చిరంజీవి నుంచి విద్యార్ధులు నేర్చుకోవాల్సింది ఏంటో తెలుసా?
మెగాస్టార్ చిరంజీవి...ఈ పేరు వింటేనే కోట్లాదిమంది అభిమానుల గుండెలు ఆనందంతో పుల‌క‌రించిపోతాయి. డ్యాన్స్ లు, ఫైట్ లతో ప్రేక్ష‌కుల‌ను ఉర్రూత‌లూగించి త‌న పేరును చ‌ల‌నచిత్ర సీమ‌లో సువ‌ర్ణాక్ష‌రాల‌తో లిఖించుకున్న న‌టుడు చిరంజీవి. ప్ర‌స్తుతం 62 వ పుట్టిన రోజును జ‌రుపుకుంటున్న చిరంజీవి సినిమా రంగంలోకి అడుగుపెట్టి 40 ఏళ్లు పూర్తయ్యాయి. ఇంత‌టి సుధీర్ఘ‌మైన కెరీర్ లో చిన్న న‌టుడిగా కెరీర్ ను మొద‌లు పెట్టి అంచంచెలుగా ఎదిగి మెగాస్టార్ గా మారి త‌ర్వాత వ‌రుస ఫెయిల్యూర్స్ ను చ‌విచూసి కెరీర్ లో బ్రేక్ తీసుకుని మ‌ళ్లీ వ‌రుస విజ‌యాల‌తో త‌న స‌త్తా చూపాడు. త‌ర్వాత రాజ‌కీయాల్లో వ‌చ్చి అక్క‌డ విఫ‌ల‌మై తిరిగి సినిమాల్లోకి రీఎంట్రీ ఇచ్చి త‌నలో గ్రేస్ త‌గ్గ‌లేద‌ని నిరూపించుకున్నాడు. చిరంజీవి సుధీర్ఘ‌మైన కెరీర్ ను నిశితంగా ప‌రిశీలిస్తే విద్యార్ధుల‌కు, ఉద్యోగుల‌కు ఎన్నో ముఖ్యమైన విష‌యాలు అవ‌గ‌తమ‌వుతాయి. ఆత్మ‌విశ్వాసంతో ఎలా ఎద‌గాలి? ఎదిగిన త‌ర్వాత ఆ స్థానాన్ని నిల‌బెట్టుకునేందుకు ఎంత క‌ష్ట‌ప‌డాలి? కెరీర్ ను ఇబ్బందుల్లోకి నెట్టే ఫెయిల్యూర్స్ ను ఎలా అధిగ‌మించాలి? కెరీర్ ఛేంజ్ మొత్తం ప్ర‌ణాళిక‌ను దెబ్బ‌తీస్తే మ‌ళ్లీ ఎలా కెరీర్ ను పున‌ర్ నిర్మించుకోవాలి? చిరంజీవి కెరీర్ అనేది ఒక ప్ర‌త్య‌క్షంగా క‌నిపించే స్పూర్తిదాయ‌క పుస్త‌కం వంటిది. విద్యార్ధులు చిరంజీవి కెరీర్ ను నిశితంగా ప‌రిశీలించి దాని నుంచి పాఠం నేర్చుకుంటే చాలు త‌మ కెరీర్ ను ఉన్న‌తంగా తీర్చిదిద్దుకోవ‌చ్చు.
