చాందినీ జైన్ హ‌త్యలో నిజ‌మైన 'దోషులు' ఎవ‌రు?
కొన్ని ఉదంతాలు, సంఘ‌ట‌న‌లు కొత్త ప్ర‌శ్న‌ల‌ను రేకెత్తిస్తాయి...ప‌త‌న‌మ‌వుతున్న విలువ‌ల‌ను, వ్య‌వ‌స్థ‌లోని లోపాల‌ను ఎత్తిచూపుతాయి. హైద‌రాబాద్ లో డ్ర‌గ్స్ ఉదంతం మ‌ర్చిపోక‌ముందే ఇటీవ‌ల ఇంట‌ర్ విద్యార్ధిని చాందినీ జైన్ హత్య‌కు గురి కావ‌డం సంచ‌ల‌నం రేపింది. చాందినీ హ‌త్య‌ను ఒక సాధార‌ణ హ‌త్య‌గా చూసేందుకు వీలు లేదు. ఎందుకుంటే ఈ హ‌త్య ఇటు ప్ర‌భుత్వాల‌కు, అటు త‌ల్లిదండ్రుల‌కు, కార్పోరేట్ విద్యా సంస్థ‌ల‌కు, మ‌న వ్య‌వ‌స్థ‌కు క‌ఠిన ప్ర‌శ్న‌ల‌ను సంధించింది. ఆ ప్ర‌శ్న‌ల‌కు స‌మాధానం చెప్ప‌లేకుంటే ప్ర‌స్తుతం మ‌నం నిర్మించుకున్న వ్య‌వ‌స్థ‌లు, విధానాలు అన్నీ కొర‌గానివ‌ని నిరూపిత‌మైన‌ట్టే. కౌమార ప్రాయంలో ఆక‌ర్ష‌ణ స‌హ‌జ‌మే అయినా అది హ‌ద్దులు దాటి హ‌త్య‌లు చేయించేంత దుస్సాహ‌సానికి ఒడిగ‌ట్టిందంటే మ‌న విధానాల్లో లోపాలు ఆందోళ‌న‌క‌ర స్థాయికి చేరుకున్న‌ట్టే. ప‌ర్య‌వేక్ష‌ణా లోపం, ప‌ట్ట‌ని త‌నం, నిర్లక్ష్యం, పైశాచిక‌త్వం అనే భూతాలు మైనారిటీ కూడా తీర‌ని ఒక విద్యార్ధినిని పొట్ట‌న పెట్టుకున్నాయి. చాందినీని హ‌త్య చేసి ఆమె స్నేహితుడే అయినా ప‌రోక్షంగా అత‌నికి స‌హ‌క‌రించిన దోషులు లెక్క‌కు మిక్కిలిగా ఉన్నారు.
ఒకవైపు డ్ర‌గ్స్.. మరోవైపు హ‌త్య‌లు!
ఒకవైపు డ్ర‌గ్స్.. మరోవైపు హ‌త్య‌లు!
ఇటీవ‌లే హైద‌రాబాద్ లో డ్ర‌గ్స్ ఉదంతం బ‌య‌ట‌ప‌డింది. చాలా స్కూల్స్ లో డ్ర‌గ్స్ విచ్చ‌ల‌విడిగా దొరుకుతున్నాయ‌ని ప‌ది నుంచి 15 ఏళ్ల వ‌య‌స్సున్న పిల్లలు కూడా డ్ర‌గ్స్ కు బానిసల‌య్యార‌ని పోలీసుల విచార‌ణ‌లో తేలింది. డ్ర‌గ్స్ అంత సులువుగా పిల్లలకు అందుబాటులో ల‌భిస్తుంటే స్కూల్ యాజ‌మాన్యాలు ఏం చేస్తున్నట్టు? ల‌క్ష‌ల రూపాయ‌ల ఫీజులు వ‌సూలు చేయ‌డం తప్పించి పిల్లలు ఏం చేస్తున్నారు? ఎలా బిహేవ్ చేస్తున్నారు? అన్న విషయాలను ప‌ట్టించుకోక‌పోతే ఎలా? ఇక్క‌డి నిజ‌మైన దోషులు ఎవ‌రు? మరోవైపు ఇంట్లో పిల్ల‌వాడికి జేబు నిండా పాకెట్ మ‌నీలు, క్రెడిట్ కార్డులు, డెబిట్ కార్డులు కుక్కి పంపడం త‌ప్ప పిల్ల‌వాడు ఏం చేస్తున్నాడు అన్న విష‌యాన్ని పట్టించుకోని తల్లిదండ్రులు కోకొల్లలు. ఎంత‌సేపు డ‌బ్బు సంపాదన తప్పించి పిల్లలపై పర్యవేక్షణ ఉంచాల‌న్న పెంప‌కంలోని ప్రాథ‌మిక సూత్రాన్ని మ‌ర్చిపోయే పేరెంట్స్ పెరిగిపోయారు. మ‌రి అటువంటి పిల్లలు డ్ర‌గ్స్ కు బానిస‌లుగా త‌యారై అవి దొర‌క్క‌పోతే నేరగాళ్లుగా మారిపోతున్నారు. ఇక్క‌డ నిజ‌మైన దోషులు ఎవ‌రు? ఇంకా మైనారిటీ కూడా తీర‌ని ఇద్ద‌రు చిన్న‌పిల్ల‌లు ప్రేమ అంటూ వ్యామోహానికి లోనే ఏకంగా త‌న స్నేహితురాలినే చంపేశాడు అంటే త‌ప్పు ఎక్క‌డ ఉంది? లోపం ఎక్క‌డ ఉంది?
