పవన్ కళ్యాణ్...అర్ధం కాని ఓ ప్రశ్న!?

        సినీ హీరో పవర్ స్టార్ పవన్ కళ్యాణ్ కు యువతలో ఉన్న క్రేజ్ కోసం చెప్పాల్సిన పనిలేదు. చిన్నపిల్లల దగ్గర్నుంచి పెద్దవాళ్ల వరకూ చాలా మంది అతన్ని అభిమానిస్తారు. సినిమాల్లో ఢిపరెంట్ స్టైల్ లో రాణించాలనుకునే ఎందరికో అతను ఆదర్శం. ఇక ఒక కొత్త అజెండాతో రాజకీయాల్లోకి ఎంట్రీ ఇచ్చేందుకు కూడా చాలా మంది యువకులు పవన్ కళ్యాణ్ దారిని ఎంచుకుంటున్నారు. తెలుగు రాజకీయాల్లో ఒక కొత్త మలుపు జనసేన పార్టీ ఆవిర్భావం. ప్రశ్నిస్తా..సాధించుకుంటా..అన్న కొత్త కాన్సెప్ట్ తో వచ్చిన పవన్ యువకుల్లో ఆలోచన రేకెత్తించారు. అయితే యువతలో ఇంత కదలిక తెచ్చిన పవన్, గడిచిన కొంతకాలంగా రాజకీయంగా వేస్తున్న అడుగులు, అతని వ్యవహారశైలిపై విద్యార్ధులు, యువకులు అసంతృప్తిగా ఉన్నారన్నది సత్యదూరం కాదు.  తమ అసంతృప్తిని, ఆవేదనను వెళ్లగక్కుతున్న విద్యార్ధులు, యువత అంతరంగంలో పవన్ కళ్యాణ్ ఏ విధంగా ఆలోచిస్తున్నారన్న దానిపై 'కెరీర్ టైమ్స్' విశ్లేషణ. 

ప‌వ‌ర్ స్టార్ ప‌వ‌న్ క‌ళ్యాణ్ గారూ...సినిమాల్లో మీ వీరోచిత పోరాటాలు చూసి పంచ్ డైలాగ్ లు మాత్ర‌మే విని మీకు ఇంత‌మంది అభిమానులు ఉన్నారంటే దాంతో మేం ఏకీభ‌వించ‌ం. అలాంటి వీరోచిత పోరాటాలు, పంచ్ డైలాగ్ లు పేల్చేవాళ్లు డ‌జ‌ను మందికి పైగా హీరోలున్నారు. అయినా వాళ్ల‌కంద‌రికీ లేని క్రేజ్ మీకెందుకు వ‌చ్చింది. య‌స్...మీలో ఏదో ప్ర‌త్యేక‌త ఉంది. ఏదో ఫైర్ ఉంది. ఏదో శ‌క్తి ఉంది. అందుకే ఓ మెగా మ‌ర్రిచెట్టు కింద చిన్న మొక్క‌గా మొలిచినా త‌ర్వాత ఆ మెగా వ‌ట వృక్షాన్నే త‌ల‌ద‌న్నే విధంగా ఎదిగిపోయావ్. శ‌భాష్..

చాలా బాగుంది!

నీలోని నిజాయితీ, ముక్కుసూటి త‌నాన్ని చూసి అభిమానులు దాన్ని ప‌వ‌నిజం అన్నారు. కొంద‌రికి ప‌న‌నిజం అంటే ఏంటో పూర్తిగా అర్ధం కాకున్నా ప‌వ‌నిజం అంటే ఏంటో తెలియ‌దా అని ఎగ‌తాళి చేస్తార‌ని జై ప‌వ‌నిజం అంటున్నారు. అదీ నీ ప‌వ‌ర్. 

చాలా బాగుంది!

ప్ర‌తీ శుక్ర‌వారం జాత‌కాలు మారిపోయే...రెండు సినిమాలు వ‌రుస‌గా ప్లాఫ్ అయితే దుకాణం స‌ర్దేయాల్సిన సినీ ఇండ‌స్ట్రీలో , ప‌దేళ్ల పాటు ప‌ట్టుమ‌ని ప‌దిరోజులు ఆడ‌ని సినిమాలు చేసి కూడా నువ్వు టాలీవుడ్ లో సూప‌ర్ స్టార్ గా నిల‌బ‌డ్డావ్. ఇది క‌చ్చితంగా రికార్డే. అది క‌చ్చితంగా పూర్వ జ‌న్మ సుకృత‌మే. నీలో ఏదో ప‌వ‌ర్ ఉంది. లేకుంటే అన్నేళ్లు ఒక్క హిట్ లేకున్నా జ‌నం నీకు బ్ర‌హ్మ‌ర‌ధం ప‌ట్ట‌డం ఏంటి? 

చాలా బాగుంది! 

