హారన్ కు మీ వ్యక్తిత్వానికి ఉన్న లింక్ ఏంటో తెలుసా??

     ఈ ఉరుకుల ప‌రుగుల జీవితంలో అభివృద్ధి మాట దేవుడెరుగు కానీ మ‌నిషి వ్యక్తిగ‌తంగా రోజురోజుకీ ప‌త‌న‌మ‌వుతున్నాడు. అన్నింట్లోనూ ముందుండాల‌నే త‌పన‌తో ఒత్తిడిని కొని తెచ్చుకుంటున్నాడు. వృత్తి నైపుణ్యాల‌ను పెంచుకుని కెరీర్ లో ఉన్న‌తిని సాధిస్తున్నా జీవన నైపుణ్యాల‌ను నిర్ల‌క్ష్యం చేసి చతికిల ప‌డుతున్నాడు. జీవ‌న నైపుణ్యాలు లేన‌ప్పుడు  వృత్తి నైపుణ్యం ఎంత‌ ఉన్నా అది బూడిద‌లో పోసిన ప‌న్నీరే అన్న విష‌యాన్ని చాలా మంది గుర్తించ‌డం లేదు. ఫ‌లితం వ్య‌క్తిగ‌త జీవితంలో త‌డ‌బాటు. తోటి మ‌నుష్యుల‌తో ఎలా వ్య‌వ‌హ‌రించాలో, నైతిక‌తను ఎలా కాపాడుకోవాలో, సామాజిక బాధ్య‌త అంటే ఏమిటో కూడా తెలియ‌క చాలా మంది ప‌త‌నం దిశగా ప‌య‌నిస్తున్నారు. అందుకే విద్యార్ధుల‌కు, ఉద్యోగుల‌కు లైఫ్ స్కిల్స్ ప్రాముఖ్యాన్ని తెలియ‌జెప్పేందుకు 'కెరీర్ టైమ్స్' ప్ర‌య‌త్నం చేస్తోంది. చాలామంది రోజువారీ జీవితంలో ఎదుర‌య్యే చిన్న చిన్న స‌మ‌స్య‌లను చిరున‌వ్వుతో ఎదుర్కోవ‌డం మాని కోరి ఒత్తిడిని కొని తెచ్చుకుంటున్నారు.  ప్రతీ దానికీ అసహనం వ్యక్తం చేస్తూ తమ మానసిక ఆరోగ్యాన్ని ప్రమాదంలో పడేసుకుంటున్నారు. అడ్డంకులు, ఆటంకాలు సర్వ సాధారణం గుర్తించి వాటిని తప్పించుకుంటూ ప్రయాణం చేయాలి కానీ వాటికి ప్రభావితమైతే గమ్యం మరింత దూరమైపోతుంది. 

రోడ్డుపై మీ ప్రయాణం ఎలా సాగుతోంది? 

    మనం రోడ్డుపై ప్రయాణం చేసేటప్పుడు చాలా మందిని చూస్తూ ఉంటాం. తమ గమ్యస్థానాలను చేరుకునేందుకు తమ స్థాయిలను బట్టి వాహనాల్లో చాలా మంది ప్రయాణం చేస్తుంటారు. అందరి లక్ష్యం ఒక్కటే గమ్యాన్ని త్వరగా చేరుకోవాలని. అయితే ఈ మధ్యలో వచ్చే ఆటంకాలను సమర్ధవంతంగా అధిగమించే వ్యక్తులు చాలా సాఫీగా గమ్యాన్ని చేరుకుంటారు. ప్రస్తుతం మన నగరాల్లో రోడ్డుపై ఎంత ట్రాఫిక్ ఉంటుందో, ఎన్ని అవరోధాలు ఉంటాయో అందరికీ తెలిసిందే. అయితే వీటికి స్పందించే విధానంలోనే మన విజయం ఆధారపడి ఉంటుంది. చాలా మంది రోడ్డుపై ఈ అవరోధాలకు తీవ్ర అసహనానికి గురవుతూ ఉంటారు. ఒక పక్క ప్రభుత్వాన్ని తిడుతూ మరోపక్క తోటి వాహనదారులను, రోడ్డుపై నడిచే జనాలను అందర్నీ నిందిస్తూ ప్రస్టేట్ అవుతారు. ఇది వారి మానసిక అపరిపక్వతను సూచించడంతో పాటు వాళ్ల ఆరోగ్యంపై ప్రభావాన్ని చూపిస్తుంది. ఒకవైపు మాటిమాటికి హారన్ కొడుతూ మరోవైపు వ్యవస్థను తిట్టిపోస్తూ తమకు తామే కీడు చేసుకుంటూ ఉంటారు. ఇటువంటి మనస్తత్వం వలన వారికే నష్టం తప్పించి ఇంకేమీ ఉపయోగం లేదు. 

