ఆ విషయంలో టీవీ9 ర‌విప్ర‌కాష్, మంత్రి నారాయ‌ణ‌ ఇద్దరూ ఇద్దరే!

     ఈ 21వ శతాబ్దంలో అటు కెరీర్ లో కానీ ఇటు వ్యాపారంలో కానీ అత్యున్నత స్థాయికి ఎద‌గాలంటే నైపుణ్యం, ప్ర‌తిభ  అన్న‌వి త‌ప్ప‌నిస‌రి విష‌యాలు. ఒక మ‌నిషిలో ఈ రెండింటిలో ఏది లేకున్నా మిగ‌తాది రాణించ‌డం కుద‌ర‌దు. ప్ర‌తిభ లేని నైపుణ్యం ఉన్నా నైపుణ్యం లేని ప్ర‌తిభ ఉన్నా ఆయా వ్య‌క్తులు సాధార‌ణ స్థాయిల‌లోనే ఉండిపోవాల్సి వ‌స్తుంది.  ప్ర‌స్తుతం చాలా మంది విద్యార్ధులు నైపుణ్యం, ప్ర‌తిభ ఈ రెండూ ఒక‌టే అని అపోహ ప‌డుతున్నారు. అటువంటి ఆలోచ‌న త‌ప్పు. ఈ రెండూ వేరు వేరు విష‌యాల‌ని గుర్తిస్తే కెరీర్ లో ముందుకు వెళ్లేందుకు వీలు క‌లుగుతుంది. ప్ర‌తిభ‌ను నైపుణ్యాన్ని జోడిస్తే అద్భుతాలు ఆవిష్కృత‌మ‌వుతాయి. ముఖ్యంగా ఎంట్రెపెన్యూర్స్ గా ఎద‌గాల‌ని క‌ల‌లు క‌నేవారు ఈ రెండు విష‌యాల‌ను బేరీజు వేసుకోవాలి. ఒక వేళ రెండింటిలో ఏదో ఒక‌టి లేకున్నా మిగ‌తా దాన్ని జోడించ‌గ‌లిగితే విజ‌య‌వంత‌మైన ఎంట్రెపెన్యూర్ గా రాణించవ‌చ్చు. కెరీర్ ప్ర‌యాణంలో, స్టార్ట‌ప్ ఏర్పాటులో అత్యంత కీలక‌మైన ప్ర‌తిభ, నైపుణ్యంపై 'కెరీర్ టైమ్స్' ప్ర‌త్యేక విశ్లేష‌ణ‌. 

మీలోని ప్ర‌తిభ‌ను మీరు గుర్తించ‌గ‌లిగారా? 

      మ‌న‌లో ప్ర‌తీ ఒక్క‌రిలోనూ ఏదో ఒక విష‌యంలో ప్ర‌త్యేక‌త ఉంటుంది. ఆ ప్ర‌త్యేక‌త‌నే మ‌నం ప్ర‌తిభ‌గా చెప్పుకుంటున్నాం. ఒక విద్యార్ధి ప్ర‌పంచంలోని అన్ని దేశాల పేర్లు చెప్ప‌గ‌ల‌డు..ఓ క్రీడాకారుడు ఆగ‌కుండా 10 మైళ్లు ప‌రిగెత్త‌గ‌ల‌డు. ఒక ఉద్యోగి ఏక ధాటిగా 50 గంట‌ల పాటు ప‌నిచేయ‌గ‌ల‌డు. ఇవ‌న్నీఆయా వ్య‌క్తుల ప్ర‌తిభ‌గానే ప‌రిగ‌ణించాలి. ఇలాంటి ప్ర‌తిభ ప్ర‌తీ ఒక్క‌రికీ ఉంటుంది. అయితే చాలా మంది దాన్ని గుర్తించ‌లేరు. త‌న‌లో ఏం ప్ర‌తిభ ఉందో గుర్తించ‌గ‌ల‌గ‌డ‌మే ఒక వ్య‌క్తి యొక్క మొద‌టి విజ‌యం. అలా గుర్తించిన‌ప్పుడు దాన్ని మ‌రింత సాన ప‌ట్టుకునేందుకు అవ‌కాశం ఏర్ప‌డుతుంది. కానీ ఆస‌క్తి లేని ప‌నులు చేస్తూ జీవితాన్ని యాంత్రికం చేసుకుంటున్న ఈ స‌మాజంలో ప్ర‌స్తుతం చాలా మంది త‌మ‌లోని ప్ర‌తిభ‌నే గుర్తించ‌లేని స్థితిలో ఉన్నారు. చిన్న‌తనంలోనే త‌మ పిల్లాడిలోని ప్ర‌తిభ‌ను గుర్తించాల్సిన త‌ల్లిదండ్రులు వాళ్ల‌ను త‌మ ఆశ‌ల‌ను నెర‌వేర్చే మెషిన్లుగా చూస్తూ ఆదిలోనే దాన్ని తొక్కిపెడుతున్నారు. ఈ విష‌యంలో టీచ‌ర్లు త‌గిన శ్ర‌ద్ధ పెడితే కొంచెమైనా ఫ‌లితం ఉంటుంది. 

