ఈ లక్షణాలు మీలో ఉంటే మంచి వ్యాపారవేత్తగా ఎదగడం ఖాయం!!

     ఏదైనా ఒక సంస్థ విజ‌యవంత‌మైన వ్య‌వ‌స్థ‌గా ఎప్పుడు ఎదుగుతుంది?  మాన‌వ వ‌న‌రుల విభాగానికి సంబంధించి ఇది చాలా ముఖ్య‌మైన‌, క్లిష్ట‌త‌ర‌మైన ప్ర‌శ్న‌. య‌జ‌మాని, ఉద్యోగుల మ‌ధ్య స‌మ‌న్వ‌య‌పూరిత వాతావ‌ర‌ణం, ప‌ర‌స్ప‌ర విశ్వాసం క‌లిగి ఉన్న‌ప్పుడు మాత్ర‌మే ఒక సంస్థ విజ‌య‌వంత‌మవుతుంది. ఒక సంస్థ‌ను విజ‌యవంతంగా న‌డ‌పాలంటే య‌జ‌మానికి అపార‌మైన తెలివితేట‌లు ఉండాల్సిన అవ‌స‌రం లేదు. కానీ అత‌ను త‌న సంస్థ‌లోకి మాత్రం తెలివైన, స‌మ‌ర్ధ‌త కలిగిన ఉద్యోగుల‌ను నియ‌మించుకోవాల్సి ఉంటుంది. మంచి ఉద్యోగుల‌ను నియ‌మించుకోవ‌డంలోనే కంపెనీ విజ‌యం, యాజ‌మాని విజ‌యం ఆధార‌ప‌డి ఉంటాయి. ఇక్క‌డ నాయ‌కుడికి కావాల్సింది తెగువ, ధైర్య‌మే కానీ విష‌యంపై సంపూర్ణ ప‌రిజ్ఞానం, ప‌ట్టు ఉండాల్సిన అవ‌సరం లేదు. స‌మ‌ర్ధుల‌ను నియ‌మించుకుని వాళ్ల‌తో స‌రైన ప‌ద్ధ‌తిలో వ్య‌వ‌హ‌రించి ఇది మ‌న సంస్థ అన్న భావ‌న క‌లిగించిన‌ప్పుడు ఏ ఆర్గ‌నైజేష‌న్ అయినా త‌ప్ప‌క విజయం సాధిస్తుంది. రాజుకు మంత్రికి మ‌ధ్య ఎటువంటి స‌మ‌న్వ‌యం ఉంటుందో అలాంటి రిలేష‌న్ ను మానవ వ‌న‌రుల విభాగంలో అప్ల‌య్ చేస్తే  అద్భుత ఫ‌లితాలు వ‌స్తాయి.

రాజు 'ధైర్యవంతుడు' అయితే సరిపోతుంది!

    కొత్తగా స్టార్టప్ పెట్టాలనుకునే చాలా మంది ఔత్సాహితులకు ముందుగా ఒక సందేహం పట్టి పీడిస్తుంది. అదేంటంటే..నేను ఈ వ్యాపారం చేద్దామనుకుంటున్నాను. ఇందులో పూర్తి లోతుపాతులు నాకు తెలియవు. నేను ప్రారంభించే ఈ వ్యాపారం విజయవంతమవుతుందా? అని. కానీ ఇటువంటి ఆలోచనలు తప్పు. ఒక సంస్థను ప్రారంభించాలనుకున్నప్పుడు ఆ వ్యాపారానికి సంబంధించిన ప్రాథమిక విషయాలు తెలిస్తే సరిపోతుంది. అందులో మీరు నిష్ణాతులు కానవసరం లేదు. 

• మీరు చేయబోయే వ్యాపారంపై, ప్రారంభించబోయే సంస్థపై పూర్తిగా అవగాహన తెచ్చుకోండి. 

• అందులో ఉండే అనుకూలతలు, ప్రతికూలతలపై మీకు ఒక రోడ్ మ్యాప్ ఉండాలి. 

• సంస్థకు కావాల్సింది సమర్ధులైన ఉద్యోగులు మాత్రమే. 

• సమర్ధులను ఎంచుకోవడంలో బాస్ విజయం ఆధారపడి ఉంటుంది. 

• సంస్థలో పనిచేసే ఉద్యోగులకు మాత్రం పూర్తి సామర్ధ్యం ఉండాలి. మీకు అవసరం లేదు. 

• రాజ్యం బలంగా ఉండాలంటే రాజు ధైర్యవంతుడు అయి ఉండాలి. అలాగే సంస్థను ముందుకు నడపాలంటే ముందు మీకు ధైర్యం కావాలి. 

ఉద్యోగులతో సత్సంబంధాలే సంస్థకు శ్రీరామరక్ష!

    ఒక సంస్థ విజయవంతంగా మనుగడ  సాగించాలంటే సమర్ధులైన ఉద్యోగులు చాలా ముఖ్యం. మంచి సమర్ధత కలిగిన ఉద్యోగులను నియమించుకోవడం ఎంత ముఖ్యమో వాళ్లతో మంచి సంబంధాలను కలిగి ఉండటం కూడా అంతే ముఖ్యం. ఎందుకంటే ఉద్యోగులే సంస్థ భవిష‌్యత్. ఈ ముఖ్యమైన విషయాన్ని ఔత్సాహిక పారిశ్రామికవేత్తలు తప్పనిసరిగా గుర్తించాలి. ఎన్ని కష్టాలొచ్చినా పరస్పర నమ్మకంతో కొనసాగినప్పుడు ఒకర్ని ఒకరు గౌరవించుకున్నప్పుడు ఉద్యోగులు సంస్థకు, బాస్ ఉద్యోగులకు ఎప్పుడూ అండగా నిలబడి ఉంటారు. 

