మంచి యూనివర్సిటీని ఎలా ఎంచుకోవాలో మీకు తెలుసా?

   మీ పిల్ల‌వాడ్ని ఒక అత్యున్నత విద్యా  సంస్థలో చదివించాల‌ని మీరు నిర్ణ‌యించుకున్న‌ప్పుడు ఏం చేస్తారు?  ఆ యూనివ‌ర్సిటీ ప‌నితీరును మదింపు చేసి ఒక అంచనాకు వ‌చ్చాక కానీ అందులో జాయిన్ చేయాలా? వ‌ద్దా? అన్న నిర్ణ‌యానికి రారు. మ‌రి మీరు ఎంచుకున్న ఈ యూనివ‌ర్సిటీ చ‌దువులో, క్ర‌మ‌శిక్ష‌ణ‌లో ఏ స్థాయిలో ఉందో తెలుసుకోవడం అత్యంత కీల‌క‌మైన విష‌య‌మే క‌దా?  యూనివ‌ర్సిటీల ఎంపికలో పేరెంట్స్ కు స్టూడెంట్స్ కు స‌హాయప‌డటంలో ఇప్పుడు ర్యాంకింగ్ ఆర్గనైజేష‌న్స్ కీల‌క పాత్ర పోషిస్తున్నాయి. ర్యాంకింగ్ ఆర్గ‌నైజేష‌న్స్ ఇస్తున్న ర్యాంకుల ఆధారంగానే ఇప్పుడు చాలా మంది యూనివ‌ర్సిటీల‌ను  ఎంపిక చేసుకుంటున్నారు. అయితే యూనివ‌ర్సిటీ ర్యాంకుల‌ను వీళ్లు ఎలా నిర్ణ‌యిస్తారు?  ఈ ర్యాంకుల‌ను అస‌లు న‌మ్మొచ్చా? అన్న సందేహాలు క‌ల‌గ‌డం స‌హజం. ర్యాంకింగ్ ఆర్గ‌నైజేష‌న్స్ యూనివ‌ర్సిటీల‌కు ఇస్తున్న ర్యాంకుల విష‌యంలో కొన్ని వివాదాలు ఉన్నా కొన్ని అత్యున్న‌త సంస్థ‌లు మాత్రం విద్యాల‌యాల ప‌నితీరును క్షుణ్ణంగా అధ్య‌యనం చేసాకే ర్యాంకులు ప్ర‌క‌టిస్తున్నాయి. ఇటువంటి ప‌రిస్థితుల్లో పేరెంట్స్ ర్యాంకింగ్ ఆర్గ‌నైజేష‌న్స్ విశ్వ‌స‌నీయ‌త‌ను ప‌రిశీలించాకే అవి ప్ర‌క‌టించే ర్యాంకుల‌ను న‌మ్మాల్సి ఉంటుంది.

ర్యాంకింగ్స్ ప్ర‌క‌ట‌న‌లో ఎంతో శాస్త్రీయ‌త దాగుంది!

    అత్యున్న‌త ర్యాంకింగ్ ఆర్గ‌నైజేష‌న్స్ యూనివర్సిటీల‌కు ర్యాంకింగ్ ల‌ను ఇచ్చే విష‌యం ఒక విశ్వ‌స‌నీయ‌మై శాస్త్రీయ విధానాన్ని అవ‌లంభిస్తున్నాయి. ముఖ్యంగా 6  విభాగాల్లో గ‌ణాంకాల‌ను అధ్య‌య‌నం చేయ‌డం ద్వారా యూనివ‌ర్సిటీల‌కు తుది స్కోరును ఇస్తున్నారు.

1. అక‌డ‌మిక్ రెప్యుటేష‌న్ ఇండెక్స్ ( 40 శాతం)
2. ఎంప్లాయ‌ర్ విశ్వ‌స‌నీయ‌త సూచీ (10% )
3. ఫ్యాక‌ల్టీ, స్టూడెండ్స్ నిష్ప‌త్తి (20% )
4. సైటేష‌న్స్ పెర్ ఫ్యాక‌ల్టీ (20%)
5. అంత‌ర్జాతీయ ఫ్యాక‌ల్టీ రేషియో ( 5%)
6. అంత‌ర్జాతీయ విద్యార్ధి నిష్ప‌త్తి (5%)

