మంచి కెరీర్ కు ఈ నిర్ణ‌య‌మే 'పెద్ద' దిక్కు!

   ఈ ఆధునిక యుగంలో కెరీర్ లో ముందుకు దూసుకెళ్లాలంటే విభిన్న విష‌యాల‌పై త‌న ఆధిప‌త్యాన్ని నిరూపించుకోవాల్సి ఉంటుంది. ముఖ్యంగా నాయ‌క‌త్వ ల‌క్ష‌ణాల‌ను పెంపోందించుకుంటే గానీ అత్యున్న‌త స్థానం దరిచేర‌దు. కెరీర్ లో ఎదుగుద‌ల‌ను కొన‌సాగిస్తూ మంచి నాయ‌కుడు అనిపించుకోవాలంటే ప్రారంభం నుంచి పెద్ద ఉద్యోగంలో ఉండాల‌న్న‌ది హెచ్ఆర్ నిపుణుల తాజా మాట‌. బాధ్య‌త‌ల‌తో కూడిన పెద్ద ఉద్యోగాన్నినిర్వ‌హించిన‌ప్పుడే నాయ‌క‌త్వ ల‌క్ష‌ణాలు వెలికి వ‌స్తాయ‌ని వారు చెపుతున్నారు. చిన్న ఉద్యోగం నుంచి అంచంచెలుగా ఎదిగి ఉన్న‌త స్థానానికి చేరిన‌ప్పుడు నాయ‌క‌త్వ ప‌టిమ అంత‌గా ఉండ‌క‌పోవ‌చ్చ‌ని హెచ్ఆర్ నిపుణులు చెపుతున్న మాట‌ను విద్యార్ధులు సీరియ‌స్ గా తీసుకోవాల్సిన అవ‌సరముంది. కాబ‌ట్టి కెరీర్ ప్రారంభంలోనే కాస్త పెద్ద ఉద్యోగాన్ని సంపాదించేందుకు, నాయ‌క‌త్వ ల‌క్ష‌ణాల‌ను మెరుగుప‌ర్చుకునేందుకు ప్ర‌య‌త్నం చేయాలి. కాస్త ప్ర‌య‌త్నం చేసి నిరూపించుకుంటే పెద్ద ఉద్యోగాల్లోకి తీసుకునేందుకు బాధ్య‌త‌ల‌ను అప్ప‌గించేందుకు కంపెనీలు రెడీగా ఉన్నాయి. దీనికి కావాల్సింది ఎద‌గాల‌నే త‌ప‌న‌, స‌వాళ్లను ఎదుర్కొనే స‌త్తా మాత్ర‌మే.

బాధ్య‌త‌ల‌ను భుజానికెత్తుకునే స‌త్తా ఉండాలి!

    ప్ర‌స్తుతం చ‌దువు పూర్తి చేసి ఉద్యోగాన్వేష‌ణ‌లో ఉన్న విద్యార్ధులు పెద్ద బాధ్య‌త‌ల‌ను తీసుకునేందుకు సిద్ధంగా ఉండ‌టం లేదు. ఇది స‌రైన ప‌ద్ధ‌తి కాదు. వృత్తిగ‌తంగా ఉన్న‌త స్థానానికి ఎదిగేందుకు ఇది పెద్ద అవ‌రోధంగా మారుతుంది. ఇటువంటి ఆలోచ‌నా విధానాన్ని విద్యార్ధులు ముందుగా త‌మ మ‌న‌స్సు లోంచి తీసేయాలి. ఇంకొంత మంది ఉద్యోగం చేరి కొన్ని రోజులు ఎంజాయ్ చేద్దాం. త‌ర్వాత ఆలోచించుకుందాం అనుకుంటారు. ఉద్యోగం అంటే ఎంజాయ్ మెంట్ ఎంత మాత్రం కాదు. ఉద్యోగం అంటే బాధ్య‌త‌. నీ బాధ్య‌త‌ను నువ్వు లైట్ తీసుకున్న‌ప్పుడు సంస్థ కూడా నిన్ను లైట్ తీసుకుంటుంది. ఎంజాయ్ మెంట్ కోసం చిన్న చిన్న ఉద్యోగాల్లో జాయిన్ కావ‌డం అన్న‌ది త‌ర్వాత కెరీర్, భ‌విష్య‌త్ పై తీవ్ర ప్ర‌భావం చూపుతుంది. కాబ‌ట్టి కెరీర్ ప్రారంభంలో పెద్ద ఉద్యోగాన్ని సాధించేందుకు ప్ర‌య‌త్నాలు చేయాలి. దాని వ‌ల‌న బాధ్య‌త‌లు మోయాల్సి వ‌చ్చినా కెరీర్ లో ఎదిగేందుకు, నాయ‌క‌త్వ ల‌క్ష‌ణాల‌ను పెంచుకునేందుకు గొప్ప అవ‌కాశం ఏర్ప‌డుతుంది.

