మనుషుల కంటే వస్తువుల్ని ఎక్కువగా ప్రేమించేది..ఆడవాళ్లా? మగవాళ్లా?

    దేవుడు ఎంతో అద్భుతంగా ఈ ప్ర‌పంచాన్ని సృష్టించాడు. ఆనందంగా జీవించ‌డానికి, ప్రేమ‌ను పంచ‌డానికి మ‌న‌కు ఎన్నో అవ‌కాశాలున్నాయి. కానీ ఆధునిక‌త పేరుతో మ‌నం ఆ ఆనందాన్ని దూరం చేసుకుంటున్నాం. చిన్న చిన్న అహాల‌తో, అపార్ధాల‌తో అంద‌మైన జీవితాన్ని న‌ర‌కంలా మార్చుకుంటున్న వైనం ఇప్పుడు ఆందోళ‌న క‌లిగిస్తోంది. జీవితాన్ని స‌రైన మార్గంలో న‌డిపించుకుని, ఆనందంగా జీవించేందుకు అవ‌స‌ర‌మైన జీవ‌న నైపుణ్యాల‌ను మీకు అందించేందుకు 'కెరీర్ టైమ్' ప్ర‌య‌త్నం చేస్తోంది. చిన్న చిన్న మార్పులతో, స‌ర్దుబాట్ల‌తో లైఫ్ ను బ్యూటీఫుల్ గా మార్చుకునే కిటుకు తెలిస్తే స‌రిపోతుంది. కానీ ఇప్పుడు చాలా మంది భార్య‌భ‌ర్త‌లు అన‌వ‌స‌ర‌పు ప‌ట్టింపుల‌తో, పంతాల‌తో సుఖంగా గ‌డ‌పాల్సిన కాలాన్ని వృధా చేసుకుంటూ లైఫ్ లోని మజాను అస్వాదించ‌లేక‌పోతున్నారు. ముఖ్యంగా కొంద‌రు భార్య‌లు ప్ర‌తీ చిన్న విష‌యాన్ని భూత‌ద్దంలో పెట్టి చూస్తూ స‌ర్దుబాటు అన్న ప‌దాన్ని పూర్తిగా మ‌ర్చిపోతున్నారు. దీంతో స‌మాజంలో కుటుంబాలు విచ్ఛిన్న‌మ‌య్యే ప్ర‌మాద‌క‌ర ప‌రిస్థితి పొంచి ఉంది. మా ఉద్దేశం భార్య‌ల‌ను త‌ప్పుప‌ట్ట‌డం కాదు. భ‌ర్త పొర‌పాటు చేస్తే గొడ‌వ‌ప‌డ‌టంలో త‌ప్పు లేదు కానీ చిన్న చిన్న గిల్లిక‌జ్జాల‌ను గల్లీ లెవెల్ దాకా తీసుకెళ్ల‌డ‌మే అస‌లైన స‌మ‌స్య‌గా మారుతోంది.

వ‌స్తువుల్ని ప్రేమిస్తున్నాం..మ‌నుష్యుల్ని వాడుకుంటున్నాం!

