గ‌ట్టిగా అనుకో..అయిపోద్ది!

     రీసెంట్ గా వచ్చిన 'ఫిదా' సినిమాలో ఓ డైలాగ్ ఉంది. 'గ‌ట్టిగా అనుకో అయిపోద్ది'. గ‌ట్టిగా అనుకుంటే నిజంగానే ఏం ప‌నైనా అయిపోద్దా? అయినా సినిమాలో ఏదో డైలాగ్ పెట్టారు కానీ గ‌ట్టిగా అనుకుంటేనే ప‌నులు అయిపోతే అంద‌రూ గట్టిగానే అనుకుంటారు క‌దా?  ఇక్క‌డ గ‌ట్టిగా అనుకోవ‌డం అంటే ఒక ప‌ని ఎలాగైనా  జ‌ర‌గాలి లేదా ఎలాగైనా చేయాలి అని గ‌ట్టిగా సంక‌ల్పించుకోవ‌డం. సంకల్పం బ‌లంగా ఉన్న‌ప్పుడు అది ఎంత పెద్ద క‌ష్ట‌మైన ప‌నైనా సరై క‌చ్చితంగా పూర్తి కావాల్సిందే. ఎందుకంటే ఈ ప్ర‌పంచంలో బ‌ల‌మైన సంక‌ల్పానికి ప్ర‌కృతి స‌హ‌క‌రిస్తుంది. ప్ర‌కృతి అంటే నీ చుట్టూ ఉన్న మ‌నుష్యులు, ప‌రిస్థితులు, కంటికి క‌నిపించ‌ని అదృశ్య శ‌క్తులు ఇవ‌న్నీ సంక‌ల్పానికి స‌హ‌క‌రిస్తాయి. కానీ ఇలా జ‌ర‌గాలంటే క‌చ్చితంగా సాధించాలి అన్న గ‌ట్టి ప‌ట్టుద‌ల‌, నీ చుట్టూ ఉన్న మ‌నుష్యుల‌పై గౌర‌వం, ఆద‌ర‌ణ ఉండాలి. అప్పుడు కంటికి క‌నిపించని ఏదో అదృశ్య శ‌క్తి నీ ల‌క్ష్యం నెర‌వేరేలా నీకు సాయం చేస్తుంది. గ‌ట్టిగా అనుకోవ‌డంలో ఈ మ‌ర్మాన్ని గుర్తించ‌గ‌లిగితే విద్యార్ధులు, ఉద్యోగులు ఉన్న‌త ల‌క్ష్యాలు నిర్దేశించుకుని వాటిని గ‌ట్టి కృషితో సాధించ‌వ‌చ్చు.

కార్య‌సిద్ధికి కావాల్సింది సంక‌ల్ప శుద్ధి!

      ప్ర‌స్తుతం చాలా మంది యువ‌కులు ఒక ఉన్న‌తమైన ల‌క్ష్యం పెట్టుకోకుండా పొందిన దాంతో సంతృప్తి ప‌డిపోయి నిస్సారంగా జీవితాల‌ను గ‌డిపేస్తున్నారు. మ‌రికొంద‌రు ల‌క్ష్యాన్ని నిర్దేశించుకున్నప్ప‌టికీ దానిపై సీరియ‌స్ నెస్ లేక అనుకున్న‌ది సాధించలేక‌పోతున్నారు. ఇంకొంద‌రు మ‌న వల్ల కాదులే..వాళ్లతోనే కాలేదు మ‌న‌తో ఏమ‌వుతుంది?..ప‌రిగెత్తి పాలు తాడ‌గం ఎందుకు? అనుకుంటారు. కానీ మ‌నం చేయ‌గ‌ల‌మ‌న్న ఆత్మ‌విశ్వాసం ఉన్న‌ప్పుడు ఉన్న‌తమైన ల‌క్ష్యాల‌ను నిర్దేశించుకుని దాన్ని సాధించేందుకు ఎన్ని క‌ష్టాలనైనా ఎదుర్కోవాలి. క‌ష్టప‌డ‌కుండా ఉన్న‌త స్థానానికి ఎదిగిన వాడ్ని ఒక్క‌డినైనా చూపించండి? ఒక‌వేళ ఎవ‌రికైనా వార‌స‌త్వంగా ఉన్నత‌ స్థానం ద‌క్కినా దాన్ని నిల‌బెట్టుకునేందుకు కూడా క‌ష్టప‌డాల్సిందే. లేదంటే ప‌త‌నం ఖాయం. కాబ‌ట్టి క‌ష్ట‌ప‌డి ప‌నిచేయ‌డం అన్న‌ది మ‌నుష్య జీవితంలో అత్యంత ముఖ్య‌మైన విష‌యం. ఆ ముఖ్య‌మైన విష‌యాన్నితేలిగ్గా తీసుకుని నిర్లిప్తంగా జీవితాన్నిగ‌డిపేయాలి అనుకుంటే మీ స్థాయిలో ఎప్ప‌టికీ మార్పు రాదు. కానీ జీవితాన్ని మార్చుకోవాలి. ఒక ఉన్న‌త ల‌క్ష్యాన్ని సాధించాలి అని గ‌ట్టిగా అనుకుంటే మిమ్మ‌ల్ని ఆప‌డం ఎవ‌రి త‌ర‌మూ కాదు.

