'స్టూడెంట్ నెంబ‌ర్ వ‌న్' కావాలంటే మీకు ఈ ల‌క్ష‌ణాలు ఉండాలి!

    ఈ పోటీ ప్ర‌పంచంలో మంచి విద్యార్ధిగా ఎదగాలంటే ఎన్నో ప్ర‌త్యేక‌త ల‌క్ష‌ణాలు ఉండాల్సిందే. ప్ర‌స్తుతం పోటీ ప‌రీక్ష‌ల్లో విజ‌యం సాధించాలంటే ఏదో సామాన్య విద్యార్ధిగా ఉంటే స‌రిపోదు. రాయ‌డం, మాట్లాడ‌టం, జ‌న‌ర‌ల్ నాలెడ్జ్, ప్రాక్టిక‌ల్ నాలెడ్జ్, లాజిక‌ల్ ఎబిలిటీ వీట‌న్నింటికీ తోడు క్లిష్ట‌ స‌మ‌యాల్లో స‌మ‌స్య‌కు అనుగుణంగా ఎలా ప్ర‌తిస్పందిస్తార‌న్న విష‌యం కూడా కీల‌క పాత్ర పోషిస్తుంది. ప్ర‌స్తుతం ప్ర‌భుత్వ ఉద్యోగం పొందాల‌న్నా, మంచి కాలేజీల్లో సీటు కావాలన్నా ఆప్టిట్యూడ్ నైపుణ్యాలు పుష్క‌లంగా ఉండాల్సిందే. క్లిష్ట‌త‌ర‌మైన సంద‌ర్భాల్లో విద్యార్ధి ఏ విధంగా స్పందిస్తున్నాడ‌న్న అంశ‌మే అత‌ని భవిష్య‌త్ ను నిర్ణ‌యిస్తుంది. విద్యార్ధి స్వ‌తంత్రంగా నిర్ణయాలు తీసుకోవాల‌న్నా, సృజ‌నాత్మ‌కంగా ఆలోచించాల‌న్నా క్రిటిక‌ల్ థింకింగ్ అనేది చాలా ముఖ్యం. సొంత అభిప్రాయాల‌ను ఏర్ప‌రుచుకునేందుకు, ఇత‌రుల దృష్టికోణంలో ఆలోచించి విష‌యాన్ని అర్ధం చేసుకునే సామ‌ర్ధ్యం ఉండే విద్యార్ధి వెనుతిరిగి చూసుకోవాల్సిన అవ‌స‌రం లేదు.

క్లిష్ట స‌మ‌యాల్లో మీ స్పంద‌నే మీ భ‌విష్య‌త్!

    నేర్చుకునే క్ర‌మంలో ప్ర‌తీ విద్యార్ధి ఏదో ఒక  స‌మ‌యంలో ఇబ్బందుల‌ను ఎదుర్కొంటూనే ఉంటాడు. అటువంటి స‌మ‌యంలో త‌న‌ను తాను స‌రిదిద్దుకుని  ముందడుగు వేయ‌కుంటే సంక్షోభంలో కూరుకుపోయే ప్ర‌మాదం ఉంది. సంక్షోభం అంటే మ‌రేదో కాదు త‌న‌పై తాను న‌మ్మ‌కాన్ని  కోల్పోవ‌డ‌మే విద్యార్ధికి నిజ‌మైన సంక్షోభం.  ఒక్క ఆత్మ‌విశ్వాస‌మే విద్యార్ధి భవిష్య‌త్ కు బంగారు బాటలు వేయ‌గ‌ల‌దు. ప్ర‌తీ విద్యార్ధి అయినా వ్య‌క్తి అయినా ఏదో ఒక సంద‌ర్భంలో కుంగుబాటుకు లోన‌వుతారు. అయితే అందులోనే ఉండిపోకుండా వీలైనంత తొంద‌ర‌గా దాన్నుంచి బ‌య‌ట‌ప‌డి అత్యున్న‌త ఫ‌లితాల‌ను సాధించేందుకు ఎవ‌రైతే ప్ర‌య‌త్నిస్తారో వారికే ఈ పోటీ ప్ర‌పంచంలో మ‌నుగ‌డ ఉంటుంది. అందుకే విద్యార్ధి ద‌శ‌లోనే క్లిష్ట స‌మ‌యాల్లో ఎలా స్పందించాలో తెలిస్తే ఉద్యోగ జీవితం, వ్య‌క్తిగ‌త జీవితం సాఫీగా సాగుతుంది.

