ఫేస్‌బుక్..ట్విట్టర్..ఓ అవాస్తవం!?
క్రిటికల్ రీడింగ్..ఈ ప‌దం విన‌డానికి కాస్త కొత్త‌గా ఉన్నా ఈ త‌రం విద్యార్ధికి ఇది అత్యంత ముఖ్యమైన‌ది. ఈ 21 వ శతాబ్దంలో క్రిటికల్ రీడింగ్ నేర్చుకోకపోతే ఎంత చ‌దువు చ‌దివినా అది అసంపూర్ణంగానే మిగిలిపోతుంది. ఇంత బిల్డ‌ప్ ఇస్తున్నారు అసలు క్రిటికల్ రీడింగ్ అంటే ఏంటో చెప్పండి అంటారా. విద్యార్ధి ఒక విష‌యాన్ని చ‌దివిన‌ప్పుడు కేవ‌లం అందులోని ప‌దాల‌నే కాదు ఆ ప‌దాల వెనుక ఉన్న ఉద్దేశాలు, ప్ర‌యోజ‌నాల‌ను బేరీజు వేసుకుని దానిపై పూర్తి అవ‌గాహ‌న తెచ్చుకుని సొంతంగా ఆలోచించ‌గ‌లిగే శ‌క్తిని సంపాదించుకోవ‌డమే క్రిటికల్ రీడింగ్. ప్రస్తుతం సోష‌ల్ మీడియా ప‌రిధి పెరిగాక అబ‌ద్దాలు, సొంత అభిప్రాయాలు, వ్యక్తిగత ప్ర‌యోజ‌నాలు, వార్త‌లుగా, ప్ర‌ముఖ‌మైన విష‌యాలుగా చెలామ‌ణీ అయిపోతున్నాయి. విష‌యంపై పూర్తి అవ‌గాహ‌న లేక‌పోవ‌డం వ‌ల‌న ఉన్నత విద్యావంతులు, మంచి స్థాయిలో ఉన్న‌వారు కూడా అబద్దాలను ప్రచారం చేసే వాహ‌కాలుగా మిగిలిపోతున్నారు. విష‌యాన్ని లోతుగా విష్లేషించి, అది నిజ‌మా? కాదా? అని రూఢీ చేసుకుని అప్పుడు సోష‌ల్ మీడియాలో కానీ వ్య‌క్తిగ‌తంగా కానీ ఆ విష‌యాన్ని సాధికారంగా చెప్ప‌గ‌లిగే స్థాయిని విద్యార్ధులు సంపాదించుకోగ‌ల‌గాలి. భోధనలో అత్యంత కీలకమైన 3 విషయాలనూ నేర్చుకుంటే ఇటువంటి పరిస్థితి నుంచి బయటపడొచ్చు.
మీకు తెలీకుండానే అబద్దాలను ప్రచారం చేస్తున్నారు!
రీసెంట్ గా ఒక మేసేజ్ సోష‌ల్ మీడియాలో బాగా హ‌ల్ చ‌ల్ చేసింది. ఆ మెసేజ్ సారాంశం ఏంటంటే..'1945 లో జ‌పాన్ పై అమెరికా అణుదాడి చేసింది.దాని ఫ‌లితంగా ఈరోజు వ‌ర‌కు కూడా అమెరికా, జ‌పాన్ లో ఒక సూది కూడా అమ్మ‌లేక‌పోతోంది. మేడ్ ఇన్ అమెరికా అని ఉంటే చాలు అక్క‌డ ప్ర‌జ‌లెవ‌రూ ఆ వ‌స్తువుల‌ను కొనుగోలు చేయ‌రు. ఇది నిజ‌మైన దేశ‌భ‌క్తి అంటే. జ‌పాన్ లా మ‌నం ఎందుకు చేయ‌లేం. చైనా మ‌న‌కు ఇప్పుడు మ‌న‌కు శ‌త్రుదేశం. కాబ‌ట్టి ఈరోజు నుంచి మ‌నం చైనా ఉత్ప‌త్తుల‌ను కొనుగోలు చేయొద్దు'. వాట్సాప్ లో ఫేస్ బుక్ లో షేర్ అయిన ఈ మేసేజ్ ను చాలా మంది గుడ్డిగా షేర్ చేసారు. కానీ ఆ విషయం నిజ‌మా? అబ‌ద్దమా? అని తెలుసుకునే ప్ర‌య‌త్నం చేసింది చాలా త‌క్కువ మంది మాత్ర‌మే. వాస్త‌వానికి జ‌ప‌నీయులు అమెరికా ఉత్ప‌త్తుల‌ను నిక్షేపంగా వాడుతారు. అక్క‌డ చాలా మంది చేతుల్లో యాపిల్ ఐఫోన్స్, ల్యాప్ టాప్స్ ద‌ర్శ‌న‌మిస్తాయి. జ‌పాన్ స్వయంగా ఎల‌క్ట్రానిక్స్ లో రారాజు కాబ‌ట్టి యాపిల్ ఫోన్స్ వాడేవారు కాస్త త‌క్కువ‌గా ఉండొచ్చు. అంతేకానీ జ‌పాన్ వాసులు అమెరికా ఉత్ప‌త్తుల‌ను నిషేధించ‌లేదు. చైనాపై వ్య‌తిరేక‌త‌ను పెంచేందుకు ఇలాంటి అబ‌ద్ధాల‌ను ప్రచారం చేసేవాళ్లు ఉంటారు. చైనా వ‌స్తువుల‌ను మ‌నం వాడాలా? వద్దా? అన్న‌ది సెకండ‌రీ. ముందుగా మ‌నం ఏ విష‌యాన్ని అయినా గుడ్డిగా న‌మ్మేస్తే ఇంత‌టి సాంకేతిక యుగంలో ఉన్నామ‌ని చెప్పుకునేందుకు మ‌నం సిగ్గు ప‌డాల్సి ఉంటుంది.
