సీబీఎస్‌ఈ..స్టేట్..ఏ సిలబస్ మంచిది??

   ప్రస్తుతం దేశీయ విద్యా విధానంలో సిలబస్ ఎంపిక అనేది పేరెంట్స్ కు అతి పెద్ద సవాలుగా మారింది. సెంట్రల్ సిలబస్ ను ఎంచుకోవాలా లేక  స్టేట్ సిలబస్ కు ఓటేయాలా? అని చాలా మంది తల్లిదండ్రులు తర్జనభర్జన పడుతుంటారు. అయితే సిలబస్ ఎంపిక అనేది తల్లిదండ్రుల ఆర్థిక స్థితి, పిల్లవాని సామర్ధ్యం, భవిష్యత్ ప్రణాళిక వీటిపై ఆధారపడి ఉండాలి.  ఏ సిలబస్ చదివినా  చెప్పే అంశం ఒకటి. కానీ చెప్పే విధానం మాత్రం మారుతూ ఉంటుంది. పోటీ పరీక్షలపై దృష్టి పెట్టే వారు, దేశంలో ఏ ప్రాంతంలో అయినా చదివించేందుకు వీలుండాలని అనుకునే తల్లిదండ్రులు సీబీఎస్‌ఈ కే ఓటేస్తున్నారు. అయితే ప్రస్తుతం స్టేట్ సిలబస్ కూడా సీబీఎస్ఈ తో సమానంగా బలంగా ఉందనే చెప్పాలి. దీనికి తోడు స్థానిక సంస్కృతీ, సంప్రదాయాలపై పిల్లవానికి అవగాహన కల్పించే విధంగా ఉంటుంది. ఎటువంటి సందేహాలకు తావులేకుండా పూర్తి స్పష్ఠతతో ఏ సిలబస్ ను ఎంచుకోవాలన్న దానిపై 'కెరీర్ టైమ్స్' అందిస్తున్న ప్రత్యేక విశ్లేషణ. 

ఎన్ని రకాల సిలబస్‌లు ఉన్నాయి? 

     చాలా మంది తల్లిదండ్రులు అసలు సిలబస్ లు ఎన్ని ఉన్నాయి? తమ పిల్లలకు ఏ సిలబస్ తో ఉపయోగం ఉంటుంది? అన్న విషయాలపై అంతగా శ్రద్ధ పెట్టరు. కేవలం అప్పటికప్పుడు నిర్ణయాలు తీసుకుని ఏదో ఒక సిలబస్ లో జాయిన్ చేస్తారు. కానీ సిలబస్ ఎంపికలో ముందుచూపుతో, జాగ్రత్తగా వ్యవహరించకుంటే తర్వాత ఇబ్బందులు పడాల్సి వస్తుంది. ఉద్యోగం, నివాసం ఉండే ప్రదేశం , ఆర్థిక స్థితిగతులు ఇవన్నీ పరిగణన తీసుకుని సిలబస్ ను ఎంపిక చేసుకోవాలి. ప్రస్తుతం మన దేశంలో అమల్లో ఉన్న సిలబస్ లను ఓసారి పరిశీలిస్తే... 

1. సీబీఎస్ఈ ( సెంట్రల్ బోర్డ్ ఆఫ్ సెకండరీ ఎడ్యుకేషన్) 

2. కౌన్సిల్ ఫర్ ద ఇండియన్ స్కూల్ సర్టిఫికెట్ ఎగ్జామినేషన్స్ (సీఐఎస్‌‌సీఈ) లేదా ఐసీఎస్‌ఈ

3. స్టేట్ బోర్డు 

4. ఐబీ ( ఇంటర్నేషనల్ బకాలరేట్) 

5. ఐజీసీఎస్‌ఈ ( ఇంటర్నేషనల్ జనరల్ సర్టిఫికేట్ ఆఫ్ సెకండరీ ఎడ్యుకేషన్) 

1. సీబీఎస్‌ఈ 

• 1962 లో సీబీఎస్ఈని ఏర్పాటు చేసారు. 

