ఆ సన్నని గీతను గుర్తిస్తే మీదే విజయం!

     ప్ర‌తీ రోజూ ఉదయం మ‌నం నిద్ర లేచిన ద‌గ్గ‌ర్నుంచి మ‌ళ్లీ రాత్రి ప‌డుకునే వ‌ర‌కూ ఎన్నో విష‌యాలను అనుకుంటూ ఉంటాం. ఫ‌లానా ప‌ని చేయాలి అనో లేదా ఫ‌లానా స్థాయికి చేరుకోవాలి అనో బాగా డ‌బ్బు సంపాదించాలి అనో ఇలా ఎన్నో ప్ర‌ణాళిక‌ల‌ను వేసుకుంటాం. అయితే ఇలా అనుకున్నవ‌న్నీ నిజ‌మైతే అంద‌రూ ఉన్న‌త స్థితిలో ఉండేవారు క‌దా?  కానీ కొంద‌రు మాత్ర‌మే విజ‌య‌వంత‌మ‌వుతున్నారు మిగిలిన వారు చిన్న స్థాయిలోనే మిగిలిపోతున్నారు. ఎందుకు?  అనుకోవ‌డానికి చేయ‌డానికి మ‌ధ్య ఉన్న స‌న్న‌ని గీతే విజ‌యం. ఆ స‌న్న‌ని గీత‌ను ఎవ‌రైతే అర్ధం చేసుకుంటారో వాళ్లే విజేత‌లుగా నిలుస్తారు. ఎవ‌రైతే ఒక ప్ర‌ణాళికతో ఒక దీర్ఘ‌కాలిక ల‌క్ష్యంతో క‌ష్ట‌ప‌డి ప‌నిచేస్తారో అటువంటి వాళ్ల‌నే విజ‌యం వ‌రిస్తుంది. మిగిలిన వాళ్ల‌తో పోల్చుకుంటే అర్హ‌త‌లు, అనుకూల‌త‌లు త‌క్కువ‌గా ఉన్నప్ప‌టికీ, ప్ర‌ణాళిక, అనుకున్న‌ది అనుకున్న‌ట్టు చేయ‌గ‌లిగే వ్య‌క్తులు ఉన్న‌త స్థానాల‌కు చేరుకుంటారు. ప్ర‌ధాని మోదీ, స‌చిన్ టెండూల్క‌ర్, ర‌జ‌నీకాంత్ వంటి వ్య‌క్తులు తాము ఏదైతే అనుకున్నారో దాన్ని క‌ష్ట‌ప‌డి చేయ‌గ‌లిగారు కాబ‌ట్టే ఇప్పుడు అంద‌రికీ ఆద‌ర్శ‌ప్రాయులుగా నిలిచారు. 

మ‌న ప్ర‌స్తుత చ‌ర్య‌లే మ‌న భ‌విష్య‌త్ ను నిర్దేశిస్తాయి!

       ప్ర‌తీ ఒక్క‌రూ జీవితంలో పైకి రావాల‌ని, మంచి ఉన్న‌త‌మైన జీవ‌నాన్ని అనుభ‌వించాలని క‌ల‌లు కంటూ ఉంటారు. కానీ కొంద‌రే విజ‌య శిఖ‌రంపై త‌లెత్తుకుని స‌గ‌ర్వంగా నిల‌బ‌డ‌గలుగుతారు. ఎందుకంటే అనుకోవ‌డానికి చేయ‌డానికి మ‌ధ్య ఉన్న వ్య‌త్యాస‌మే విజ‌యం. క‌ల‌లు క‌న‌డం చాలా సులువే కానీ ఆ క‌ల‌ల‌ను నిజం చేసుకునే ప్రాసెస్ మాత్రం చాలా క‌ష్టంతో కూడుకుని కాస్త క‌ఠినంగా ఉంటుంది. అలా అని కల‌లు క‌న‌డం మానేయ‌మ‌ని కాదు. ప్రతీ ఒక్క‌రూ గొప్ప‌వాళ్లుగా ఎద‌గాలంటే క‌ల‌లు క‌నాల్సిందే. అయితే వాటికి శ్ర‌మ‌, ప్ర‌ణాళిక‌ను కూడా జోడిస్తేనే  క‌ల‌లు నిజ‌మ‌వుతాయి. విజ‌యం అనేది రాత్రికి రాత్రే నెర‌వేరే విషయం కాదు. ఎన్నో క‌ష్టాలు, మ‌రెన్నో న‌ష్టాలు వాటిని మించి ఓర్పు ఉన్న‌ప్పుడే విజ‌యం దరికి చేరుతుంది. ఆర్ఎస్ఎస్ ప్రచార‌క్ గా జీవితాన్ని ప్రారంభించిన మోదీ దేశ ప్ర‌ధాన మంత్రిగా ఎలా ఎదిగారు? ఒక దీర్ఘ‌కాలిక ల‌క్ష్యంతో అలుపు లేకుండా క‌ష్టప‌డి ప‌నిచేసారు కాబ‌ట్టే ఇప్పుడు  ప్ర‌పంచంలో అతిపెద్ద ప్ర‌జాస్వామ్య దేశానికి ప్ర‌ధాని కాగ‌లిగారు. 