      రీసెంట్ గా వ‌చ్చిన సినిమాలో ఓ డైలాగ్ ఉంది. 'మ‌నం వ‌స్తువుల్ని వాడుకోవాలి. మ‌నుష్యుల్ని ప్రేమించాలి. కానీ ఇప్పుడు మ‌న‌మేం చేస్తున్నాం. వ‌స్తువుల్ని ప్రేమిస్తున్నాం..మ‌నుషుల్ని వాడుకుంటున్నాం'. మ‌నం స‌మాజం ఎంత భ‌యంక‌ర‌మైన  ప‌రిస్థితిలోకి జారిపోతుందో ఈ ఒక్క డైలాగ్ క‌ళ్ల‌కు క‌డుతోంది. టెక్నాల‌జీ ప‌రంగా అభివృద్ధి సాధించినా, ఆర్థికంగా ఉన్న‌తిని సాధించినా మానవ సంబంధాల విష‌యంలో మాత్రం మ‌నం తిరిగి రాతియుగానికి వెళ్లిపోతున్నాం. ఒక వ‌స్తువు పోతే మ‌ళ్లీ కొనుక్కోవ‌చ్చు. కానీ మ‌నుషుల్ని దూరం చేసుకుంటే తిరిగి వాళ్ల‌ను మ‌నం ద‌క్కించుకోగ‌ల‌మా?  మ‌ధ్య త‌ర‌గ‌తి నుంచి సంప‌న్నుల వ‌ర‌కూ ప్ర‌తీ ఒక్క‌రూ ఈ చిన్న లాజిక్ ను మిస్ అయిపోతున్నారు. మాన‌వ సంబంధాల‌ను ఆర్థిక సంబంధాల కోణంలో చూడ‌ట‌మే ఈ దుస్థితికి ప్ర‌ధాన కార‌ణంగా క‌నిపిస్తోంది. మ‌నుష్యుల్ని ప్రేమించ‌డం అంటే వాళ్ల‌లో ఉండే అనుకూల‌త‌ల‌ను , వారి బ‌లాల‌ను, వారి డ‌బ్బును ప్రేమించ‌డం కాదు...వారి బ‌ల‌హీన‌త‌ల‌ను, వారి లోపాల‌ను ఇలా అన్నింటినీ ప్రేమించాలి. కానీ దుర‌దృష్టవ‌శాత్తూ ఇప్పుడు అటువంటి ప్రేమ‌లు కనుమ‌రుగవుతున్నాయి. సామాజిక మార్పో లేక అప‌రిప‌క్వ‌తో తెలియ‌దు కానీ చాలా మంది భార్య‌లు ఇప్పుడు త‌మ భ‌ర్త‌ల్లోని లోపాల‌ను ప్రేమించేందుకు సిద్ధంగా ఉండ‌టం లేదు. ఈ పరిస్థితి  ఇప్పుడు స‌మాజంలో పెను సంక్షోభాన్ని పుట్టించేదిగా మారుతోంది.

కుళ్లిన మామిడి పండ్ల‌ను తినొద్దు!

      మీకు రాజు, మామిడి పండ్ల క‌థ తెలుసా? ఒక రాజ్యంలో రాజుగారికి మామిడి పండ్లు అంటే విప‌రీత‌మైన వ్యామోహం. ఎంత వ్యామోహం అంటే మామిడి ప‌ళ్ల సీజ‌న్ లేని కాలంలోనూ వాటిని తినాల‌నే కోరిక‌తో ఎంతో దూరం నుంచి అయినా వాటిని తెప్పించుకునేవాడు. రాజ్య వ్యవ‌హారాలను గాలికొదిలి రాజుగారి వ్యాప‌కం అంతా మామిడి ప‌ళ్ల చుట్టూనే ఉండేది.  సీజ‌న్ లేని స‌మ‌యంలో సుదూరం నుంచి తెప్పించుకున్న మామిడి ప‌ళ్ల‌ను ప్ర‌త్యేకంగా ఒక బీరువాలో పెట్టి తాళం వేసి రోజుకొక‌టి తినేవాడు. అయితే మొత్తం ప‌ళ్ల‌లో రోజూ ఏదో ఒక పండు కుళ్లిపోయేది. అయితే కుళ్లిన పండును పారేస్తే ప‌ళ్లు త‌రిగిపోతాయ‌ని రేపు మంచి పండు తినొచ్చులే అనుకుని కుళ్లిన పండునే తినేసేవాడు. ఇలా ప్ర‌తీ రోజూ మంచి ప‌ళ్ల‌ను వ‌దిలేసి కుళ్లిన పండ్ల‌నే తినేవాడు. దీంతో రాజుగారి ఆరోగ్యం క్షీణించింది. తత్వం భోధ‌ప‌డింది. ఏదైనా మంచి ప‌రువంలో ఉన్న‌ప్పుడే ఆస్వాదించాలి. త‌ర్వాత తిందాంలే అనుకుంటే కుళ్లిన పండ్ల‌ను తినాల్సి వ‌స్తుంది. ప్ర‌స్తుతం చాలా మంది భార్యాభ‌ర్త‌లు ఇలా కుళ్లిన మామిడి పండ్ల‌నే తింటున్నారు. చిన్న చిన్న అపోహ‌ల‌తో జీవితాన్ని న‌క‌రం చేసుకుంటున్నారు. రోజంతా ప‌నిచేసిన అలిసిపోయిన భ‌ర్త , ఇంటికి సంబంధించిన కొన్ని ప‌నుల‌ను మ‌ర్చిపోవ‌చ్చు. దీన్ని భార్య‌లు అర్ధం చేసుకోవాలి. ఇంటి ప‌ని చేయ‌లేదు అంటే నేనంటే మీకు చుల‌క‌న భావం క‌దా? అంటూ గొడ‌వ చేస్తే సంసారంలో చిక్కులు త‌ప్ప‌వు. అలా కాకుండా అత‌ని త‌ప్పును క్ష‌మించి, అత‌ను రోజంతా క‌ష్ట‌ప‌డింది. త‌న కుటుంబం కోస‌మే క‌దా? అని ఆలోచిస్తే అపార్ధాలు రావు. మధుర‌మైన మామిడి పండ్ల‌ను తినొచ్చు. ఇలా అర్ధం చేసుకోకుండా గొడ‌వ‌ల‌తో, అపార్ధాల‌తో కాలాన్ని వ్య‌ర్ధం చేసుకుంటే త‌ర్వాత కుళ్లిన మామిడి పండ్ల‌ను తినాల్సిందే.