• దేశంలో అధిక పాఠశాలల్లో ఈ సిలబస్ నే భోధిస్తున్నారు. 
• సైన్స్, మ్యాథ్స్ పై ఎక్కువగా దృష్టి పెడతారు. 

• ఏఐఈఈఈ, జేఈఈ, నీట్ వంటి జాతీయ స్థాయి పరీక్షల్లో పాల్గోవాలి అనుకునే వారు సీబీఎస్‌ఈ సిలబస్ తో మంచి ప్రతిభ చూపగలుగుతారు. 

• ఇంజీనీరింగ్, మెడిసిన్ చదవాలనుకునే వారికి ఇది ఉత్తమమైన సిలబస్. 

2. ఐసీఎస్‌ఈ 

• ఇది ప్రయివేట్ రంగ బోర్డు సిలబస్ 

• సైన్స్, ఆర్ట్స్ భాషలపై సమానంగా దృష్టిపెడుతుంది. 

• పదో తరగతి వరకూ ఐసీఎస్‌ఈ, ఇంటర్ కు ఐఎస్సీ సిలబస్ తో కొనసాగిస్తారు. 

• ఎక్కువగా ప్రాక్టికల్ నాలెడ్జ్ ఉండేలా ఈ సిలబస్ ను రూపొందించారు. 

• జాతీయ స్థాయి పోటీ పరీక్షలకు ప్రిపేర్ అయినప్పుడు సీబీఎస్‌ఈ వారికంటే కొంచెం ఎక్కువ కష్టపడాల్సి ఉంటుంది. 

3. స్టేట్ బోర్డు 

• దేశంలోని ప్రతీ రాష్ట్రంలోనూ ప్రభుత్వ, ప్రయివేట్ పాఠశాలల్లో భోధనకు వీలుగా స్టేట్ బోర్డుల  సిలబస్ లు ఉన్నాయి. 

• వీటికి కేంద్ర, రాష్ట్ర ప్రభుత్వాల ఆమోదం ఉంటుంది. 

• తెలుగు రాష్ట్రాల్లో పదో తరగతి కోసం ఎస్‌ఎస్‌సీ బోర్డు, ఇంటర్ కోసం ఇంటర్ బోర్డు ఉన్నాయి. 

• స్టేట్ సిలబస్ ప్రాంతీయ సంస్కృతీ, సంప్రదాయాలు ప్రతిబింబిస్తాయి. 
• సీబీఎస్‌ఈ స్కూల్స్ తో పోల్చితే ఫీజులు చాలా తక్కువగా ఉంటాయి. 

• రాష్ట్ర స్థాయి ప్రవేశ పరీక్షలు రాసే విద్యార్ధులకు ఈ సిలబస్ తగిన విధంగా ఉంటుంది. 

4. ఐబీ ( ఇంటర్నేషనల్ బకాలరేట్ ) 

• ఇది అంతర్జాతీయ సిలబస్ 
• నగరాల్లో ఎక్కువ మంది ఉన్నత శ్రేణి వర్గాలు ఈ సిలబస్ పై ఆసక్తి చూపుతున్నారు. 

• ప్రపంచ వ్యాప్తంగా 150 దేశాలు, చాలా యూనివర్సిటీలు ఈ విద్యా విధానాన్ని అంగీకరిస్తున్నాయి. 
• ఈ సిలబస్ లో భాషలపై ప్రత్యేక శ్రద్ధ ఉంటుంది. కమ్యూనికేషన్స్ స్కిల్స్ పై కూడా శ్రద్ధ పెడతారు. 

• జాతీయ స్థాయి పోటీ పరీక్షల్లో ఈ సిలబస్ ‌తో అనుకున్న ఫలితాలు రావు. పై చదువులకు విదేశాలకు వెళ్లాలనుకునే వాళ్లకు ఇది బాగా ఉపయోగపడుతుంది. 

5.ఐజీసీఎస్‌ఈ

• ఇది ఇంటర్నేషనల్ సిలబస్ తో కూడికుని ఉంటుంది. 

• ప్రతీ సబ్జెక్ట్ కు ఓ సర్టిఫికేట్ ఇస్తారు.

• ఇందులో కూడా విద్యార్ధి అంతర్గత ప్రతిభను వెలికి తీసేందుకు ప్రయత్నిస్తారు. 

