స‌భ్య స‌మాజానికి ఏం మెసేజ్ ఇద్దామ‌నుకుంటున్నారు..?

    ఇప్పుడు మ‌న స‌మాజంలో నెలకొని ఉన్న కొన్ని అవాంఛ‌నీయ ప‌రిణామాలు, ప‌రిస్థితులు విద్యార్ధుల‌పై తీవ్ర ప్ర‌భావాన్ని చూపుతున్నాయి. గ‌తంలో ఒక విద్యార్ధిని బాధ్య‌తాయుత‌మైన పౌరునిగా త‌యారు చేయ‌డంలో ఉపాధ్యాయులు, త‌ల్లిదండ్రుల పాత్ర అధికంగా ఉండేది. కానీ ప్ర‌స్తుతం స‌మాజంలో పిల్ల‌ల‌ను, విద్యార్ధుల‌ను, యువ‌త‌ను ప్ర‌భావితం చేయ‌డంలో బాహ్య ప‌రిణామాలదే కీల‌క పాత్ర‌. ముఖ్యంగా మీడియా ప‌రిధి పెరిగిపోయాక పిల్ల‌ల‌ మాన‌సిక ఎదుగుద‌ల‌, ప‌రిణితిపై స‌మాజం, సాటి వ్య‌క్తులు, టెక్నాల‌జీ వంటివి ప్ర‌భావితం చూపుతున్నాయి. అవ‌స‌రం పరిధి దాటి మ‌న జీవితంలోకి చొచ్చుకొచ్చిన‌  టెక్నాల‌జీకి తోడు బాధ్యతారాహిత్యంగా మాట్లాడే మ‌న‌ సెల‌బ్రెటీలు, నాయ‌కులు..ఆ ప‌నికిమాలిన చెత్త వాగుడును ఒక‌టికి ప‌దిసార్లు చూపించే స్వీయ నియంత్ర‌ణ లేని మీడియా..ఇవ‌న్నీ ఇప్పుడు మ‌న యువ‌త‌కు చెడు సందేశాన్నే ఇస్తున్నాయి. ఇటువంటి పరిస్థితుల్లో త‌ల్లిదండ్రులు, ఉపాధ్యాయులు మాత్రమే మంచి పౌరుల‌ను త‌యారు చేయ‌లేరు. స‌మాజంలో బాధ్య‌తాయుత‌మైన స్థానంలో ఉన్న వ్య‌క్తులు, వ్య‌వ‌స్థ‌లు కూడా ఉపాధ్యాయుల పాత్ర పోషించాలి. అప్పుడే ఆరోగ్య‌వంత‌మైన‌, సంస్కార‌వంత‌మైన స‌మాజాన్ని త‌యారు చేసుకోగ‌లుగుతాం.

స‌భ్య‌తా, సంస్కారం మ‌ర్చిపోవ‌డ‌మే రాజ‌కీయమా?

    రాజ‌కీయ నాయకులు  ప్ర‌జ‌ల‌చే ఎన్నుకోబ‌డిన ప్ర‌జా ప్ర‌తినిధులు. వారు మాట్లాడే ప్ర‌తి మాటను, చేసే ప్ర‌తీ పనిని ప్ర‌జ‌లు నిశితంగా గ‌మ‌నిస్తూ ఉంటారు. వీరిని చాలా మంది అనుస‌రిస్తూ, ఆరాధిస్తూ ఉంటారు. గతంలో ప్ర‌జ‌ల్లోకి వ‌చ్చిన‌ప్పుడే నాయ‌కులు ఏం మాట్లాడేవారో ప్ర‌జ‌ల‌కు తెలిసేది. ఇప్పుడు అలా కాదు క‌దా?   ఇంటి ద‌గ్గ‌ర నుంచి అసెంబ్లీ వ‌ర‌కు వారు ఏం మాట్లాడుతున్నారో, ఎలా ప్ర‌వ‌ర్తిస్తున్నారో చూపించే వ్య‌వ‌స్థ వ‌చ్చేసింది. పెద్ద‌లు, పిల్ల‌లు అంతా టీవీ ముందుకు కూర్చుని వాళ్ల మాట‌ల‌ను, చేత‌ల‌ను చూస్తూ ఉంటారు. పెద్ద‌ల విష‌యాన్ని ప‌క్కన పెడితే పిల్ల‌లు వీళ్ల‌ను చూసి క‌చ్చితంగా ప్ర‌భావిత‌మ‌వుతారు. ఇటువంటి సున్నిత ప‌రిస్థితుల్లో హుందాగా, మ‌ర్యాద‌గా మాట్లాడాల్సిన మ‌న రాజ‌కీయ నాయ‌కులు అస‌భ్య ప‌ద‌జాలం ఉప‌యోగిస్తూ మర్యాద‌, మ‌న్న‌న మ‌ర్చిపోయి వీధిరౌడీల్లా బూతులు మాట్లాడుతున్నారు. ఒక రాజ‌కీయ నాయ‌కురాలు సాటి ప్ర‌జాప్ర‌తినిధిని  ఏం బట్టలు వేసుకోవాలో డిసైడ్ చేస్తూ ఆమె వ‌స్త్ర‌ధార‌ణపై కామెంట్లు చేస్తుంది. మ‌రో ప్ర‌ముఖ నేత ముఖ్యమంత్రిని న‌డిరోడ్డుపై కాల్చిపారేస్తా అంటాడు. ఇంకో అసెంబ్లీలో ప్ర‌జ‌లు లైవ్ లో చూస్తున్నార‌న్న ఇంగిత జ్ఞానం మ‌ర‌చి ఒరేయ్ నిన్న చంపుతా..లేపేస్తా..ఏమ‌నుకున్నావ్ అంటూ రెచ్చిపోతాడు. మ‌రోవైపు సాక్షాత్తూ రాష్ట్రాన్ని ఏలుతున్న వ్య‌క్తే చ‌వ‌ట‌లు, స‌న్నాసులు, ద‌ద్ద‌మ్మ‌లు అంటూ కొత్త తిట్ల‌ను ప్ర‌యోగిస్తూ ఉంటాడు. ప్ర‌జ‌ల‌కు ఆద‌ర్శంగా ఉండాల్సిన ఈ నాయ‌కులు ఇలాంటి భాష‌ను ఉప‌యోగిస్తూ టీవీల్లో ప్ర‌త్య‌క్ష ప్ర‌సారాల్లో కొన్ని ల‌క్ష‌ల‌మంది విద్యార్ధుల‌ను ప్ర‌భావితం చేస్తున్నారు. రేపు విద్యార్ధులు టీవీల్లో వీరి భాష‌ను చూసి, నేర్చుకుని అలాగే తోటి వారిని బూతులు తిడుతూ ఉంటే ఆ ప‌రిస్థితికి బాధ్యులెవ‌రు?

