'జేమ్స్ బాండ్' లాంటి థ్రిల్లింగ్ ఉద్యోగం చేయాలని ఉందా?

     వాస్త‌వానికి విజ‌య‌వంత‌మైన‌ కెరీర్ అంటే మ‌నసుకు న‌చ్చిన ప‌నిని చేయ‌డ‌మే. ఎవ‌రైతే ఏం ప‌ని చేస్తే తాము ఆనందిస్తామో ఆ ప‌ని చేస్తూ ఆ పనికి త‌గిన డ‌బ్బులు సంపాదిస్తున్నారో వాళ్లే స‌క్సెస్‌ఫుల్ కెరీర్ ను లీడ్ చేస్తున్న‌ట్టు. చేసే ప‌నిలో ఆనందం లేకుంటే ఎంత జీతం వ‌చ్చినా, ఎంత డ‌బ్బు సంపాదించినా అది సంతృప్తిని ఇవ్వ‌దు. అందుకే కెరీర్ ను ఎంచుకునేట‌ప్పుడు ఆచితూచి అడుగులు వేయాలి. మనం చిన్న‌ప్ప‌టి నుంచి జేమ్స్ బాండ్ సినిమాలు, షెర్లాక్ హోమ్స్ సినిమాలు చూసి ఉంటాం. అందులో ఉండే హీరోల్లా సాహ‌సాలు చేస్తూ, నేర ప‌రిశోధ‌న చేసే ఉద్యోగం చేయాల‌ని చాలామంది అనుకుంటారు. అయితే చాలా మంది అనుకోవ‌డం ద‌గ్గ‌రే ఆగిపోతారు. అనుకోవ‌డ‌మే కాదు ఆస‌క్తి, ప‌ట్టుద‌ల ఉంటే జేమ్స్ బాండ్, షెర్లాక్ హోమ్స్ లా మీరూ సాహ‌సాలు చేయొచ్చు. స‌మాజంలో నేరాలు, ఘోరాలు, అక్ర‌మాలు పెరిగిపోవ‌డంతో  ఇప్పుడు అప‌రాధ ప‌రిశోధ‌కులు అవ‌సరం భారీగా ఏర్ప‌డింది. ఈ నేప‌థ్యంలో సాహసం, కాస్త ఓపిక మ‌రికాస్త స‌హ‌నం ఉన్న‌వాళ్లు డిటెక్టివ్ కెరీర్ ను ఎంచుకుంటే అద్భుతంగా రాణించొచ్చు. 



డిటెక్టివ్ ల‌కు భారీ డిమాండ్! 

    ఈ ఆధునిక ప్ర‌పంచంలో వేగ‌వంతమైన అభివృద్ధితో పాటు అంతే వేగంగా నేరాలు కూడా పెరిగిపోతున్నాయి. టెక్నాల‌జీ పెరిగిపోవ‌డంతో నేర‌స్తులు పోలీసుల క‌ళ్లుగ‌ప్పి త‌మ కార్య‌క‌లాపాలు సాగిస్తున్నారు. మ‌రోవైపు మ‌నుష్యులు ఒక‌రిని మ‌రొక‌రు న‌మ్మించి మోసం చేసుకుంటూ విలువ‌ల‌కు తిలోద‌కాలు ఇస్తున్నారు. దీంతో  నేరగాళ్లు, మోస‌గాళ్ల‌పై నిఘా పెట్టాల్సిన అవ‌స‌రం ఏర్ప‌డింది.  దీంతో డిటెక్టివ్ ఏజెన్సీల‌కు చేతినిండా పని. ఎందుకంటే త‌గిన సిబ్బంది లేక‌పోవ‌డంతో చాలా కేసుల్లో పోలీసులే ప్ర‌యివేట్ డిటెక్టివ్ ల స‌హాయం తీసుకుంటున్నారు. మ‌రోవైపు కుటుంబ క‌ల‌హాలు, గొడ‌వ‌లు పెరిగిపోవ‌డంతో వ్య‌క్తుల‌పై నిఘా పెట్ట‌డం కూడా అనివార్యంగా మారిపోయింది. దీంతో ఇప్పుడు డిటెక్టివ్ కెరీర్ ను అనేది ఒక థ్రిల్లింగ్ హాట్ కెరీర్ గా రూపుదిద్దుకుంది. 



ఈ నైపుణ్యాలుంటే  కెరీర్ వెలిగిపోతుంది! 

     డిటెక్టివ్ లుగా రాణించాల‌నుకునే వాళ్ల‌కు కాస్త న్యాయ ప‌రిజ్ఞానం ఉండాలి. దీంతో పాటు కంప్యూట‌ర్ స్కిల్స్ కూడా త‌ప్ప‌నిసరి. అలాగే ప్ర‌తీ విష‌యాన్ని బాగా ప‌రిశీలించే నేర్పు, విశ్లేష‌ణా నైపుణ్యాలు కావాలి. వీటిన్నింటితో పాటు నీతి, నిజాయితీ ఉంటే కెరీర్ లో బాగా రాణించేందుకు వీలు క‌లుగుతుంది. మంచి క‌మ్యూనికేష‌న్ స్కిల్స్ కు తోడు చేప‌ట్టిన ప‌నిని ఎట్టి ప‌రిస్థితుల్లోనైనా పూర్తి చేయాల‌న్న ప‌ట్టుద‌ల ఉన్న‌వాళ్లకు ఈ కెరీర్ స‌రిపోతుంది. డిటెక్టివ్ లుగా రాణించాల‌నుకునేవాళ్ల‌కు ముఖ్యంగా కావాల్సిన‌వి ఆత్మ‌విశ్వాసం, ఓర్పు, స‌హ‌నం అల‌వ‌ర్చుకోవ‌డం త‌ప్ప‌నిస‌రి. ఇక ఈ వృత్తిలో అనేక స‌వాళ్లు, ఒత్తిడులు ఉంటాయి. ముందు మ‌నం చెప్పుకున్న‌ట్టు స‌వాళ్ల‌ను ఒక థ్రిల్ గా ఫీల‌య్యే వారికి ఈ కెరీర్ స‌రిగ్గా స‌రిపోతుంది. కొన్ని సంద‌ర్భాల్లో ప్రాణాపాయ ప‌రిస్థితి కూడా ఎదురుకావ‌చ్చు. ఇలాంటి వాటిని ధైర్యంగా, ధీటుగా ఎదుర్కోనే ధైర్యం కావాలి. 


