఓ లుక్కేద్దామా? 

కెరీర్ కౌన్సిలర్ 

        ఇంటర్ తర్వాత ప్రతీ విద్యార్ధి క్రాస్ రోడ్డులో నిల్చుంటాడు. తర్వాత ఏం చేయాలి? ఇంజినీరింగ్ చదవాలా? లేక మెడిసిన్ చేస్తే బాగుంటుందా? లేక స్పోర్ట్స్ వైపు వెళితే ఎలా ఉంటుంది? ఇలాంటి రకరకాల సందేహాలు వేధిస్తూ ఉంటాయి. ఇటువంటి సమయంలో ఎవరికి సరైన నిర్ణయాలు తీసుకోలేరు. ఎందుకంటే అవి సరైనవి కాకపోతే జీవితం తలకిందులు అయిపోతుంది. కాబట్టి నిపుణుల సలహాలు, సూచనలు తప్పనిసరిగా తీసుకోవాలి. కోర్సులు, కెరీర్స్ పెరిగిపోయాయి కాబట్టి కెరీర్ కౌన్సిలర్స్ సహాయం తీసుకోవడం తప్పనిసరిగా మారింది. విద్యార్ధులతో పాటు తల్లిదండ్రులకు కూడా వీరు కౌన్సిలింగ్ ఇస్తారు. పిల్లవాడి ఆసక్తులేమిటి? ఏం చేస్తే అతను రాణిస్తాడు. అన్న విషయాలను గమనించి సరైన సలహాను ఇస్తాడు. పేరెంట్స్ ఆకాంక్షలు పెద్దగా ఉండి పిల్లవాడికి అంత శక్తి సామర్ధ్యాలు లేనప్పుడు నిర్మోహమాటంగా వాళ్లకు ఆ విషయం చెప్పి అతనికి తగ్గ చదువును, కెరీర్ ను సూచిస్తాడు. పేరెంట్స్ ముందుగానే కెరీర్ లేదా ఎడ్యుకేషన్ కౌన్సిలర్ల సలహా తీసుకోవడం వలన ఎంతో ఉపయోగం ఉంటుంది. ఆసక్తి లేని చదువుల వలన పిల్లల ఆత్మహత్యలు పెరిగిన నేపథ్యంలో మన దేశంలో ఇప్పుడు కెరీర్ కౌన్సిలింగ్ కు ఆదరణ పెరుగుతోంది. నమ్మకమైన సలహా ఇస్తారన్న గుర్తింపు వస్తే చాలా కెరీర్ కౌన్సిలర్స్ కు తిరుగుండదు. రానున్న రోజుల్లో కెరీర్ లేదా ఎడ్యుకేషన్ కౌన్సిలింగ్ తప్పనిసరిగా మారుతుంది కాబట్టి ఈ రంగంలో నిపుణులకు మంచి అవకాశాలు వస్తాయి. 

సర్టిఫైడ్ ఫైనాన్సియల్ ప్లానర్ 

      పొదుపు అనేది మన భారతీయ సంస్కృతిలో ఒక భాగం. సంపాదించిన దాంట్లో భవిష్యత్ కోసం కాస్త దాచిపెట్టాలని చిన్నతనం నుంచి మనకు నేర్పిస్తారు. మన దేశంలో పొదుపు సంస్కృతి  ఉంది కానీ ఎక్కువ రాబడులు ఇచ్చే పొదుపు పథకాల గూర్చి ప్రజలకు సరైన అవగాహన లేదు. ఇప్పటికీ చాలామంది సంప్రదాయ పొదుపు పద్ధతులనే అవలంభిస్తున్నారు. రోజురోజుకూ ద్రవ్యోల్బణం పెరిగిపోతున్న నేపథ్యంలో సంప్రదాయ పొదుపు పద్ధతులు సరైన ఫలితాలను ఇవ్వవు.ఈ నేపథ్యంలో పొదుపు మంచి మార్గాలను చూపించే ఆర్థిక నిపుణులు అవసరం ఏర్పడింది. ద్రవ్యోల్బణాన్ని మించి రాబడులు సాధించే పథకాలను సూచించడం, భవిష్యత్ అవసరాలు, ఆర్థిక లక్ష్యాల కోసం ఒక సమగ్ర ఆర్థిక ప్రణాళిక వేయడం వంటి పనులు సర్టిఫైడ్ ఫైనాన్సియల్ ప్లానర్స్ చేస్తారు. మన దేశంలో ఇప్పుడిప్పుడే స్టాక్‌మార్కెట్ , రియల్ ఎస్టేట్, బాండ్లు వంటి పెట్టుబడులపై అవగాహన పెరుగుతోంది. ఈ నేపథ్యంలో సరైన పెట్టుబడి సాధనాల కోసం సలహాలను ఇచ్చే నిపుణులకు మంచి డిమాండ్ ఉంది. ముఖ్యంగా పన్ను ప్రణాళిక ముఖ్యంగా మారాక వీరి అవసరం, ప్రాధాన్యత మరింతగా పెరిగాయి. కాస్త ఓపిక, సబ్జెక్ట్ పట్టు ఉంటే చాలు ఫైనాన్సియల్ ప్లానర్ గా రాణించడం చాలా సులభం. సంఘంలో మంచి పేరుతో పాటు డబ్బు సంపాదనకు ఇది చాలా మంచి రంగం. 

