ఆన్‌లైన్ అప్లికేషన్ లో 10 సూపర్ టిప్స్!

      ఈ టెక్నాలజీ యుగంలో రోజుకో కొత్త విధానం రంగ ప్రవేశం చేస్తోంది. ఎవరైతే టెక్నాలజీకి అనుగుణంగా ఎప్పటికప్పుడు అప్‌డేట్ అవుతూ ఉంటారో వారికే మనుగడ సాధ్యం. ఇప్పుడు యువతరం కూడా ఈ విషయాన్ని గుర్తు పెట్టుకోకుంటే పోటీలో వెనుకబడిపోతారు. ముఖ్యంగా మార్కెట్లో ఏ ట్రెండ్ నడుస్తుందో, తమ రంగంలో ఎటువంటి పద్ధతులను అవలంభిస్తున్నారో విద్యార్ధులు తెలుసుకోవాలి. ముఖ్యంగా ఉద్యోగం కోసం ప్రయత్నాలు చేస్తున్న వారు టెక్నాలజీ విషయంలో పూర్తిస్థాయిలో అప్‌డేటేడ్‌గా ఉండాలి. ప్రస్తుతం చాలా కంపెనీలు పేపర్‌లెస్ కార్యకలాపాలను ప్రోత్సహిస్తున్నాయి. అందులో భాగంగానే ఆన్‌లైన్ లోనే దరఖాస్తులను స్వీకరిస్తున్నాయి. దీంతో ఆన్‌లైన్ లో సీవీలను ఎలా పంపాలి? ఆన్‌లైన్ దరఖాస్తులో ఎటువంటి జాగ్రత్తలు తీసుకోవాలి? అన్న విషయాలపై అవగాహన పెంచుకోవడం తప్పనిసరిగా మారింది. ఈ నేపథ్యంలో ఆన్‌లైన్ అప్లికేషన్స్ పంపేటప్పుడు కొన్ని జాగ్రత్తలు పాటిస్తే మీకు ఇంటర్వ్యూ పిలుపు రావడం గ్యారంటీ. 

  

మీ దరఖాస్తుకు ఆన్‌లైన్ సొగసులు అద్దండి! 

     వేదకాలంలో 'ప్రవర' అనే పద్ధతి ఉండేది. 'ప్రవర' అంటే ఒక వ్యక్తి తను ఏ వంశానికి చెందినవాడో, ఏ గోత్రానికి చెందినవాడో, అసలు తన గుణగణాలు చెప్పుకోవడం. కాలక్రమంలో ప్రవర అనేది దరఖాస్తుగా మారింది. ఒకప్పుడు కేవలం పోస్ట్ ద్వారా మాత్రమే దరఖాస్తులను స్వీకరించే కంపెనీలు ఇప్పుడు ఆన్‌లైన్ ద్వారా  అప్లికేషన్స్ ను కోరుతున్నాయి. కార్పోరేట్ కంపెనీలే కాదు ప్రభుత్వ రంగ కంపెనీలు కూడా ఆన్‌లైన్ అప్లికేషన్స్‌కే ప్రాధాన్యతనిస్తున్నాయి. అయితే ఆన్‌లైన్ లో అప్లికేషన్ ను పంపేటప్పుడు కొన్ని జాగ్రత్తలు తీసుకోవాలి. లేకుంటే మొదటికే మోసం వస్తుంది.  

ఆన్‌లైన్ దరఖాస్తులో ఈ జాగ్రత్తలు తీసుకోండి! 

• ఒక ఫైల్ ను అటాచ్ చేసిన తర్వాత కచ్చితంగా మీ పేరు తెలియజేయాలి. దీని వలన ఎంప్లాయర్ కు ఆయోమయం లేకుండా చాలా స్పష్టంగా ఉంటుంది. సీవికి ముందుగా మీ పేరు పెట్టుకోవడం వలన అటాచ్‌మెంట్ లో అది క్లియర్ గా కనిపిస్తుంది. 