ప్రేమ‌లు, పార్టీల్లో ఇంట‌ర్మీడియ‌ట్ పిల్లలు!!
ఇటీవ‌లి కాలంలో స్కూల్ స్థాయిలో ప్రేమ వ్య‌వ‌హారాలు వెలుగు చూస్తున్నాయి. సినిమాల ప్ర‌భావం, చేతినిండా డ‌బ్బు ఉండ‌టంతో చాలా మంది పిల్లలు శారీరక ఆక‌ర్ష‌ణ‌లో ప‌డిపోతున్నారు. ఫ‌లితంగా విలువైన కాలాన్ని వృధా చేసుకుంటూ చ‌దువును నిర్లక్ష్యం చేస్తున్నారు. అస‌లు పిల్లలు చదువు నిర్లక్ష్యం చేస్తూ ఏం చేస్తున్నారు? ఎక్క‌డికి వెళ్తున్నారు? అన్న విషయాలను జాగ్ర‌త్త‌గా గ‌మ‌నించాల్సిన స్కూల్ యాజ‌మాన్యాలు ఏం చేస్తున్నట్టు? పేరుకు పెద్ద పెద్ద ఇంట‌ర్నేష‌న‌ల్ స్కూల్స్ . స్కూల్లో దారుణులు జ‌రుగుతున్నా , డ్ర‌గ్స్ అమ్ముతున్నా, పిల్లలు హ‌త్య‌లకు గుర‌వుతున్నా పట్టించుకోని తోలుమందం వైఖ‌రి. స్కూల్లో పిల్ల‌లంద‌రూ బయట హోటల్ లో రూమ్ లు తీసుకుని ఒక మీటింగ్ ను నిర్వ‌హించుకున్నా యాజ‌మాన్యాల‌కు తెలియ‌డం లేదంటే వాళ్ల పర్యవేక్షణ స్థాయి ఏ రేంజ్ లో ఉందో అర్ధం చేసుకోవ‌చ్చు. ఇక పేరెంట్స్ విషయం ఎంత త‌క్కువ చెప్పుకుంటే అంత మంచిది. చాలా మంది తల్లిదండ్రులు పెంప‌కం బాధ్యత అంటే కేవ‌లం ఫీజులు క‌ట్ట‌డం, తిండి పెట్ట‌డం, పాకెట్ మనీ ఇవ్వ‌డం అని మాత్ర‌మే అనుకుంటున్నారు. కౌమ‌ర ద‌శ‌లో పిల్ల‌ల్లో శారీరకంగా చాలా మార్పులు చోటుచేసుకుంటాయి. ఆకర్షణలకు, ప్ర‌లోభాల‌కు చాలా ఈజీగా ప్ర‌భావిత‌మ‌వుతారు. ఇటువంటి కీల‌క స‌మ‌యంలో వాళ్ల‌ను కంటికి రెప్ప‌లా కాపాడుకుంటూ అనుక్ష‌ణం ప్రేమ‌తో కూడిన పర్యవేక్షణను అందించాల్సిన అవ‌స‌రం ఉంది. కానీ ఈత‌రం త‌ల్లిదండ్రుల్లో అది పూర్తిగా కొర‌వ‌డుతోంది.
పెంపకంలో నిర్లక్ష్యం వేదనను మిగులుస్తుంది!
