ఒక‌టే దేశం..ఒక‌టే సిల‌బ‌స్..సౌండ్ బాగుంది కానీ..?

      ఉప‌ఖండం, భిన్న‌త్వంలో ఏక‌త్వం..మ‌న దేశం గురించి ప‌రిచ‌యం చేసేట‌ప్పుడు వాడే ప‌దాలు ఇవి. నిజ‌మే మ‌రి ఒక వైపు మంచు కొండ‌లు, ద‌ట్ట‌మైన అడ‌వులు మ‌రోవైపు చురుక్కుమ‌నిపించే ఎండ‌లు, ఇంకోవైపు ఎడారులు.. ఒకే దేశంలో ఇన్ని వైరుధ్యాలు బ‌హుశా అరుద‌నే చెప్పాలి. వీట‌న్నింటికంటే విచిత్ర‌మైన విష‌యమేంటి అంటే ఎన్నో భాష‌లు, మ‌రెన్నో సంస్కృతులు, జీవన విధానాలతో స‌మ్మిళిత‌మైన ఇండియాను మినీ ఖండం అన‌డంలో అతిశ‌యోక్తి ఏమీ లేదు. ఇంత‌టి వైరుధ్యం ఉంది కాబ‌ట్టే ఎటువంటి మార్పు చేప‌ట్టాల‌న్నాజాగ్ర‌త్తగా వ్య‌వ‌హ‌రించాల్సి ఉంటుంది. ముఖ్యంగా విద్యా విధానంలో ఏమైనా మార్పులు చేయాలంటే ఆచితూచి వ్య‌వ‌హ‌రించాల్సి వ‌స్తుంది. అయితే దేశ వ్యాప్తంగా ఏక‌రూప‌ విద్యా విధానాన్ని అమ‌లు చేయాల‌ని వేగిర ప‌డుతున్న  ప్ర‌భుత్వాలు మాత్రం క్షేత్ర‌స్థాయిలో ఉన్న ఆటంకాల‌ను గుర్తించ‌కుండా దుందుడుకు చ‌ర్య‌ల‌కు ఉప‌క్ర‌మిస్తున్నాయి. ఇది ప్ర‌జ‌ల భాషా సంస్కృతులతో ముడిప‌డిన అతి సున్నిత‌మైన అంశ‌మ‌న్న విష‌యాన్ని విస్మ‌రించి అత్యుత్సాహాన్ని ప్ర‌ద‌ర్శిస్తున్నాయి. ఈ నేప‌థ్యంలో ఏక రూప విద్యా విధానం ప్ర‌తిపాద‌న‌పై 'కెరీర్ టైమ్స్' అందిస్తున్న ప్ర‌త్యేక క‌థ‌నం.

ఏంటీ ఏక రూప విద్యా విధానం?

      ప్ర‌స్తుతం మన దేశంలో సీబీఎస్ఈ కేంద్ర సిల‌బ‌స్ గా అమ‌ల్లో ఉంది. అదే విధంగా ఏ రాష్ట్రాల‌కు ఆయా రాష్ట్రాల‌కు త‌మ సొంత బోర్డుల ద్వారా సిల‌బ‌స్ ల‌ను త‌యారు చేసుకుని అమ‌లు చేసుకుంటున్నాయి. త‌మ భాష, సంస్కృతులు, భౌగోళిక అంశాల‌ను పొందుప‌ర్చి పాఠ్యాంశాల‌ను త‌యారు చేస్తున్నాయి. అదే విధంగా సీబీఎస్ఈ సిల‌బ‌స్ అనేది కేంద్ర సిల‌బ‌స్ గా అమ‌ల్లో ఉంది. అయితే ఇది ఆప్ష‌న‌ల్. స్కూల్స్ లో విద్యార్ధుల త‌ల్లిదండ్రులు త‌మ పిల్ల‌వాడికి ఏది బాగా ఉప‌యోగ‌ప‌డుతుందో నిర్ణ‌యించుకుని ఆయా సిల‌బ‌స్ ల‌ను ఎంచుకుంటున్నారు. జాతీయ స్థాయిలో పోటీ పరీక్ష‌లకు సిద్ధ‌ప‌డే వారు, ప్రాక్టిక‌ల్ ఆధారిత చ‌దువుకు ప్రాధాన్య‌త‌నిచ్చే వారు సీబీఎస్ఈని చ‌దువుతున్నారు. అయితే స్టేట్ సిల‌బ‌స్ తో పోల్చుకుంటే సిబీఎస్ఈ ఫీజులు చాలా ఎక్కువ‌గా ఉంటాయి. కాబ‌ట్టి ఆర్థికంగా కొంచెం బాగా స్థిర‌ప‌డిన వారే త‌మ పిల్ల‌ల‌ను సీబీఎస్ఈ లో చ‌దివిస్తున్నారు. అయితే దేశ మొత్తం ఒకే సిల‌బ‌స్ ను అమ‌లు చేయాల‌ని కేంద్రం ప్ర‌భుత్వం ఎప్ప‌టి నుంచో ఒక ప్ర‌తిపాద‌న‌తో రెడీ గా ఉంది. దేశ‌మంతా ఒక‌టే సిల‌బ‌స్ వ‌ల‌న విద్యార్ధులు పోటీ ప‌రీక్ష‌ల్లో మంచి ఫ‌లితాల‌ను రాబ‌డ‌తార‌ని, మ‌న అవ‌స‌రాల‌కు త‌గ్గ‌ట్టు విద్యార్ధుల‌ను త‌యారు చేసుకోవ‌చ్చ‌ని చెపుతోంది. అయితే ఈ ప్ర‌తిపాద‌న‌పై రాష్ట్ర ప్ర‌భుత్వాలు అంత సుముఖంగా లేవు.