• సీవీలను ఆల్‌లైన్ పంపే ముందు కచ్చితంగా చెక్ చేసుకోవాల్సిన ఒక విషయం ఉంది. అసలు మీ అప్లయ్ చేయాలనుకున్న కంపెనీ అటాచ్‌మెంట్లను అంగీకరిస్తుందా లేదా అన్నది క్రాస్ చెక్ చేసుకోండి. వైరస్ ఆందోళనల నేపథ్యంలో కొన్ని కంపెనీలు అటాచ్‌మెంట్లను అంగీకరించవు. ఈ విషయాన్ని నిర్ధారించుకుని ఒకవేళ అటాచ్‌మెంట్లను అంగీకరించకపోతే రెజ్యుమెను పేస్ట్ చేస్తే సరిపోతుంది. 

• జస్టిఫికేషన్ ఫార్మాట్ లో టెక్స్ట్ ని ఎంటర్ చేయాలి. గ్రామర్ ను ఒకటికి రెండుసార్లు చెక్ చేసుకోవాలి. అదే విధంగా అక్షర దోషాలు అస్సలు లేకుండా చూసుకొండి. స్పెల్లింగ్ మిస్టేక్స్ మీ రెజ్యుమె స్థాయిని తగ్గిస్తాయి. 

• ఒకవేళ రిఫరెన్స్ నెంబర్ ను జోడించవచ్చని కంపెనీ చెపితే కచ్చితంగా రిఫరెన్స్ నెంబర్స్ ను అందులో పేర్కొనండి. 

• చాలా మంది ఆన్‌‌లైన్ అప్లికేషన్ లో రెజ్యుమెను కూడా చాలా క్యాజువల్ గా రాసేస్తూ ఉంటారు. ఇది మంచి పద్ధతి కాదు. రెజ్యుమె అన్నది మన ఫ్రెండ్ కు పంపే పర్సనల్ మెయిల్ కాదన్నది గుర్తించండి. ఆన్‌లైన్ అప్లికేషన్ ఎప్పుడూ ప్రొఫెషనల్ మెయిల్ లా ఉండాలి. 

• మీరు పంపే మెయిల్ ఐడీని ప్రొఫెషనల్ గా రూపొందించుకొండి. నాటీ నరేష్..స్వీట్ చిన్ను ఇలాంటి పేర్లతో రెజ్యుమెను పంపిస్తే మీపై ఎంప్లాయర్ కు ప్రతికూల భావం కలుగుతుంది. 

• ఎప్పుడూ ఒక రెజ్యుమెను ఒక కంపెనీకే పంపాలి. సమయం కలిసి వస్తుంది కదాని బల్క్ మెయిల్స్ ను రకరకాల కంపెనీలకు ఫార్వార్డ్ చేయడం సరైన నిర్ణయం కాదు. అలా చేయడం మీ విశ్వసనీయతను దెబ్బతీస్తుంది. 

• మెయిల్ లో ఎప్పుడూ ప్రొఫెషనల్ రిమార్క్ మాత్రమే కనిపించాలి. కొంచెం వెరైటీగా ఉంటుందని ఫ్యాన్సీ రిమార్క్స్ చేస్తే ఎంప్లాయర్ దృష్టిలో మీరు బాధ్యత లేని వ్యక్తిగా మిగిలిపోతారు. 

• ఒక కంపెనీ ఆన్‌లైన్ లో దరఖాస్తు కోరితే వాళ్ల ఇన్‌బాక్స్ లోకి వేలాది మెయిల్స్ వచ్చి చేరుతాయి. అందులో మీ మెయిల్ ప్రత్యేకంగా ఉండాలంటే చాలా జాగ్రత్తలు తీసుకోవాలి. పక్కా ప్రొఫెషనల్ గా మీ మెయిల్ ను తీర్చిదిద్దుకోవాలి. 

• చివరిగా ఒకటికి పదిసార్లు చెక్ చేసుకున్నాక మెయిల్ పంపాలి. తర్వాత మళ్లీ ఒక అవుట్‌బాక్స్ తెరిచి మనం పంపిన మెయిల్ ఎలా ఉందో మరోసారి క్రాస్ చెక్ చేసుకోవాలి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com