జాబ్ లో 'అన్ ప్రొఫెష‌న‌ల్' అనిపించుకోవ‌ద్దు అంటే ఈ ప‌నులు చేయ‌కండి!

      కెరీర్లో అత్యుత్త‌మంగా ఎద‌గ‌డంలో మీ నైపుణ్యాల‌తో పాటు మీ వైఖ‌రి, మీ న‌డ‌వ‌డిక కూడా ముఖ్య‌పాత్ర పోషిస్తాయి. ఎంత‌టి నైపుణ్యం ఉన్నా ఆఫీస్ లో కొన్ని సంప్ర‌దాయాల‌ను పాటించ‌కుండా, కొన్ని జాగ్ర‌త్తలు తీసుకోకుంటే మిమ్మ‌ల్ని అన్ ప్రొఫెష‌న‌ల్ గా లెక్క క‌ట్టేస్తారు. గాసిప్ ల‌ను మోయడం, బాధ్య‌త‌ల‌కు దూరంగా జ‌ర‌గ‌డం, ప‌నిని త‌ప్పించుకోవ‌డం, పొర‌పాట్ల‌ను ప‌క్క‌వాళ్ల‌పైకి నెట్టివేయడం వంటివ‌న్ని అన్ప్రొఫెష‌న‌ల్స్ ల‌క్ష‌ణాల కింద‌కు వ‌స్తాయి. ప్ర‌స్తుతం కార్పోరేట్ ప్ర‌పంచంలో ఇలాంటి అన్ప్రొఫెష‌న‌ల్స్  త‌మ కెరీర్ ను ఎక్కువ కాలం కొన‌సాగించ‌లేరు. కెరీర్ ప్రారంభంలో ప్రొఫెష‌న‌ల్ గా ఎలా ఉండాలో ఎవ‌రికీ తెలియ‌దు. కానీ ప్రతీ రోజు కొత్త విష‌యాల‌ను నేర్చుకుంటూ తమ అన్ప్రొఫెష‌న‌ల్స్ ల‌క్ష‌ణాల‌ను వదిలించుకుంటూ ప‌క్కా ప్రొఫెష‌న‌ల్ గా ఎదిగే వారికే కంపెనీలు రెడ్ కార్పెట్ ప‌రుస్తాయి. అస‌లు మిమ్మ‌ల్ని అన్ప్రొఫెష‌న‌ల్స్ గా మార్చే ఆ ప‌నులు ఏంటి ?  అలాంటి ప‌నుల‌కు దూరంగా ఎలా ఉండాలి? అన్న దానిపై 'కెరీర్ టైమ్స్'  ప్ర‌త్యేక విశ్లేష‌ణ‌. 

1. అతి వాగుడును క‌ట్టిపెట్టండి!

      చాలా మంది ఉద్యోగులు ఆఫీస్ లో అవ‌స‌రం ఉన్నా లేకున్నా త‌మ కోల్సీగ్స్ తో ఇత‌రుల‌తో అతిగా మాట్లాడుతూ ఉంటారు. ఇది మంచి ప‌ద్ధ‌తి కాదు. ఎందుకంటే మీ మాట‌ల‌ను బ‌ట్టే ఎదుటి వ్య‌క్తులు మీపై ఒక అంచ‌నాకు వ‌స్తారు. మీరు అసంద‌ర్భంగా ఎదుటి వాళ్ల మ‌నోభావాల‌ను, మ‌న‌స్సును అర్ధం చేసుకోకుండా అనాలోచితంగా మాట్లాడ‌టం అపార్ధాల‌కు దారితీస్తుంది. మీరు ఒక అర్ధంలో చెపితే ఎదుటి వాళ్లు దాన్ని ఇంకో విధంగా అర్ధం చేసుకునే ప్ర‌మాద‌ముంది. దీని వ‌ల‌న మీపై ఎదుటి వాళ్లు వ్య‌తిరేక‌త‌ను పెంచుకుంటారు. ఇలా ఆలోచించ‌కుండా మాట్లాడ‌టం మీకు 'అన్ప్రొఫెష‌న‌ల్స్' అన్న బిరుదును క‌ట్ట‌బెడుతుంది. 

2. అతిగా స్నేహం చేయ‌కండి! 

             స్నేహం చేయడం చాలా మంచి విష‌యమైనా ఆఫీస్ లో దాన్ని కొన్ని ప‌రిమితులు విధించుకుంటే మంచిది. ఆఫీస్ లోని మీ కోలీగ్స్ తో అతిగా స్నేహం చేయ‌డం వ‌ల‌న మీరు అతిగా మాట్లాడాల్సి వ‌స్తుంది. దీని వ‌ల‌న పక్క‌నున్న వాళ్లు ఇబ్బందిగా ఫీల్ అవుతారు. మీ కోలీగ్ స్నేహితునితో మీరు పెద్ద‌గా మాట్లాడ‌టం, న‌వ్వ‌డం చాలా మందికి రుచించ‌క‌పోవ‌చ్చు. మీరు ప‌ని మానేసి ప‌దే ప‌దే మీ స్నేహితుని టేబుల్ దగ్గ‌ర‌కు వ‌స్తున్నార‌ని మీపై ఫిర్యాదులు వెళ్లే అవ‌కాశం కూడా ఉంది. కాబ‌ట్టి ఆఫీస్ స్నేహాల‌ను కొన్ని ప‌రిమితుల‌కు లోబ‌డి, కొన్ని స్వీయ నిబంధ‌న‌లు విధించుకుని కొన‌సాగించాలి. లేకుంటే మీ స్నేహాన్ని త‌ప్పుగా అర్ధం చేసుకుని మిమ్మిల్ని ఈజీగా 'అన్ప్రొఫెష‌న‌ల్' అనేస్తారు. 

