ఇలా చేస్తే మీకు మంచి ఇంక్రిమెంట్, ప్రమోషన్ గ్యారంటీ!

       చాలా మంది ఉద్యోగులు ఆఫీస్ లో ఒళ్లు దాచుకోకుండా చాలా కష్టపడి నిజాయితీగా పనిచేస్తారు. అయినా సరే ఇంక్రిమెంట్ సమయంలో శాలరీ స్లిప్ ను చూసుకుంటే వాళ్లకు నిరాశే ఎదురవుతుంది. ఇంత బాగా పనిచేస్తున్నా నాకు ఎందుకు ప్రమోషన్ రావడం లేదు? ఎందుకు శాలరీ ఇంక్రిమెంట్ రావడం లేదన్న ఆలోచన వాళ్లను వేధనకు గురిచేస్తుంది.  పనిలో తనకన్నా తక్కువ కష్టపడుతున్నవారికి ఇంక్రిమెంట్లు, ప్రమోషన్లు రావడం కొంచెం బాధను కలిగిస్తుంది. ఇటువంటి సమయంలో చాలా మంది ఆవేశంలో తొందరపాటు నిర్ణయాలు తీసుకుంటారు. మేనేజ్‌మెంట్ విధానాలను తప్పుపడుతూ, కొత్త జాబ్ వెతుక్కోకుండానే రాజీనామా చేస్తారు. దీని వలన వ్యక్తిగతంగా మరింతగా నష్టపోతారు. కంపెనీలు అనేవి ఒక వ్యక్తి వలన నడవవు. వాళ్ల తొందరపాటు నిర్ణయం వాళ్లకే కీడు చేస్తుంది. కంపెనీ విధానాలు నచ్చనప్పుడు, తనను గుర్తించడం లేదని భావించినప్పుడు సరైన సమయం తీసుకుని, మంచి అవకాశం వెతుక్కుని అప్పుడు రాజీనామా చేయాలి. ఆవేశంలో తీసుకున్న నిర్ణయాలు వ్యక్తిగత నష్టాన్ని కలిగిస్తాయని కానీ కంపెనీకి ఎటువంటి ఇబ్బంది కలుగదు. 

ఇంక్రిమెంట్ రావాలంటే బోలెడు మార్గాలున్నాయి! 

       చాలా మంది శాలరీ పెరగకపోతే రిజైన్ ఒక్కటే మార్గం అనుకుంటారు. ఆ ఆలోచన చాలా తప్పు. మీకు ప్రమోషన్ రావాలన్నా, ఇంక్రిమెంట్ రావాలన్నా నిజాయితీగా పనిచేస్తే సరిపోదు మీ పనిని ప్రమోట్ చేసుకునే నేర్పు కూడా తెలియాలి. రిజైన్ ఒక్కటే మార్గం కాదు. 'అతను చాలా సమర్ధుడు'  అని కంపెనీతో గుర్తింపు పొందాలంటే మీరు కొన్ని పనులు చేయాల్సి ఉంటుంది. కేవలం మీ పనిని మీరు చేసుకుంటూ వెళ్లిపోతే ఇంక్రిమెంట్లు, గుర్తింపు వచ్చే పరిస్థితులు ఇప్పుడు లేవు. మీ పనిని ప్రమోట్ చేసుకున్నప్పుడే జాబ్ మార్కెట్లో మనుగడ సాగించగలుగుతారు. 

    మీరు చేస్తున్న పనికి తగినంత శాలరీ మీకు రానప్పుడు ఆ విషయాన్ని మేనేజ్ మెంట్ తో డిస్కస్ చేయాలి. అంతకంటే ముందు మీ పనితీరును, దానికి మీకు లభిస్తున్న శాలరీని బేరీజు వేసుకుని స్వీయ సమీక్ష చేసుకోవాలి. మీ సమర్ధతకు తగిన శాలరీ రావడం లేదంటే వెంటనే ఆ విషయాన్ని మేనేజ్‌మెంట్ దృష్టికి తీసుకెళ్లాలి. ఈ క్రమంలో  ఉద్యోగులు చేయాల్సిన కొన్ని ముఖ్యమైన పనులను మనం చర్చించుకుందాం. 

