'పార్కింగ్' కరెక్ట్‌గా ఉంటే లైఫ్ కరెక్ట్‌గా ఉన్నట్టే!!

     ఈ ఆధునిక ప్ర‌పంచంలో సామాజిక‌, వ్య‌క్తిగ‌త విలువ‌లు అన్న‌వి ఒక విధంగా అరుదైపోయాయ‌నే చెప్పాలి.  ప్ర‌తీ రోజూ చేసే జీవ‌న పోరాటంలో గెలుపు కోసం అర్రులు చాస్తూ అంద‌రూ త‌మ‌కు తెలియ‌కుండానే స్వార్ధం అనే ఉచ్చులో చిక్కుకుంటున్నారు.  ఈ స్పీడ్ యుగంలో ప‌క్క‌వాడి క‌న్నా ముందుండాల‌నే తాప‌త్ర‌యంలో త‌న వ్య‌క్తిగ‌త స్వార్ధం‌కే ప్రాధాన్యత నిస్తున్నారు. తాను బాగుండాలి అనుకోవ‌డంలో త‌ప్పు లేదు కానీ తాను మాత్ర‌మే బాగుండాలి అన్న ఆలోచ‌నా విధానం ఇబ్బందుల‌ను క‌లుగజేస్తోంది. ఇటువంటి స్వార్ధ చింత‌న ఎంత‌వ‌ర‌కూ వెళుతోంది అంటే త‌న కోసం త‌ప్పితే స‌మాజం, సాటి మ‌నుష్యుల కోసం కొంచెం కూడా ఆలోచించలేని సంకుచిత మ‌న‌స్త‌త్వానికి దారితీస్తోంది. ఈ క్ర‌మంలో చాలా మంది త‌మ‌ వ‌ల‌న తాము చేసే ప‌నుల వ‌ల‌న‌ వేరే వాళ్లు ఇబ్బందులు ప‌డ‌తార‌మేమోన‌న్న‌ అన్న ఇంగితం కూడా మ‌ర్చిపోతున్నారు. ఇటువంటి ప‌రిణామం మ‌నుష్య‌ల మ‌ధ్య‌ సంబంధాల‌ను దెబ్బ‌తీయడంతో పాటు వ్య‌క్తిగ‌తంగా, విలువ‌ల ప‌రంగా మ‌నిషిని ప‌త‌నం చేస్తోంది. అవ‌త‌లి వారు ఏమైపోతే నాకేంటి అనుకునే వారు వారికి తెలియ‌కుండానే ఒక ర‌క‌మైన మానసిక వైకల్యానికి గురై వ్యక్తిగ‌త  ప‌త‌నం దిశగా సాగుతున్నారు.   

వాహ‌నాన్ని పార్కింగ్ చేయ‌డం తెలిస్తే లైఫ్ లో పాస్ అయిన‌ట్టే! 

