ఆఫీస్ లో మీ గుర్తింపు పెరగాలంటే ఈ '4 ప‌నులు' చేయండి చాలు!
గుర్తింపు...ప్ర‌స్తుతం సమాజంలో ఈ ప‌దానికి చాలా విలువ ఉంది. ఎందుకంటే గుర్తింపే మ‌నిషి మ‌నుగ‌డ‌ను శాసిస్తుంది. సామాజికంగా, ఆర్ధికంగా, వృత్తిప‌రంగా రాణించాలంటే గుర్తింపు త‌ప్ప‌నిస‌రిగా మారింది. ముఖ్యంగా ప‌నిచేసే చోట గుర్తింపు ఉన్న‌ప్పుడే కెరీర్ లో ఎదుగుద‌ల సాధ్య‌మ‌వుతుంది. అయితే ఇది అనుకున్నంత సులువూ కాదు అలా అని పెద్ద కష్ట‌మైన విష‌య‌మూ కాదు. చిన్న చిన్న జాగ్ర‌త్త‌లు తీసుకుంటే వృత్తిగ‌తంగా మంచి గుర్తింపును సాధించవ‌చ్చు. అయితే ఇక్కడ చిన్న ఇబ్బంది ఉంది. సమాజ దృక్కోణంలో సాధించే గుర్తింపు వేరు, వృత్తిలో సాధించే గుర్తంపు వేరు. సమాజంలో సాధించే గుర్తింపుతో వృత్తిలో రాణించే వీలు లేదు. అయితే వృత్తిలో సాధించే గుర్తింపుతో సామాజిక హోదా, ప్ర‌తిష్ట కూడా పెరుగుతాయి. ఎప్ప‌టిక‌ప్పుడు అప్‌డేట్ కావ‌డం, ఒక‌టే టెక్నాల‌జీని అంటిపెట్టుకోకుండా కొత్త విష‌యాలు నేర్చుకోవ‌డం వ‌ల‌న వ‌ర్క్ ప్లేస్ లో మీ గుర్తింపు మరింత‌గా పెరుగుతుంది. 'కెరీర్ టైమ్స్' లో ఇప్పుడు మ‌నం చెప్పుకుంటున్న నాలుగు ప‌నులు చేయ‌డం ద్వారా మీరు ప‌నిచేసే చోట మంచి గుర్తింపును సాధించుకోవ‌చ్చు.
1. స్వీయ చైతన్యం అల‌వ‌ర్చుకొండి!
వ్య‌క్తిగా ఎద‌గాలంటే ముందుగా ఎవ‌రైనా ప్ర‌తీ విష‌యంపై అవ‌గాహ‌న పెంచుకుని స్వీయ చైతన్యం అల‌వ‌ర్చుకోవ‌డం త‌ప్ప‌నిస‌రి. వ‌ర్క్‌ప్లేస్ లో కూడా మీ గుర్తింపు పెరగాలంటే ముందుగా సెల్ప్ అవేర్‌నెస్ ను పెంచుకోండి. స్వీయ చైతన్యం అంటే మ‌రేదో కాదు త‌న బ‌లాలు, బ‌ల‌హీన‌త‌ల‌పై ఒక క‌చ్చిత‌మైన అంచ‌నా ఏర్ప‌రుచుకోవ‌డం. ముందుగా త‌న ప‌రిమితులు తెలిస్తేనే క‌దా ఏం చేయాల‌న్న‌దానిపై ఒక స్ప‌ష్ట‌త వ‌చ్చేది. తనకు సాధ్యం కాని, త‌న ప‌రిధిలో లేని విషయాలను ఆలోచించ‌డం మాని తనకు చేతనయ్యే ప‌నిని మ‌రింత నాణ్యంగా ఎలా చేయాల‌న్న‌దానిపై దృష్టిపెడితే గుర్తింపు ఆటోమేటిక్ గా వ‌చ్చిప‌డుతుంది. త‌న చేతనయ్యే ప‌ని అంటే చేయ‌గ‌లిగిన ప‌నిని కూడా చేయ‌కుండా, అప్‌డేట్ కాకుండా ఉండిపొమ్మ‌ని కాదు. ఒక వ్య‌క్తికి జ‌ర్న‌లిజంలో 15 ఏళ్ల అనుభవం ఉన్న‌ప్పుడు ఐటీ రంగంలోకి వెళ్లాల‌నుకోవ‌డం అక్క‌డ గుర్తింపు తెచ్చుకోవాల‌నుకోవ‌డం అవివేకం అనిపించుకుంటుంది. అలా కాకుండా కొత్త విషయాలను నేర్చుకుని మ‌రింత జ్ఞానాన్ని పెంచుకుంటే త‌న జ‌ర్న‌లిజం రంగంలోనే మంచి గుర్తింపు తెచ్చుకునేందుకు వీలు క‌లుగుతుంది.