నైపుణ్యం, ప్ర‌తిభ‌కు మెరుగులు దిద్దుతుంది!

       ఈ ఆధునిక యుగంలో నైపుణ్యం లేకుండా పూచిక పుల్ల కూడా క‌దిలించ‌లేని ప‌రిస్థితి. ముఖ్యంగా కెరీర్ లో మంచి స్థిర‌త్వం సాధించేందుకు నైపుణ్య‌మే పెట్టుబ‌డి. అయితే త‌న‌లో ఏం ప్ర‌తిభ ఉందో గుర్తించి దానికి అనుగుణంగా నైపుణ్యాన్ని మెరుగులు దిద్దుకునే వారి వృత్తిగత జీవితం ఉన్న‌తంగా ఉంటుంది. దీనికి తోడు ఇప్పుడు నైపుణ్యంలో అప్ డేష‌న్ అనేది చాలా ముఖ్య‌మైన విష‌యంగా మారిపోయింది. నైపుణ్యాల‌ను ఎప్ప‌టిక‌ప్పుడు అప్ డేట్ చేసుకుంటేనే  కెరీర్ లో మ‌నుగ‌డ సాధ్య‌మ‌వుతుంది. ఇక త‌నలోని ప్ర‌తిభ‌ను గుర్తించి దానికి నైపుణ్యాల‌ను జోడించి ఎప్ప‌టికప్పుడు అప్ డేట్ అయ్యే వాళ్ల‌కు ఇక తిరుగుండ‌దు. విద్యార్ధి ద‌శ‌లోనే ఈ కీల‌క విష‌యాన్ని గుర్తించ‌గ‌ల‌గాలి. అలా గుర్తించ‌గ‌లిగినప్పుడు ప్ర‌తిభ‌ను ఆధారం చేసుకుని, నైపుణ్యాల‌ను పెంచుకుని లైఫ్ ను చ‌క్క‌గా ప్లాన్ చేసుకునేందుకు ఛాన్స్ ఉంటుంది. 

స్టార్ట‌ప్స్ ఏర్పాటులోనూ ప్ర‌తిభ‌దే కీరోల్! 

