లైఫ్ లో కిక్ కావాలంటే ఈ జాబ్స్ చేయండి!

     ప్రస్తుత నవతరం కుర్రాళ్లు ప్రతీది కొత్తగా,థ్రిల్లింగ్ గా ఉండాలని కోరుకుంటున్నారు. వీళ్లకి నైన్ టూ ఫైవ్ జాబ్ అస్సలు నచ్చడం లేదు. ఏ స్కూల్ లో టీచర్ గానో, లేక టార్గెట్లను మోసే సాఫ్ట్‌వేర్ ఇంజీనీర్లుగానో , మార్కెటింగ్ ఎగ్జిక్యూటివ్స్ గానో ఉద్యోగం చేయడం ఈ తరంలో చాలా మందికి నచ్చని విష‍యం. జీవనాధారం కోసం చేసే పనిలో కాస్త థ్రిల్ ను కాస్త కొత్తదనాన్ని కోరుకుంటున్నారు. అందుకే ఇప్పటి యువతరం తమ మనసుకు నచ్చే ఆ పనిని, ఆ పని చేస్తే తమకు వచ్చే ఆనందాన్ని కాలిక్యులేట్ చేసుకుంటున్నారు. జీతం కాస్త తక్కువైనా ఫర్వాలేదు. ఆ పని వలన తమ లైఫ్ బోర్ కొట్టడం లేదని ఫీల్ కలిగితే చాలన్నది ఈ వై జనరేషన్ కుర్రాళ్ల స్టైల్. వీళ్ల ఆలోచనలకు తగినట్టుగానే ప్రపంచవ్యాప్తంగా మంచి థ్రిల్లింగ్ జాబ్స్ కు కొదువే లేదు. వీటి లైఫ్ టైమ్ కాస్త తక్కువైనా పనిలో ఆనందాన్ని వెతుక్కునేందుకు మంచి వేతనాన్ని అందుకునేందుకు వీటిని మించిన ప్రత్యామ్నాయం లేదు. సముద్రంలో అందమైన ప్రపంచంలో విహరించడాన్ని, ఏ ధోనితోనో, కోహ్లీతోనో సన్నిహితంగా మెలగాలన్న కలను నిజం చేసే కొన్ని థ్రిల్లింగ్ కెరీర్స్ పై లుక్కేద్దామా. 

మెరైన్ ఫోటోగ్రాఫర్

      సముద్రగర్భం అంటేనే మరో ప్రపంచం. అక్కడ ఎన్నో వింతలు, విశేషాలు, జీవాలు, రహస్యాలు.  సముద్రపు లోతుల్లో వెళ్లి పరిశోధనలు చేస్తున్నా ఇప్పటికీ సాధించింది ఏ 5 శాతమో ఉంటుంది.  సముద్ర గర్భంలోని ఆ అద్భుత ప్రపంచాన్ని ఫోటోలుగా, వీడియోలుగా తీసి ప్రపంచానికి చూపించే వాడే మెరైన్ ఫోటోగ్రాఫర్. ఇది చాలా సాహసంతో, ధైర్యంతో కూడుకున్న ఉద్యోగం. డైవింగ్ స్కిల్స్ ఉండి సముద్రంలో ఉన్న ఆ థ్రిల్ ను ఎంజాయ్ చేయగలిగే వాళ్లు మెరైన్ ఫోటోగ్రాఫర్ గా రాణిస్తారు. ముందుగా ఏదైనా సెంటర్ లో ఒపెన్ వాటర్ డైవింగ్ కోర్సుని పూర్తి చేయాలి. అదే విధంగా ముంబైలో ఉన్న అండర్ వాటర్ ఫోటోగ్రఫీ కోర్సు నేర్చుకోవాలి. ఈ అర్హతలు సాధిస్తే నేషనల్ జియోగ్రఫిక్ ఛానెల్, డిస్కవరీ ఛానెల్, డైవర్ మ్యాగజైన్, రీఫ్‌వాచ్ వంటి ప్రముఖ సంస్థల్లో ఉద్యోగాన్ని అప్లయ్ చేయొచ్చు. అనుభవాన్ని బట్టి , ఎంత లోతు డైవ్ చేయగలరు అన్న దాన్ని బట్టి వీళ్లకు వేతనాలు భారీగానే ఉంటాయి. 