ఎటువంటి సినిమా నేప‌థ్యం లేని ఒక ఇర‌వై రెండేళ్ల కుర్రాడు సినిమాల్లో వెలిగిపోదామ‌ని మ‌ద్రాస్ చేరుకున్నాడంటే అతనికి ఎంత ఆత్మ‌విశ్వాసం ఉండాలి. అప్ప‌టికే ఎంద‌రో హీరోలుగా రాణిస్తున్నారు. ఎంద‌రో ప్ర‌తిభ గ‌ల న‌టులు ఉన్నారు. ఇటువంటి ప‌రిస్థితుల్లో మిగిలిన వాళ్ల‌తో పోల్చుకుంటే న‌ట‌న స‌రిగ్గా చేత‌కాని చిరంజీవి అనే ఇర‌వై రెండేళ్ల కుర్రాడు హీరోగా ఎలా ఎద‌గగ‌ల‌డు? కానీ అతనికి హీరోగా అవ‌కాశం వ‌చ్చింది. ఎందుకు? మిగిలిన వాళ్ల‌లో లేని ప్ర‌త్యేక‌త‌ను అత‌ను చూపించాడు. క‌ష్ట‌ప‌డి ఎలాగైనా స‌రే ఆ సీన్ ను పండించాల‌నుకునే అత‌ని త‌ప‌న ద‌ర్శ‌కుల‌కు న‌చ్చింది. అందుకే అవ‌కాశాలు క్యూ క‌ట్టాయి. దీనికి తోడు అప్ప‌టి వ‌ర‌కూ ఎవ్వ‌రూ చూపించ‌ని డ్యాన్స్ అనే ప్ర‌త్యేక‌త‌ను చూపించి ప్రేక్ష‌కుల‌ను మెప్పించగ‌లిగాడు. దీంతో అంచెంచెలుగా ఎదిగి మెగాస్టార్ రేంజ్ కు చేరుకున్నాడు.
విద్యార్ధులు నేర్చుకోవాల్సింది:
- ఆత్మ‌విశ్వాసం ఉంటే ఏదైనా సాధ్య‌మే.
- త‌నకు కొన్ని మైన‌స్ లు ఉన్న‌ప్పుడు త‌క్ష‌ణం త‌న ప్ల‌స్ లు గుర్తించాలి.
- మిగిలిన వారిలో లేని ప్ర‌త్యేక‌త‌ను చూపించ‌గ‌ల‌గాలి.
- క‌ష్ట‌ప‌డి ప‌నిచేస్తే చాలు ఫ‌లితం త‌ప్ప‌కుండా ద‌రికి చేరుతుంది.
స్థాయిని నిల‌బెట్టుకునేందుకు 'శ్ర‌మ' చేయాల్సిందే!
కెరీర్ లో ఎద‌గ‌డం ఒక ఎత్తైతే, త‌ర్వాత చేరుకున్న స్థానాన్ని నిల‌బెట్టుకోవ‌డం మ‌రో ఎత్తు. చిరంజీవి కెరీర్ ను కూడా గ‌మ‌నిస్తే ఇదే విష‌యం క్లియ‌ర్ గా అర్ధ‌మ‌వుతుంది. మెగాస్టార్ గా ఎదిగాక కూడా అత‌ని నెంబ‌ర్ వ‌న్ స్థానానికి తీవ్ర పోటీ ఎదురైంది. అత‌ని త‌ర్వాత వ‌చ్చిన హీరోలు, త‌ర్వాత వ‌చ్చిన యంగ్ హీరోలు అత‌ని స్థాయికి చేరుకునేందుకు గ‌ట్టి ప్ర‌య‌త్నాలు చేసారు. కానీ కాలానికి అనుగుణంగా అప్ప‌టి ప్రేక్ష‌కుల అభిరుచికి త‌గ్గ‌ట్టుగా త‌న‌ను తాను మ‌లుచుకుని చిరంజీవి ఆ పోటీని స‌మ‌ర్ధ‌వంతంగా ఎదుర్కొన్నాడు. త‌న నంబ‌ర్ వ‌న్ స్థానాన్ని నిల‌బెట్టుకున్నాడు.
విద్యార్ధులు నేర్చుకోవాల్సింది :
- కెరీర్ ఒక స్థానానికి వెళ్లాక రిలాక్స్ కాకూడ‌దు.