మీ బ‌లాలు , బ‌ల‌హీన‌త‌ల‌ను గుర్తించాక మీరు ఏం చేయాలో ఒక నిర్ణ‌యానికి వ‌చ్చాక కెరీర్ లో మెల్ల‌గా గుర్తింపును తెచ్చుకునేందుకు ప్ర‌య‌త్నాలు చేయండి. ఈ క్ర‌మంలో మీరు స్వీయ అంగీకార స్థితిని అల‌వ‌ర్చుకోండి. మీ గురించి ఇత‌రులు ఇచ్చే ఫీడ్ బ్యాక్ ను జాగ్ర‌త్త‌గా వినండి. వాళ్లు మీ గురించి ఏ విధంగా ఫీల్ అవుతున్నార‌న్న విష‌యాన్ని నిశితంగా గ‌మ‌నించండి. (ఇది ఆఫీస్ లో మాత్ర‌మే ) అందులో మార్చుకోవాల్సిన అంశాలు ఉంటే క‌చ్చితంగా మార్పులు చేసుకొండి. ఈ క్ర‌మంలో స్వీయ అంగీకార స్థితిని అల‌వ‌ర్చుకోండి. ఒకవేళ మీ ప్ర‌వ‌ర్తన కొన్ని విష‌యాల్లో స‌రిగ్గా లేద‌ని మీక‌నిపిస్తే దాన్ని త‌క్ష‌ణం మార్చుకునేందుకు ప్ర‌య‌త్నాలు మొద‌లుపెట్టండి. ఇందులో ఈగోల‌కు తావు లేదు. మిమ్మల్ని మీరు ఒక విమ‌ర్శకుడిగా చూసిన‌ప్పుడు మీలో ఉన్న లోపాలు ఒక్కొక్క‌టిగా మీకు క‌నిపిస్తాయి. వాటిని మెల్ల మెల్ల‌గా అధిగ‌మించే ప్ర‌య‌త్నం చేస్తే ఆఫీస్ లో మీ ఇమేజ్ పెరుగుతుంది. ముందుగా మీకు త‌ర్వాత సంస్థ‌కు ఉప‌యోగ‌ప‌డే నైపుణ్యాల‌ను ఎప్ప‌టిక‌ప్పుడు నేర్చుకునేందుకు స‌దా సిద్ధంగా ఉండండి. సంస్థ కోసం మీరు ఫ‌లానా ప‌ని చేస్తున్నార‌ని అనిపించుకుకోవ‌డం మీ గుర్తింపును రెట్టింపు చేస్తుంది.
గుర్తింపు తెచ్చుకోవ‌డం ఒకెత్తు అయితే వ‌చ్చిన గుర్తింపును కాపాడుకోవ‌డం మ‌రో ఎత్తు. ముఖ్యంగా సంక్షోభ స‌మ‌యంలో ఉన్న గుర్తింపును యాజ‌మాన్యం ద‌గ్గ‌ర కాపాడుకోవ‌డం ప్ర‌తీ ఉద్యోగికీ అతిపెద్ద స‌వాలుగా మారుతుంది. ఇటువంటి ప‌రిస్థితుల్లోనే త‌న‌లోని అస‌లైన సామ‌ర్ధ్యాన్ని వెలికి తీయాలి. ఈ స్టేజ్ లో యాజ‌మాన్యం ప‌ట్టించుకోవ‌ట్లేదు అన్న బాధ అధికంగా ఉంటుంది. మ‌రోవైపు ఉద్యోగాన్ని కాపాడుకోవాల్సిన స్థితి కూడా ఉంటుంది. ఇటువంటి ప‌రిస్థితుల్లో మీ గుర్తింపును కాపాడుకోవ‌డం యాజ‌మాన్యం దృష్టిలో స‌మ‌ర్ధ‌వంత‌మైన ఉద్యోగి అనిపించుకోవడం చాలా ముఖ్యం. అదే స‌మ‌యంలో ఆత్మ‌విశ్వాసం కూడా చాలా అవ‌స‌రం. మీ నైపుణ్యాల‌పై, సామ‌ర్ధ్యంపై న‌మ్మ‌కాన్ని మ‌రింత పెంచుకుని బాధ్య‌తాయుతంగా ప‌నిచేస్తే స‌రిపోతుంది. సంక్షోభంలో ఉద్యోగం పోయినా జాబ్ మార్కెట్లో మీ గుర్తింపు పోకుండా చూసుకోవాలి.
ఒక్కోసారి యాజ‌మాన్యం నుంచి మ‌న‌కు గుర్తింపు సంక్షోభం ఎదురుకావ‌చ్చు. ముఖ్యంగా ఖ‌ర్చు త‌గ్గింపు చ‌ర్య‌ల్లో భాగంగా అధిక సంఖ్యలో ఉద్యోగుల‌ను తొల‌గించిన‌ప్పుడు, ఇత‌ర సంద‌ర్భాల్లో కూడా ఇలాంటి ప‌రిస్థితి వ‌స్తుంది. అదే స‌మ‌యంలో వ్య‌క్తిగ‌తంగా కూడా గుర్తింపు సంక్షోభం ఎదురుకావ‌చ్చు. ఇటు కెరీర్ ప‌రంగా, అటు వ్య‌క్తిగ‌తంగానూ ఇది చాలా క‌ఠిన‌మైన స‌మ‌యం.కెరీర్ డెవ‌ల‌ప్‌మెంట్ లో ఒక ఉద్యోగిగా గుర్తింపు సంక్షోభంలో ప‌డ‌కుండా కాపాడుకోవాలి. దీనికోసం నైపుణ్యాల‌కు మెరుగు పెట్టుకుంటూ, ఆఫీస్ లో మీరు మంచి ప‌నివార‌ని వ్య‌క్తిగ‌త ఇమేజ్‌ను పెంచుకుంటూ సంక్షోభాల‌కు వెర‌వ‌ని మ‌న‌స్త‌త్వాన్ని అల‌వ‌ర్చుకుంటే గుర్తింపు సంక్షోభాన్ని చాలా ఈజీగా అధిగ‌మించ‌వ‌చ్చు. ఇప్పుడు మ‌నం చెప్పుకున్న ఈ నాలుగు విషయాలను చాలా జాగ్ర‌త్త‌గా ప‌రిశీలించిన కెరీర్ ప్ర‌యాణంలో త‌గు మార్పులు చేసుకుంటే వృత్తిగ‌తంగా మీ ఎదుగుద‌ల‌కు ఢోకా ఉండ‌దు.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
You can send your Educational related articles to careertimes.online1@gmail.com
Comments
Post a Comment