కెరీర్ లో 'మిడ్ లెవెల్ సంక్షోభాన్ని' ఎదుర్కోవడం మీకు తెలుసా?

     ఇటీవలి కాలంలో ఐటీ రంగంలో ఉద్యోగుల తొలిగింపు అనేది సర్వ సాధారణంగా మారిపోయింది.  పది నుంచి 15 ఏళ్ల అనుభవం ఉన్న సీనియర్లకు పింక్ స్లిప్ అనేది గుండెల్లో గుబులు పుట్టిస్తోంది. ముఖ్యంగా ఐటీ రంగంలో ఆటోమేషన్ ప్రక్రియ ప్రారంభం కావడంతో ఎక్కువ జీతాలు అందుకుంటున్న వారిని, మిడిల్ లెవెల్ ఎగ్జిక్యూటివ్స్ ను వదిలించుకునేందుకు కంపెనీలు రెడీ అయ్యాయి. దీంతో పది, పదిహేనేళ్ల అనుభవం సాధించి 40 ఏళ్లకు చేరుకున్న ఉద్యోగుల్లో తీవ్ర అభద్రతాభావం నెలకొంది. గడిచిన ఏడాది కాలంలో ఐటీ రంగంలో ఇలాంటి మిడిల్ ఎగ్జిక్యూటివ్ ‌లు దాదాపు 70 వేల మందికి పింక్ స్లిప్ లు జారీ చేసారు.  దీంతో ఆ రంగంలో సీనియర్లు భయపడుతున్నారు. ఇటువంటి సంక్షోభంలో కెరీర్ ను ఎలా కాపాడుకోవాలి? ఏం చేస్తే మనుగడ సాధ్యమవుతుంది? అన్న విషయాలపై 'కెరీర్ టైమ్స్' ప్రత్యేక విశ్లేషణ. 

సమస్యకు మూల కారణం 'నైపుణ్యాల లేమి'!

    ప్రస్తుతం చాలా కంపెనీలు తమ బిజినెస్ స్ట్రాటజీని మార్చుకున్నాయి.  లేటెస్ట్ టెక్నాలజీని సొంతం చేసుకుని తక్కువ ఖర్చుతో ఎక్కువ ఉత్పత్తి , సేవల కోసం ప్రయత్నం చేస్తున్నాయి. అందులో భాగంగానే మానవ వనరులను వీలైనంత వరకూ తగ్గించుకుని  ఖర్చును అదుపులో ఉంచుకుంటూ మార్కెట్ పోటీలు ముందువరుసలో నిలవాలని ప్లాన్ చేస్తున్నాయి. అందుకే నైపుణ్యాల్లో అప్‌డేట్ గా ఉన్నవారిని ఎటువంటి పరిస్థితుల్లో అయినా పనిచేసే వారినే ఉద్యోగాల్లోకి తీసుకోవాలని నిర్ణయించుకున్నాయి. అందుకే ఇప్పుడు ఎక్కువ జీతాలు ఉన్న మిడిల్ లెవెల్ ఎగ్జిక్యూటివ్స్ ను వదిలించుకోవాలిన భావిస్తున్నాయి. అందుకే పింక్ స్లిప్ లు జారీ చేస్తూ  ఉద్యోగుల గుండెల్లో గుబులు రేపుతున్నాయి. ముఖ్యంగా ఐటీ రంగంలో ఈ ట్రెండ్ నడుస్తోంది. కొత్త నైపుణ్యాలు లేకుండా అధిక జీతాలు తీసుకుంటున్న వారిని ఇంటికి పంపేందుకు చాలా కంపెనీలు రెడీ అవుతున్నాయి. తరచి చూస్తే ఈ ఉద్యోగాల తొలిగింపుకు సరైన నైపుణ్యాలు లేకపోవడమే ప్రధాన కారణంగా కనిపిస్తోంది. 

షార్ప్ గా లేకుంటే షాక్ తగలడం ఖాయం! 

     ప్రస్తుతం ఐటీ రంగంలో మనుగడ సాగించాలంటే సంప్రదాయ స్కిల్స్ ఉంటే సరిపోదు. క్లౌడ్ కంప్యూటింగ్, డేటా మైనింగ్, బిగ్ డేటా, డేటా అనాలసిస్, సైబర్ సెక్యూరిటీ వంటి నైపుణ్యాలను సొంతం చేసుకోవాలి. మరోవైపు ఆర్టిఫిషియల్ ఇంటెలిజెన్స్ అనేది చాలా వేగంగా దూసుకొస్తోంది. ఇటువంటి పరిస్థితుల్లో ఉద్యోగాన్ని కాపాడుకోవాలంటే నైపుణ్యాలకు పదును పెట్టుకోవడం ఒక్కటే మార్గం. ఆర్టిఫిషియల్ ఇంటెలిజెన్స్ అనేది ఒక్క ఐటీ రంగానికే పరిమితం అనుకుంటే పొరపాటు. రానున్న రోజుల్లో ఇది తయారీ, ఫైనాన్సియల్ సర్వీసెస్, సేవలు, ఫార్మా వంటి రంగాల్లో కూడా అడుగుపెడుతుంది. కాబట్టి ఆయా రంగాల్లోని ఉద్యోగులు కూడా నైపుణ్యాలను పెంచుకోవాల్సిందే. మార్కెట్లో డిమాండ్ ఉన్న స్కిల్స్ ను నేర్చుకోకుంటే ఉద్యోగం ప్రమాదంలో పడినట్టే. 