- కాలానికి త‌గ్గ‌ట్టు ఎప్ప‌టిక‌ప్పుడు అప్ డేట్ అయితేనే మ‌నుగ‌డ సాధ్యం
- పోటీ అనేది ఎప్పుడూ ఉంటుంది. దానిని ఎదుర్కోవ‌డంలో విఫ‌లం కాకూడ‌దు.
- ఎప్పుడూ క‌ష్ట‌ప‌డ‌టం అన్న సూత్రం పాటిస్తే మీ స్థానం ప‌దిలం.
ఫెయిల్యూర్స్ కు భ‌య‌ప‌డొద్దు!
కెరీర్ విజ‌యవంతంగా సాగిపోతున్న‌ప్పుడు మ‌ధ్య‌లో చిరంజీవి కెరీర్ ఒక్కసారిగా గాడి త‌ప్పింది. వ‌రుస ప‌రాజ‌యాలు ఉక్కిరిబిక్కిరి చేసాయి. విమ‌ర్శ‌కులు నోటికి ప‌నిచెప్పారు. ఇక చిరంజీవి కెరీర్ ముగిసిపోయింది. అంటూ చాలా మంది అంచనాలు క‌ట్టేసారు. అయితే కొన్నాళ్లు బ్రేక్ తీసుకున్న చిరంజీవి అస‌లు లోపం ఎక్క‌డ ఉందో క‌నుక్కున్నాడు. త‌ను ఎంచుకుంటున్న క‌థ‌లు మూస ప‌ద్ధ‌తిలో సాగుతున్నాయ‌ని గ్ర‌హించి పంథా మార్చుకున్నాడు. ఇమేజ్ ను కాస్త ప‌క్క‌న పెట్టి కొత్త త‌ర‌హా క‌థ‌ల‌ను ఎంచుకున్నాడు. దీంతో స్వ‌ల్ప విరామం త‌ర్వాత కూడా త‌న విజ‌యాల‌ను కొనసాగిస్తూ త‌న నంబ‌ర్ వ‌న్ స్థానాన్ని ప‌దిలంగా కాపాడుకున్నాడు.
విద్యార్ధులు నేర్చుకోవాల్సింది :
- ఫెయిల్యూర్స్ అనేవి జీవితంలో స‌ర్వ‌సాధారణం. వాటిని ఎదుర్కొనేందుకు సిద్ధంగా ఉండాలి.
- ఫెయిల్యూర్స్ లో మీ ఆత్మ‌విశ్వాసం దెబ్బ‌తిన‌కుండా కాపాడుకోవాలి.
- విమ‌ర్శ‌కుల మాట‌ల‌ను ప‌ట్టించుకోకుండా మీ శ‌క్తి సామర్ధ్యాల‌పై పూర్తి న‌మ్మ‌కముంచాలి.
- ఫెయిల్యూర్స్ కు మూల కార‌ణం ఎక్క‌డుందో క‌నిపెట్టి అవ‌స‌ర‌మైన మార్పులు చేసుకోవాలి.
కెరీర్ ఛేంజ్ విఫ‌ల‌మైనా త‌ట్టుకోవాలి!