     ఏంటీ..వాహ‌నాన్ని పార్క్ చేయ‌డం తెలిస్తే లైఫ్ లో పాస్ అయిన‌ట్టా?  పార్క్ చేయ‌డం వ‌చ్చినంత మాత్రాన జీవితంలో ఎదుగుద‌ల ఎలా సాధ్యం? ఈ హెడ్డింగ్ చ‌దివిన వెంట‌నే మీకు సందేహం రావ‌డం స‌హ‌జం.  ప్ర‌స్తుతం మ‌హా న‌గ‌రాల్లో పార్కింగ్ అనేది అతిపెద్ద స‌మ‌స్య‌. ఎప్పుడూ వేలాది వాహ‌నాలు తిరిగే రోడ్ల‌పై ఎవ‌రైనా ఒక్క‌ వాహ‌నాన్ని త‌ప్పుగా పార్క్ చేస్తే చాలు ఎన్నో వాహ‌నాలు నిలిచిపోయి మార్గం అంతా అస్త‌వ్య‌స్థ‌మై ప్ర‌యాణం చేస్తున్న వాళ్లంతా తీవ్రంగా ఇబ్బందులు ప‌డాల్సి వ‌స్తుంది. కేవ‌లం ఒక్క‌రు చేసిన త‌ప్పు అంత మందికి  ఇబ్బంది క‌లుగుతుంది. ఈ విష‌యాన్ని అర్ధం చేసుకుంటే ఎవ్వ‌రూ రాంగ్ ప్లేస్ లో ఇత‌రులకు ఇబ్బంది క‌లిగించేలా వాహ‌నాన్ని పార్క్ చేయ‌రు. కానీ అలా జ‌ర‌గ‌డం లేదు. ఎందుకు? మ‌ంచి దుస్తులు వేసుకుని, మంచి వాహ‌నాల్లో తిరుగుతున్న వాళ్లు కూడా రోడ్డు ప‌క్క‌న వాహ‌నాన్ని పార్క్ చేస్తూ త‌న ప‌ని అయిపోయిందా లేదా అని చూసుకుంటున్నారు త‌ప్పితే త‌న వాహ‌నం వ‌ల‌న ఎంత మంది ఇబ్బంది ప‌డ‌తారు అన్న విష‌యాన్ని ప‌ట్టించుకోవ‌డం లేదు. ఇటువంటి వ్య‌క్తులు  జీవితంలో ఒక వ్యక్తిత్వం, గౌరవం లేకుండా అప్రతిష్ఠను మూటగట్టుకుంటారు. మనిషిగా ఎదగడంలో విఫలమవుతారు. 

పార్కింగ్ అనేది మన మన:స్థితిని తెలియజేస్తుంది!

మన ఆలోచనల్లోని స్వచ్చత మనం చేసే పనుల్లో కనిపిస్తుంది. మంచి హృదయం ఉన్న వాళ్లు, బాధ్యతతో మెలిగే వాళ్లు తమ వాహనం పార్కింగ్ ను కూడా అంతే పొందికగా చేస్తారు. ఎందుకంటే తమ వలన ఎదుటి వ్యక్తులు ఇబ్బందులు పడకూడదన్నది వారి ఆలోచన. ఈ విధంగా ఆలోచించే వారు ఎప్పుడూ ఆనందంగా ఉంటారు. ఇతరులతో, తన సాటివారితో మంచి సంబంధాలను కొనసాగిస్తారు. సమాజం పట్ల, వ్యవస్థ పట్ల గౌరవాన్ని కలిగి ఉంటారు. ఇటువంటి మన:స్థితి ఉన్న వారి మానసిక, శారీరక ఆరోగ్యం బాగుంటుంది. ఇక వీరికి భిన్నమైన మనస్తత్వం ఉన్నవారు పక్కవారి అసౌకర్యాన్ని అర్ధం చేసుకోకుండా, తమకు సౌకర్యంగా ఉన్నచోట అడ్డదిడ్డంగా పార్క్ చేస్తూ తమ హీన మన:స్థితిని చాటుకుంటూ ఉంటారు. అపరిమితమైన స్వార్థంతో  బాధ్యత లేకుండా మెలిగే వ్యక్తులు తీవ్ర మానసిక రుగ్మతతో బాధపడుతున్నట్టు . ఎందుకంటే వారి అంతరంగంలో ఉన్న అపరిపక్వత, అస్తవ్యస్థ ఆలోచనలు వారి చేసే పనుల్లో ప్రస్ఫుటమవుతూ ఉంటాయి. రోడ్డుకి అడ్డంగా, అందరికీ అసౌకర్యం కలిగేలా వాహనాన్ని పార్క్ చేయడం కూడా ఒక విధమైన మాసినక రుగ్మత.  

వ్యక్తిగతంగా ఎదగాలంటే క్రమశిక్షణ తప్పనిసరి! 