సెలబ్రిటీ మేనేజర్ 

     పెద్ద పెద్ద సినిమా హీరోలు, క్రికెట్ స్టార్స్ దగ్గర సన్నిహితంగా మెలుగుతూ వాళ్ల వ్యవహారాలను చక్కబెట్టే అవకాశం సెలబ్రిటీ మేనేజర్ ఉద్యోగంతోనే సాధ్యం. కాస్త అనుభవం ఉంటే చాలు ధోనీయైనా, షారూక్ ఖాన్ అయినా వీళ్లకు అధిక ప్రాధాన్యతనివ్వాల్సిందే. సెలబ్రిటీల రోజువారీ వ్యవహారాలు, వాళ్లు అటెండ్ కావాల్సిన కార్యక్రమాలు, మాట్లాడాల్సిన వ్యక్తులు ఇలా అన్ని పనులు సెటబ్రిటీ మేనేజర్ కనుసన్నల్లోనే జరుగుతాయి. ముందుగా చిన్న చిన్న స్టార్స్ దగ్గర పనిచేసి సామర్ధ్యాన్ని నిరూపించుకుంటే తర్వాత వీళ్ల కోసం పెద్ద పెద్ద సెటబ్రిటీలే క్యూ కడతారు. వీళ్లకు అంత డిమాండ్ ఉంది. పబ్లిక్ రిలేషన్స్ అండ్ అడ్వర్టైజింగ్ లో డిగ్రీ పూర్తి చేసి వాళ్లకు సెలబ్రిటీ మేనేజర్ గా ఎదిగేందుకు అవకాశాలు ఎక్కువ. ముందుగా ఒక క్లయింట్ దగ్గర ప్రీలాన్సర్ పనిచేసి అనుభవం సంపాదిస్తే తర్వాత సెలబ్రిటీ మేనేజ్‌మెంట్ ఏజెన్సీలో ఉద్యోగాన్ని సాధించొచ్చు. వీళ్ల పనిచేస్తున్న సెలబ్రిటీ స్థాయిని బట్టి వీళ్ల జీతం భారీగానే ఉంటుంది. 

ఆర్గానిక్ ఫార్మర్  

       ప్రస్తుతం కెమికల్స్, ఫెర్టిలైజర్స్ వాడకం వ్యవసాయంలో బాగా పెరిగిపోయింది. దీంతో భూసారం దెబ్బతినడంతో పాటు రసాయనాలతో పండించిన పంటలు తినడం మనుష్యులు అనారోగ్యం బారిన పడుతున్నారు. దీంతో ఇటీవల కాలంలో ఆర్గానిక్ పంటలకు డిమాండ్ పెరిగింది. అందుకే ఇప్పుడు ఇది ఒక కెరీర్ గా రూపుదాలుస్తోంది. దీనిపై ఆసక్తి ఉన్న యువతరం దీన్ని కెరీర్ గా మార్చుకోవచ్చు. ఉత్తరాఖండ్ లో ఉన్న నవధాన్య,  నేషనల్ సెంటర్ ఫర్ ఆర్గానిక్ ఫార్మింగ్ సెంటర్ , ఆల్ ఇండియా ఆర్గానిక్ ఫార్మర్స్ సోసైటీల్లో చదివితే దీనిపై మంచి పట్టు చిక్కుతుంది. ఈ కెరీర్ ను ఎంచుకున్న వాళ్లు చాలా మంది సొంతంగానే వ్యవసాయం చేస్తున్నారు. మరికొందరు ఇతర కార్పోరేట్ సంస్థల్లో, ఎన్‌జీవోల్లో ఆల్టర్‌నేటివ్స్ గా పనిచేస్తున్నారు. వేతనం కూడా ఆకర్షణీయంగానే ఉంటుంది. 

ఫుడ్ సైంటిస్ట్ 

      మనం ఏదైనా ఆహార పదార్ధాన్ని కొనుగోలు చేసినప్పుడు లేబుల్ పై  ఉన్న కేలరీల వివరాలన్నీ ఫుడ్ సైంటిస్ట్ చెప్పినవే. ఒక ఆహార పదార్ధంలో  ఎన్ని కేలరీలు ఉన్నాయి. పోషకాలు ఏంటి? ఇవన్నీ లేబుల్ పై పరిశీలించాకే ఇప్పుడు చాలా మంది ఆ ఐటమ్ ను కొనుగోలు చేస్తున్నారు. దీంతో ఇవన్నీ వెల్లడించే ఫుడ్ సైంటిస్ట్ లకు ఆదరణ పెరిగింది. విభిన్న రకాల ఫుడ్ ను పరిశీలించి, పరిశోధించడం మంచి కిక్ నిచ్చే విష‍యమే కదా? ఏదైనా యూనివర్సిటీలో ఫుడ్ టెక్నాలజీ బ్యాచిలర్ డిగ్రీ చేసినవారు ఈ రంగంలోకి రావచ్చు.  ప్రభుత్వ ఏజెన్సీలు, ఫుడ్ ప్రాసెసింగ్ యూనిట్లలో వీరికి బోలెడు ఉద్యోగ అవకాశాలున్నాయి. అనుభవాన్ని బట్టి జీతం కూడా భారీగానే ముట్టజెపుతారు. 

        వీటితో పాటు ఫ్యాషన్ బ్లాగర్, డేటా సైంటిస్ట్, వాయిస్ ఓవర్, యాప్ డిజైనర్ వంటి జాబ్స్ ను యువత తమ థ్రిల్లింగ్ కెరీర్స్ లిస్ట్ లో ఉంచారు. ఆసక్తి ఉన్నవారు వీటిపై కూడా ఓ లుక్కేయవచ్చు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                            You can send your Educational related articles to  careertimes.online1@gmail.com