వ్యాపారంలో ఆ 'నాలుగు' చాలా ముఖ్యం!

      మ‌నిషి జీవితంలో నాలుగు అనేదానికి చాలా ముఖ్య‌మైన స్థానం ఉంది. నాలుగు దిక్కులు, నాలుగు వేదాలు, నాలుగు స్తంభాలు ఇలా చెప్పుకుంటూ పోతే ఎన్నో. ఏదైనా ఒక క‌ట్ట‌డం స్థిరంగా నిల‌బ‌డాలంటే నాలుగు స్తంభాలు ఎంత అవ‌స‌ర‌మో అలాగే విజ‌య‌వంత‌మైన వ్యాపార‌వేత్త‌గా ఎద‌గాలంటే నాలుగు ముఖ్య‌విషయాలు అంతే అవ‌స‌రం. ఆ నాలుగు ముఖ్య విష‌యాల‌ను అవ‌గాహ‌న చేసుకుంటే త‌ప్ప విజ‌య‌వంత‌మైన బిజినెస్ మెన్ గా ఎద‌గ‌డం అసాధ్యం. వ్యాపారం అనే  నాలుగు స్తంభాలాట‌లో స‌క్సెస్ సాధించాలంటే ఇప్పుడు మ‌నం చెప్పుకోబోతున్న నాలుగు విష‌యాల‌ను క్షుణ్ణంగా అవ‌గాహ‌న చేసుకోవాలి. ప్ర‌స్తుత యువ‌త‌రం ఉద్యోగాల‌ను కాదునుకుని స్టార్ట‌ప్ మంత్రం జపిస్తున్నారు. ఎక్సెల్ షీట్స్ లో లాభం, న‌ష్టం, ఉత్ప‌త్తి, వినియోగ‌దారుడు ఇలాంటి లెక్క‌ల‌తో పాటు సంబంధాలు, విశ్వ‌స‌నీయ‌త వంటి బిజినెస్ స్ట్రాటెజీల‌పై దృష్టిపెట్టాలి. కాస్త సిల్లీగా అనిపించినా  స్టార్ట‌ప్ పెట్టి మంచి వ్యాపారవేత్త‌గా ఎద‌గాలంటే ముందు చిన్న చిన్న ప్రాథ‌మిక అంశాల‌ను స్టడీ చేయాల్సి ఉంటుంది. 

త‌క్కువ రేటుకు వ‌స్తువును కొన‌డం తెలుసా? 

       విజ‌యవంత‌మైన వ్యాపార‌వేత్త‌గా ఎదిగేందుకు మ‌నం నేర్చుకోబోతున్న నాలుగు ముఖ్య విష‌యాల్లో ఇది మొద‌టిది. ఒక వ‌స్తువును వీలైనంత త‌క్కువ రేటుకు కొన‌డ‌మే వ్యాపార సూత్రాల్లో అత్యంత ముఖ్య‌మైన‌ది. నాణ్యత విష‌యంలో రాజీప‌డ‌కుండా మీకు కావాల్సిన ముడిస‌రుకును త‌క్కువ రేటుకు కొన్నారంటూ మీరు వ్యాపార‌వేత్త‌గా తొలి ప‌రీక్ష పాస‌యిన‌ట్టే. మీరు 100 రూపాయలు ఖ‌ర్చు పెట్టాల్సిన చోట 80 రూపాయల‌నే ఖ‌ర్చు పెట్టారంటే మీరు ఆల్రెడీ కంపెనీకి 20  రూపాయ‌ల లాభం చేకూర్చారు. దీని వ‌ల‌న కంపెనీ సుధీర్ఘ‌కాలం మ‌నుగ‌డ సాగించేందుకు అవ‌కాశం ఏర్ప‌డుతుంది. ఖ‌ర్చు త‌గ్గింపు చ‌ర్య‌లే కంపెనీకి నిజ‌మైన లాభాల‌ని త‌ల‌పండిన వ్యాపార‌వేత్త‌లే స్ప‌ష్టం చేసారు. సో మీరు స‌క్సెస్ ఫుల్ ఎంట్రెపెన్యూర్ గా ఎదగాలంటే ఖ‌ర్చును ఎలా అదుపు చేయాలో మీకు తెలిసుండాలి. మీకు కావాల్సిన ముడి స‌రుకును త‌క్కువ ధ‌ర‌కు కొన‌డం తెలిస్తే  వ‌స్తువును త‌యారు చేసి మార్కెటింగ్ చేయ‌కుండానే మీ కంపెనీలోకి లాభం వ‌చ్చిప‌డిన‌ట్టే. 

ఏది బాగా అవ‌స‌ర‌మో గుర్తించ‌డం తెలియాలి! 