సంస్కారం లేక‌పోవ‌డ‌మే న‌యా సెలబ్రిటీ స్టైల్!

       ఈ మ‌ధ్య సోకాల్డ్ న‌టులు సెల‌బ్రిటీ హోదాలో స‌భ్య‌త, సంస్కారం లేకుండా ప్ర‌వ‌ర్తించి స‌మాజానికి త‌ప్పుడు సంకేతాల‌ను పంపిస్తున్నారు. రీసెంట్ గా సీనియ‌ర్ హీరో  త‌న అసిస్టెంట్ ను కొట్టి షూ విప్పించుకున్న వీడియో సోష‌ల్ మీడియాలో వైర‌ల్ అయింది. సాటి మ‌నిషితో ఆ విధంగా ప్ర‌వ‌ర్తించి స‌ద‌రు హీరో విద్యార్ధుల‌కు, యువ‌త‌కు ఏం మెసేజ్ ఇవ్వ‌ద‌లుచుకున్నాడు. సినిమా న‌టుల‌ను ఆద‌ర్శంగా తీసుకుని వాళ్ల‌లా న‌డవాల‌ని, వాళ్ల‌లా మాట్లాడాల‌ని చాలా మంది యువ‌కులు ప్ర‌య‌త్నిస్తూ ఉంటారు. అటువంటి యువ‌కుల‌కు ఈ సినిమా హీరోలు ఇలాంటి సందేశాల‌నా ఇచ్చేది. కొంద‌రు సెల‌బ్రిటీలు ఆడ‌వారిపై వాళ్ల వ‌స్త్ర‌ధార‌ణ‌పై అనుచిత కామెంట్లు చేసిన ఘ‌ట‌న‌లు కొకొల్ల‌లు. వారి మాట్లాడే బాష అంత అసభ్యంగా ఉన్న‌ప్పుడు దాన్ని టీవీల్లో చూపించ‌కుండా ఉండాల్సిన బాధ్య‌త మీడియా సంస్థ‌ల‌ది. కానీ రేటింగ్ లు  త‌ప్ప విలువ‌లు ప‌ట్ట‌ని టీవీ చానెళ్లు ఆ చెత్త వాగుడును ఇంటి బెడ్ రూమ్ లోకి  ఆ త‌ర్వాత చిన్న పిల్ల‌ల మెద‌ళ్ల‌లోకి తీసుకెళుతున్నాయి. రేపు సంస్కారం లేని సెల‌బ్రిటీ స్టైల్ లోనే ఒక‌ విద్యార్ధి ఆడ‌వాళ్ల‌పై అనుచిత వ్యాఖ్య‌లు చేస్తే దానికి ఎవ‌రు కార‌ణ‌మ‌వుతారు?

నాయ‌కులు, సెల‌బ్రిటీలు కూడా టీచ‌ర్లే!