• సమర్ధులను ఉద్యోగంలోకి తీసుకోవడమే కాదు వాళ్లతో మంచి సత్సంబంధాలను కలిగి ఉండాలి. 

• ఉద్యోగులు కంపెనీ ఉన్నతికి పూర్తి స్థాయిలో పనిచేసేలా మలుచుకోవడం మీ సమర్ధతపై ఆధారపడి ఉంటుంది. 

• కుటుంబంలా భావించి ఉద్యోగుల సంక్షేమాన్ని దృష్టి పెట్టుకోవాలి. 

• సంస్థపై పూర్తి విశ్వాసం ఉన్నప్పుడు సంక్షోభ సమయంలో ఉద్యోగులు అండగా నిలబడతారు. 

• ఎక్కడ కఠినంగా ఉండాలి. ఎక్కడ పట్టువిడుపు ఉండాలి అన్న దానిపైనే యాజమాని విజయం ఆధారపడి ఉంటుంది. 

పటిష్ఠమైన వ్యవస్థ ను నిర్మించాలి! 

    ఒక ఉన్నతమైన సంస్థను నిర్మించాలని కలగన్నప్పుడు పటిష్ఠమైన వ్యవస్థను కూడా నిర్మించుకోవాలి. వ్యక్తులు వచ్చినా పోయినా ఆ వ్యవస్థ మాత్రం నిరాటంకంగా కొనసాగాలి. టాటా గ్రూప్, ఎల్ అండ్ టీ వంటి పెద్ద సంస్థల్లో ఇటువంటి వ్యవస్థే పనిచేస్తుంది. బాస్ లు మారినా ఉద్యోగులు మారినా సంస్థ నాణ్యత, పనితీరు మాత్రం మారవు. ఇటువంటి వ్యవస్థలో బాస్ అనే రాజు కూడా ఆ పటిష్ఠ వ్యవస్థను మార్చలేడు. మహా అయితే అందులో చిన్న చిన్న మార్పులు చేయగలడు అంతే. 

• సంస్థను ప్రారంభించేటప్పుడే ఉన్నత ఆశయాలతో ఒక వ్యవస్థను నిర్మించుకోవాలి. 

• వ్యక్తిగత ప్రయోజనాలు కంటే సంస్థ మనుగడే ముఖ్యమన్నది గుర్తించాలి. 

• ఉద్యోగులు మారినా, బాస్ లు మారినా సంస్థ నాణ్యత,పనితీరు మారకుండా ఉండే వ్యవస్థను తయారు చేసుకోవాలి. 

• దీర్ఘకాలిక లక్ష్యంతో పనిచేసినప్పుడే ఇది సాధ్యమవుతుంది. 

• యజమానికి లాభాలు కావాలి. కానీ కేవలం లాభార్జనే ధ్యేయంగా పనిచేస్తే సంస్థ మనుగడ దెబ్బతినొచ్చు. 

చెట్టు బలంగా ఎదగాలంటే వేళ్లు బలంగా ఉండాలి! 

       ఒక చెట్టు బలంగా పెరగాలంటే వేళ్లు ఎంత బలంగా ఉండాలో అలానే సంస్థ బలంగా ఉండాలంటే మంచి ఉద్యోగులు కావాలి. ముందు మనం చెప్పుకున్నట్టు మీరు ఒక సెల్‌ఫోన్ తయారీ కంపెనీ పెట్టాలంటే మీకు సెల్‌ఫోన్ తయారు చేయడం రానవసరం లేదు. సెల్‌ఫోన్ ను బాగా తయారు చేయగలిగే సమర్ధులను నియమించుకోవడమే మీ సమర్ధత, మీ విజయ రహస్యం. అన్ని రకాల నైపుణ్యాలు, అర్హతలు ఉన్నవారిని నియమించుకున్నప్పుడు సంస్థ బలంగా ఎదుగుతుంది. ఈ విషయంలో విఫలమైతే మీ సంస్థ కూడా విఫలమవుతుంది. సంక్షోభం వచ్చినప్పుడు ఉద్యోగులను కాపాడుకుంటే తర్వాత కంపెనీకి ఇబ్బందులు వచ్చినప్పుడు ఉద్యోగులు అండగా నిలబడతారు. విజయవంతమైన ఎంటర్‌ప్రెన్యూర్ కి ఉండవలసిన ప్రధాన లక్షణం ఉద్యోగి తో సత్సంబంధాలను కొనసాగించడం. ఉద్యోగితో మంచి సంబంధాలను కొనసాగించకుండా వాళ్లను కేవలం పని చేసే వాళ్లలానే ట్రీట్ చేస్తే వాళ్లు ఎప్పుడూ సంస్థ మేలు కోరుకోరు. మానవ వనరుల విభాగంలో ఈ ముఖ్యమైన విషయాన్ని గుర్తిస్తే అటు ఎంటర్‌ప్రెన్యూర్స్ కు ఇటు ఉద్యోగులకు ప్రయోజనం చేకూరుతుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com