      పూర్వ కాలంలో ఒక వ్యక్తిని విచారించవలసి వచ్చినప్పుడు అతని అలవాట్లను విశ్లేషించేవారు. అతను ఎంత బాధ్యతగా వ్యవహరిస్తున్నాడు? సాటి మనుష్యుల పట్ల, సమాజం పట్ల ఎలాంటి దృక్ఫధం కలిగి ఉన్నాడు? అన్న విషయాలను బేరీజు వేసుకుని తీర్పులు చెప్పేవారు. ఎందుకంటే తన అలవాట్లతో అతను తన మన:స్థితిని తనే బహిర్గతం చేసుకుంటాడు. ఉదాహరణకు ఒక కంపెనీకి ఇంటర్వ్యూకు వెళ్లిన వ్యక్తి  అక్కడి నిబంధనలను ఉల్లంఘించి అడ్డదిడ్డంగా పార్క్ చేసాడనుకుందాం. ఆ విషయాన్ని కంపెనీ వ్యక్తులు గుర్తిస్తే అతను ఇంటర్వ్యూలో ఎంత బాగా సమాధానాలు చెప్పినా అతనికి వాళ్లు ఉద్యోగం ఇవ్వరు. ఎందుకంటే ఉన్నతంగా ఎదగాలనుకునే కంపెనీలు నైపుణ్యాలు లేకున్నా సహిస్తాయి కానీ బాధ్యతగా ప్రవర్తించడం రాని వ్యక్తులను భరించలేవు. ఎందుకంటే మనిషిగా ఎదగకుండా అపరిపక్వతతో ఉన్న వ్యక్తులు చాలా ప్రమాదకారులు. ఎందుకంటే వారు తమకు తామే కీడు చేసుకోవడంతో పాటు ఎదుటి వాళ్లకు కీడు తలపెడతారు. ఈ విషయాన్ని విద్యార్ధులు, ఉద్యోగులు కచ్చితంగా గుర్తించాలి. మనిషిగా ఎదిగేందుకు ప్రయత్నం చేస్తే ఆటోమేటిక్ గా కెరీర్ లో కూడా ఉన్నతిని సాధించేందుకు అవకాశం కలుగుతుంది. 

బాధ్యత లేనప్పుడు స్వేచ్ఛకు విలువ లేదు!

       మనం మన వెహికల్ ను నిర్దేశించిన ప్రదేశంలో చక్కగా పార్క్ చేస్తున్నామంటే మనం మనిషిగా ఎదుగుతున్నట్టు. మనం పక్కవాడికి ఇబ్బంది కలిగించడం లేదంటే పక్కవాడి అసౌకర్యాన్ని గుర్తించి అతన్ని గౌరవిస్తున్నామని అర్ధం. ఇలాంటి ఆలోచన ఉంటే మన వ్యక్తిత్వం ఉన్నతంగా ఉన్నట్టు. మనిషిగా పై స్థాయిలో ఉన్నట్టు. అలా కాకుండా పక్కవాళ్ల అసౌకర్యం మీకు ఆనందాన్ని కలిగిస్తుంది అంటే మీ మానసిక స్థితిపై అనుమాన పడాల్సిందే. ఎందుకంటే శాడిస్టిక్ మనస్తత్వం ఉన్నవాళ్లే ఎదుటి వ్యక్తులు బాధపడుతుంటే చూసి ఆనందిస్తారు. మనం అటువంటి వాళ్లం కాదు అనుకుంటే బాధ్యతగా మెలగాల్సిందే. మన వాహనాన్ని సరైన ప్రదేశంలో పార్క్ చేసి మన వ్యక్తిత్వాన్ని కాపాడుకుందాం. బాధ్యతగా మెలుగుదాం. ఎందుకంటే బాధ్యతగా ఉండటం వలన మనకు మనం మేలు చేసుకోవడంతో పాటు ఎదుటి వ్యక్తులకు కూడా మేలు చేస్తాం. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com