చైనా ఎంబీబీఎస్ చైనా ఫోన్ లాంటిదేనా?
నీట్ 2017 రాష్ట్ర స్థాయి ర్యాంకులు కూడా విడుద‌ల అయిపోయాయి. ఇప్పుడు త‌మ‌కు ఎక్క‌డ సీటు వ‌స్తుంది? ఏ సీటు వ‌స్తుంది? ఏ కేట‌గిరీలో సీటు వ‌స్తుంది? అన్న‌దానిపై విద్యార్ధులకు ఇప్ప‌టికే ఒక స్ప‌ష్ట‌త వ‌చ్చిఉంటుంది. నీట్ కు అర్హ‌త సాధించి, సీటు సాధించే అవకాశాలున్న విద్యార్ధుల సంగ‌తి స‌రే. మ‌రి నీట్ కు అర్హ‌త సాధించ‌ని, సీటు వ‌చ్చే అవ‌కాశం లేని విద్యార్ధులు ఏం చేస్తే బాగుంటుంది? ఇటువంటి ప‌రిస్థితుల్లో కొంద‌రు విద్యార్ధులు ఏడాది వెయిట్ చేసే మ‌రోసారి నీట్ రాసేందుకు ప్ర‌య‌త్నిస్తే, మ‌రికొంద‌రు విద్యార్ధులు విదేశాల్లో వైద్య విద్యను చదివేందుకు స‌మాయుత్తం కావ‌డం మనకు తెలిసిందే. అయితే విదేశాల్లో వైద్య విద్యను చ‌ద‌వాల‌ని నిర్ణ‌యించుకున్న‌ప్పుడు అందులోని అనుకూల‌త‌ల‌ను, ప్ర‌తికూల‌త‌ల‌ను తెలుసుకుని రంగంలోకి దిగితే బాగుంటుంది. లేకుంటే త‌ర్వాత ఇబ్బందుల‌పాలు కావాల్సి ఉంటుంటి. కొంచెం క‌ష్ట‌ప‌డైనా ఇండియాలోనే వైద్య విద్యను చ‌దివితే మంచి వైద్యునిగా ఎద‌గొచ్చు అన్న‌ది నిపుణుల మాట. వేరే మార్గం లేన‌ప్పుడు మాత్రమే విదేశీ వైద్య విద్య‌పై దృష్టి సారిస్తే బాగుంటుంద‌న్నది వారి స‌ల‌హా.
రాష్ట్ర స్థాయి ప్ర‌వేశ ప‌రీక్ష‌ల‌ను తొలిగించి నీట్ ను ప్ర‌వేశ‌పెట్టాక వైద్య విద్యార్ధులకు ప్ర‌యోజ‌న‌మే ఎక్కువ జ‌రిగింద‌ని చెప్పాలి. ఇందులో ప్ర‌తికూల‌త‌ల‌ను పెద్ద‌గా ప‌రిగ‌ణ‌న‌లోకి తీసుకోవాల్సిన అవ‌స‌రం లేదు. ఒక కొత్త విధానాన్ని ప్ర‌వేశ‌పెట్టిన‌ప్పుడు చిన్న చిన్న లోపాలు ఉండటం స‌హ‌జ‌మే.ఈ ఏడాది నీట్ ప‌రీక్ష‌ను దాదాపు 12 ల‌క్ష‌ల మంది విద్యార్ధులు రాస్తే అందులో సుమారుగా 6ల‌క్ష‌ల మంది విద్యార్ధులు మాత్రమే అర్హ‌త సాధించారు . అర్హ‌త సాధించ‌ని విద్యార్ధుల్లో ఇప్పుడు చాలా మంది విదేశాల్లో వైద్య విద్యను చదివేందుకు క్యూ క‌డుతున్నారు. త‌క్కువ ఖ‌ర్చుతో డిగ్రీ చేతికి రావ‌డం, విదేశాల్లో చదువుతున్నామ‌న్న ఆత్మ సంతృప్తి చాలా మంది విద్యార్ధుల‌ను ఆక‌ర్షిస్తోంది. ఇండియాలో సీటు రాక‌పోతే పోనీ విదేశాల్లో చ‌ద‌వొచ్చు అని త‌ల్లిదండ్రులు కూడా త‌మ పిల్ల‌ల‌కు భ‌రోసా ఇస్తున్నారు. అయితే ఇది మంచి ప‌రిణామ‌మేనా అని ఆరాతీస్తే ఇందులో ఎన్నో ఇబ్బందులు తెర‌మీద‌కు వ‌స్తున్నాయి.