     అయితే మ‌రికొన్ని సంస్థ‌లు మాత్రం టీచింగ్, రీసెర్చ్, సైటేష‌న్స్, ఇంట‌ర్నేష‌న‌ల్ ఔట్ లుక్ వంటి విష‌యాల ఆధారంగా యూనివర్సిటీల‌కు ర్యాంకుల‌ను ప్ర‌క‌టిస్తున్నారు. ర్యాంకింగ్ ఆర్గ‌నైజేష‌న్స్  వివిధ మార్గాల ద్వారా డేటాను స‌మీక‌రిస్తున్నాయి. ప్రొఫెస‌ర్స్, హెడ్స ఆఫ్ డిపార్ట్ మెంట్, డీన్స్ , వైస్ ఛాన్సెల‌ర్స్ నుంచి స‌మాచారం సేక‌రిస్తారు. అదే విధంగా స్టూడెంట్స్ డేటాను మంత్రిత్వ శాఖ నుంచి సెంట్ర‌ల్ గ‌ణాంక శాఖ నుంచి తీసుకుని వారిచ్చే స‌మాచారం ఆధారంగా స‌ర్వే నిర్వహించి ర్యాంకులను ప్ర‌క‌టిస్తారు.

మ‌న‌దేశంలో స‌రైన యంత్రాంగం లేదు!

      ఇప్ప‌టివ‌ర‌కూ మ‌నం చెప్పుకున్న శాస్త్రీయ యంత్రాంగం అంతా విదేశాల్లో స‌రైన రీతిలో పనిచేస్తోంది. ర్యాంకింగ్ ఆర్గ‌నైజేష‌న్ ప‌క్కా స‌మాచారాన్ని సేక‌రించి యూనివ‌ర్సిటీల‌కు ర్యాంకింగ్స్ ను ఇస్తాయి. అయితే మ‌న దేశంలో మాత్రం ఇటువంటి యంత్రాంగం స‌రైన విధంగా ప‌నిచేయ‌డం లేద‌నే చెప్పాల్సి వ‌స్తుంది. అత్యున్న‌త సంస్థ‌లు ప్ర‌క‌టించే ర్యాంకింగ్స్ లో మ‌న యూనివర్సిటీలు ఎక్క‌డో అట్ట‌డుగు స్థానాల్లో నిలుస్తూ ఉంటాయి. కొన్ని యూనివ‌ర్సీటిలు మంచి ర్యాంకులు సాధిస్తున్నా మ‌నం పైన చెప్పుకున్న కొన్ని విభాగాల్లో మాత్ర‌మే అవి మంచి ప‌నితీరును క‌న‌బ‌రుస్తున్నాయి కీల‌క‌మైన ప‌రిశోధ‌న వంటి విష‌యాల్లో మ‌న యూనివర్సిటీలు వెనుక‌బ‌డి ఉన్న‌ట్టు ర్యాంకింగ్ ఆర్గ‌నైజేష‌న్స్ చెపుతున్నాయి. స‌రైన యూనివ‌ర్సిటీ  ఎంపికే విద్యార్ధి స‌క్సెస్ ఫుల్ కెరీయ‌ర్ కు బాటలు వేస్తుంద‌ని ఈ విష‌యంలో నిర్ల‌క్ష్యం వ‌హించి ఏదో ఒక యూనివ‌ర్సిటీని ఎంచుకుంటే భ‌విష్య‌త్ ఇబ్బందుల్లో ప‌డుతుంద‌ని ర్యాకింగ్ ఆర్గనైజేష‌న్స్ చెపుతున్నారు.

ర్యాంకింగ్ ఆర్గ‌నైజేష‌న్స్ కు విశ్వ‌స‌నీయ‌త ముఖ్యం!