ప్రతీ రంగానికీ డిటెక్టివ్‌ల అవసరముంది!

     అప‌రాధ ప‌రిశోధ‌కులుగా కాస్త పేరు గ‌డిస్తే చాలు. వీరి కెరీర్ కు ఇక ఎటువంటి ఢోకా లేదు. ప్ర‌యివేట్ డిటెక్టివ్ ఏజెన్సీలు, న్యాయ‌సేవా సంస్థ‌లు ,ఇన్సూరెన్స్ కంపెనీలు, వివిధ కౌన్సిల్, ప్ర‌యివేట్, కార్పోరేట్ సంస్థ‌లకు వీరి అవ‌స‌రం ఎప్పుడూ ఉంటుంది. ప్ర‌స్తుతం చాలా మంది లాయ‌ర్లు కేసుల‌ను చేధించేందుకు డిటెక్టివ్ ల‌ స‌హాయం తీసుకుంటున్నారు.ముఖ్యంగా విడాకులు, ద‌త్త‌త‌, అనుమానాస్ప‌ద వ్య‌క్తుల‌పై నిఘా, త‌ప్పిపోయిన వారిని వెతికిపెట్ట‌డం వంటి పనులు వీరి ప్ర‌మేయం లేకుండా ముందుకు సాగ‌డం లేదు.  సుధీర్ఘ‌కాలంగా కొన‌సాగుతున్న కోర్టు కేసులు  ఇటీవ‌లి కాలంలో వీరి సేవ‌ల‌తో చాలా త్వ‌ర‌గా ముగిసిపోతున్నాయి.  



సరైన ప్లానింగ్ తో కెరీర్ కు ధీమా! 

    డిటెక్టివ్ గా కెరీర్ ను ఎంచుకునేందుకు ప్రత్యేకంగా విద్యార్హతలు అంటూ ఏమీ లేవు. డిగ్రీ తర్వాత క్రిమినాలజీ, ఫోరెన్సిక్ సైన్స్ కోర్సులు చేసిన వారు ఈ రంగాన్ని ఎంచుకుంటే మరింతగా రాణించొచ్చు. ఇక క్లయింట్లను ఆకట్టుకునేందుకు అవసరమైన బిజినెస్ స్కిల్స్, మార్కెటింగ్ స్కిల్స్ ఉంటే బాగుంటుంది. ముందుగా ప్రయివేట్ ఇన్వెస్టిగేటర్ల వద్ద కొంతకాలం పనిచేసి అనుభవం సంపాదిస్తే తర్వాత డిటెక్టివ్ ఏజెన్సీల్లో మంచి ఉద్యోగాలను పొందొచ్చు. అలాగే మరికాస్త అనుభవం ఉంటే సొంతగా డిటెక్టివ్ ఏజెన్సీని కూడా ఏర్పాటు చేసుకోవచ్చు. డిటెక్టివ్ లుగా మారాలనుకుంటున్న ఔత్సాహికులకు ఈ కెరీర్ కు సంబంధించిన సమాచారం కావాలంటే అసోసియేషన్ ఆఫ్ ప్రైవేట్ డిటెక్టివ్స్ అండ్ ఇన్వెస్టిగేటర్స్ , కౌన్సిల్ ఆఫ్ ఇంటర్నేషనల్ ఇన్వెస్టిగేటర్స్ , వరల్డ్ అసోసియేషన్ ఆఫ్ డిటెక్టివ్స్ వంటి సంస్థల వెబ్‌సైట్లను చూడొచ్చు. ఇక ఈ కోర్సులును ఆఫర్ చేస్తున్న విద్యా సంస్థల వివరాలకొస్తే ఢిల్లీ యూనివర్సిటీ, డాక్టర్ బీఆర్ అంబేద్కర్ యూనివర్సిటీ -ఆగ్రా, యూనివర్సిటీ ఆఫ్ మైసూర్, నేషనల్ ఇన్‌స్టిట్యూట్ ఆఫ్ క్రిమినాలజీ అండ్ ఫోరెన్సిక్ సైన్స్. డిటెక్టివ్ గా రాణించడం సినిమాల్లో చూపించినంత సులభం కాకపోయినా సవాళ్లను స్వీకరించే గుణం, థ్రిల్ ను కోరుకునే మనస్తత్వం ఉన్న యువత ఈ కెరీర్ ను ఎంచుకోవచ్చు. 




ఈ ఫీచ‌ర్ పై  గైడెన్స్ కావాల్సిన వారు  క్రింది నెంబర్ వాట్సాప్ గ్రూప్ లో చేరచ్చు.
97006 09135



                         You can send your Educational related articles to  careertimes.online1@gmail.com

Comments

Popular posts from this blog

అదృష్టాన్ని జేబులో పెట్టుకు తిరగడం ఎలా?

24.."టైం మిష‌న్"..!

ఈ 'కెరీర్' తో కంపెనీకి, మీడియాకు మధ్య వారధి మీరే కావచ్చు!!