విజ‌యానికి ఎందుకు దూర‌మ‌వుతున్నాం?

     విజ‌యాన్ని చేరుకోవ‌డంలో మ‌నం ఎక్క‌డ ఫెయిల్ అవుతున్నాం? ప్ర‌తీరోజూ మ‌న చుట్టూ ఉన్న ఎన్నో విష‌యాల‌ను గ‌మ‌నిస్తూ వాటికి స్పందిస్తూ మ‌నం చాలా విష‌యాల‌ను నేర్చుకుంటూ ఉంటాం. అందులో కొన్నింటిని సీరియ‌స్ గా తీసుకుని క‌చ్చితంగా  ఆ పని చేయాల్సిందే అనో లేదంటే ఫ‌లానా స్థాయికి చేరుకోవాల్సిందే అనో నిర్ణ‌యించుకుంటాం. కానీ ఈ విధంగా అనుకున్న వాళ్ల‌లో కేవ‌లం ఓ 5 శాతం మందో 6 శాతం మందో మాత్ర‌మే అనుకున్న‌ది అనుకున్న‌ట్టు చేసి విజయాన్ని సొంతం చేసుకుంటారు. మిగిలిన వాళ్లు అనుకోవ‌డం ద‌గ్గ‌రే ఆగిపోతారు. అనుకున్న‌ది అనుకున్న‌ట్టు చేసేస్తే క‌చ్చితంగా విజ‌యం వ‌స్తుంది. ఈ విష‌యం తెలిసినా మ‌న‌లో చాలా మంది ఆ అనుకోవ‌డ ద‌గ్గ‌రే ఎందుకు ఆగిపోతున్నారు?  దీనికి చాలా కార‌ణాలున్నాయి. సామాజిక కార‌ణాలు కావ‌చ్చు లేక వ్య‌క్తిగ‌త కార‌ణాలు కావ‌చ్చు చాలా మందికి భ‌విష్య‌త్ మీద పెద్దగా ఆశ ఉండ‌దు. ఈ రోజు గ‌డిస్తే చాలు అన్న మాన‌సిక స్థితిలో ఉంటారు. దీంతో వాళ్ల దీర్ఘ‌కాలిక ల‌క్ష్యాలు మ‌రుగున ప‌డిపోతాయి. ఎప్ప‌టికీ అలా సామాన్యుల్లానే మిగిలిపోతారు. 

గొప్ప‌వాళ్లు కావాలంటే గొప్ప‌గా క‌ష్ట‌ప‌డాలి! 