       మ‌నం ఇందాక చెప్పుకున్న‌ట్టు మ‌న దేశంలో స‌రైన ప‌ద్ధ‌తుల్లో శాస్త్రీయంగా యూనివ‌ర్సిటీలకు ర్యాంకుల‌ను ప్ర‌క‌టించే వ్య‌వ‌స్థ లేద‌నే చెప్పాలి. కొన్ని సంస్థ‌లు యూనివ‌ర్సిటీల‌కు ర్యాంకులు ప్ర‌క‌టిస్తున్న‌ప్ప‌టికీ వాటి విశ్వ‌స‌నీయ‌తపై సందేహాలున్నాయి. ప్ర‌స్తుతం మ‌న దేశంలో చాలా సంస్థ‌లు ప్ర‌తీ ఏటా యూనివ‌ర్సిటీల‌కు ర్యాంకుల‌ను ప్ర‌క‌టిస్తున్నాయి. ఇందులో ఏవో ఒక‌టీ ఆరా సంస్థ‌ల ప్ర‌క‌టించే ర్యాంకింగ్స్ కు త‌ప్ప మిగ‌తా వాటికి ఎటువంటి విశ్వ‌సనీయత లేదు. విద్య వ్యాపారంగా మారిపోయిన త‌రుణంలో ర్యాంకింగ్స్ ఆర్గ‌నైజేష‌న్స్ కూడా నాణ్య‌త‌ను గాలికొదిలి వ్యాపార సంస్థ‌లుగా మారిపోయాయి. ప్ర‌స్తుతం కొన్ని అంత‌ర్జాతీయ సంస్థ‌లు మ‌న దేశంలో ఉన్న యూనివ‌ర్సిటీల‌కు ర్యాంకుల‌ను ప్ర‌క‌టిస్తున్నా కొన్ని ఇబ్బందులు వాటిని వేధిస్తున్నాయి. శాంపిల్స్ సేక‌ర‌ణ‌, గ‌ణాంకాల సేక‌ర‌ణ‌లో ఇబ్బందులు ఎదుర‌వుతున్నాయి. ఇటువంటి ప‌రిస్థితుల‌లో పేరెంట్స్ , విద్యార్ధులు మరింత అప్ర‌మ‌త్తంగా ఉండాల్సిన అవ‌స‌ర‌ముంది. విభిన్న మార్గాల ద్వారా మంచి యూనివ‌ర్సిటీని ఎంపిక చేసుకోవ‌డం, అదే స‌మయంలో మంచి ర్యాంకింగ్ సంస్థ‌లు ఇచ్చే ర్యాంకింగ్స్ ను ఎంచుకోవ‌డం చాలా కీల‌కం. ఈ విష‌యంలో స‌మ‌చార సేక‌ర‌ణే విద్యార్ధికి మంచి యూనివ‌ర్సీటిని ఎంపిక చేసుకోవ‌డంలో స‌హాయం చేస్తుంది.

యూనివ‌ర్సిటీ ఎంపికే కీల‌కం!

       ప్ర‌స్తుతం కంపెనీలు విద్యార్ధి నైపుణ్యాల‌తో పాటు ఏ కాలేజీలో చ‌దివాడు? ఏ యూనివ‌ర్సిటీలో చ‌దివాడు? అన్న విష‌యాల‌కు ప్రాముఖ్యతనిస్తున్నాయి. అందుకే ఉన్న‌త విద్యా సంస్థ‌ల్లో చ‌దివిన విద్యార్ధులు మంచి ఉద్యోగాల‌ను సాధిస్తున్నారు. దీంతో పాటు ఎడ్యుకేష‌న్ లోన్ తీసుకుని చ‌దువుకోవాల‌నుకునే విద్యార్ధుల‌కు కూడా మంచి యూనివ‌ర్సిటీని ఎంపిక చేసుకోవ‌డ‌మే కీల‌కం. మంచి యూనివ‌ర్సిటీలు, కాలేజీల్లో చదివే విద్యార్ధుల‌కు రుణాలు ఇచ్చేందుకు బ్యాంకులు ముందుకు వ‌స్తాయి. వీటితో పాటు స‌బ్జెక్ట్ పై ప‌ట్టు, నైపుణ్యాలు ఉండ‌టం వ‌ల‌న భ‌విష్య‌త్ లో అత్యున్న‌త స్థాయికి చేరుకునేందుకు అవ‌కాశం క‌లుగుతుంది. ఈ అన్ని విష‌యాల‌ను ప‌రిగ‌ణ‌నలోకి తీసుకుంటే మంచి యూనివ‌ర్సిటీని ఎంపిక చేసుకోవ‌డ‌మే విద్యార్ధికి, పేరెంట్స్ కు అత్యంత కీల‌క‌మైన విష‌యం అన్న విష‌యం అర్ధ‌మ‌వుతోంది. కాబట్టి స‌మ‌గ్ర స‌మాచారం, విశ్వ‌స‌నీయ‌త క‌లిగిన ర్యాంకింగ్ ఆర్గ‌నేజేష‌న్స్ ను ఫాలో అయితే మంచి యూనివ‌ర్సిటీని ఎంపిక చేసుకోవ‌డం సుల‌భ‌త‌ర‌మ‌వుతుంది.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com