'క్రిటిక‌ల్ థింకింగ్' సామ‌ర్ధ్యాన్ని పెంచుకుంటే ఏంటి ఉప‌యోగాలు?
1. స్వ‌తంత్ర భావాలు పెంచుకోవ‌డం
2. సృజ‌నాత్మ‌కంగాఆలోచించే సామ‌ర్ధ్యం.
3. ఒక విష‌యంపై అభిప్రాయాల‌ను ఏర్ప‌రుచుకునే నేర్పు
4. స్వ‌యం జాగురు క‌తని క‌లిగి ఉండ‌టం
5. ఇత‌రుల‌ను అర్ధం చేసుకునే ఓర్పు
6. స్వంతంగా నిర్ణ‌యాలు తీసుకునే ఒడుపు

'క్రిటికల్ థింకింగ్' సామ‌ర్ధ్యాన్ని ఎలా పెంచుకోవాలి?

1. ల‌క్ష్య సాధ‌న ఆధారంగా టాపిక్ ను ఎంచుకోవాలి

    మీరు ఏ విష‌యాన్ని తీసుకున్నా ల‌క్ష్య సాధ‌న ఆధారంగానే దాన్ని చూడాలి. ముందుగా మ‌స్తిష్కంలో మీరు చేయ‌బోయే ప‌ని గుర్తించండి. దాని వ‌ల‌న కలిగే న‌ష్టాలు, లాభాల‌ను రెండింటినీ అనుకోండి. అనుకూల‌త‌లు, ప్ర‌తికూల‌త‌లపై మీకు పూర్తి ప‌ట్టు ఉన్న‌ప్పుడు , ఆప‌నిని చేయ‌డం వ‌ల‌న క‌లిగే ఫ‌లితాల‌పై మీకు మంచి అవ‌గాహ‌న ఏర్ప‌డుతుంది.

2. ప్ర‌శ్న‌లు అడిగేందుకు ఆస‌క్తి చూపించండి.

    క్లిష్ట  స‌మ‌యాల్లో మీ ఆలోచ‌నా  సామ‌ర్ధ్యాన్ని పెంచుకునేందుకు ఇది చాలా మంచి పద్ధ‌తి. ఒక విష‌యానికి సంబంధించి మీకున్న సందేహాల‌ను ప్ర‌శ్న‌లుగా అడిగిన‌ప్పుడు మీకు ఎన్నో విష‌యాలు తెలుస్తాయి. స‌ద‌రు విష‌యంపై ఇత‌రుల అభిప్రాయాల‌ను, ఆలోచ‌న‌ల‌ను మీరు తెలుసుకునేందుకు వీలు క‌లుగుతుంది.

3. తోటివారితో చ‌ర్చించండి

     ఏదైనా  ఒక విష‌యంపై మీకు తెలిసిందే ఫైన‌ల్ కాదు. ఒక అంశంపై మీరు ఏర్ప‌రుచుకున్న భావ‌న న‌లుగురిలో చ‌ర్చించిన‌ప్పుడు మీరు క‌రెక్ట్ చేసుకునేందుకు అవ‌కాశం ఏర్ప‌డుతుంది. మీరు చ‌ర్చించ‌కుండా ఒక విష‌యంపై ఒక అభిప్రాయాన్ని ఏర్ప‌రుచుకుని ఉండిపోతే అది మీ ఎదుగుద‌ల‌కు అవ‌రోధంగా మారుతుంది.