విద్యార్ధులు విషయం వెనుక వాస్త‌వాలు తెలుసుకోవాలి!
భోధనలో మూడు కీలకమైన విషయాలు ఉంటాయి. ఒక అంశాన్ని విద్యార్ధులకు భోధించేటప్పుడు లేదా విద్యార్ధులు తామే స్వయంగా చదువుకుంటున్నప్పుడు ఈ విషయాలను తప్పనిసరిగా గుర్తుంచుకోవాలి. అవి...
2. అరౌండ్ ద లైన్
3. బియాండ్ ద లైన్
ప్రస్తుతం మార్కుల సాధనే ప్రతిపాదికగా నడుస్తున్న మన విద్యా వ్యవస్థ భోధనలో టోవర్డ్స్ ద లైన్, అరౌండ్ లైన్ వరకే పరిమితమైపోతోంది. బియాండ్ ద లైన్ ను టచ్ చేసినప్పుడు విద్యార్ధి ఒక విషయం వెనక ఉన్న వాస్తవాన్ని గ్రహించగలుగుతాడు. అలా గ్రహించలేకపోవడం వలనే ప్రతీ విషయాన్నిగుడ్డిగా నమ్మే స్థితిలో ఉండిపోతున్నాడు.
మ‌నం గ‌తంలో చెప్పుకున్న‌ట్టు సాంకేతిక ఎన్ని సౌక‌ర్యాల‌ను తెచ్చిందే అంత‌కు రెట్టింపు ఇబ్బందుల‌ను కూడా మోసుకొచ్చింది. సోష‌ల్ మీడియాలో ఏదైనా ఒక విష‌యానికి సంబంధించి ఏదైనా పోస్ట్ వ‌చ్చిన‌ప్పుడు విద్యార్ధులు, ఉద్యోగులు అది నిజ‌మా? కాదా? అన్న‌ది ముందుగా నిర్ధార‌ణ చేసుకోవాలి. ఆ విషయం వెనుక ఉన్న ఉద్దేశాన్ని నిశితంగా ప‌రిశీల‌న చేయాలి. ప్రస్తుతం ప్రతీ విషయం వెనుక, ప్రచారం వెనుక వ్యక్తిగత, రాజ‌కీయ, వ్యాపార ప్ర‌యోజ‌నాలు దాగుంటున్నాయి. విద్యార్ధులు వాళ్ల ఉద్దేశాన్ని స‌రిగ్గా అర్ధం చేసుకోలేకుంటే వాటిని ఉచితంగా ప్రచారం చేసే వాహ‌కాలుగా మారుతారు. అదే విధంగా వ్యక్తిగత అభిప్రాయాల‌ను, దృష్టి కోణాల‌ను కూడా స‌రిగా అర్ధంచేసుకోకుండా షేర్ చేయ‌డం మంచి ప‌ద్ధ‌తి కాదు. దీనివ‌ల‌న కొంద‌రి మ‌నోభావాల‌ను మీరు దెబ్బ‌తీసిన‌ట్ల‌వుతుంది. ఇటీవ‌ల వ‌చ్చిన ఓ సినిమా డైలాగ్ గుర్తుంది క‌దా? న‌్యూస్ పేప‌ర్ మొద‌టి పేజీలో వ‌చ్చిన వార్త‌కు, బిజినెస్ పేజీలో ఉన్న వార్త‌కు అవినాభావ సంబంధం ఉంటుంది. అలాగే ఒక వార్త వెనుక, ఒక పోస్ట్ వెనుక కూడా కొన్ని వ్యక్తిగత ప్ర‌యోజ‌నాలు దాగుంటాయి అన్న విష‌యాన్ని విద్యార్దులు తెలుసుకోవాలి. మీరు చ‌దివిన విషయం లేదా మీకు వేరే ఎవ‌రైనా షేర్ చేసిన విషయం అవాస్తవం అని తెలిసిన‌ప్పుడు దాన్ని ఖండించండి. కుదర‌కుంటే షేర్ చేయ‌కుండా నిలిపివేయండి. ఒక విష‌యంపై లేదా వార్త‌ను ప‌రిశీల‌న చేసి అది స‌రైన‌దా? కాదా? అని దృవీక‌ర‌ణ చేసుకున్న‌ప్పుడు క్రిటికల్ రీడింగ్ లో నైపుణ్యం సాధించిన‌ట్టే.