నీట్ పై మరిన్ని వివరాలకు ఇక్కడ క్లిక్ చేయండి.
నీట్ పై మరిన్ని వివరాలకు ఇక్కడ క్లిక్ చేయండి.
విదేశాల్లో వైద్య విద్యను చ‌దివిన విద్యార్ధుల‌తో పోల్చుకుంటే మ‌న దేశంలో స్థానికంగా చ‌దివిన విద్యార్ధులే మంచి వైద్యులుగా రాణిస్తున్న‌ట్టు తెలుస్తోంది. వైద్య సౌక‌ర్యాల కొర‌త అన్న ప్ర‌తికూలాంశ‌మే మ‌న దేశంలో మంచి వైద్య విద్యార్ధుల‌ను త‌యారు చేస్తోంది. రోగులు సంఖ్య ఎక్కువ ఉండ‌టంతో జూనియ‌ర్ స్థాయి నుంచే వైద్యం చేయ‌డం, రోగిని ప్ర‌త్య‌క్షంగా ప‌రీక్ష చేసే అవ‌కాశం ఇవన్నీ మ‌న దేశంలో వైద్య విద్యార్ధులకు ఒక సువ‌ర్ణావ‌కాశం. విదేశాల్లో అయితే జూనియ‌ర్ స్థాయి డాక్ట‌ర్ల‌ను పేషెంట్ ద‌రిదాపుల‌కు కూడా రానివ్వ‌రు. ప్రాక్టిక‌ల్ గా ఎక్కువ రాటుదేల‌డం వ‌ల‌న మ‌న దేశంలో జూనియ‌ర్ డాక్ట‌ర్లతో పోల్చుకుంటే విదేశాల్లో వైద్య విద్యను చ‌దువుతున్నవారు వెనుక‌బ‌డి ఉన్నారు. విదేశాల్లో కేవ‌లం ల్యాబ్ లు, పేప‌ర్ వ‌ర్క్ త‌ప్పించి రోగిని ప్ర‌త్య‌క్షంగా ప‌రీక్షించి, త‌న చికిత్స‌కు అత‌ను ఎలా స్పందిస్తున్నాడ‌న్న విష‌యం తెలుసుకునే వీలుండ‌దు.
చికిత్స ఎప్పుడు విజ‌య‌వంత‌మవుతుంది? రోగి చెప్పుకుంటున్న స‌మ‌స్య‌ను డాక్ట‌ర్ వివ‌రంగా అర్ధం చేసుకుని ట్రీట్ మెంట్ చేసినప్పుడు క‌దా? కానీ స‌రిగ్గా ఇక్క‌డే మ‌న దేశంలో ఒక స‌మ‌స్య ఉత్ప‌న్న‌మ‌వుతోంది. త‌మ సొంత రాష్ట్రాల్లో సీట్లు రాని విద్యార్ధుల వేరే రాష్ట్రాల‌కు వెళ్లి వైద్య విద్యను అభ్య‌సిస్తున్నారు. అయితే అక్క‌డ స్థానిక రోగులు చెప్పుకునే బాధ‌లు వీళ్ల‌కి స‌రైన రీతిలో అర్ధం కాని ప‌రిస్థితి ఉంది. రోగికి డాక్ట‌ర్ కు క‌మ్యూనికేష‌న్ గ్యాప్ అనేది అస్స‌లు ఉండ‌కూడ‌దు. దీనివ‌ల‌న ఇటు వైద్య విద్యార్ధికి నేర్చుకునే అవ‌కాశం ఉండ‌దు. అటు రోగికి జ‌బ్బు త‌గ్గ‌దు. అక్క‌డి స్థానిక భాష‌పై ప‌ట్టు సాధించే వ‌ర‌కూ విద్యార్ధి నేర్చుకునేందుకు కొంచెం ఇబ్బందులు పడుతూనే ఉంటాడు. విభిన్న