మీ చుట్టూ ఉన్న వాళ్ల‌ని ప్రేమించండి!

       మ‌నం ఒక గొప్ప ల‌క్ష్యాన్ని నిర్దేశించుకుని దాని కోసం తీవ్రంగా కృషి చేస్తున్న‌ప్పుడు అది మ‌రింత త్వ‌ర‌గా నెర‌వేరాలంటే మీ చుట్టూ ఉన్న వాళ్ల‌ను గౌర‌వించ‌డం నేర్చుకోండి. మీ కుటుంబ స‌భ్యులు, ఫ్రెండ్స్ , స‌న్నిహితులు ఇలా అంద‌రికీ మీ నుంచి ఒక పాజిటివ్ వైబ్రేష‌న్ ఉండేలా చూసుకోండి. ఆఖ‌రికి చిన్న‌స్థాయిలో ఉన్న వ్య‌క్తుల‌తోనూ మంచి సంబంధాల‌ను క‌లిగి ఉండండి. ఇలా చేయ‌డం వ‌ల‌న మీతో పాటు వీళ్లు కూడా మీరు విజ‌యం సాధించాల‌ని కోరుకుంటారు. దీని వ‌ల‌న మీ ల‌క్ష్యానికి పాజిటివ్ వైబ్రేష‌న్స్ పెరిగి చివ‌రికి ప్ర‌కృతి శ‌క్తులు కూడా మీరు స‌హ‌కారం అందిస్తాయి. ఉదాహ‌ర‌ణ‌కు మీ ఆఫీస్ లో ప‌నిచేసే ఫ్యూన్ ను మీ ఆద‌ర‌ణ‌తో ప‌లుక‌రించి, అతని యోగ‌క్షేమాలు ఎప్ప‌టిక‌ప్పుడు క‌నుక్కుని అతనితో మంచి సంబంధాల‌ను నెరిపితే రేపు అత‌ను మీకు అత‌ని స్థాయిలో ఏదో ఒక మంచి మీకు చేస్తాడు. మీ ప్ర‌యాణంలో మీరు కాలిబాట వెంట‌ విత్త‌నాలు చ‌ల్లుకుంటూ వెళితే కొన్నేళ్ల త‌ర్వాత అదే త్రోవ‌లో మీరు చ‌ల్లిన విత్త‌నాలు చెట్లుగా మారి మీకు నీడ‌నిస్తాయి. బ‌త‌క‌డం వేరు, జీవించ‌డం వేరు..ఈ రెండింటికీ మ‌ధ్య ఉన్న వ్య‌త్యాసాన్ని గుర్తిస్తే మ‌నిషి జీవితం మారిపోతుంది. జీవించ‌డం నేర్చుకుంటే నీ చుట్టూ ఉన్న ప్ర‌తీ విష‌యాన్ని ప్రేమించ‌డం నేర్చుకుంటారు.

పొర‌పాట్లు స‌రిదిద్దుకుంటూ సాగిపోవ‌డ‌మే జీవితం!