4. బాగా చ‌ద‌వండి.

    ఒక అంశంపై లేదా విష‌యంపై మీకు మంచి సాధికార‌త రావాలంటే మీరు బాగా చ‌ద‌వాలి. ఒక పుస్త‌కం చ‌దువుతున్నప్పుడు అందులో విష‌యాలు, మీరు ఏర్ప‌రుచుకున్న భావాలు రెండింటి మ‌ధ్య సంఘ‌ర్ష‌ణ జ‌రుగుతుంది. అది మిమ్మ‌ల్ని ఆలోచ‌నావంతులుగా తయారు చేస్తుంది. కొన్ని విష‌యాల‌తో మీకు ఏకీభ‌వించ‌క‌పోవ‌చ్చు కానీ వ్య‌తిరేకించేందుకు కూడా మీకు చాలా తెలివితేట‌లు ఉండాలి.

5. స‌మ‌స్య‌ల‌ను గుర్తించి వాటిని ప‌రిష్క‌రించేందుకు ప్ర‌య‌త్నించండి.

   స‌మస్య‌ల‌ను ప‌రిష్క‌రించిన‌ప్పుడు మీరు ప‌రిణితి క‌లిగిన మ‌నిషిగా ఎదిగిన‌ట్టు. కాబట్టి స‌మ‌స్య‌ల‌ను స‌వాలుగా తీసుకోండి. చిన్న చిన్న ప‌జిల్స్ ను పూర్తి చేయ‌డం కావ‌చ్చు , ర్యూబిక్ క్యూబ్ ప‌రిస్క‌రించ‌డం కావ‌చ్చు. ఏదైనా ఒక‌సారి తీసుకుంటే దాన్ని సాల్వ్ చేసేవ‌ర‌కూ విశ్ర‌మించ‌కండి.

క్లాస్ రూమ్ చ‌దువే కాదు జీవితాన్నీ చ‌ద‌వాలి!

   ప్ర‌స్తుతం చాలా మంది విద్యార్ధులు చిన్న చిన్న స‌మ‌స్య‌ల‌ను ప‌రిష్క‌రించుకోలేక ఆత్మ‌హ‌త్య‌ల‌కు పాల్ప‌డుతున్నారు. లేదా విప‌రీత‌మైన మాన‌సిక ఒత్తిడికి గుర‌వుతున్నారు. క్లిష్ట‌స‌మాయాల్లో ఎలా వ్య‌వ‌హ‌రించాలో స‌మ‌స్య నుంచి ఎలా గ‌ట్టెక్కాలో నేర్చుకుంటే ఇటువంటి ఇబ్బందులు రావు. ఈ విష‌యంలో తల్లిదండ్రులు పిల్ల‌ల‌కు పూర్తి స‌హ‌కారం అందించాలి. వారి ప‌నులు వారే చేసుకునే విధంగా వారి చిన్ని చిన్ని స‌మ‌స్య‌ల‌ను వారే ప‌రిష్క‌రించుకునే విధంగా పిల్ల‌ల‌ను త‌యారు చేయాలి. పిల్ల‌లపై తల్లిదండ్రుల‌కు ప్రేమ ఉండ‌టం త‌ప్పుకాదు. కానీ ఆ ప్రేమ అతి ప్రేమ‌గా మారి వారి భ‌విష్య‌త్ కు ఆటంకంగా మార‌కుండా చూసుకోవాలి. సొంతంగా ఆలోచించ‌డం, స‌మ‌స్య‌ల‌ను ప‌రిష్క‌రించుకోవ‌డం, క్లిష్ట స‌మయాల్లో ఎదురొడ్డి నిల‌వ‌డం నేర్చుకుంటే మీరు మంచి విద్యార్ధిగా, మంచి ఉద్యోగిగా, మంచి పౌరునిగా ఎదిగేందుకు అవ‌కాశం ఉంటుంది.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                         You can send your Educational related articles to  careertimes.online1@gmail.com