న్యూట్రిషియనిస్ట్

     మనం అనారోగ్యానికి ప్రధాన కారణం మన తీసుకునే ఆహారమే. నియంత్రణ లేకుండా అవగాహన లేకుండా ఏది పడితే అది తినడం వలనే ఇప్పుడు ఊబకాయం, ఇతర అనారోగ్య సమస్యలు తలెత్తుతున్నాయి. ఆరోగ్యంగా ఉండాలంటే మంచి ఆహారం తీసుకోవడం, సరైన వేళకు తినడం చాలా ముఖ్యం. అయితే తమ శరీర తత్వానికి, బరువుకు ఎటువంటి ఆహారం తీసుకోవాలన్న దానిపై చాలా మందికి అవగాహన ఉండదు. ఈ ఉరుకుపరుగుల జీవితంలో మంచి ఆహారాన్ని తీసుకోవడం అంటే సవాలే. ఇటువంటి పరిస్థితుల్లో విభిన్న జీవన శైలి పద్ధతులకు అనుగుణంగా సరైన ఆహారాన్ని సూచించే నిపుణులకు కూడా డిమాండ్ పెరిగింది. ఏ ఆహారం ఎంత మోతాదులో తీసుకోవాలన్న విషయాన్ని వీరు సూచిస్తారు. ఇటీవలి కాలంలో ప్రజలకు ఆరోగ్యంపై శ్రద్ధ పెరిగింది. అనారోగ్యాలకు భయపడి మంచి ఆహారం తీసుకునేందుకు రెడీ అవుతున్నారు. దీంతో పోషకాహార నిపుణులకు అవకాశాలు పెరిగాయి. మంచి సలహాలు, సూచనలు ఇచ్చి క్లయింట్లను పెంచుకుంటే న్యూట్రిషియనిస్ట్ కెరీర్ కు ఎటువంటి ఢోకా లేదు. 

సర్టిఫైడ్ ఫిటినెస్ ట్రైనర్స్ 

     ఇక జీవన శైలిలో వచ్చిన మార్పుల కారణంగా శారీరక శ్రమ అనేది తగ్గిపోతోంది.  కూర్చుని లేవకుండానే కొంచెం దూరం నడవకుండానే పనులు జరిగిపోవడంతో చాలా మందికి ఫిట్‌నెట్ ఉండటం లేదు. దీని వలన రకరకాల ఆరోగ్య సమస్యలు తలెత్తుతున్నాయి. శారీరక వ్యాయామం లేకపోవడం ఇటువంటి సమస్యలు ఉత్పన్నమవుతున్నాయి. దీంతో మంచి ఆహారంతో పాటు వ్యాయామానికి కూడా ప్రాధాన్యత పెరిగింది. ఇక యువతకు కూడా తమ ఫిట్‌నెస్ తో పాటు శారీరక రూపంపై శ్రద్ధ పెరగడంతో ఫిట్‌నెస్ ట్రైనర్స్ కు డిమాండ్ ఏర్పడింది. వారంలో ఎన్ని రోజులు వ్యాయామం చేయాలి? రోజుకు ఎన్ని గంటలు చేయాలి? వయస్సుకు అనుగుణంగా ఎటువంటి వ్యాయామాలను ఎంచుకోవాలి? అన్న సలహాలను ఇచ్చేందుకు ఫిట్‌నెస్ ట్రైనర్స్ చాలా ముఖ్యం. అందుకే ఇప్పుడు జిమ్ లతో పాటు ఫిట్‌నెట్ ట్రైనర్స్ కెరీర్ కు మంచి ఆదరణ. క్లయింట్ల శరీర స్వభావానికి అనుగుణంగా వాళ్ల ఫిట్‌నెస్ ను తీర్చిదిద్దే నేర్పు ఉంటే ఈ రంగంలో ఉన్నవారికి తిరుగుండదు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com