విద్యా విధానంలో ప్రాంతీయ‌త ప్ర‌తిబింబించాలి!

    ఒక విద్యార్ధికి భోధించే సిల‌బ‌స్ లో అత‌ని ప్రాంతీయ‌త ప్ర‌తిబింబించాలి. అత‌ని ప్రాంత భౌగోళిక ప‌రిస్థితులు, యాస భాష‌లు, సంస్కృతీ సంప్రదాయాలకు ఆ సిల‌బ‌స్ లో చోటుండాలి. త‌న జీవ‌న విధానం తెలియ‌న‌ప్పుడు విద్యార్ధి ప‌రిణితి చెందిన వ్య‌క్తిగా త‌యారుకాలేడు. ఇవ‌న్నీ కేంద్ర సిల‌బ‌స్ ద్వారా కానీ సెంట్ర‌ల్ బోర్డు ద్వారా కానీ ఎట్టి ప‌రిస్థితుల్లోనూ సాధ్యం కావు. ఆయా రాష్ట్రాల్లో ప్రాంతీయ ప‌రిస్థితుల‌పై , జీవ‌న విధానంపై అవ‌గాహ‌న క‌లిగే ఉండే ప్రాంతీయ విద్యా మండ‌ళ్ల ద్వారానే ఇది సాధ్య‌మ‌వుతుంది. దేశ‌వ్యాప్తంగా ఒక‌టే సిల‌బ‌స్ ను అమ‌లు చేసే సీబీఎస్ఈ వంటి సెంట్ర‌ల్ బోర్డుల‌న్నీ ఏకీకృత విధానాన్ని ప్ర‌తిబించించేలా ఉంటాయి కానీ ప్రాంతీయ సంస్కృతీ, సంప్ర‌దాయాల‌ను, భాష‌ల‌ను గౌర‌వించేలా ఉండ‌వన్న‌ది అంద‌రికీ తెలిసిన విష‌య‌మే. ఉదాహ‌ర‌ణ‌కు మ‌హ‌బూబ్ న‌గ‌ర్ జిల్లాలో సెంట్ర‌ల్ బోర్డు సిల‌బ‌స్ చ‌దివే పిల్ల‌వాడికి త‌మ జిల్లా నైస‌ర్గిక స్వ‌రూపాలు కానీ, త‌మ వేష భాష‌లు కానీ సంప్ర‌దాయాలు కానీ తెలిసే వీలు లేదు. దేశ‌వ్యాప్తంగా ఒక‌టే సిల‌బ‌స్ అంటే విద్య‌ను చట్రంలో బంధించిన‌ట్టే.

ఏక‌రూప విద్యా విధానంపై కేంద్రం ఏం చెపుతోంది!