3. డెడ్ లైన్స్ ను మ‌ర్చిపోవ‌ద్దు! 

      చేస్తున్న పనిలో అతి ముఖ్య‌మైన‌ది గ‌డువు. మీరు డెడ్ లైన్ లోగా ఒక ప‌నిని పూర్తి చేయ‌కుంటే దాని వ‌ల‌న మిగ‌తా ప‌నులు వాయిదా ప‌డి మొత్తం వ‌ర్క్ అంతా డిస్ట్ర‌బ్ అవుతుంది. కాబ‌ట్టి డెడ్ లైన్స్ ను గుర్తుపెట్టుకోవ‌డం , గ‌డువులోగా ప‌నిని పూర్తి చేయ‌డం మీ చాలా ముఖ్య‌మైన విష‌యం. ఒక్కసారి మీరు డెడ్ లైన్ లోగా ప‌నిని కంప్లీట్ చేయ‌కుంటే మిమ్మ‌ల్ని అన్ ప్రొఫెష‌న‌ల్ గా ట్రీట్ చేస్తారు. మీరు ఎంత‌టి ప్ర‌తిభావంతులైనా స‌రే మీరు డెడ్ లైన్లు మ‌ర్చిపోతూ ఉంటే మీ మెడ‌లో అన్ ప్రొఫెష‌న‌ల్ ట్యాగ్ ను త‌గిలించేస్తారు. 

4. గాసిప్స్ మోయ‌డం, అబ‌ద్దాలు చెప్పడం.. 

      చాలా మందికి గాసిప్స్ అంటే చాలా ఆసక్తిక‌రంగా ఉంటుంది. గాసిప్స్ లోని ఉన్న థ్రిల్ ను ఇష్ట‌ప‌డే వాటిని వినేందుకు, వాటిని మోసుకుంటూ మ‌రొక‌రికి ప్ర‌చారం చేసేందుకు అమిత‌మైన ఆస‌క్తిని క‌న‌బ‌రుస్తారు. కెరీర్ లో ఉన్న‌తంగా ఎదిగేందుకు ఈ ల‌క్ష‌ణం పెద్ద అవ‌రోధంగా మారుతుంది. గాసిప్స్ ను స్ప్రెడ్ చేయ‌డం అనేది ఆఫీస్ వాతావ‌ర‌ణాన్ని చెడ‌గొడుతుంది. అలాగే చిన్న చిన్న విష‌యాల‌ను అబ‌ద్దాలు చెప్ప‌డం, వంచ‌న చేయ‌డం కూడా  మీ కోలీగ్స్ ను మీ నుంచి దూరం చేస్తుంది. ఇలాంటి ప‌నులు చేయ‌డం వ‌ల‌న మిమ్మ‌ల్ని అన్ ప్రొఫెష‌న‌ల్ గా ట్రీట్ చేసి మీకు దూరంగా ఉంటారు. 

5. బాధ్యాతా రాహిత్యం, అశ‌క్త‌తా ధోర‌ణి..

      ఆఫీస్ లో ఏదైనా త‌ప్పు జ‌ర‌గ్గానే చాలా మంది ఉద్యోగులు ఆ త‌ప్పును త‌మ ప‌క్క‌వాళ్ల మీద‌కు నెట్టేసేందుకు ప్ర‌య‌త్నం చేస్తూ ఉంటారు. అస‌లు త‌ప్పు ఎక్క‌డ జ‌రిగిందో తెలుసుకుని ఒక వేళ త‌న వ‌ల్లే ఆ పొర‌పాటు జ‌రిగితే ధైర్యంగా చెప్ప‌గ‌ల‌గాలి. అలా చెప్ప‌కుండా త‌ప్పును ప‌క్క‌కు నెట్టివేసి చేతులు దులుపుకుంటే మిమ్మ‌ల్ని అన్ ప్రొఫెష‌న‌ల్ అంటే త‌ప్పేంటి? ఇక కొంద‌రు బాస్ ఏదైనా ప‌ని చెప్పగానే ఇది నేను చేయ‌లేను. నా వ‌ల్ల కాదు.అయినా ఇది నేనెందుకు చేయాలి. అని త‌ప్పించుకుంటారు. ఒక ప‌నిని ఛాలెంజింగ్ గా తీసుకోకుండా అశ‌క్త‌తా ధోర‌ణి క‌న‌బ‌రిస్తే బాస్ మిమ్మ‌ల్ని అన్ప్రొఫెష‌న‌ల్ అని ఈజీగా అనేస్తాడు. 

       అదే విధంగా ఆఫీస్ కు లేట్ గా రావ‌డం, ప‌ని లో బ‌ద్ధకంగా ఉండ‌టం, అలాగే చీటికి మాటికీ కోప్ప‌డుతూ చిట‌ప‌ట‌లాడ‌టం కూడా అన్ ప్రొఫెష‌న‌ల్ ల‌క్ష‌ణాలే. వీలైనంత తొంద‌ర‌గా వీటిని వ‌దిలించుకుని మిస్ట‌ర్ ప‌ర్ ఫెక్ట్ గా మారి అంద‌రితో ప‌క్కా ప్రొఫెష‌న‌ల్ అనిపించుకోవాలి.   

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                   You can send your Educational related articles to  careertimes.online1@gmail.com