భగవద్గీతలో శ్రీకృష్ణుడు చెప్పిన ఈ 'కెరీర్ టిప్స్' తెలుసుకోవాల్సిందే!

      భగవద్గీతలో శ్రీకృష్ణుడు ఒక అద్భతమైన మాట చెప్పాడు. 'నువ్వు పని మాత్రమే చెయ్.. ఫలితం గురించి ఆలోచించకు..దాన్ని నాకు వదిలెయ్' అని. కెరీర్ లో ఉన్నతిని సాధంచాలనుకునే వాళ్లు ఈ మాటను ఆచరణలో పెట్టగలిగితే తామనుకున్న లక్ష్యాలను సులువుగా చేరుకోగలుతారు. 'నాకు ఇంత జీతం ఇస్తున్నారు.  ఆ జీతానికి సరిపడా పనిచేస్తాను' అంతే. అంతకంటే ఎక్కువ పనిచేస్తే నాకేంటి ఉపయోగం? ఇలా ఆలోచిస్తే మీ ఎదుగుదల ఆగిపోయినట్టే. ఇటువంటి ఆలోచనా విధానం ఉద్యోగులను వ్యక్తిగతంగా తీవ్రంగా నష్టపరుస్తుంది. పని విషయంలో సంకుచిత్వంగా ఆలోచించడం వలన మీరు నేర్చుకునే అద్భుత అవకాశాన్ని చేజేతులా జారవిడుచుకున్నట్టే. పనిలో మీ పూర్తి సామర్ధ్యాన్ని వినియోగించి మంచి అవుట్‌పుట్ కోసం ప్రయత్నించినప్పుడు మీ వృత్తిలో నైపుణ్యం సాధించగలుగుతారు. నైపుణ్యం ఉన్నవాళ్లకు ఉండే డిమాండ్ తెలిసిందే కదా? అలా కాకుండా ఏవో విషయాలను సాకుగా చూసి మీరు పనిచేయడాన్ని ఆపేస్తే ఉద్యోగులే నష్టపోతారు తప్ప కంపెనీ కాదు. చేసే పనిలో నిరంతరం బెస్ట్ కోసం ప్రయత్నిస్తే మీ వృత్తిగత జీవితం కూడా ఎప్పుడూ ది బెస్ట్ గా ఉంటుంది.  

ఇవ్వు.. కానీ.. ఆశించకు..! 

     మనలో చాలా మంది చేసే ఒక సర్వసాధారణమైన పొరపాటు ఏంటంటే..ఏదైనా పని చేసి దాన్నుంచి అతిగా ఆశించడం. ఇటువంటి  ఆలోచనా విధానం వ్యక్తిగత ఎదుగుదలకు అవరోధంగా మారుతుంది. వ్యక్తికైనా, విద్యార్ధికైనా, ఉద్యోగులకైనా ఎవరికైనా ఇది వర్తిస్తుంది. ప్రకృతి నియమాల ప్రకారం మీరు ఫలితం ఆశించకుండా పూర్తి నిస్వార్ధంగా దేన్నైనా ఒకరికి ఇవ్వగలిగితే..నువ్వు ఊహించని విధంగా ఏదో ఒక రూపంలో ఆ మంచి తిరిగి నీకు చేరుతుంది. ప్రస్తుత తరంలో చాలా మంది ఉద్యోగులు ఈ కంపెనీ వాళ్లు నాకు ఇంత తక్కువ జీతం ఇస్తున్నారు. వీళ్లకు కోసం నేనెందుకు కష్టపడాలి. వీళ్లు ఇస్తున్న జీతానికి సరిపడా పని మాత్రమే చేస్తాను ..ఈ విధంగా ఆలోచిస్తూ తీవ్రంగా నష్టపోతున్నారు. ఇటువంటి ఆలోచనా విధానం మీకెన్నడూ మేలు చేయదు. 

• పని చేయడం, నేర్చుకోవడం అన్నది మీ కెరీర్ కు ఉపయోగపడే విషయం.

• మీరు సరిగ్గా పనిచేయనంత మాత్రాన కంపెనీకి నష్టం లేదు. మీకే నష్టం. 

• కంపెనీపై కోపంతో పనిచేయకపోవడం వలన కొన్ని రోజులకు మీరు నైపుణ‌్యం లేని వ్యక్తిగా మిగులుతారు. 

• నైపుణ్యం లేని వ్యక్తులకు జాబ్ మార్కెట్లో విలువ లేదు.  
• కంపెనీపై కోపం పెంచుకోవడం అంటే  మీ కెరీర్ ను నాశనం చేసుకున్నట్టే. 

మిమ్మల్ని కాపాడేది మీ సామర్ధ్యమే! 

     మనం ముందు చెప్పుకున్నట్టు భవద్గీతలో లైన్ లను స్పూర్తిగా తీసుకుని పనిచేసుకుంటూ వెళ్లిపోతే చాలా ఆ పనే మనల్ని ఉన్నత స్థానంలో నిలబెడుతుంది. ఈ రోజు నేను ఎంత నేర్చుకున్నాను? ఎలా పనిచేసాను? నేను సరిదిద్దుకోవాల్సిన విషయాలు ఏమైనా ఉన్నాయా? ఇటువంటి సానుకూల ఆలోచనలు మాత్రమే చేయాలి. అలా కాకుండా ఈ కంపెనీ వాడు నన్ను సరిగ్గా గుర్తించడం లేదు. ఈ రోజు జీతం కు తగినట్టుగానే పనిచేసాను. ఇలాంటి నెగెటివ్ ఆలోచనల వలన ఎటువంటి ఉపయోగం లేదు. కంపెనీ ఇస్తున్న జీతం నచ్చనప్పుడు, అక్కడ పని వాతావరణం నచ్చనప్పుడు కొత్త కంపెనీకి షిప్ట్ అయ్యేందుకు ప్రయత్నాలు చేయండి. కానీ పని చేయకుండా తప్పించుకున్నారంటే మీ కెరీర్ ను చేజేతులా ఇబ్బందుల్లోకి నెట్టుకున్నట్టే. 