2014 ఎన్నిక‌ల‌కు ముందు అనూహ్యంగా, అక‌స్మాత్తుగా జ‌న‌సేన పార్టీ పెట్టావ్. ప్ర‌శ్నించ‌డ‌మే నా ప‌ని అన్నావ్. మా ఆనందానికి అవ‌ధులు లేవు. నువ్వు పోటీ చేయ‌క‌పోయినా ఎవ‌రికి వేయ‌మంటే వాళ్ల‌కు ఓట్లేసి గెలిపించాం. గెల‌వ‌లేం అనుకున్న వాళ్లు గెలిచారు. అదీ నీ ప‌వ‌ర్.

చాలా బాగుంది.! 

ప్ర‌శ్నిస్తా..ప్ర‌శ్నిస్తూనే ఉంటా...అంటూ పెట్టిన మీ జ‌నసేన పార్టీ పూర్తిస్థాయి రాజ‌కీయ పార్టీయా?  లేక మ‌రో పార్టీకి అనుబంధ పార్టీయా? ఇంత పెద్ద‌ డౌట‌నుమానం మాకు క‌ల‌గ‌డానికి మీ వైఖ‌రే కార‌ణం. ఎప్పుడో ఒక సారి ట‌క్కున ప్ర‌జ‌లు గుర్తుకువ‌చ్చి మీడియా ముందుకు వ‌స్తారు? ఫ‌లానా ప‌ని నాకు న‌చ్చ‌లేదు అంటారు. పోనీ దాని కోసం పోరాటం చేస్తారా? అంటే అదీ లేదు. ఒక‌టి రెండు రోజులు హ‌డావుడి చేయడం త‌ర్వాత షూటింగ్ ల‌కు వెళ్లిపోవ‌డం. 

అస్స‌లు బాగాలేదు!

ప్ర‌శ్నించ‌డం అంటే పోరాటం చేయ‌డం...ఇన్ని పుస్త‌కాలు చ‌దివిన మీకు ఇది తెలియ‌ద‌ని మేం అనుకోవ‌డం లేదు. కానీ మీ మాట‌లు మాతో ఇలా అనిపిస్తున్నాయి. ప్ర‌భుత్వాన్ని ఇబ్బంది పెట్ట‌డం నా ప‌ద్ధ‌తి కాదు అంటారు. ప్ర‌భుత్వాన్ని ఇబ్బంది పెట్ట‌కుండా ప్ర‌శ్నించి ఏం సాధించాల‌నుకుంటున్నారు?  మీ వైఖ‌రితో మీకు ప‌వ‌ర్ స్టార్ బిరుదుతో పాటు క‌న్ఫ్యూజింగ్ స్టార్ బిరుదును కూడా ఇస్తుంటే మీ అభిమానిగా మేం ఎంత బాధ‌ప‌డుతున్నామో మీకేం తెలుసు? 

అస్స‌లు బాగా లేదు.! 

స‌డ‌న్ గా ఒక్క విష‌యంపై మాట్లాడ‌తారు. అది ఎందుకు మాట్లాడారో మాకు క్లారిటీ ఇవ్వ‌రు. పోరాడి సాధించుకోవాలంటారు. శాంతి భ‌ద్ర‌త‌ల‌కు భంగం క‌లుగ‌కూడ‌దు అంటారు. మిమ్మ‌ల్ని న‌మ్మి ప్ర‌త్యేక హోదా సాధన కోసం మేం వైజాగ్ వెళ్తే మీరు సినిమా షూటింగ్ కు వెళ్లిపోయారు. పోలీసుల చేతిలో త‌న్నులు తిని చివ‌రికి సంపూర్ణేష్ బాబును చూసి ఇంటి ముఖం ప‌ట్టాల్సి వ‌చ్చింది. 

అస్స‌లు బాగా లేదు! 

కోట్లు ఖ‌ర్చు పెట్టి కొత్త‌గా క‌ట్టిన స‌చివాల‌యం చిన్న వర్షానికే కారిపోతే మీరు ప్ర‌శ్నించ‌లేదు. అధికార పార్టీ వాళ్లు బ‌స్సులు ప్ర‌జ‌ల ప్రాణాలు తీస్తుంటే మీరు ప్ర‌శ్నించ‌లేదు. ఇసుక విధానంపై పిచ్చి తుగ్ల‌క్ విధానాన్ని మీరు ప్ర‌శ్నించ‌లేదు. విశాఖ భూకుంభ‌కోణంపై మీరు ప్ర‌శ్నించ‌లేదు. పోల‌వరం టెండ‌ర్ల‌లో జ‌రుగుతున్న అవ‌క‌త‌వ‌క‌ల‌పై మీరు ప్ర‌శ్నించ‌లేదు. ఇవి మ‌చ్చుకు కొన్నే. ఇంకా ఎన్నో ప్ర‌శ్న‌లున్నాయి. ప్ర‌శ్నిస్తా ...ప్ర‌శ్నిస్తా ...అంటూ మీటింగ్స్ లో గొంతు చించుకునే మీరు ఇన్ని ప్ర‌శ్న‌లు ఎందుకు వ‌దిలేసారు? 

అస్స‌లు బాగాలేదు.!

