ఒక 'ముసుగు మనిషి' కథ!

     ఈ ఆధునిక కాలంలో ప్రతీది కృత్రిమమే. కృత్రిమ వస్తువులు..కృత్రిమ ఆహారం.. కృత్రిమ చెట్లు..చివరికి కృత్రిమ మేథ ఇలా ప్రతీది కృత్రిమం అయిపోయింది. ఇది ఎంత వరకూ వచ్చింది అంటే చివరికి మానవ జీవితంలో అతి ముఖ్యమైన బంధాలు, అనుబంధాలు, సంభాషణ, ఆహార్యం ఇలా అన్నింటిలోనూ ఈ కృత్రిమతే రాజ్యమేలుతోంది. మనుష్యులు ఆ ఆర్టిఫిషియల్ నాగరికత మాయలో పడి తమ వాస్తవ స్వభావాన్ని, వాస్తవ నైజాన్ని పక్కన పెట్టి ప్రతీ విషయానికీ కృత్రిమత అనే ప్లాస్టిక్ పూతను పూస్తున్నారు. మనసారా నవ్వే నవ్వులోనూ, నోరారా పిలిచే పిలుపులోనూ, బాధలోనూ, దు:ఖంలోనూ ఇలా అన్నింట్లోనూ తమది కానిదాన్ని తెచ్చిపెట్టుకుంటున్నారు. స్వల్ప కాలానికి దీని వలన జీవితం సాగుతుందేమో కానీ మనుష్యులుగా సంపూర్ణంగా జీవించేందుకు, నిజమైన బంధాలను ఏర్పరుచుకునేందుకు ఈ కృత్రిమ విధానం పెద్ద అవరోధంగా మారుతుంది. కృత్రిమత అనే దాన్ని ఒక స్థాయి వరకూ వాడుకుంటే ఫర్వాలేదు కానీ దాన్నే ఒక అలవాటుగా మార్చుకుని చాలా మంది తమ అసలైన వ్యక్తిత్వాలను పొగొట్టుకుంటున్నారు. మనిషికి తన కెరీర్ లో, జీవితంలో, వ్యక్తిత్వంలో, తనదైన ఒక ప్రత్యేకమైన ముద్ర చాలా అవసరం..అది పొగొట్టుకున్న రోజున కెరీర్, జీవితం రెండూ గాడి తప్పుతాయి. 

జుత్తుకు రంగు వేయొచ్చు కానీ వ్యక్తిత్వానికి...?

      ప్రస్తుతం చాలా మంది ఒక వయస్సుకు వచ్చిన తర్వాత జుత్తుకు, మీసాలకు, గెడ్డాలకు రంగు వేస్తున్నారు. కాస్మోటిక్ సర్జరీలు చేయించుకుని వంకరగా ఉన్న పళ్లను, ముక్కును సరిచేసుకుంటున్నారు. ఇక్కడ వరకూ బాగానే ఉంది. కానీ అదేరకమైన కృత్రిమతను తమ జీవితాల్లోకి కొని తెచ్చుకుంటున్నారు. తన కంటూ ఒక ప్రత్యేకమైన వ్యక్తిత్వం, ఆలోచనలు, అభిప్రాయాలు ఉన్నా వాటికి కృత్రిమ రంగులు పూసి బయటకు అందంగా చూపించుకునేందుకు ప్రయత్నం చేస్తున్నారు. కానీ తనకు లేని దాన్ని తెచ్చుకోవడం అన్నది తన వ్యక్తిత్వాన్ని దెబ్బతీస్తున్న విషయాన్ని చాలా మంది గుర్తించలేకపోతున్నారు. దీంతో తమకు మాత్రమే పరిమితమైన ఒక ప్రత్యేకమైన గుణాన్ని, లక్షణాలను చేజేతులా సమాధి చేసుకుంటున్నారు. కొందరికి వేడుకల్లో అందరిలా డ్యాన్స్ చేయాలని, పాటలు పాడాలని లోపల బలంగా ఉంటుంది. కానీ అలా చేస్తే తన హోదా, తన హుందాతనం దెబ్బతింటాయెమోనని తనలో ఉండే ఆ ఉత్తేజకరమైన కోరికను బలవంతంగా అణుచుకుంటారు. వేడుకలో డ్యాన్స్ చేసినంత మాత్రాన మీ హుందాతనానికి ఎటువంటి నష్టమూ జరగదు. మనలోని చెడును అణిచిపెట్టుకోవాలి కానీ మనలోని ఒక ప్రత్యేకమైన, మంచి లక్షణాన్ని కాదు. 

కృత్రిమ మాయలో పడి మీ ఒరిజినాలిటీని పొగొట్టుకోకండి!

     చాలామంది బ్రాండెడ్ వస్తువులనే వాడతారు. దాని వలన తమ స్థాయి నలుగురికి తెలుస్తుందన్న కారణమూ కావచ్చు లేక నాణ్యంగా ఉండవచ్చన్న కారణమూ కావచ్చు. బ్రాండెడ్ దుస్తులు వేసి బయటకి హుందాగా కనిపించే వారంతా మంచి ఉన్నతమైన వ్యక్తిత్వం ఉన్నవారు అని అనుకోవడానికి వీలు లేదు. అలా అని కాస్త చవకైన దుస్తులు ధరించే వారంతా మంచి వ్యక్తిత్వం లేని వారని కాదు. వ్యక్తిత్వం అనేది చేసే పనులను బట్టి , కృత్రిమతను జోడించకుండా మాట్లాడే మాటలపై ఆధారపడి ఉంటుంది. కృత్రిమంగా ఖరీదైన పై మెరుగులు దిద్దుకున్నంత మాత్రాన మంచి ఉన్నతమైన వ్యక్తిత్వం కల వ్యక్తులుగా మనం తయారు కాలేం. మనలో ఉన్న అంతర్గత లోపాలను అధిగమించి, మాట్లాడే మాటలోనూ, చేసే పనిలోనూ, ఆహార్యంలోనూ ఎక్కడా కృత్రిమ జాడలు లేకుండా ప్రవర్తిస్తూ మనలోని అసలైన మనిషిని బహిర్గతం చేయాలి. అప్పుడే అవతలి వాళ్లకు మనపై గురి కుదురుతుంది. 