  ఒక వ్యాపార సంస్థ‌ను ప్రారంభించిన‌ప్పుడే వినియోగ‌దారులకు ఏది బాగా అవ‌స‌ర‌మో గుర్తిస్తాం క‌దా? అని మీకు సందేహం రావ‌చ్చు. వినియోగ‌దారుల అవ‌స‌రాలు అనేవి ఎప్ప‌టిక‌ప్పుడు మారిపోతూ ఉంటాయి. వారి అభిరుచుల‌కు, అవ‌స‌రాల‌కు అనుగుణంగా ఎప్ప‌టిక‌ప్పుడు మీరు అప్ డేట్ అవుతూ ఉండాలి.  మీరు కొనుగోలు చేసిన ముడి స‌రుకును వినియోగ‌దారుల అవ‌స‌రాల‌కు అనుగుణంగా త‌యారు చేసి ఎక్కువ ధ‌ర‌కు అమ్మ‌గ‌ల‌గాలి. స‌రిగ్గా ఇక్క‌డే నిజ‌మైన వ్యాపార కిటుకు దాక్కుని ఉంటుంది. దాన్ని ఒడిసిప‌డితే మీరు తిరుగుండ‌దు. ఉదాహ‌ర‌ణ‌కు ఇప్పుడు ఊబ‌కాయం స‌మ‌స్య పెరిగిపోవ‌డంతో ట్రెడ్ మిల్ అనేది అంద‌రికీ అవ‌స‌ర‌మైన వ‌స్తువుగా మారిపోయింది. ఇది డిమాండ్. ఈ డిమాండ్ ను గుర్తించి ట్రెడ్ విడిభాగాల‌ను ఒక్కోచోటు నుంచి చౌక‌గా స‌మీక‌రించుకుని 10 వేల రూపాయ‌లు ఖ‌ర్చుపెట్టి ట్రెడ్ మిల్ తయారు చేసి దాన్ని 25 వేల రూపాయ‌ల‌కు అమ్మ‌గ‌ల‌డ‌మే వ్యాపారంలోని కిటుకు. ఆ కిటుకును అర్ధం చేసుకుంటే  మీ బిజినెస్ కు తిరుగు ఉండ‌దు.  

మీకు రావాల్సిన మొత్తాల‌ను తొంద‌ర‌గా వ‌సూలు చేసుకోవాలి! 

      వ్యాపారంలో ఇది కూడా చాలా ముఖ్య‌మైన విష‌య‌మే. మీకు రావాల్సిన డబ్బును తొంద‌ర‌గా రాబ‌ట్టుకునేందుకు ప్ర‌య‌త్నం చేయాలి. ఎందుకంటే ఇలా వ‌సూలు కాని మొత్తాన్ని బిజినెస్ ప‌రిభాష‌లో నిర‌ర్ధ‌క ఆస్తులుగా ప‌రిగ‌ణిస్తారు. నిర‌ర్ధ‌క ఆస్తులు పెరిగిపోతున్నాయంటే కంపెనీ మనుగ‌డ ప్రమాదంలో ప‌డింద‌ని అర్ధం చేసుకోవాలి. కాబ‌ట్టి ఎప్పుడూ మీ సంస్థ‌కు నిరర్ధ‌క ఆస్తులు పెర‌గ‌కుండా చూసుకుంటూ ఉండాలి. వ‌సూలు కావాల్సిన మొత్తాల‌ను ఆల‌స్యం చేయకుండా వ‌సూలు చేసుకుంటూ అదే స‌మ‌యంలో మీతో పాటు ప్ర‌యాణం సాగించే వివిధ విభాగాల వారిని నొప్పించ‌కుండా చూసుకోవాలి. ఎక్కువ‌సార్లు మీ సంస్థ‌తో అసోసియేట్ అయిన వ్య‌క్తుల నుంచే మీకు రావాల్సిన మొత్తాలు నిలిచిపోతూ ఉంటాయి. అటువంటి స‌మ‌యంలో స‌మ‌స్య‌ను చాలా సున్నితంగా ప‌రిష్కరించుకోవాలి. ఒక‌వైపు మీకు రావాల్సిన డ‌బ్బుల‌తో పాటు మీకు రిలేష‌న్ అనేది కూడా చాలా ముఖ్యం. 

గుడ్ విల్ ను కాపాడుకోవ‌డ‌మే గుడ్ బిజినెస్! 

     వ్యాపారంలో రెండు విష‌యాలు మ‌న‌కు చాలా ముఖ్య‌మైన‌వి. ఒక‌టి మ‌నీ..రెండు రిలేష‌న్. ఈ రెండింటిని ఎట్టి ప‌రిస్థితుల్లోనూ పొగొట్టుకోకూడ‌దు. ఒక‌వేళ రెండింటిలో ఏదో ఒక‌టి పొగొట్టుకోవాల్సి వ‌స్తే డ‌బ్బును వదిలేసుకోవాలి కానీ రిలేష‌న్ ను మాత్రం చెడ‌గొట్టుకోకూడ‌దు. డ‌బ్బు పోతే ఆ ఆర్ధిక న‌ష్టాన్ని ఎలాగోలా పూడ్చుకోవ‌చ్చు. కానీ రిలేష‌న్ పోతే దాన్ని మ‌ళ్లీ కొన‌సాగించ‌డం సాధ్యం కాదు. కాబ‌ట్టి వ్యాపారంలో సంబంధాలు అనేవి చాలా ముఖ్యం. ఎందుకంటే మార్కెట్ లో కొత్త‌వారిని న‌మ్మేందుకు ఎవ‌రూ సిద్ధంగా ఉండ‌రు. కాబ‌ట్టి రిఫ‌రెన్స్ లు సంబంధాల‌పైనే అధికంగా ఆధార‌ప‌డాలి. కాబ‌ట్టి మంచి రిలేష‌న్స్ ను డబ్బు మూలంగా పాడు చేసుకోవ‌ద్దు. ఇదంతా గుడ్ రిలేష‌న్ అని మీరు భావిస్తున్న‌ప్పుడు మాత్ర‌మే. బ్యాడ్ రిలేష‌న్ ను వ‌దిలించుకున్నా ఫ‌ర్వాలేదు అనుకున్న‌ప్పుడు మీ డ‌బ్బును వారి నుంచి ఒత్తిడి చేసి తీసుకున్నా ఫ‌ర్వాలేదు. ఈ విష‌యాల‌న్నీ తెలుసుకుని వ్యాపార‌మ‌నే నాలుగు స్తంభాలాట బాగా ఆడితే అలిసిపోకుండా వ్యాపారం చేయ‌గ‌లుగుతాం. సొల‌సి పోకుండా లాభాల‌ను సాధించ‌గ‌లుగుతాం. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                                  You can send your Educational related articles to  careertimes.online1@gmail.com