లోపాలు లేనివాళ్లు కావాలంటే హిమాల‌యాల‌కు వెళ్లాల్సిందే!

       కుటుంబ బాధ్య‌త‌ల‌ను నిర్వ‌ర్తించే స్త్రీల ప‌రిధి చాలా చిన్న‌ది. భ‌ర్త‌, పిల్ల‌లు, కుటుంబం. అయితే ప‌రిధి త‌క్కువ ఉన్న‌ప్పుడే ప్ర‌తీది చాలా పెద్ద‌దిగా క‌నిపిస్తుంది. స‌రిగ్గా ఇక్క‌డే చాలా మంది భార్య‌లు విష‌యాన్ని స‌రిగ్గా అర్ధం చేసుకోలేక కాపురాల్లో క‌ల‌త‌ల‌ను కొని తెచ్చుకుంటున్నారు. కుటుంబ బాధ్య‌త‌ల‌ను స‌రిగ్గా నిర్వ‌ర్తించే ప్ర‌తీ మ‌గ‌వాడూ రోజంతా తాను సాధించిన ఘ‌న‌త‌లు చేసిన ప‌నుల‌ను త‌న భార్య‌తో చెప్పుకునేందుకు ఇష్ట‌ప‌డ‌తాడు. త‌ను క‌ష్ట‌ప‌డుతుంది..మ‌రింత క‌ష్ట‌ప‌డ‌బోయేది అన్నీ మ‌న కుటుంబం కోస‌మే అని చెప్పేందుకు ట్రై చేస్తాడు. ఈ స‌మ‌యంలో భార్య‌లు అత‌ని లోపాల‌ను ఎత్తిచూపుతూ, ఉద‌యం గ్యాస్ బుక్ చేయ‌మ‌ని చెప్పాను, చేసారా?  ఐదు ర‌కాల కూర‌గాయ‌లు తెమ్మంటే మూడే తెచ్చారు?  నేనంటే చుల‌క‌న అయిపోయింది? అంటూ త‌న అసంతృప్తిని గొడ‌వ రూపంలో బ‌య‌ట‌పెడితే విష‌యం జ‌ఠిలంగా మారుతుంది. త‌న‌పై ప్రేమ‌తో ఇంత క‌ష్ట‌ప‌డుతుంటే ఆమె చిన్న చిన్న లోపాల‌ను ఎత్తిచూప‌డం త‌నను ధిక్క‌రించిన‌ట్టుగానే భ‌ర్త భావిస్తాడు. దీంతో క‌ల‌హాలు మొదల‌వుతాయి. ఎడ‌బాటు క‌లుగుతుంది. చిన్న చిన్న స‌ర్దుబాట్లు చేసుకోక‌పోవ‌డం వ‌ల‌న చివ‌రికి కుళ్లిన మామిడిప‌ళ్ల‌ను తినాల్సి వ‌స్తుంది. భార్య‌లైనా, భ‌ర్త‌లైనా త‌మ భాగస్వామి లోని లోపాల‌ను  ఎత్తి చూపుతుంటే కుటుంబం చివ‌రికి ఛిన్నాభిన్నంగా మారుతుంది. లోపాలు, త‌ప్పులు లేని మ‌నుష్యులు మ‌న‌కు ఈ స‌మాజంలో క‌నిపించ‌రు. అలాంటి వాళ్లు కావాలంటే హిమాల‌యాల‌కు వెళ్లాల్సిందే. అక్క‌డ కూడా దొరుకుతార‌న్న గ్యారంటీ లేదు.