భాష‌లు, సంస్కృతులు ఉన్న మ‌న‌దేశంలోనే ఇన్ని ఇబ్బందులు ఉంటే ఇక విదేశాల‌కు వెళ్లి వైద్య విద్యను నేర్చుకోవ‌డం అన్న‌ది మ‌రింత క‌ష్ట‌త‌రం. దీనికి తోడు రోగికి ప్ర‌త్య‌క్షంగా చికిత్స చేసేందుకు అనుమతించ‌క‌పోవ‌డంతో కొన్ని దేశాల్లో వైద్య విద్యను చ‌దివిన విద్యార్ధులకు థియ‌రీ, ప్రాక్టిక‌ల్ నాలెడ్జ్ ఉండటం లేదు. ఇక చైనాలో కొన్ని కాలేజీల్లో వైద్య విద్యలో నాణ్యత ఉండటం లేదనే ఆరోపణలు కూడా ఉన్నాయి.
విదేశాల్లో డాక్ట‌ర్ చ‌ద‌వాలంటే ఈ విష‌యాలు తెలియాలి!
వివిధ విష‌యాల‌పై అవ‌గాహ‌న, స‌మాచారం ఉంటేనే విదేశాల్లో వైద్య విద్యను చదివేందుకు సిద్ధ‌మ‌వ్వాలి. అన్నింటికంటే ముఖ్యంగా విదేశాల్లో డాక్ట‌ర్ ప‌ట్టా ప‌ట్టుకుని ఇండియాలో అడుగుపెట్టినా ఇక్కడ మ‌ళ్లీ మెడిక‌ల్ కౌన్సిల్ ఆఫ్ ఇండియా నిర్వ‌హించే స్క్రీనింగ్ టెస్ట్ ను పాస్ కావాల్సి ఉంటుంది. ఈ ప‌రీక్ష‌ను పాస్ కావ‌డం అంత సులువైన విష‌యం కాదు.
- ఫీజులు అందుబాటులో ఉన్న దేశాల‌ను ఎంపిక చేసుకోవాలి.
- మ‌న వాతావ‌ర‌ణం, సంస్కృతులకు ద‌గ్గ‌రగా ఉన్న దేశాల్లో డాక్ట‌ర్ చ‌దివితే బాగుంటుంది.
- ర‌ష్యా, ఉక్రెయిన్ వంటి శీత‌ల దేశాల‌ను ఎంచుకుంటే అక్క‌డి వాతావ‌ర‌ణ పరిస్థితులకు, సంస్కృతులకు అల‌వాటు ప‌డ‌టం క‌ష్టం కావచ్చు.
- విదేశాల్లో డాక్ట‌ర్ చ‌దివాక ఇక్క‌డకు వ‌చ్చాక ఎమ్‌సీఐ స్క్రీనింగ్ టెస్ట్ పాస‌యితేనే డీగ్రీకి విలువ ఉంటుంది.
- విదేశాల్లో వైద్య విద్యను పూర్తిచేస్తే ఎండీ స‌ర్టిఫికేట్ ఇస్తాడు. కానీ అది ఇండియాలో ఎంబీబీఎస్ తో స‌మానం. మ‌న దేశంలో దాన్ని ఎండీ తో స‌మానంగా ప‌రిగ‌ణించ‌రు.
- మ‌న దేశంలో సీటు రావ‌డం ఇక క‌ష్టం అనుకుంటేనే విదేశాల్లో చదివేందుకు సిద్ధం కండి.
- వైద్య విద్యను మ‌న దేశంలోనే చ‌దివితేనే మంచి వైద్యుడిగా త‌యారు కావ‌చ్చ‌న్న విష‌యాన్ని గుర్తుంచుకోండి.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
Comments
Post a Comment