ప్రారంభంలోనే పెద్ద ఉద్యోగాన్ని చేయ‌డం వ‌ల‌న ఎన్నో ఉప‌యోగాలు!

• కెరీర్ ప్రారంభంలోనే పెద్ద ఉద్యోగాన్ని, బాధ్య‌త‌ల‌ను తీసుకోవ‌డం వ‌ల‌న బ‌ల‌మైన నాయ‌కునిగా ఎదిగేందుకు క‌చ్చిత‌మైన అవ‌కాశాలు ఉంటాయి. ఇక విష‌యంలో వ‌చ్చే ఆటంకాలు, ఒడిదుడుకులును స‌మ‌ర్ధంగా ఎదుర్కొని స‌మయానుసారంగా త‌గు నిర్ణ‌యాలు తీసుకునే అనుభ‌వం మీ సొంతమ‌వుతుంది. ఏ ప‌నిచేస్తే సంస్థ‌కు మేలు జ‌రుగుతుంది? అన్న విశ్లేష‌ణ‌లో రాటుదేలుతారు. ఎటువంటి క్లిష్ట ప‌రిస్థితుల్లో అయినా స‌రైన నిర్ణ‌యాలు తీసుకునే సామ‌ర్ధ్యం వ‌స్తుంది.

• ఉద్యోగ జీవితం ప్రారంభంలోనే పెద్ద ఉద్యోగాన్ని చేయ‌డం ఎన్నో కొత్త విష‌యాల‌ను నేర్పుతుంది. విభిన్న ర‌కాల ఒత్తిళ్ల‌ను ఎదుర్కోనే సామ‌ర్ధ్యం, స‌త్తా అల‌వ‌డ‌తాయి. ముఖ్యంగా అనిశ్చితి, సంక్షోభం, భ‌యం వంటి విభిన్న స‌వాళ్ల‌ను ఏ విధంగా అధిగ‌మించాలి అన్న ముఖ్య‌మైన పాఠాన్ని నేర్చుకునేందుకు వీలు క‌లుగుతుంది. క‌ష్ట‌ప‌డి ప‌నిచేయ‌డం అన్న విష‌యాన్ని పేప‌ర్ పై కాకుండా నిజంగా ఎంత క‌ష్ట‌మో అన్న‌ది అనుభ‌వ పూర్వ‌కంగా తెలుసుకుంటారు.

• కెరీర్ ప్రారంభంలోనే పెద్ద బాధ్య‌త‌ల‌ను తీసుకోవ‌డం వ‌ల‌న ప్ర‌తీ విష‌యంపై సంపూర్ణ అవ‌గాహ‌న వ‌స్తుంది. ఏది చేయాలి..ఏది చేయ‌కూడ‌దు. అన్న‌దానిపై సాధికార‌త క‌లుగుతుంది. ఒక్క విష‌యానికి ఇంకో విష‌యానికి మ‌ధ్య ఉన్న సంబంధం వాటి వ‌ల‌న ఏర్ప‌డే ప్ర‌యోజ‌నాలు, అవ‌రోధాలపై స్ప‌ష్ట‌తను సాధించొచ్చు.