హారన్ మీ ఆరోగ్య పరిస్థితిని బయటపెట్టేస్తుంది!

     హారన్ అదే పనిగా మోగించడం అంటే మీరు మానసిక అనారోగ్యంతో బాధపడుతున్నారని అర్ధం. అవసరం లేని సందర్భంలో హారన్ కొట్టినా ఎటువంటి ఉపయోగం లేదని తెలిసినా మీ అసహనాన్ని వెల్లగక్కడానికి హారన్ మోగిస్తున్నారంటే మీరు పతనానికి దగ్గరవుతున్నారని చెప్పుకోవాలి.ఉదాహరణకు ఒక వ్యక్తిని మీరు అంచనా వేయాలంటే బిజీ రోడ్డులో అతనికి డ్రైవింగ్ అప్పగించి అతన్ని నిశితంగా గమనించండి. గంట ప్రయాణంలో అతను ఎన్నిసార్లు హారన్ కొట్టాడో, ఏయే సందర్భాల్లో కొట్టాడో గమనించడం ద్వారా అతని వైఖరిని, సామాజిక బాధ్యతను వీటితో పాటు అతని మానసిక పరిస్థితిపై కూడా ఒక అంచనాకు రావచ్చు. బిజీ రోడ్ లో మీరు హారన్ ను అదే పనిగా మోగించడం వలన ఆ రోడ్డు వెడల్పు కాదు కదా? హారన్ అనేది వెళ్తున్న త్రోవలో ఎవరూ రాకుండా ఉపయోగించే హెచ్చరిక మాత్రమే. కానీ దాన్ని మనం మన అసహనాన్ని, అసమర్ధతను ప్రదర్శించేందుకు ఉపయోగిస్తూ ధ్వని కాలుష్యాన్ని పెంచుతూ సమాజానికి హాని చేస్తున్నాం. మానసిక శాస్త్రవేత్తల తాజా పరిశోధనల ప్రకారం రోడ్డుపై అవసరం లేకున్నా, కోపంతో, అసహనంతో హారన్ మోగించడమన్నది ఒక మానసిక సమస్య అని  తేలింది. 

పెంచాల్సింది వాయిస్ ను కాదు విలువను!

