భగవద్గీతపై ప్రమాణం చేసి 'నిజాలు' చెప్పుకుందాం!!

   మతం వేరు..ధర్మం వేరు..మతాన్ని ధర్మం అనుకుని..ధర్మాన్ని మతం అనుకుని ప్రస్తుతం చాలామంది అయోమయంలో కొట్టుకుపోతున్నారు. మతం అనేది ఆయా కాలమాన పరిస్థితులకు అనుగుణంగా ప్రజల్లో చైతన్యం కలిగించేందుకు వారిని సక్రమమార్గంలో పెట్టేందుకు ఉద్దేశించబడింది. అందులో ధర్మం అనేది మతంలో ఒక అంతర్భాగంగా ఉంటూ వచ్చింది. ఎందుకుంటే ఒక మతం యొక్క అంతిమ లక్ష్యం ధర్మ సంస్థాపన. అందుకే మనం ఏ మతాన్ని ఉదాహరణగా తీసుకున్నా అందులో ధర్మాన్ని రక్షించేందుకు అధిక ప్రాధాన్యత నిచ్చారు. మత గ్రంధాలు కూడా ఇదే విషయాన్ని చెపుతాయి. మతాన్ని నిష్టగా పాటించేటప్పుడు అందులోని ధర్మాన్ని కూడా అంతే నిష్ఠగా పాటించాలి. కదా? కానీ అలా జరగడం లేదు. అందుకే ధర్మాన్ని, న్యాయాన్ని కాపాడేందుకు చట్టాన్ని తీసుకురావాల్సి వచ్చింది. ప్రతీ ఇంట్లో, పాఠశాలలో పిల్లలకు ధర్మాన్ని సరైన విధంగా భోధిస్తే చట్టం యొక్క అవసరమే రాదు కదా? భగవద్గీతలోని ప్రతీ అంశాన్ని కూలంకుషంగా చదివి జీర్ణించుకుంటే కోర్టులో భగవద్గీత మీద ప్రమాణం చేయాల్సిన సందర్భం అస్సలు ఏర్పడదు. పాఠశాల స్థాయి నుంచి పిల్లలకు ధర్మాన్ని భోధించడంలో విఫలమవుతున్నాం కాబట్టే ఈ నేరాలు.. ఈ దారుణాలు. విలువలతో కూడిన విద్యను భోధించడంలో మన వైఫల్యం, పిల్లల భవిష్యత్ కు పెను ప్రమాదంగా మారింది. 

భగవద్గీతపై ప్రమాణం ఎందుకు చేయిస్తారు? 

     కోర్టుకు వెళ్లినప్పుడు అక్కడ దోషులు, సాక్షులతో భగవద్గీతపై ప్రమాణం చేయిస్తారు. ఎందుకు? ప్రమాణం అనేది ఒక కమిట్‌మెంట్. కమిట్‌మెంట్ అనేది ఒక వ్యక్తి శీలం, వ్యక్తిత్వానికి సంబంధించిన విషయం. భగవద్గీత ఒక మనిషికి సత్యం, సత్ప్రవర్తన అనేది చాలా ముఖ్యమని చెపుతుంది. ఆ లక్షణాలు కోల్పోయిన రోజున మనిషిగా పతనం తప్పదని హెచ్చరిస్తుంది. అందుకే భగవద్గీతపై ప్రమాణం చేయిస్తారు. అయితే అసలు భగవద్గీత అంటే ఏమిటో దానిలోని గొప్ప విషయాలు ఏంటో తెలియనప్పుడు  ప్రమాణం చేయడానికి జంకెందుకు? ప్రస్తుతం సమాజంలో ఇదే జరుగుతోంది. భగవద్గీత యొక్క గొప్పతనం తెలియక చాలా మంది చాలా ఈజీగా దానిపై ప్రమాణం చేసేస్తున్నారు. అబద్దాల కోరులు, నేరగాళ్లు విచ్చలవిడిగా నేను చాలా గొప్పవాడ్ని, సత్యవంతుడ్ని అని ప్రమాణం చేస్తున్నారు. ఎందుకు ఇలా జరుగుతోంది? లోపం ఎక్కడ ఉంది? విలువలు లేకుండా నేరాలు చేసే వాళ్లకు భగవద్గీత పై ప్రమాణం చేయడం ఓ లెక్కా అని మనకు అనిపించవచ్చు. అది నిజం కూడా. కానీ బాగా చదువుకున్న వాళ్లు కూడా నేరాలు చేస్తూ అవసరమైనప్పుడు భగవద్గీతపై తప్పుడు ప్రమాణాలు చేస్తున్నారు. ఇటువంటి పరిణామాలకు కారణమేంటి? 

విలువలతో కూడిన విద్యను భోధిస్తున్నామా?