మీకు ప్రేమ కావాలా? ప‌ర్‌ఫెక్ష‌నిస్ట్ కావాలా?

     మ‌నం వ‌స్తువుల‌ను ప‌ర్‌ఫెక్ష‌న్ కోస‌మే క‌దా కొనుక్కుంటాం. వాటిలో ఎటువంటి ప్రేమ ఉండ‌దు. అలాగా వాటిలో నిర్ల‌క్ష్యం కూడా ఉండ‌దు. కానీ మ‌నుష్యులు అలా ఉండ‌టం సాధ్యం కాదు. మ‌నుష్యులు ప్రేమిస్తారు. కొన్నిసార్లు నిర్ల‌క్ష్యం కూడా చేస్తారు. నిజంగా ప్రేమించిన‌ప్పుడు లోపాలు క‌న‌బ‌డ‌కూడ‌దు. వ‌స్తువుల్ని మ‌నుష్యుల్ని ఒకేలా ట్రీట్ చేస్తే మ‌న స‌మాజంలో కుటుంబ సంబంధాలు మ‌రింత దిగ‌జారుతాయి. ప్ర‌స్తుతం మ‌న దేశంలో చాలా మంది భార్య‌లు భ‌ర్త‌ను ఒక వ‌స్తువులా చూస్తున్నార‌ని పురుష సంఘాలు వాదిస్తున్నాయి. చిన్న అహం తో తెలివిత‌క్కువత‌నంతో జీవితాల‌ను సంక్షోభంలోకి నెట్టుకుంటున్న వాళ్లు పెరిగిపోయారు. సరిగ్గా ఇక్క‌డే కుటుంబాలు విచ్ఛిన్న‌మై అక్ర‌మ సంబంధాలు పెరిగే ప్ర‌మాదం పొంచి ఉంది.  భ‌ర్త భ‌రించ‌లేని పెద్ద త‌ప్పులు చేసినప్పుడు అత‌న్ని దూరం పెట్టాల్సిందే. త‌ప్పు లేదు. కానీ చిన్న చిన్న విష‌యాల‌కు విష‌యాన్ని తెగే వ‌ర‌కూ లాగితే జీవితం కుళ్లిన మామిడి పండు అవుతుంది.  మీకు ప్రేమ కావాలంటే మ‌నుష్యుల‌నే ప్రేమించండి. కాదు ఫ‌ర్‌పెక్ష‌నిస్ట్ కావాలంటే ఒక రోబోను కొనుక్కోవ‌డం త‌ప్ప మ‌రో మార్గం లేదు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                            You can send your Educational related articles to  careertimes.online1@gmail.com