      ప్ర‌స్తుతం చాలా మంది ఉద్యోగం చేయ‌డం కంటే స్టార్ట‌ప్ పెట్టి ఎంట్రెపెన్యూర్స్ గా రాణించాల‌ని భావిస్తున్నారు. అయితే స్టార్ట‌ప్ ఏర్పాటుకు ముఖ్యంగా కావాల్సింది ధైర్యం, తాము ఎందులో ప్ర‌తిభావంతులో గుర్తించ‌గ‌ల‌గ‌డం. నైపుణ్యం అనేది నేర్చుకుంటే వ‌స్తుంది కానీ ప్ర‌తిభ జ‌న్మ‌తః రావాల్సిందే. త‌మ ప్ర‌తిభ‌కు ఏం జోడిస్తే రాణిస్తామో తెలుసుకోగ‌ల‌గ‌డ‌మే స‌క్సెస్ పుల్ ఎంట్రెప్రెన్యూర్ షిప్. ఒక సాధార‌ణ రిపోర్ట‌ర్ గా ఉన్న ర‌విప్ర‌కాష్ టీవీ9 స్థాపించి ఇంత ఉన్న‌త స్థితికి చేరుకున్నార‌న్నా, చిన్న టీచ‌ర్ గా ప‌నిచేసే నారాయ‌ణ త‌ర్వాత నారాయ‌ణ విద్యా సంస్థ‌లు పెట్టి మంత్రి స్థాయికి ఎదిగారంటే కార‌ణం వాళ్లు త‌మ‌లోని ప్ర‌తిభ‌ను, నైపుణ్యాల‌ను స‌రిగ్గా వాడుకోవ‌డ‌మే. ఎంట్రెప్రెన్యూర్ షిప్ లో ఎన్నో ఆటుపోట్లు ఉంటాయి. త‌మలోని ప్ర‌తిభ‌ను, నైపుణ్యాల‌ను గుర్తించ‌డం అంటే త‌మ బ‌లాల‌ను, బ‌ల‌హీన‌త‌ల‌ను గుర్తించ‌డ‌మే. తాము చేయ‌లేని ప‌నిని స‌మ‌ర్ధుల‌తో చేయించుకోగ‌ల‌గ‌డ‌మే స‌క్సెస్ ఫుల్ ఎంట్రెప్రెన్యూర్ షిప్. చిన్న స్థాయి నుంచి ప్ర‌యాణం సాగించి ప్ర‌స్తుతం ఉన్న‌త స్థానాల్లో ఉన్న‌వారంద‌రూ ఈ సూత్రాన్ని తూచా త‌ప్ప‌కుండా అమ‌లు చేసిన‌వారే. 

ప్ర‌తిభ‌కు, నైపుణ్యానికి మ‌ధ్య ఉన్న లింక్ తెలుసుకోవాలి! 

       ఎంత ప్ర‌తిభ ఉన్నా ఎన్ని నైపుణ్యాలు స‌రైన ప్ర‌ణాళిక , క్ర‌మ‌శిక్ష‌ణ లేకుంటే ఫ‌లితాలు సంతృప్తిక‌రంగా ఉండ‌వు. ముఖ్యంగా ప్ర‌తిభ‌కు, నైపుణ్యానికి మ‌ధ్య ఉన్న ఒక ముఖ్య‌మైన లింక్ ను తెలుసుకోవాలి. ఆ లింక్ ఏంటంటే క‌ష్ట‌ప‌డే తత్వం. ప్ర‌తిభ‌, నైపుణ్యం బంగారం అనుకుంటే దానికి ప్ర‌ణాళిక‌, క్ర‌మ‌శిక్ష‌ణ‌, క‌ష్ట‌ప‌డే త‌త్వం వంటి వ‌జ్రాల‌ను అతికిస్తే దాని అందం రెట్టింప‌వుతుంది. విద్యార్ధులు చిన్న‌తనం నుంచే త‌మ‌లో ఉన్న ప్ర‌తిభ‌ను గుర్తించే ప్ర‌య‌త్నం చేయాలి. ఈ విష‌యంలో టీచ‌ర్లు, తల్లిదండ్రుల‌దే కీల‌క‌పాత్ర‌. ఇక కెరీర్ లో నైపుణ్యాల‌ను పెంచుకుని దానికి ప్ర‌తిభ‌ను జోడిస్తే ఉన్న‌త స్థానాల‌కు చేరుకోవ‌చ్చు. అదే విధంగా ఎంట్రెప్రెన్యూర్ గా ఎద‌గాల‌నుకుంటే నైపుణ్యానికి , ప్ర‌తిభ‌ను జోడించి స‌రైన ప్ర‌ణాళిక వేసుకుని ఎక్క‌డ ప్ర‌తిభ ఉందో వెతికిప‌ట్టుకునే నేర్పు ఉంటే విజయం మీ తోనే ఉంటుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                            You can send your Educational related articles to  careertimes.online1@gmail.com