     ర్యాంకులు, మార్కులు మాయలో పడి మన విద్య ఇప్పటికే పతనం అంచున ఉంది. అటు తల్లిదండ్రులకు ఇటు టీచర్స్ కు ఎంతసేపూ పిల్లలు ఎన్ని మార్కులు తెచ్చుకున్నారన్న ధ్యాసే తప్పితే వాళ్లు ఎటువంటి విద్యను నేర్చుకుంటున్నారు..ఎటువంటి విలువలను నేర్చుకుంటున్నారు. అన్న విషయాలను పట్టించుకోవడం లేదు.  భారతీయ సంస్కృతి మూలాల్లో ఉన్న విలువలతో కూడిన విద్యను విడిచిపెట్టి ఎప్పుడైతై కార్పోరేట్ విద్య మాయలో పడ్డామో అప్పుడే మనం సంక్షోభంలో పడ్డాం. ఇంట్లో తల్లిదండ్రులు, స్కూల్ లో టీచర్స్ ఒక మనిషికి వ్యక్తిత్వ నిర్మాణం ఎంత అవసరమో, మంచి ప్రవర్తన, సత్యం గూర్చి భోధిస్తే ఈ రోజు ఇటువంటి పరిస్థితులు వచ్చి ఉండేవి కావు. ప్రతీ హిందువు ఇంట్లోనూ భగవద్గీతలోని ధర్మాన్ని పిల్లలకు భోధిస్తే వారు కోర్టు మెట్లెక్కి భగవద్గీతపై ప్రమాదం చేయాల్సిన దుస్థితి రాదు కదా? అలానే ముస్లింలు తమ పిల్లలకు ఖురాన్ లోని గొప్ప విషయాలను, క్రైస్తవులు తమ పిల్లలకు బైబిల్ లోని వాక్యాలను చెప్పి వాటిలోని ధర్మాన్ని వారు గ్రహించిగలిగేలా చేస్తే ప్రస్తుత సమాజంలో నేరాలు సగానికి పైగా తగ్గిపోతాయి. 

మత గ్రంధాలను అవమానించేలా చేయకండి! 

   న్యాయస్థానంలో భగవద్గీతను సత్యానికి ప్రామాణికంగా తీసుకుంటున్నామంటే అది ఎంత మహోన్నతమైనదని అర్ధం? అటువంటి అద్భుతమైన , గొప్పదైన గ్రంధంపై చాలా ఈజీగా ప్రమాణం చేసేస్తున్నారు. చాలామంది దానిని ఒక సామాన్యమైన పుస్తకంలానో, నవలగానో భావిస్తున్నారు. కానీ భగవద్గీత యొక్క గొప్పతనం అందులోని జీవిత సత్యాలు, మనిషి జీవితాన్ని సమూలంగా మార్చేసే విషయాలు ఇవేవీ వాళ్లకు తెలియవు. నిజంగా భగవద్గీతను చదివిన వాళ్లు అందులోని విషయాలపై అవగాహన ఉన్నవాళ్లు ఆ అద్భుత గ్రంధంపై ప్రమాణం చేసేందుకు సిద్ధపడరు. తప్పుడు ప్రమాణాలు చేసి భగవద్గీత అవమానిస్తున్న వాళ్లకు ఆ గ్రంధం గొప్పతనం తెలియదు. మతాన్ని అనుసరిస్తున్న వారు ఆయా మత గ్రంధాలు చెపుతున్న విషయాలను పూర్తిగా ఆకలింపు చేసుకోవడం, అందులో ఉన్న అసలు సారాన్ని అవగాహన చేసుకోకపోవడమే సమస్యకు మూలకారణం. భగవద్గీతను కూలంకుషంగా చదివిన హిందువు ఎటువంటి తప్పులు, పొరపాట్లు, నేరాలు అస్సలు చేయడు. ఖురాన్ ను పూర్తిగా చదివి అందులో చెప్పిన విషయాలను ఔపోసన పట్టిన వాళ్లు సాటి వాళ్ల ప్రాణాలు అస్సలు తీయరు. బైబిల్ లో ఏసు క్రీస్తు చెప్పిన భోధనలను సరిగ్గా అర్ధం చేసుకున్న వాళ్లు ఇతరులపై దాడులు చేయడం, హింసించడం వంటి తప్పులు చేయరు. 

మూలాల్లోకి తిరిగి వెళ్లడమే సమస్యకు పరిష్కారం!

      మన ప్రాచీన భారతీయ విద్యా విధానం విలువలతో కూడిన విద్యతో ముడిపడి ఉండేది. పెద్దలను, న్యాయాన్ని, చట్టాన్ని గౌరవిస్తూ సామాజిక భాద్యతను నెరవేరుస్తూ ప్రకృతితో మమేకమై ఏ విధంగా మసులుకోవాలే పిల్లలకు నేర్పించేవారు. ఈ ఆధునిక యుగంలో  పిల్లలకు నైతికత, విలువలు, సామాజిక భాధ్యతలను నేర్పించే విధానం కరువైపోయింది. దీంతో ఎంత చదివినా సామాజిక విలువలు,కట్టుబాట్లు, స్వీయ నియంత్రణ అన్నది మచ్చుకు కూడా కనిపించడం లేదు. ఎన్ని ఘోరాలు చేసైనా ఉన్నత స్థానానికి చేరుకోవాలన్న తపన తప్పించి నైతికంగా తాము ఎంతగా పతనం అవుతున్నామన్న విషయాన్ని చాలామంది గుర్తించడం లేదు. దీంతో సమాజం ఒక ప్రమాదకరమైన పరిస్థితిని ఎదుర్కొంటోంది. హత్యలు, అత్యాచారారాలు, అబద్దాలు పెరిగిపోయాయి. ఈ విష వలయం నుండి మన పిల్లలను కాపాడుకోవాలంటే మన ధర్మ గ్రంధాల్లోని విషయాలను వాళ్లకు భోధించి విలువలతో కూడిన విద్యను అందించేందుకు ప్రయత్నించాలి. అప్పుడే మన పిల్లలు నైతికత ఉన్న బాధ్యాతాయుతమైన పౌరులుగా ఎదగగలుగుతారు.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com