ఈ టెక్నాలజీ యుగంలో పిల్లల పెంపకంలో తల్లిదండ్రుల బాధ్యత మరింత పెరిగింది. ఒకవైపు మొబైల్ ఫోన్స్, మరోవైపు ఇంటర్నెట్, ఇంకోవైపు సోషల్ మీడియా విద్యార్ధులను తీవ్రంగా ప్రభావితం చేస్తోంది. టెక్నాలజీతో ఎన్ని సౌకర్యాలు ఉన్నాయో అంతకు మించి దుష్పరిణామాలు కూడా ఉన్నాయి. టెక్నాలజీని సరిగ్గా ఉపయోగించుకోవడం తెలియక పెద్దవాళ్లే తడబడుతున్న వేళ పిల్లలు అందులోని చెడుకు ప్రభావితం కావడంలో ఆశ్చర్యమేమీ లేదు. ఇంట్లో టీవీ , ఇంటర్నెట్ దగ్గర్నుంచి బయట సినిమాలు, పరిస్థితుల వరకూ ప్రతీదాంట్లోనూ నెగెటివ్ ఉంటుంది. పిల్లలు ఆ విష వలయంలో చిక్కుకోకుండా కాపాడుకోవడం పేరెంట్స్ కు పెను సవాలు.
- పిల్లలు అదే పనిగా ఫోన్ మాట్లాడుతుంటే హెచ్చరించండి.
- ఇంటర్నెట్ లో వాళ్లు ఏం చేస్తున్నారో, చూస్తున్నారో ఒక కంట కనిపెట్టండి. కొన్ని వెబ్‌సైట్లను నిపుణుల సహాయంతో బ్లాక్ చేయండి.
- పిల్లలకు అవసరానికి మించి పాకెట్ మనీ ఇవ్వకండి.
- మీ పిల్లల స్నేహితులు ఎటువంటి వారో, ఎలాంటి కుటుంబ నేపథ్యం ఉందో ఆరా తీయండి.
- ఎప్పటికప్పుడు స్కూల్ కు వెళ్లి మీ పిల్లవాడి చదువు, ప్రవర్తన పై ఆరా తీయండి.
- మానసికంగా, శారీరకంగా ఏమైనా డల్ గా ఉన్నట్టు అనిపిస్తే ప్రేమగా విషయం ఏంటని అడిగి తెలుసుకోండి.
- ఇంటికి లేట్ గా వస్తున్నా, తరుచుగా అబద్దాలు చెపుతున్నా, రూమ్ లో దూరి తలుపులు వేసుకుంటున్నా అనుమానించండి.
- చేసే హెచ్చరికను ఆప్యాయంగా ఒక స్నేహితుడిలా చేయండి. కోపంతో ఊగిపోయి అరిస్తే పరిస్థితి మరింత చేయి జారవచ్చు.
సామాజిక బాధ్యతను మర్చిపోవడమే సమస్యకు మూలం!
ప్రభుత్వాలు ఎన్ని చట్టాలు తెస్తున్నా వాటిని సక్రమంగా అమలు చేయలేకపోవడం కూడా పెద్ద ప్రమాదంగా మారింది. నిబంధనలు , చట్టాలను తేవడమే తప్పించి వాటిని సరిగ్గా అమలు చేసేలా చేయడంలో నిర్లక్ష్యం ప్రభుత్వానిదైతే. లాభాపేక్ష తప్పితే నైతిక విలువలు లేని వ్యాపారం ధోరణి వ్యక్తులది. 21 ఏళ్లు దాటని పిల్లలకు మద్యం అమ్మకూడదని స్పష్టమైన నిబంధనలు ఉన్నా అవి అమలవులున్న దాఖలాలు లేవు. హోటల్స్ లో మైనర్లు పార్టీ చేసుకుంటే వారికి మద్యం సరఫరా చేసిన హోటల్ యాజమాన్యాన్ని ఏమనాలి? వ్యాపారం తప్పించి నైతికత లేకపోవడం, చట్టం అంటే భయం లేకపోవడం దీనికి ప్రధాన కారణం. మరోవైపు అడ్డగోలుగా వెలుస్తున్న పబ్ లు, హుక్కా సెంటర్లు యువతను చెడు మార్గం పట్టిస్తున్నాయి. హుక్కా పీలుస్తూ , మద్యం తాగుతూ శారీరక ఆకర్షణలకు లోనవుతూ చాలా మంది విద్యార్ధులు జీవితాన్ని నాశనం చేసుకుంటున్నారు. దీనికి తల్లిదండ్రులు పర్యవేక్షణ లేకపోవడం ప్రధాన కారణమైతే చిన్న పిల్లలతో ఈ వ్యాపారమేంటి అన్న సామాజిక స్పృహ కొరవడటం రెండో కారణం. ఇలాంటి ఘటనలు జరిగాక అయినా తల్లిదండ్రులు కళ్లు తెరిచి తమ పిల్లలపై పర్యవేక్షణను పెంచి వారిని కాపాడుకోవాలి. ప్రేమకు, వ్యామోహానికి మధ్య ఉన్న సన్నటి గీతను గుర్తించి బాధ్యతతో కూడిన ప్రేమను పంచి తమ చిన్నారులను మంచి పౌరులుగా తయారు చేయాలి.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
Comments
Post a Comment