• ఈ సిలబస్ తో జాతీయ స్థాయి పోటీ పరీక్షల్లో ప్రతిభ చూపాలంటే చాలా కష్టపడాలి. 

• విదేశాల్లో చదవాలనుకునే విద్యార్ధులకు ఇది అనువుగా ఉంటుంది. 

సిలబస్ ను ఎంచుకోవడం కీలకం!

     తమ పిల్లలకు అనువైన సిలబస్ ను ఎంచుకోవడంలో పేరెంట్ తగిన జాగ్రత్తలు తీసుకోవాలి. లేకుంటే తర్వాత ఇబ్బందులు పడాల్సి వస్తుంది. ముఖ్యంగా ఆర్థిక స్థితిగతులకు , సిలబస్ ల ఎంపికకు అవినాభావ సంబంధం ఉంది. దిగువ మధ్య తరగతి వారు స్టేట్ బోర్డు సిలబస్ నే ఎంచుకోవాలి. ఎందుకంటే సీబీఎస్ఈ సిలబస్ ఫీజులను తట్టుకోలేరు. అలాగే భవిష్యత్ లో ఇంజినీరింగ్, మెడిసిన్ ను తప్పని సరిగా చదవాలి అనుకుని కాస్త ఆర్ధిక స్థితి బాగున్న మధ్యతరగతి వారు సీబీఎస్‌ఈ ని ఎంచుకుంటే ఫలితాలు బాగుంటాయి. అదే విధంగా ఉద్యోగ రీత్యా దేశమంతా తిరగాల్సిన అవసరం ఏర్పడే తల్లిదండ్రులు కూడా సీబీఎస్‌ఈకే ఓటేయాలి. ఎందుకంటే దేశంలో ఏ రాష్ట్రం వెళ్లినా పిల్లవాడు సిలబస్ పరంగా ఎటువంటి ఇబ్బంది పడకుండా ఉంటాడు. ప్రస్తుతం ఎంసెట్ ప్రాధాన్యత తగ్గిపోవడంతో తమ పిల్లలను ఇంజినీరింగ్ చదివించాలనుకునే తల్లిదండ్రులు సీబీఎస్‌ఈ సిలబస్ కే మొగ్గు చూపుతున్నారు. అదే విధంగా ఉన్నత వర్గాల వారు, తమ పిల్లలను విదేశాల్లో చదివించానుకునే తల్లిదండ్రులు ఐబీ, ఐసీఎస్‌ఈ సిలబస్ లపై దృష్టి పెడుతున్నారు. 

స్టేట్ సిలబస్ ను ఎంచుకుంటే ఏమవుతుంది? 

    ప్రస్తుతం చాలా మంది స్టేట్ సిలబస్ వలన అంతగా ఉపయోగం లేదు. దాని వలన ఉపయోగం లేదు అని చాలా మంది తల్లిదండ్రులు అనుకుంటున్నారు. కానీ అది తప్పు . ప్రస్తుతం స్టేట్ సిలబస్, సీబీఎస్‌ఈ తో సమానంగా మంచి ప్రమాణాలను పాటిస్తోంది. మారిన కర్కులమ్ తర్వాత సీబీఎస్‌ఈ వాళ్లు అనుసరించే ఎన్‌సీఆర్‌టీ సిలబస్ ను దాదాపుగా అనుసరిస్తే స్టేట్ సిలబస్ ను రూపొందించారు. దీనికి తోడు మన ప్రాంత సంస్కృతీ , సంప్రదాయాలు, భౌగోళిక పరిస్థితులపై అవగాహన వస్తుంది. వీటన్నింటితో పాటు ఫీజులు చాలా తక్కువగా ఉంటాయి. దిగువ మధ్యతరగతి వారు స్టేట్ సిలబస్ ను ఎంచుకోవడం మంచిది. గొప్పలకు పోయి సీబీఎస్ఈ అంటే తర్వాత ఫీజులు కట్టలేక ఇబ్బందులు పడాల్సి వస్తుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                                You can send your Educational related articles to  careertimes.online1@gmail.com