       మ‌నం ఇప్పుడు ఆద‌ర్శంగా తీసుకుంటున్న గొప్ప‌వాళ్లు సులువుగా ఆ స్థాయికి రాలేదు. వాళ్లు ఆ స్థాయికి రావ‌డం వెనుక ఎంతో క‌ష్టం, శ్ర‌మ ఉంటాయి. చాలా మంది ఆ స‌క్సెస్ ఫుల్ వ్య‌క్తుల్ని చూసి వాళ్ల‌లా ఎద‌గాల‌నుకుంటారు కానీ వాళ్ల విజ‌యం వెనుక ఉన్న క‌ష్టాన్ని విస్మ‌రిస్తారు. స‌చిన్ టెండూల్క‌ర్ ప్ర‌పంచంలోనే గొప్ప బ్యాట్స్ మ‌న్ ఎలా కాగ‌లిగాడు? గ‌ంట‌ల త‌ర‌బ‌డి ప్రాక్టీస్, రోజుల తర‌బ‌డి ఓర్పుతో ప్ర‌తీ రోజూ క్ర‌మం త‌ప్ప‌కుండా క‌ష్ట‌ప‌డ‌బ‌ట్టే ఆ స్థాయికి చేరుకున్నాడు. యువ‌కులు స‌చిన్ టెండూల్క‌ర్ లా గొప్ప క్రికెట‌ర్ ని అయిపోతా అంటే కాదు అత‌ని విజ‌యం వెనుక ఉన్న క‌ష్టాన్ని గుర్తించాలి. ఆ స్థాయిలో తానూ క‌ష్ట‌ప‌డేందుకు సిద్ధ‌ప‌డాలి.అప్పుడే గొప్ప క్రికెట‌ర్ అయ్యేందుకు అవ‌కాశం ఉంటుంది. ప్ర‌స్తుతం చాలా మంది విద్యార్ధులు చిన్న‌త‌నంలో డాక్ట‌ర్ కావాల‌నో లేదా గొప్ప ఇంజినీర్ కావాల‌నో మంచి ల‌క్ష్యాలు పెట్టుకుంటున్నారు. దాని కోసం టెన్త్ ద‌గ్గ‌ర్నుంచి, ఇంట‌ర్, నీట్ వ‌ర‌కూ ల‌క్ష్య సాధ‌న‌కు అవ‌స‌ర‌మైన క‌ష్టాన్ని ప‌డాలి. అలా కాకుండా ఇంట‌ర్ లోకి రాగానే చ‌దువుకు నిర్ల‌క్ష్యం చేస్తూ మంచి డాక్ట‌ర్ గా ఎద‌గాలంటే ఎలా సాధ్య‌మ‌వుతుంది? 

అనుకున్నా చేయ‌లేక‌పోవ‌డ‌మే ప‌రాజ‌యం! 

     ప్ర‌స్తుతం మ‌న‌లో చాలా మంది ఉద‌యాన్నే ఆరు గంట‌ల‌కు లేచి వ్యాయామం చేద్దామ‌ని ముందు రోజు అనుకొంటారు. కానీ స‌రిగ్గా ఆ స‌మ‌యం వ‌చ్చిన‌ప్పుడు ఆ ప‌నిని వాయిదా మ‌రో రెండు గంట‌లు ప‌డుకుంటారు. ఈ వాయిదాల ప‌ర్వం ఎప్ప‌టికీ కొన‌సాగుతూనే ఉంటుంది. ఎన్నో ప‌నులు చేయ‌గ‌లిగిన విలువైన రెండు గంట‌ల స‌మ‌యాన్ని వృధా చేస్తారు. వ్యాయామం చేయ‌రు కానీ వందేళ్లు ఆరోగ్యంగా బ‌తికేయాల‌ని అనుకుంటూ ఉంటారు. ఇది ఎలా సాధ్యం? అనుకోవ‌డానికి చేయ‌డానికి మ‌ధ్యనే అధిక శాతం మంది ఫెయిల్ అవుతూ ఉంటారు. ఒక టెన్నిస్ ప్లేయ‌ర్ ప్రాక్టీస్ లో భాగంగా రోజుకు దాదాపు 3 వేల బాల్స్ ను హిట్ చేయ‌గ‌లిగితే అత‌నికి మ్యాచ్ లో విజ‌యం వ‌రిస్తుంది. అంత క‌ఠినమైన ప్రాక్టీస్ చేయ‌కుండా విజ‌యం సాధించాలంటే ఎలా కుదురుతుంది? మ‌నలో సామాన్య వ్య‌క్తి ద‌గ్గ‌ర్నుంచి, తెలివైన వాళ్ల వ‌ర‌కూ అంద‌రూ కొన్ని ఆలోచ‌న‌లు చేస్తారు. కొన్ని ప‌నులు చేయాల‌ని అనుకుంటారు. అలా అనుకుని దాన్ని పూర్తి చేయ‌డ‌మే విజ‌యం..అనుకుని చేయ‌లేక‌పోవ‌డ‌మే ప‌రాజ‌యం. ఈ చిన్న తేడాను గుర్తించ‌గ‌లిగితే విజ‌యం మీ ద‌రికి చేరుకుండా త‌ప్పించుకోలేదు. మ‌రెందుకాల‌స్యం ...చేయాల‌నుకున్న ప‌నిని ఇప్పుడే మొద‌లుపెట్టేయండి.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com