      మనలో చాలా మంది ఒక విషయంపై వాదించినప్పుడు వాయిస్ ను రైజ్ చేస్తారు. ఇక్కడ పెంచాల్సింది వాయిస్ ను కాదు మీరు చెప్తున్న విషయంలో ముఖ్యమైన పాయింట్ ను వత్తి చెప్పండి చాలు. వాయిస్ ను రైజ్ చేయడం వలన మీరు వాదనలో గెలవరు సరికదా మీ విలువ పడిపోతుంది. మనం ఇందాక చెప్పుకున్నట్టు హారన్ గట్టిగా కొట్టో, లేక వాదనలో గట్టిగా అరిచో మీరు ఎవర్నీ గెలవలేరు. మీరు శబ్దాన్ని పెంచుతున్న కొద్దీ మీ గౌరవాన్ని తగ్గించుకుంటూ ఉంటారు. ఇక్కడ చిన్న లాజిక్ ను మనలో చాలా మంది మిస్ అవుతూ ఉంటారు. మన గట్టిగా హారన్ కొట్టి, వాయిస్ ను రైజ్ చేసి అరుస్తున్నామంటే దానర్ధం మనం మన అసహనాన్ని వ్యక్తం చేస్తున్నాం. అంతే కదా? మన అసహనాన్ని అవతలి వాళ్లు అర్ధం చేసుకోవాల్సిన అవసరం ఎంత మాత్రం లేదు. అర్ధం చేసుకోరు కూడా. పెంచుకోవాల్సింది వాదనా పటిమను కానీ వాయిస్ ను కాదు. మీరు చెప్పే విషయంలో నిజాయితీ ఉన్నప్పుడు అది మెల్లగా చెప్పినా అవతలి వాళ్లకు అర్ధమవుతుంది. ఆ చెప్పే విషయాన్ని హుందాతనంతో మెల్లగా చెప్పాలి. అర్ధం చేసుకోని వాళ్లతో వాదన అనవసరం. మనుష్యులతో మంచి రిలేషన్ ను కొనసాగించాలి అనుకున్నప్పుడు ఈ విషయాన్ని గుర్తు పెట్టాలి. మాటల్లో మీ చేతల్లో కనిపించే హుందాతనమే అందర్నీ మీకు దగ్గర చేస్తుంది. అటువంటి హుందాతనం మెయింటైన్ చేసే వాళ్లు రోడ్డుపై అవసరం లేకున్నా హారన్ కొట్టరు. వాయిస్ రైజ్ చేసి వాదనకు కూడా దిగరు. 

అవరోధాలను తప్పించుకు వెళ్లే నైపుణ్యం నేర్చుకో!

       మనలో ప్రతీ ఒక్కరికీ అహం ఉంటుంది. అయితే దాన్ని ప్రతీ చిన్న విషయానికి ప్రదర్శిస్తూ పోతే మన వ్యక్తిత్వం మసకబారిపోతుంది. సరోజినీనాయుడుతో మహాత్మా గాంధీ వ్యవహరించిన ఓ ఉదంతాన్ని మనం గుర్తు చేసుకుంటే అహాన్ని అట్టిపెట్టుకోవడం మనల్ని ఎంత ఉన్నతులను చేస్తుందో తెలుసుకోవచ్చు. ఓ సందర్భంలో సభకు అధ్యక్షత వహించేందుకు వస్తున్న గాంధీని , సరోజినీనాయుడు గేటు దగ్గర అడ్డగించింది. మీరు ఎవరో నాకు తెలియదు. మీ గుర్తింపు చూపిస్తే నేను మిమ్మల్ని లోపలికి పంపుతాను అని చెప్పింది. సాక్షాత్తూ గాంధీనే అడ్డగిస్తావా? నేను ఎవరనుకున్నావు? అంటూ గాంధీ కోపంతో ఊగిపోతే ఇప్పుడు మనం అతని గురించి మాట్లాడుకునే వాళ్లం కాదు. గాంధీ మాత్రం చాలా హుందాగా వ్యవహరించి ఆ గుర్తింపును చూపించి లోపలికి వెళ్లి అందరి మనసులు గెల్చుకున్నారు. ఇదే మనం ఇప్పుడు చేయాల్సింది.  అసహనానికి గురవడం వలన మన విలువ పడిపోతుంది. గట్టిగా అరిచి గీపెట్టడం వలన ఎటువంటి ఉపయోగం ఉండదు. ఈ తరం యువత ఈ విషయాన్ని జీనవ నైపుణ్యాల్లో భాగంగా ఆకలింపు చేసుకోవాలి. దీని వలన వ్యక్తిగతంగా ఎదగడంతో పాటు మంచి పౌరునిగా కూడా ఎదిగేందుకు వీలు కలుగుతుంది. అడ్డంకులు ఉన్నాయని వాటిని తిట్టుకుంటూ అసహనంగా అరుస్తూ ఉంటే ఏమీ ఒరగదు. ఆ అవరోధాలను చాకచక్యంగా తప్పించుకుని ముందుకు వెళ్లే నైపుణ్యం నేర్చుకోండి.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                           You can send your Educational related articles to  careertimes.online1@gmail.com