     ఈ స‌మాజంలో ఉన్న‌త‌మైన వృత్తుల్లో టీచ‌ర్ వృత్తి కూడా ఒక‌టి. కానీ ఈ ఆధునిక ప్ర‌పంచంలో  పిల్లవాడ్ని ఒక్క టీచ‌ర్ మాత్ర‌మే గాడిన పెట్ట‌లేడు. త‌ల్లిదండ్రులు, స‌మాజాన్ని ప్ర‌భావితం చేసే వ్యక్తులు..ఇలా అంద‌రూ టీచర్ పాత్ర పోషించాలి. రాజ‌కీయ నాయ‌కులు, సెల‌బ్రిటీలు కూడా ఒక పిల్ల‌వాడికి ప‌రోక్షంగా టీచ‌ర్లే. వారిని చూసి ప్ర‌భావితమై ఒక విద్యార్ధి మంచి అయినా చెడు అయినా నేర్చుకుంటాడు. ఈ విష‌యాన్ని సోకాల్డ్ పొలిటీషియ‌న్స్, సెల‌బ్రిటీలు గుర్తించాలి. తాము మాట్లాడే ప్ర‌తీ మాట స‌మాజానికి మంచి సందేశాన్ని ఇస్తుందా?  చెడు సందేశాన్ని ఇస్తుందా? అన్న‌ది బేరీజు వేసుకోవాలి. ఆచితూచి మాట్లాడాలి. ఒక సామాన్య వ్య‌క్తి మాట్లాడితే ఎవ‌రో న‌లుగురైదుగురు మాత్రమే ప్ర‌భావితమ‌వుతారు. అదే ఒక సెల‌బ్రిటీ మాట్లాడితే ల‌క్ష‌లాది మంది ప్ర‌భావిత‌మ‌వుతారు. వాళ్ల‌కు అంత‌టి శ‌క్తి ఉంది. ఆ శ‌క్తిని మంచి చేసేందుకు మేలు చేసేందుకు ఉప‌యోగించాలి కానీ. ఇలా మాన‌సిక దౌర్భ‌ల్యాల‌కు లోనై అదుపు కోల్పోయి నోటికొచ్చిన‌ట్టు మాట్లాడితే వాళ్ల‌కు వాళ్లు న‌ష్టం చేసుకోవ‌డంతో పాటు స‌మాజానికి కూడా న‌ష్టం చేసినవాళ్ల‌వుతారు. ఈ విష‌యంలో ప్ర‌ధాన పాత్ర పోషించాల్సిన మీడియా వ్యాపార ధోర‌ణిలోకి కూరుకుపోయింది కాబ‌ట్టి త‌ల్లిదండ్రులే త‌మ పిల్ల‌ల విష‌యంలో మ‌రిన్ని అద‌న‌పు జాగ్ర‌త్త‌లు తీసుకోవాలి. 

తల్లిదండ్రులు మరింత జాగ్రత్త పడాల్సిందే! 

      మనం ముందు చెప్పుకున్నట్టు టెక్నాలజీ మోసుకొచ్చిన సౌకర్యాల సంగతేమో కానీ పిల్లలను చెడగొట్టడంలో ఇప్పుడు దానిదే ప్రముఖ పాత్ర. రీసెంట్ గా హైదరాబాద్ లో బయటపడిన డ్రగ్స్ కేసు పిల్లల పేరెంట్స్ ఎంత అప్రమత్తంగా ఉండాలన్న విషయాన్ని మరోసారి తెలియజేసింది. కేవలం ఎనిమిదో తరగతి చదువుతున్న పిల్లలు డ్రగ్స్ వాడుతున్నారంటే పరిస్థితి ఎంతకు దిగజారిందో అర్ధం చేసుకోవచ్చు. వీటికి తోడు మీడియా ప్రభావం కూడా పిల్లల పెరుగుదలలో ప్రధాన పాత్ర పోషిస్తుంది. టీవీల్లో, సినిమాల్లో చూసిన వాటిని, విన్నవాటిని అనుకరించేందుకు పిల్లలు ప్రయత్నిస్తూ ఉంటారు. సినిమాల విషయం పక్కన పెడితే టీవీ అనేది పిల్లలకు ప్రతీక్షణం అందుబాటులో ఉంటుంది. ఇటువంటి పరిస్థితుల్లో ఏ విషయాన్ని చూపించాలి, ఏ విషయాన్ని చూపించకుూడదు అన్న దానిపై మీడియాకు ఒక బాధ్యత ఉండాలి. ఇక సెలెబ్రిటీలు, రాజకీయ నాయకులు తమ మాటలు మీడియా ద్వారా కొన్ని కోట్ల మందికి చేరుతాయని గుర్తించి ఆచితూచి బాధ్యతాయుతంగా మాట్లాడాలి. పిల్లలను తమ మాటలతో ప్రభావితం చేయకున్నా ఫర్వాలేదు కానీ తమ అసభ్య పదజాలంతో వారిని చెడగొట్టవద్దు అన్న కనీస సామాజికి బాధ్యతను అయినా గుర్తెరగాలి. ఇక ఇలాంటి విషమ పరిస్థితుల్లో తమ పిల్లలను కాపాడుకునేందుకు తల్లిదండ్రులే తగిన జాగ్రత్తలు తీసుకోవాల్సి ఉంది. అనుక్షణం పర్యవేక్షణ, కొన్ని జాగ్రత్తలతో వాళ్లు చెడు మార్గం పట్టకుండా అడ్డుకట్ట వేయాలి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                           You can send your Educational related articles to  careertimes.online1@gmail.com