• మీ సామర్ధ్యం మేరకు పనిచేయడంలో తప్పించుకోవద్దు, రాజీపడొద్దు. 

• పనిలో ది బెస్ట్ ఇచ్చేందుకు ప్రయత్నం చేయాలి.

• పనిలో మీరు మెరుగవుతున్నారు అంటే మీ కెరీర్ కు బంగారు బాటలు వేసుకున్నట్టే.

• కంపెనీ నచ్చనప్పుడు, మీకు గుర్తింపు లేనప్పుడు కూడా పని చేసే విషయంలో  బెస్ట్ అనిపించుకోండి. 

• జీతం నచ్చలేదని పని చేయడాన్ని మానేస్తే రేపు కూడా మీరు తక్కువ జీతానికే పనిచేయాల్సిన పరిస్థితి ఏర్పడుతుంది. 

రేపటి పనిని ఈరోజే పూర్తి చేసెయ్!

       కెరీర్ లో ఉన్నత శిఖరాలకు చేరుకోవాలంటే చేయాల్సిన మరో ముఖ్యమైన విషయం.. రేపటి పనిని ఈరోజే పూర్తి చేయడం. ప్రతీ రోజూ డెడ్‌లైన్ అనుకుని పనిచేయడం వలన మంచి ఫలితాలు వస్తాయి. ఒత్తిడి తగ్గుతుంది. చాలా మంది ఉద్యోగులు మంచి క్వాలిటీ కావాలి. మంచి అవుట్ ‌పుట్ కావాలి అనుకుంటూ ఒక పనిని సుదీర్ఘంగా చేస్తూ ఉంటారు. ఇది సరైన పద్ధతి కాదు. క్వాలిటీ ముఖ్యమే కానీ సమయం అంతకంటే ముఖ్యం. ఒక రోజు మాగ్జిమమ్ అవుట్‌పుట్ ను సాధిస్తే అందులో మంచి క్వాలిటీ తో ఉన్నవి రెండు మూడు తప్పక ఉంటాయి. అలా కాకుండా క్వాలిటీ అనుకుంటూ ఉంటే రోజుకు ఒకటే నాణ్యమైన అవుట్‌పుట్ ను సాధించగలగుతాము. నైపుణ్యాన్ని పెంచుకునే ప్రాసెస్ లో ఉద్యోగులు ఈ విషయాన్ని ముఖ్యంగా గుర్తుంచుకోవాలి. పనిలో నైపుణ్యత సాధించగలిగితే ప్రతీరోజూ మరిన్ని క్వాలిటీ అవుట్‌పుట్స్ తీసుకురావడం సాధ్యమవుతుంది. ఇలా క్వాలిటీ అవుట్ పుట్స్ తీసుకురాగలిగే ఎంప్లాయీస్ కు మార్కెట్లో మంచి డిమాండ్ ఉంది. మీరెప్పుడూ డిమాండ్ ఉన్న ఎంప్లాయ్ గానే ఉండేందుకు ప్రయత్నించండి. లేకుంటే ఈ పోటీ ప్రపంచంలో మీ స్థానం ప్రశ్నార్ధకంగా మారుతుంది. 

నాలుగైదు ప్రయత్నాలతో నాలుగు విధాలా మేలు!

       ఒక లక్ష్యం పెట్టుకోవడం దాని కోసం తీవ్రంగా కృషి చేయడం తప్పేమీ కాదు . కాకపోతే ఏమైనా కొన్ని ప్రతికూల కారణాల వలన ఆ లక్ష్యం నెరవేరకపోతే నిరాశ ఆవరిస్తుంది. ప్రస్తుతం చాలా మంది విద్యార్ధులు, ఉద్యోగులు ఒకటే లక్ష్యాన్ని పెట్టుకుంటున్నారు. దీనివలన కొన్నిసార్లు వాళ్లు నష్టపోతున్నారు. అలా కాకుండా నాలుగైదు ప్రయత్నాలు చేస్తే, మంచిది ఎంచుకునేందుకు ఆప్షన్స్ దొరుకుతాయి. ఒకదాంట్లో లక్ష్యం సాధించలేకపోయినా నిరాశపడకుండా వేరే దానికి వెళ్లేందుకు వీలు కలుగుతుంది. ప్రతీ విద్యార్ధి  బెస్ట్ కోసమే ప్రయత్నించాలి. ఇందులో రెండో ప్రశ్నకు తావు లేదు. అయితే ఆ క్రమంలో వరస్ట్ ఎదురైనా దాన్ని అంగీకరించేందుకు సిద్ధంగా ఉండాలి. ఎందుకంటే ఓటమిని అంగీకరించడం తెలిసినప్పుడే గెలుపును ఆస్వాదించడం వస్తుంది. కాబట్టి ఇటువంటి మనస్తత్వాన్ని, మానసిక పరిణితిని విద్యార్ధులు, ఉద్యోగులు సాధించాలి. ఏమీ ఆశించకుండా ఇవ్వడం నేర్చుకుంటే వ్యక్తిగత జీవితంలోనూ, వృత్తిగత జీవితంలో మీ ఎదుగుదల ఎంతో ఉన్నతంగా ఉంటుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com