• అన్నింటికంటే ముఖ్యంగా ఉద్యోగుల‌ను ఎలా న‌డిపించాలో, క్ల‌యింట్లతో ఎలా వ్య‌వ‌హ‌రించాలో తెలుస్తుంది. అదే విధంగా వారి నుంచి ఏం నేర్చుకోవాలో తెలుస్తుంది. లీడ‌ర్ షిప్ లో ఇదే అత్యంక కీల‌కమైన విష‌యం. నీ కింది స్థాయి ఉద్యోగుల‌తో ఎలా న‌డుచుకోవాలో, వాళ్ల‌ను మీకు అనుగుణంగా ఎలా న‌డిపించుకోవాలో ఉద్యోగం చేరిన మొద‌టి రోజు నుంచే నేర్చుకునేందుకు వీలు క‌లుగుతుంది.

• అస‌లు సంస్థ‌కు ఏం కావాలో, ప‌రిమితుల‌కు, నిబంధ‌న‌ల‌కు లోబ‌డి కింద‌స్థాయి ఉద్యోగుల‌ను ఎలా న‌డిపించాల‌న్న‌దానిపై అవ‌గాహ‌న వ‌స్తుంది. దేశానికి ఏది మంచిదో అది కంపెనీకి మంచి అయ్యేలా చేయ‌డం నేర్చుకోవ‌చ్చు. అదే విధంగా టీమ్ కు ఏది మంచిదో అదే విష‌యం త‌న‌కు కూడా మంచిది అవుతుంద‌న్న ప‌రిణితిని సాధించే నేర్పు అల‌వ‌డుతుంది. ఇందులోకి మిగ‌తా విష‌యాలు చొర‌బ‌డ‌కుండా చూసుకుంటూ పూర్తి సామ‌ర్ధ్యంతో, సానుకూల‌త‌తో ప‌నిచేసే ఓర్పు వ‌స్తుంది.

• ఒక మ‌నిషిని జీవితంలో ఉన్న‌తంగా తీర్చిదిద్దేందుకు ఉద్యోగం అనేది ఒక సుదీర్ఘ అనుభ‌వం. సాఫీగా సాగిపోయే జీవితాన్ని కోరుకుని చిన్న స్థాయిలో ఉండిపోతావో, స‌వాళ్ల‌ను ఎంచుకుని ఉన్న‌తంగా ఎదుగుతావా? అన్న ప్ర‌శ్న‌ను ఇది సంధిస్తుంది. పెద్ద ఉద్యోగాన్ని చేప‌ట్టి చిన్న‌తనం నుంచే స‌వాళ్ల‌ను స్వీక‌రించ‌డం వ‌ల‌న జీవితంపై మ‌న దృక్ఫ‌దం పూర్తిగా మారిపోతుంది. క‌ఠిన‌మైన ప‌రిస్థితుల్లో ఎలా వ్య‌వ‌హ‌రించాలో, స‌మ‌స్య‌ల‌ను ఎలా ప‌రిష్క‌రించాలో అది నీకు నేర్పుతుంది. ఒక వ్య‌క్తికి జీవితంలో ఎన్ని అడ్డంకులు వ‌స్తే అంత ఉన్న‌తంగా ఎదుగుతాడు అదే విధంగా పెద్ద ఉద్యోగాన్ని చేప‌డితే ఉన్న‌తంగా ఎదిగేందుకు దారులు ప‌రుచుకుంటాయి.

• కెరీర్ స్టార్టింగ్ లోనే పెద్ద ఉద్యోగాన్ని చేయ‌డం లైఫ్ ను భ‌ద్రంగా చేసుకోవ‌డ‌మే. బాధ్య‌త‌ల‌ను నెర‌వేర్చే స‌త్తా, క‌ఠిన ప‌రిస్థితుల‌కు ఎదురెళ్లే నేర్పు ఉంటాయి కాబ‌ట్టి వీళ్లు కెరీర్ లో వెనుదిరిగి చూసే అవ‌కాశం ఉండ‌దు. పెద్ద ఉద్యోగం చేయ‌డం అంటే పెద్ద ప్ర‌భావాన్ని క‌లిగించ‌డ‌మే. కెరీర్ ప‌రంగా దేనికీ నెర‌వ‌ని వీళ్ల మ‌న‌స్త‌త్వం సంస్థ‌కు పెద్ద వ‌రంలా  మారుతుంది. వీళ్ల‌ను వ‌దులుకునేందుకు ఏ సంస్థ‌లు కూడా సిద్ధ‌ప‌డ‌వు.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                           You can send your Educational related articles to  careertimes.online1@gmail.com