సినిమాల్లో మెగాస్టార్ గా వెలుగొందుతున్న స‌మ‌యంలో రాజ‌కీయ రంగ ప్ర‌వేశం చేయాల‌ని చిరంజీవి నిర్ణ‌యించుకున్నారు. సినిమాల‌కు స్వ‌స్తి చెప్పి ఫుల్ టైమ్ రాజ‌కీయ నాయ‌కుడిగా మారిపోయారు. రాజ‌కీయ పార్టీ పెట్టి ప్ర‌జా నాయ‌కుడిగా కొత్త అవ‌తారం ఎత్తారు. సినిమాల్లో నెంబ‌ర్ వ‌న్ గా వెలుగొందిన చిరంజీవి రాజ‌కీయాల్లో మాత్రం అంత‌గా రాణించ‌లేక‌పోయారు. దాదాపు 8 ఏళ్ల పాటు రాజ‌కీయాల్లో ఉన్నా త‌న ప్ర‌భావం చూప‌లేక‌పోయారు. దీంతో సినిమాల్లోకి రీఎంట్రీ ఇవ్వాల‌ని నిర్ణ‌యించుకున్నారు. అయితే 60 ఏళ్లు దాటిపోయిన చిరంజీవి సినిమాల్లో మునుప‌టి గ్రేస్ ను చూపించ‌లేర‌ని రీఎంట్రీ కూడా రాజకీయాల్లా ఫెయిల్ అవుతుందని విమ‌ర్శ‌కులు మాట‌ల దాడి చేసారు. అయితే వాట‌న్నింటినీ ప‌టాపంచ‌లు చేస్తూ చిరు రీఎంట్రీలో అద‌ర‌గొట్టారు. 60 ఏళ్లు వ‌చ్చినా త‌న న‌ట‌న‌లో, డ్యాన్స్ లతో ప‌దును త‌గ్గ‌లేద‌ని నిరూపించుకున్నారు. మ‌ళ్లీ నెంబ‌ర్ వ‌న్ అనిపించుకున్నారు.
విద్యార్ధులు నేర్చుకోవాల్సింది :
- కెరీర్ ను ఛేంజ్ చేసుకోవాలి అనుకున్న‌ప్పుడు ఒక‌టికి రెండుసార్లు ఆలోచించుకోవాలి.
- ఒకవేళ కెరీర్ ఛేంజ్ విఫ‌ల‌మైతే న‌ష్ట‌నివార‌ణ ఏ విధంగా చేసుకోవాలి.
- మ‌ళ్లీ కెరీర్ ను పున‌ర్ నిర్మించుకున్న‌ప్పుడు ఆత్మవిశ్వాసాన్ని కోల్పోకుండా ఉండగ‌ల‌గాలి.
- కెరీర్ లో ఎప్పుడూ క‌ష్టాన్ని న‌మ్ముకుంటే ఫెయిల్యూర్స్ వ‌చ్చినా త‌ట్టుకుని నిల‌బ‌డ‌గ‌లుగుతారు.
వివాదాల‌కు దూరంగా ఉండాలి!
చిరంజీవి గురించి ఎవ‌రు చెప్పినా ముందుగా చెప్పే మాట ఒక్క‌టే. అదే వివాద‌ర‌హితుడు. ఇంత స‌క్సెస్ చూసినా, నెంబ‌ర్ వ‌న్ గా వెలుగొందినా చిరంజీవి ఎప్పుడూ వివాదాల‌కు దూరంగా ఉండేవారు. ఎప్పుడూ ఎవ‌ర్నీ నొప్పించ‌డం, బాధ‌పెట్టేలా మాట్లాడ‌టం, పొగ‌రు ప్ర‌ద‌ర్శించ‌డం అన్న‌ది చిరంజీవి డిక్ష‌న‌రీలోనే లేదు. అందుకే చిరంజీవిని అంద‌రూ గౌర‌విస్తారు. అభిమానిస్తారు. రెండు స‌క్సెస్ లు వ‌స్తే చాలు త‌ల‌పొగ‌రుతో మాట్లాడే యంగ్ హీరోలు చిరంజీవి వ్య‌క్తిత్వాన్ని చూసి నేర్చుకోవాల్సింది ఎంతో ఉంది.
విద్యార్ధులు నేర్చుకోవాల్సింది :
- వివాదాల‌కు ఎప్పుడూ దూరంగా ఉండాలి.
- వివాదం అనేది మిమ్మ‌ల్ని విజ‌యం నుంచి దూరం చేస్తుంది.
- వివాదాల వ‌ల‌న మీ చుట్టూ ఉండే మ‌నుష్యులు మీకు దూర‌మ‌వుతారు.
- శ‌త్ర‌వులను త‌యారు చేసుకోవ‌డం మీ ల‌క్ష్య సాధ‌న‌కు అడ్డంకిగా మారుతుంది.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
Comments
Post a Comment