• ముందుగా మీ పనితీరుకు తగ్గ శాలరీ రావడం లేదని మీరు అనుకున్నప్పుడు మీ మేనేజర్ తో మాట్లాడేందుకు మీరు ప్రిపేర్ కావాలి. 

• మీ ఇంక్రిమెంట్ కోసం మేనేజర్ తో మాట్లాడే ముందు మీ శాలరీని మీ జాబ్ రోల్ కు మార్కెట్ స్టాండర్డ్స్ ను బట్టి లభిస్తున్న శాలరీని పోల్చి చూసుకోండి. దీనికోసం ఆన్‌లైన్ శాలరీ చెక్కర్స్ ను ఉపయోగించవచ్చు.

• శాలరీ విషయాలను మేనేజర్ తో చర్చించడానికి సమయం చాలా కీలకమని గుర్తుంచుకొండి. బిజినెస్ అవర్స్ లో కాకుండా లంచ్ టైమ్ తర్వాత మేనేజర్స్ కాస్త రిలాక్స్‌డ్ ఉండే సమయాన్ని ఎంచుకొండి. 

• అన్ని విషయాలపై అవగాహన పెంచుకున్నాకే మేనేజర్ తో శాలరీ విషయాన్ని చర్చించడానికి వెళ్లాలి. మేనేజర్ తో మీ ఇంక్రిమెంట్ చర్చ సరైన విధంగా సాగనప్పుడు రాజీనామా చేస్తా అని బెదిరింపులకు దిగకండి. మీరు ఎంత శాలరీ ఆశిస్తున్నారో అతనికి క్లియర్ గా వివరించండి. 

• ఇంక్రిమెంట్, ప్రమోషన్ కోసం మాట్లాడేటప్పుడు అన్నింటికన్నా ముఖ్యం మీ పనితీరు.  గడిచిన ఆరు నెలల కాలంలో మీరు సాధించిన విజయాలు, లక్ష్యాలతో ఒక రిపోర్ట్ ను తయారు చేసుకోండి. మేనేజర్ తో మాట్లాడేటప్పుడు దానికి సంబంధించిన ప్రజంటేషన్ ఇవ్వండి. 

• కంపెనీ పనితీరు మెరుగుపడేందుకు, లాభాలను సాధించేందుకు మీ దగ్గర ఉన్న ప్లాన్స్ ను వివరించండి. మీ ఐడియాల వలన కంపెనీ రెవెన్యూ ఎలా పెరుగుతుందో ప్రజంటేషన్ ద్వారా చెప్పండి. మిమ్మల్ని మీరు ప్రమోట్ చేసుకోవడమే మీ శాలరీని పెంచుతుందని గుర్తించండి. 

• మీరు ఎంత ఇంక్రిమెంట్ ఆశిస్తున్నారో అన్నదానిపై మీకు చాలా స్ఫష్టత ఉండాలి. ముందు చెప్పుకున్నట్టు మీ పనితీరు ఆధారంగానే మీ డిమాండ్ ఉండాలి. లేదంటే మొదటికే మోసం వస్తుంది. 

• అయితే ప్రమోషన్, ఇంక్రిమెంట్ కోసం అడుగుతున్నప్పుడు కంపెనీ మీ నుంచి ఏం ఆశిస్తుందో తెలుసుకోవడం కూడా చాలా ముఖ్యం. ఆ చర్చలో మీకు సమాధానాలు ఎస్..నో.. అని కాకుండా, ఎందుకు? ఏమిటి? ఎలా అన్న రీతిలో ఉండాలి. 

       మనం చెప్పుకున్న ఈ జాగ్రత్తలు తీసుకుని పనిని నిజాయితీగా చేస్తూ అదే సమయంలో మీ పనిని ప్రమోట్ చేసుకుంటే మీకు ఇంక్రిమెంట్లు, ప్రమోషన్లు రావడం ఖాయం. ఈ విషయాన్ని గుర్తించి శాలరీ పెరగనప్పుడు ముందు వెనుకా చూసుకోకుండా ఆవేశంలో తొందరపాటు నిర్ణయాలు తీసుకోకండి.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com