క్రిటికల్ రీడింగ్ లో మ‌నం వెనుక‌బ‌డి ఉన్నాం!
విదేశాల‌తో పోల్చుకుంటే విద్యార్ధులకు క్రిటికల్ రీడింగ్ ప్రాముఖ్య‌త‌ను వివ‌రించ‌డంలో మన దేశం చాలా వెనుక‌బ‌డి ఉంది. మన విద్యావిధానం కానీ, విద్యా సంస్థ‌లు కానీ విద్యార్ధులకు క్రిటికల్ రీడింగ్ ను నేర్పించ‌డంలో విఫ‌లం చెందాయ‌నే చెప్పాలి. ఫ‌లిత‌మే మంచి ఉన్నత చ‌దువులు చ‌దివినా, రాజ‌కీయ నాయ‌కులు చేతుల్లో, క‌ప‌ట మోస‌గాళ్ల చేతుల్లో మోసపోవ‌డం జ‌రుగుతోంది. మన విద్యా విధానం ఎలా ఉంది అంటే..క‌ష్ట‌ప‌డి మార్కులు తెచ్చుకోవ‌డం త‌ర్వాత జాబ్ సాధించ‌డం, త‌ర్వాత 9 టూ 5 కెరీర్ ప‌రుగు అంతే. ప్రస్తుతం యువ‌త‌లో సామాజిక చైత‌న్యం కానీ సామాజిక బాధ్య‌త కానీ కొర‌వ‌డుతోంది. దీని వ‌ల‌న ప్ర‌శ్నించడం, శోధించ‌డం అన్న ముఖ్యమైన విషయాలను పూర్తిగా మ‌ర్చిపోతున్నారు. టైమ్ పాస్ కు పేప‌ర్ చ‌ద‌వ‌డం, సామాజిక మాధ్య‌మాలు చూడ‌టం అక్క‌డ ఎవ‌రో త‌మ ప్ర‌యోజ‌నాల కోసం పెట్టుకున్న దాన్ని వెనుకా ముందూ చూడ‌కుండా పోస్ట్ చేయ‌డం. దీని వ‌ల‌న దేశంలో యువ‌త అధికంగా ఉన్నప్ప‌టికీ విద్యా విధానంలో ఈ లోపాల వ‌ల‌న అందులో సగం మంది దేశం కోరుకునే మార్పును సాధించ‌లేని త‌రంగా మిగిలిపోతున్నారు.
విద్యార్ధులకు క్రిటికల్ రీడింగ్ స్కిల్స్ త‌ప్ప‌నిస‌రి!
ఈ 21 వ శతాబ్దంలో క్రిటికల్ రీడింగ్ స్కిల్స్ లేకుండా విద్య సంపూర్ణం కానేర‌దు. క్రిటికల్ రీడింగ్ లో అతి ముఖ్యమైన విషయం ఏంటంటే..ఏ విష‌యాన్నైనా పైపైన అంటే వాక్యం తో తెలుసుకుని వ‌దిలేయ‌కుండా దాని లోతుల్లోకి అంటే అర్ధం తెలుసుకునేందుకు ప్ర‌య‌త్నం చేయాలి. విద్యార్ధుల్లో ఈ విధ‌మైన ఆలోచ‌నా విధానాన్ని పెంపోదించేందుకు అధ్యాప‌కులు ప్ర‌య‌త్నం చేయాలి. విద్యార్ధులు కూడా ఒక విష‌యాన్ని విభిన్న కోణాల్లో చూడ‌టం నేర్చుకోవాలి. ఒక విష‌యాన్ని రాసిన వ్య‌క్తి అసలు ఉద్దేశం ఏంటి? దీని ద్వారా అత‌ను ఏమైనా ప్ర‌యోజ‌నాల‌ను ఆశిస్తున్నాడా? అత‌ను రాసిన విష‌యంలో ఏకీభ‌వించే కార‌ణాలు ఏమున్నాయి.? విద్యార్ధుల ఆలోచ‌నా విధానం ఈ త‌ర‌హా లో సాగాలి. అప్పుడే క్రిటికల్ రీడింగ్ స్కిల్స్ లో ప‌ట్టు సాధించ‌గ‌లుగుతారు. సగం నిజాన్ని, అసలు నిజ‌మే కాని దాన్ని విద్యార్ధులు నిజ‌మ‌ని న‌మ్మ‌డం, పైగా దాన్ని ప్రచారం చేయ‌డం దేశ భ‌విష్య‌త్ ను ప్ర‌మాదం లో ప‌డేస్తుంది. కాబ‌ట్టి విద్యార్ధులు ఒక విష‌యంపై పూర్తి అవ‌గాహ‌న తెచ్చుకున్నాకే దానిపై ఒక అభిప్రాయానికి రండి.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
You can send your Educational related articles to careertimes.online1@gmail.com
Comments
Post a Comment