కేస్ స్ట‌డీ : కెరీర్ ఎంపిక లో రాంగ్ స్టెప్.. జీవితానికి రాంగ్ ట‌ర్న్!

     కెరీర్ ఎంపికలో త‌ప్పిదాలు ఒక్కోసారి జీవితాన్ని అస్త‌వ్య‌స్థం చేస్తాయి. సామాజికంగా, ఆర్థికంగా త‌మ‌కు అస్సలు న‌ప్ప‌ని కెరీర్ ల‌ను కొంద‌రు ఎంచుకుంటారు. స‌రైన మార్గ‌నిర్దేశ‌క‌త్వం లేక‌పోవడం, త‌న‌కు అన్నీ తెలుసు అనుకునే అవ‌గాహ‌న లేమి వ‌ల‌న ఇటువంటి త‌ప్పిదాలు చేస్తారు. అయితే కొన్నిసార్లు ఈ త‌ప్పుకు వీరు భారీ మూల్యం చెల్లించాల్సి రావ‌చ్చు. వృత్తిగ‌త జీవితంతో పాటు వ్య‌క్తిగ‌త జీవితం కూడా దెబ్బతిని  కోలుకోలేని ఇబ్బందుల్లో ప‌డ‌తారు. కెరీర్ ను ఛేంజ్ చేసుకునే ప్ర‌యత్నాల్లో కూడా వీరికి పాత  కెరీర్ పెద్ద అడ్డంకిగా మారుతుంది. అయితే చేసిన పొర‌పాటును స‌రిదిద్దుకునే కీల‌క‌మైన మ‌లుపులో నిపుణుల స‌ల‌హాలు తీసుకుని అప్ర‌మ‌త్తంగా వ్య‌వ‌హ‌రిస్తే ఈ సంక్షోభం నుంచి బ‌య‌ట‌ప‌డొచ్చు. 

కెరీర్ ఎంపిక‌లో త‌ప్పు చేస్తే జీవితం త‌ల‌కిందులే!

        చంద్ర‌క‌ళ ఆర్ట్స్ బ్యాక్ గ్రౌండ్ లో డిగ్రీ వ‌ర‌కూ చ‌దివింది. డిగ్రీ త‌ర్వాత ఒక మంచి ప్రొఫెష‌న‌ల్ కోర్సు చ‌ద‌వాల్సిన త‌రుణంలో త‌న చుట్టూ ప‌రిస్థితులు, నేప‌థ్యాల‌కు ప్ర‌భావిత‌మై లా చ‌ద‌వాల‌ని నిర్ణ‌యించుకుంది. ఎందుకంటే చంద్ర‌క‌ళ తండ్రి పోలీస్ డిపార్ట్ మెంట్ లో మంచి ఉన్న‌త‌మైన స్థానంలో ఉన్నాడు. త‌న ఇంటికి వ‌చ్చిపోయే పోలీసులు, లాయ‌ర్ల‌ను చూసి ప్ర‌భావితమై లాయ‌ర్ కావాల‌నుకుంది. అదే ఉత్సాహంతో లా కోర్సును పూర్తి చేసి లాయ‌ర్ గా ప్రాక్టీస్ మొద‌లుపెట్టింది. తండ్రికి ఉన్న ప‌రిచ‌యాలు, ప‌లుకుబ‌డి వ‌ల‌న చంద్ర‌క‌ళ‌కు మొద‌ట్లో కేసులు బాగానే వ‌చ్చాయి. ఎన్ని స‌క్సెస్ అయ్యాయి అన్న విష‌యం ప‌క్క‌నపెడితే  తండ్రి రిఫరెన్స్ తో లాయర్ చంద్రకళకు కేసులకు కొదువ ఉండేది కాదు. ఈ బిజీలో పడి చంద్రకళ పెళ్లి కూడా కాస్త ఆలస్యంగా జరిగింది. ఇటువంటి సమయంలో ఆమె తండ్రి పదవీ విరమణ చేసాడు. అక్కడ నుంచి చంద్రకళకు కష్టాలు మొదలయ్యాయి. క్లయింట్లు తగ్గిపోయారు. ఉన్న క్లయింట్లు కూడా వేరే లాయర్లను చూసుకోవడంమొదలుపెట్టారు. మరోవైపు భర్తతో విభేధాలు ఏడాది తిరిగే సరికి భర్త తన నుంచి దూరంగా వెళ్లిపోయాడు. కేసులు కూడా రాకపోవడంతో లాయర్ ప్రాక్టీస్ తో లాభం లేదనుకుని బీఈడీ పూర్తి చేసి టీచర్ గా ఉద్యోగ ప్రయత్నాలు చేస్తే అక్కడ కూడా నిరాశ ఎదురైంది. దీంతో ఏం చేయాలో పాలుపోక చంద్రకళ ఒక లాయర్ దగ్గర డాక్యుమెంట్స్ తయారు చేసి పనికి కుదిరి చాలీచాలని జీతంతో జీవితాన్ని నెట్టుకొస్తోంది. 

చంద్రకళ లాయర్ కెరీర్ ఎందుకు ఫెయిలైంది?