నిరంతర విద్యార్ధిగా ఉండాలి!

    మార్కెట్, కంపెనీల అవసరాలను అందుకునేందుకు ప్రస్తుతం చాలా మార్గాలు అందుబాటులో ఉన్నాయి. చాలా ఇన్‌స్టిట్యూట్స్ ఈ అప్‌డేటేడ్ స్కిల్స్ కు సంబంధించి సర్టిఫికేట్ కోర్సులను ఆఫర్ చేస్తున్నాయి. వాటిల్లో చేరి కొత్త సాంకేతికతను నేర్చుకోవాలి. అన్నింటికంటే ముఖ్యంగా నిరంతరం నేర్చుకుంటూ ఉంటేనే తప్ప ఉద్యోగం భద్రత సాధ్యం కాదన్న వాస్తవాన్ని గుర్తించాలి. ఆ వాస్తవానికి అనుగుణంగానే నిరంతర విద్యార్ధిగా ఉండాలి. మీ టీమ్ ను మరింత బాగా పనిచేసేందుకు అనుసరించాల్సిన విధానాలు, కొత్తగా అందుబాటులోకి వచ్చిన మార్గాలను ఎప్పటికప్పుడు తెలుసుకోవాలి. ఈ క్రమంలో ఈ స్కిల్స్ పై పట్టు సాధించాలి. 

1. బిగ్ డేటా, డేటా అనాలసిస్ పై పట్టు 
2. క్లౌడ్ కంప్యూటింగ్ లో నైపుణ్యాలు 
3. రీసెర్చ్ ఒరియెంటేషన్ 
4.ఇంటర్నెట్ ఆఫ్ థింగ్స్ పై సాధికారత 
5. రోబోటిక్ టెక్నాలజీపై స్కిల్స్ 

సంక్షోభాన్ని సవాలు చేసేందుకు రెడీగా ఉండండి! 

     మనం ఇప్పుడు చెప్పకున్నట్టు ఎన్ని నైపుణ్యాలు ఉన్నా, ఎంత అప్‌డేట్ గా ఉన్న కంపెనీల విధానాల వలన ఉద్యోగాన్ని కోల్పోవాల్సిన పరిస్థితి రావచ్చు. ఇటువంటి సమయంలో సవాళ్లను ఎదుర్కోవడానికి సర్వ సన్నద్ధంగా ఉండాలి. మానసిక ధైర్యాన్ని కోల్పోకుండా అందుబాటులో ఉన్న ఇతర మార్గాలపై ఫోకస్ చేయాలి. ఒక కంపెనీలో ఉద్యోగం పోయిన వెంటనే మరో కంపెనీలో ఉద్యోగం దొరకడం కష్టమే. కానీ కాస్త విరామం వచ్చినా ఆందోళన పడకుండా కొత్త జాబ్ కోసం ట్రై చేయాలి. దొరికిన విరామంలో తనకు లేని నైపుణ్యాలను పెంచుకునేందుకు అలాగే డబ్బు సంపాదనకు అవసరమైతే ఫ్రీలాన్సింగ్ కూడా చేసేందుకు సిద్ధపడాలి. తర్వాత తనకు సరిపోయే జాబ్ కోసం అన్వేషించాలి. 

• ఉద్యోగం పోయాక ఆందోళన చెందకుండా అవసరమైతే చిన్న కంపెనీలో కూడా ఉద్యోగం చేసేందుకు రెడీ కావాలి. 

• మార్కెట్లో డిమాండ్ ఉన్న నైపుణ్యాలను తెలుసుకుని అందులో పట్టు సాధించాలి. 

• తమ నైపుణ్యాలకు సరిపోయే కంపెనీలను గుర్తించి అందులో ఉద్యోగం కోసం ప్రయత్నం చేయాలి. 

• కంపెనీలు ఏ నైపుణ్యాలకు పెద్ద పీట వేస్తున్నాయో తెలుసుకుని అందుకు అనుగుణంగా తనను తాను మలుచుకోవాలి. 

రీ-స్కిల్లింగ్ తో రేసులో నిలవండి! 

      15 ఏళ్ల అనుభవం సాధించాక కూడా ఇప్పటికీ నేర్చుకోవాలా? అన్న ఆలోచనను పూర్తిగా విడిచిపెట్టేయాల్సిందే. ఎందుకుంటే రీ స్కిల్ విషయంలో ముందంజంలో ఉంటేనే యువతతో పోటీ పడేందుకు అవకాశం ఉంటుంది. అప్పుడు మాత్రమే ఉద్యోగాన్ని కాపాడుకునే పరిస్థితులు ఉంటాయి. మిడిల్ లెవెల్ ఎగ్జిక్యూటివ్స్ ఈ విషయంలో మాత్రం చాలా అప్రమత్తంగా, వ్యూహాత్మకంగా వ్యవహరించాల్సిందే.  కొత్త కోర్సులు నేర్చుకునేందుకు, నైపుణ్యాలను మెరుగుపెట్టుకునేందుకు రెడీ కాకుండే కెరీర్ అక్కడితో ముగిసిపోతుంది. ఈ విషయాన్ని దృష్టిలో పెట్టుకుని వ్యవహరిస్తే ఇబ్బందులు లేకుండా కెరీర్ సుధీర్ఘకాలం కొనసాగుతుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com