       మ‌నిషి జీవితంపై ఒక చిన్న క‌థ‌ను మ‌నం తెలుసుకుందాం. 'ఒక వ్య‌క్తి జీవితంపై విర‌క్తి చెంది ఆత్మ‌హ‌త్య చేసుకునేందుకు ఒక కొండ ద‌గ్గ‌ర‌కు వ‌చ్చాడు. అప్పుడు దేవుడు వ‌చ్చి ఏం ఎందుకు ఆత్మ‌హ‌త్య చేసుకోవాల‌నుకుంటున్నావ్? అని అడిగాడు. దానికి ఆ వ్య‌క్తి నేను ఎన్నో పొర‌పాట్టు చేసాను. దాని వ‌ల‌న లైఫ్ లో పైకి రాలేక‌పోయాను. జీవితం అంటే రోత పుడుతుంది. అందుకే చ‌నిపోయి వ‌చ్చే జ‌న్మ‌లో ఎటువంటి పొర‌పాట్లు చేయ‌కుండా మంచి స్థాయికి చేరాల‌ని ఆశ‌ప‌డుతున్నాను అని చెప్పాడు. దానికి దేవుడు ఈ మాత్రం దానికి వచ్చే జ‌న్మ వ‌ర‌కూ ఎందుకు?  నీ గ‌తం అంతా తీసేసి ఇప్పుడే నీకు కొత్త జ‌న్మ ఇస్తాను. పొర‌పాట్లు చేయ‌కుండా మంచి స్థాయికి చేరుకో అని చెప్పాడు. కొన్ని సంవ‌త్స‌రాలు గ‌డిచిపోయాక ఆ వ్య‌క్తి అదే కొండ ద‌గ్గ‌ర‌కు వ‌చ్చాడు. దేవుడి ముందు మోక‌రిల్లి పొర‌పాట్లు చేయ‌కుండా కుద‌ర‌డం లేదు, అనుకోకుండానే త‌ప్పులు జ‌రిగిపోతున్నాయని చెప్పాడు. అప్పుడు దేవుడు జీవితం అంటేనే పొర‌పాట్లు చేయ‌డం. పొర‌పాట్లు చేస్తేనే క‌దా నేర్చుకునేది. కాబ‌ట్టి పొర‌పాట్లు నుంచి ఎప్ప‌టిక‌ప్పుడు నేర్చుకుని చేసిన త‌ప్పును మ‌ళ్లీ చేయ‌కుండా ముందుకు సాగిపోవ‌డ‌మే జీవితం అంటే అని చెప్పాడు'. కాబ‌ట్టి మ‌నం నిర్దేశించుకున్న ల‌క్ష్యానికి చేరుకునే ప్ర‌య‌త్నంలో కొన్ని పొర‌పాట్లు జ‌ర‌గొచ్చు. అంత‌మాత్రం చేత ప్ర‌యాణం ఆపేస్తామా? ఆ పొర‌పాట్ల‌ను స‌రిదిద్దుకుని మ‌రింత వేగంగా ల‌క్ష్యాన్ని సాధించేందుకు అవ‌స‌ర‌మైన ఆలోచ‌న‌లు చేయాలి.

సంక‌ల్పం బ‌లంగా ఉంటేనే దేవుడు సాయం చేస్తాడు!

       మ‌న‌లో చాలామంది నేను చాలా కష్ట‌ప‌డుతున్నాను, కానీ ఏదీ నేను అనుకున్న‌ట్టు జ‌ర‌గ‌డం లేదు దేవుడు  నాకు సాయం చేయ‌డం లేదు. అని నిందిస్తారు. మ‌న సంక‌ల్పం బ‌ల‌మైన‌ది, శ‌క్తివంత‌మైన‌ది అయిన‌ప్పుడు దేవుకు క‌చ్చితంగా సాయం చేస్తాడు చేయాలి కూడా. మీరు క‌ష్ట‌ప‌డ‌కుండా దేవుడు సాయం చేయాలంటే కుద‌ర‌దు. మీరు నిజాయితీతో, పూర్తి శ్ర‌మ‌తో కృషి చేస్తున్న‌ప్పుడు దేవుడు  మీకు తెలియ‌కుండా ప‌రోక్షంగా సాయం చేస్తాడు. ద్రౌప‌దీ స్వ‌యంవ‌రంలో అర్జునుడి మ‌త్స‌యంత్రాన్ని చేధించిన‌ప్పుడు శ్రీకృష్ణుడ్ని ఇదే ప్ర‌శ్న వేసాడు. ఈ విజయాన్ని నేనే సాధించాను. దేవుడు ప్ర‌మేయం ఇందులో లేదు క‌దా? అని దానికి కృష్ణుడు..'అర్జునా..మ‌త్స యంత్రాన్ని ఛేదించ‌డం క‌చ్చితంగా నీ ప్ర‌తిభే కానీ నువ్వు గురి చూసి ల‌క్ష్యాన్ని కొడుతున్న‌ప్పుడు కింద నీటిలో అల‌లు లేకుండా చూసింది దేవుడే. దాని వ‌ల‌నే నువ్వు సూటిగా ల‌క్ష్యాన్ని చేధించ‌గ‌లిగావు. దేవుడు ఎప్పుడూ మ‌న‌కు సాయం చేస్తాడు. కానీ ఆ సాయం మ‌న‌ ఊహ‌కు అంద‌ని ప‌రోక్ష ప‌ద్ధ‌తిలో ఉంటుంది'. కాబ‌ట్టి మ‌నం బ‌లంగా ఒక విష‌యాన్ని కోరుకున్నా లేదా ఒక ల‌క్ష్యాన్ని చేరుకోవాల‌ని నిర్దేశించుకున్నా అది క‌చ్చితంగా నెర‌వేరుతుంది. అలా నెర‌వేర‌డానికి నీ చుట్టూ ఉన్న ప‌రిస్థితులు, ప్రకృతి, దేవుడు ఇలా అంద‌రూ స‌హ‌క‌రిస్తారు. కానీ అలా జ‌ర‌గాలంటే నీ సంక‌ల్పం చాలా బ‌ల‌మైన‌దై ఉండాలి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                            You can send your Educational related articles to  careertimes.online1@gmail.com