      ప్ర‌స్తుతం దేశీయ విద్యా వ్య‌వ‌స్థ‌లో నాణ్య‌త కొర‌వ‌డుతోంది. డిగ్రీ చేత‌బ‌ట్టుకుని బ‌య‌ట‌కు వ‌స్తున్న గ్రాడ్యుయేట్ల‌కు ఉద్యోగాల‌కు అవ‌స‌ర‌మ‌య్యే నైపుణ్యాలు ఉండ‌టం లేదు. దీంతో ఉద్యోగాల డిమాండ్ కు నిపుణుల ల‌భ్య‌త‌కు మధ్య అంత‌రం పెరిగిపోతోంది. ముఖ్యంగా ఇంజినీరింగ్ ప‌ట్ట‌భ‌ధ్ర‌తుల‌కు క‌నీస నైప‌ణ్యాలు లేక‌పోవ‌డం ఆందోళ‌న‌క‌ర ప‌రిణామంగా ప‌రిణ‌మించింది. దీంతో దేశ‌వ్యాప్తంగా సీబీఎస్ఈ సిల‌బ‌స్ ను ప్ర‌వేశ‌పెట్టాల‌నే ప్ర‌తిపాద‌న ఒక‌టి ఊపందుకుంది. దీని వ‌ల‌న విద్య‌లో నాణ్య‌త పెరుగుతుంద‌ని, మ‌న పారిశ్రామిక అవ‌స‌రాల‌కు త‌గిన‌ట్టు నిపుణుల‌ను త‌యారు చేసుకునేందుకు అవకాశం క‌లుగుతుంద‌ని చెపుతున్నారు. గ‌తంలో యూపీఏ ప్ర‌భుత్వం ముందుగా స్కూల్ స్థాయిలో సెంట్ర‌ల్ సిల‌బ‌స్ ను ప్ర‌వేశ‌పెట్టాల‌నే ప్ర‌తిపాద‌న‌ను తీసుకొచ్చింది కానీ ఎందుకో త‌ర్వాత వెన‌క్కి త‌గ్గింది. ఇప్పుడు న‌రేంద్ర మోదీ ప్ర‌భుత్వం దీన్ని మ‌రోసారి తెర‌మీద‌కు తీసుకొచ్చే ప్ర‌య‌త్నాలు చేస్తోంది.

ప్రాంతీయ విద్యా మండ‌ళ్ల‌ను బ‌లోపేతం చేయ‌రెందుకు?

     రాష్ట్రాలు త‌యారు చేస్తున్న సిల‌బ‌స్ లు వాటి బోర్డులు బ‌లంగా లేవ‌ని, అందులో నాణ్య‌త కొర‌వ‌డింద‌ని కేంద్ర ప్ర‌భుత్వం భావించిన‌ప్పుడు వాటిని ప‌టిష్టంగా తయారు చేసే ఆలోచ‌న ఎందుకు చేయ‌డం లేద‌న్న ప్ర‌శ్న ఉద‌యిస్తోంది. ప్రాంతీయ విద్యా మండ‌ళ్ల‌ను బ‌లోపేతం చేస్తే నాణ్య‌మైన సిల‌బ‌స్ అందుబాటులోకి వ‌స్తుంది కదా?  సెంట్ర‌ల్ సిల‌బ‌స్ తో పోటీ ప‌డేలా స్టేట్ సిల‌బ‌స్ ను రూపొందిస్తే స‌మ‌స్య‌కు ప‌రిష్కారం దొరుకుతుంది క‌దా అన్న వాద‌న బ‌లం పుంజుకుంటోంది. దీనికి తోడు వివిధ భాష‌లు, సంస్కృతులు ఉన్న మ‌న దేశంలో సింగిల్ విండో విద్యా విధానం క‌చ్చితంగా ఫెయిల్ అవుతుంద‌న్న‌ది విద్యావేత్త‌ల అంచ‌నా. ఇటువంటి పరిస్థితుల్తో ఏక‌రూప విద్యా విధానం అనుకున్న ఫ‌లితాల‌ను అందించ‌లేక‌పోవ‌చ్చ‌న్న‌ది వాళ్ల మాట‌. కాబ‌ట్టి సెంట్ర‌ల్ బోర్డుల‌కు, సిల‌బ‌స్ ల‌కు ధీటుగా స్టేట్ బోర్డుల‌ను త‌యారు చేయ‌డ‌మే నైపుణ్య లేమి స‌మ‌స్య‌కు స‌రైన ప‌రిష్కారాన్ని చూపిస్తుంద‌ని నిపుణులు చెపుతున్నారు. మ‌రి కేంద్ర ప్ర‌భుత్వం ఎటువంటి నిర్ణయం తీసుకుంటుంద‌న్న అంశం తేలాలంటే మ‌రికొన్ని రోజులు ఆగాల్సిందే.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com