కృత్రిమత జీవితకాలం చాలా తక్కువ! 

        మనం ఒక డాక్టర్ దగ్గరకు వెళ్లాం అనుకుందాం. అతను అక్కడ తన సీట్లో డాక్టర్ అనే ముసుగును ధరించి ఉంటాడు. తనదైన మూస పద్ధతిలో డాక్టర్ పరిభాషలో మాత్రమే మీతో సంభాషణను కొనసాగిస్తున్నప్పుడు మీకు చాలా ఇబ్బంది కలుగుతుంది. కానీ అతను డాక్టర్ అనే ముసుగును తొలిగించి తన దగ్గరకు వచ్చిన రోగితో ప్రేమగా, ఆప్యాయంగా మాట్లాడితే అక్కడ వాతావరణం ఎంత ఉల్లాసంగా ఉంటుంది. డాక్టర్ అలా తన ఉన్నతమైన వ్యక్తిత్వంతో అప్యాయంగా మాట్లాడినప్పుడు రోగి చాలా స్వాంతనగా ఫీల్ అవుతాడు. తన ఇబ్బందులను, బాధలను తన ఇంట్లో మనిషితో చెప్పుకున్నట్టు చెపుతాడు. ఇలానే ఇప్పుడు అందరూ ఒక సాఫ్ట్‌వేర్ ప్రొఫెషనల్, ఒక లాయర్, ఒక బిజినెస్‌‌మెన్ ఇలా అందరూ ఒక ముసుగును తగిలించుకున్నారు. కొన్ని సందర్భాల్లో వృత్తి పరంగా వాళ్లకు ఇది అనివార్యం కావచ్చు కూడా. కానీ మీ పరంగా మీరు కృత్రిమతను మీ దరికి రానీయనప్పుడు వాళ్లతో కూడా చాలా క్లియర్ గా ఉంటారు. మీకు కావాల్సింది చాలా క్లియర్ గా ఒపెన్ గా ఎటువంటి భేజషాలు లేకుండా చెప్తారు. అప్పుడు అవతలి వ్యక్తులు తమ కృత్రిమ ముసుగును తొలిగించి మీకు సహాయపడేందుకు ముందుకు వస్తారు. అవతలి వ్యక్తిని సరిగ్గా అంచనా వేయగలిగితే మీకు ఎదురయ్యే ప్రతీ కృత్రిమ ముసుగు తొలిగిపోతుంది. దానికంటే ముందుగా ఎవరికి వారు తమలోని కృత్రిమతను తొలిగించుకునే ప్రయత్నం చేస్తే ఫలితం అనుకూలంగా ఉంటుంది. 

మీకు స్పష్టత ఉంటే కృత్రిమతతో ఇబ్బంది ఉండదు!

       వాస్తవానికి దూరంగా జరిగిపోవడమే కృత్రిమతలో మొదటి లక్షణం. మనం ఖచ్చితంగా ఏం చేయగలమో చెప్పడం మానేసి ఏం చేయలేమో, ఏది మన వల్ల కాదో దాని గురించే కృత్రిమ మనుష్యులు అతిగా మాట్లాడతారు. తనది కాని దాన్ని తనదే అని ప్రచారం చేసుకోవడానికి తాపత్రయపడతారు. దీని వలన మన వ్యక్తిత్వం ఇబ్బందుల్లో పడుతుంది. అవతలి వ్యక్తులతో మాట్లాడేటప్పుడు హుందాతనాన్ని మెయింటైన్ చేస్తూనే మీ అసలైన వ్యక్తిత్వాన్ని చూపించుకొండి. మీ మాటలు, చేతలు, హావభావాలు కృతకంగా ఉన్నట్టు అవతలి వారు గ్రహిస్తే మీపై నమ్మకాన్ని కోల్పోతారు. మీ కంటూ ఒక ప్రత్యేకతను ఏర్పరుచుకుని అవతలి వ్యక్తులు మిమ్మల్ని ప్రేమించేలా ప్రవర్తించండి. అలాగే పెద్ద వ్యక్తులతో లావాదేవీలు జరిపినప్పుడు వాళ్లు వాళ్ల వృత్తిపరంగా కాస్త కృత్రిమంగా ఉన్నా , మీరు స్పష్టత కలిగి ఉంటే పని సులువవుతుంది. మీకు ఏం కావాలో ఎలా కావాలో సూటిగా మీదైన ముద్రతో చెప్పగలిగితే వారికి మీపై గురి కుదురుతుంది. అప్పుడు వాళ్లు కూడా మీకు సహాయపడేందుకు ముందుకు వస్తారు. కృత్రిమం మాయలో పడి మీ ఒరిజినాలిటీని ఎట్టి పరిస్థితుల్లోనూ పొగొట్టుకోకండి. ఎందుకంటే ఈ ప్రపంచంలో మీలా ఉండగలిగేది మీరు ఒక్కరు మాత్రమే. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com