ఇప్పుడు ఉద్దానం కిడ్నీ స‌మ‌స్య అంటున్నావ్..శ‌భాష్ మంచి ప‌ని. ఏళ్ల త‌ర‌బ‌డి మ‌రుగున ప‌డిన విష‌యాన్ని బ‌య‌ట‌కు లాగావ్. బాగానే ఉంది. మ‌రి అన్నేళ్లు పాటు ఈ రాష్ట్రాన్ని ప‌రిపాలించిన ఒక బ‌డా నాయ‌కుడి ఇన్ని రోజులు దాని గురించి ఎందుకు ప‌ట్టించుకోలేద‌ని నువ్వు ప్ర‌శ్నిస్తే బాగుండేది. మాట్లాడితే నిర్మాణాత్మ‌కంగా మాట్లాడ‌తాం అంటావ్. నిర్మాణాత్మ‌కంగా మాట్లాడిన‌ప్పుడు ప్ర‌శ్నించ‌డం అన్న నీ ప్ర‌ధాన ఉద్దేశం ప‌క్క‌దారి పడుతుంది క‌దా? ఇంత చిన్న లాజిక్ ను ఎలా మిస్ అవుతున్నావ్. 

అస్స‌లు బాగాలేదు.! 

మీ కార్పోరేట్ ఫ్యాన్స్ కోసం ట్విట్ట‌ర్ లో ప్ర‌శ్నించేవారు. ఇప్పుడు హ్యాక్ అయింది అంటూ అది కూడా మానేసారు. మీరు ప్ర‌శ్నించ‌క‌పోయ‌నా మీ ట్విట్ట‌ర్ ఖాతాను ఫాలో అయ్యేవారికి ఏం న‌ష్టం లేదు. ఇన్నాళ్ల‌కు మాకు మంచి నాయ‌కుడు వ‌చ్చాడు అని ఆశ‌ప‌డ్డ సామాన్యుల‌కి ట్విట్ట‌ర్ అంటే ఏంటో తెలియ‌దు. ప్ర‌భుత్వాన్ని మీరు ప్ర‌త్య‌క్షంగా నిల‌దీస్తే చూడాలనుకుంటున్నారు.  

అస్స‌లు బాగాలేదు.! 

మీరు చంద్ర‌బాబు చెప్పిన‌ట్టు న‌డుచుకునే, అవ‌స‌రానికి అత‌ను వాడుకునే అస్త్ర‌మ‌ని పుకార్లు వ‌స్తుంటే ఎంత బాధేస్తుందో తెలుసా?  కానీ మీ వైఖ‌రి, మీ పార్ట్ టైమ్ రాజ‌కీయాలు ఆ పుకార్లు నిజ‌మ‌నేలానే ఉన్నాయి. హామీ ఇచ్చి ఇప్పుడు మాట త‌ప్పుతున్నా మీరు ప్ర‌భుత్వాన్ని ప్ర‌శ్నించ‌రు. నాకు కులం అంట‌గ‌ట్టొద్దు అంటారు. మ‌రి కులం పేరు చెప్పి ఓట్ల‌డిగిన వారితో మీరెందుకు రాసుకు పూసుకు తిరుగుతున్నారు. ఆవేశంతో నిర్ణ‌యాలు తీసుకుంటార‌ని, దేన్నీ పూర్తిస్థాయిలో చేయ‌ర‌ని మీపై అప‌వాదు ఉంది. అది నిజ‌మ‌ని నిరూపించ‌కండి. 

అస్స‌లు బాగాలేదు.! 

మీరు సినిమాలు చేసుకోవాలి అనుకుంటే నిక్షేపంగా సినిమాలు చేసుకోండి. అంతేకానీ ప్ర‌జా సంక్షేమం,..ప్ర‌శ్నిస్తా,...కొత్త రాజ‌కీయం అంటూ మాలో ఆశ‌లు క‌ల్పించ‌కండి. మోసపోవ‌డం మాకు కొత్తేమీ కాదు. రాజ‌కీయాల్లోకి రావాల‌నుకుంటే ఒక క్లారిటీతో రండి. ఖాళీ దొరికిన‌ప్పుడు, టైం కుదిరిన‌ప్పుడు, పేప‌ర్ లో యెల్లో న్యూస్ చ‌దివి ప్ర‌శ్న‌లు అడ‌క్కండి. ఒక ప్ర‌ణాళిక‌తో రండి..ఒక ఆవేశంతో రండి..ఏదో సాధించాల‌ని రండి..మీపై న‌మ్మ‌కం,ఆశ‌లు పెట్టుకున్న వాళ్ల ఆకాంక్ష‌ల‌ను గెలిపించండి. అలా కుద‌ర‌దు అంటే సినిమాలు చేసుకోండి. ప‌వ‌ర్ స్టార్ గా మిగులుతారు. లేదంటే ప‌వ‌ర్ లెస్ స్టార్ గా అప‌ఖ్యాతిని మూట‌గ‌ట్టుకుంటారు. ఆలోచించుకోండి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                            You can send your Educational related articles to  careertimes.online1@gmail.com