      సమాజంలో కొన్ని కోర్సులు, కొన్ని కెరీర్లు కొందరికి మాత్రమే నప్పుతాయి. ముఖ్యంగా మహిళలు లా కోర్సు చదివి లాయర్ గా స్థిరపడాలంటే చాలా కష్టపడాల్సి ఉంటుంది.  పోలీస్ డిపార్ట్‌మెంట్ లో ఉన్నాడు కాబట్టి చంద్రకళ తండ్రి ఆమెను లాయర్ చేయాలని అనుకున్నాడు. అయితే భవిష్యత్ తో తన అండ లేకుండా ఆమె లాయర్ గా నిలదొక్కుకోగలదా లేదా అన్న విషయాన్ని ఆయన ఆలోచించలేదు. తన సర్వీస్ లో ఉన్నంత కాలం తన పలుకుబడితో ఆమెకు కేసులు ఇప్పించగలిగాడు. కానీ స్వంతంగా క్లయింట్లను సంపాదించుకోగలిగేలా ఆమెను తయారుచేయలేకపోయాడు. మరోవైపు చంద్రకళ కూడా లాయర్ గా స్థిరపడాలంటే ఎంత కష్టపడాలో అన్న విషయాన్ని మర్చిపోయి ఒక ఫ్యాన్సీ కెరీర్ కోసం మాత్రమే బీఎల్ చదివింది. తండ్రి సహాయం లేకుండా కేసులు సంపాదించుకోవాలి అన్న విషయాన్ని విస్మరించింది. దీంతో వృత్తిగత జీవితం ఇబ్బందుల్లో పడింది. మరోవైపు తనకున్న పరిజ్జానాన్ని కోర్టుకు పరిమితం చేయకుండా ఆ ఆలోచనలను ఇంటికి కూడా తీసుకొచ్చి, హృదయంతో సంబంధాలను నెరపాల్సిన చోట హక్కులు, అవకాశాలు అని వాదించడం వలన భర్తతో కూడా విభేధాలు వచ్చాయి. వ్యక్తిగత జీవితం కూడా అస్తవ్యస్థమైంది. ఇక అప్పటికైనా కెరీర్ ప్లానింగ్ లో చేసిన తప్పును సరిదిద్దుకోకుండా మరోసారి కెరీర్ ఛేంజ్ కు ప్రయత్నించి విఫలమైంది. లా చదివిన వారికి మిగిలిన రంగాల్లో ఉద్యోగాలు దొరకడం కష్టమన్న విషయాన్ని కూడా ఆమె గుర్తించలేదు. ఇన్ని పొరపాట్లు చేయడం వలన ఆమె కెరీర్ అక్కడితో అంతమై జీవితం కష్టాలపాలైంది. 

చంద్రకళ లైఫ్ డిజాస్టర్‌కు కారణాలు: 

• సొంతంగా కాకుండా తండ్రి అండతో కెరీర్ ను సాగించాలనుకోవడం. 

• తనకు ఈ కెరీర్ సరిపోతుందా? అని ఆలోచించకుండా గుడ్డిగా కెరీర్ ను ఎంచుకోవడం.  

• ఇంట్లో అప్పటికే లాయర్లు ఉంటే కానీ లా చదివి లాయర్ గా స్థిరపడటం కష్టం. సొంతంగా కేసులు సంపాదించుకోవడం ఆడవాళ్లకు ఇంకా కష్టమవుతుంది.

• కష్టపడకుండా లాయర్ గా స్థిరపడటం కష్టమనే ప్రాథమిక సూత్రాన్ని విస్మరించడం 

• వృత్తిగత జీవితానికి, వ్యక్తిగత జీవితానికి మధ్య ఉన్న తేడాను గుర్తించలేకపోవడం 

• కెరీర్ ఛేంజ్ సమయంలో కూడా నిర్లక్ష్య పూరితంగా వ్యవహరించి చేసిన తప్పునే మళ్లీ చేయడం. 

• తన ఎంచుకున్న రంగంలో ఉన్న స్థితిగతులను సరిగ్గా అంచనా వేయలేకపోవడం

ఏం చేస్తే చంద్రకళ కెరీర్ గాడిన పడేది: 

• సొంతంగా లాయర్ గా స్థిరపడేందుకు తగిన మానసిక ధైర్యాన్ని తెచ్చుకోవాల్సింది. 

• ప్రాక్టీస్ కష్టమని గుర్తించినప్పుడు నిపుణుల సలహాలతో సరైన రీతిలో కెరీర్ ఛేంజ్ చేసుకోవాల్సింది. 

• టీచింగ్ అంటే ఇష్టం ఉంది కాబట్టి బీఎల్ తర్వాత పీజీ చేసి లా కాలేజీలో లెక్చరర్ గా స్థిరపడేందుకు ప్రయత్నిస్తే ఆమె కెరీర్ వెలిగిపోయేది. 

• లాను భోధిస్తూనే అదే సమయంలో కోర్టు కౌన్సిలింగ్ లను నిర్వహిస్తూ ఉంటే ఆమెకు అదనపు ఆదాయం కూడా సమకూరి ఉండేది. 

• వివిధ కంపెనీ లీగల్ సలహాలను ఇచ్చే కన్సల్టెన్సీ లాంటిది ఏర్పాటు చేసుకుని ఉంటే ఎంట్రెప్రెన్యూర్ కూడా రాణించి ఉండేది. 

• లాయర్ ప్రాక్టీస్ తన వల్ల కాదని భావించినప్పుడు సివిల్ సర్వీసెస్ తో పాటు ఇతర పోటీ పరీక్షలకు ప్రిపేర్ అయి ఉంటే మంచి అధికారిణిగా స్థిరపడి ఉండేది.     

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com