బీర్లు హెల్త్ డ్రింక్స్‌గా మారిన జమానాలో జాగ్రత్త పడాల్సింది ఎవరు??

      ఆరోగ్యంతో, తెలివితేట‌ల‌తో న‌వ‌న‌వ‌లాడే యువ‌త‌ర‌మే ఒక దేశానికి నిజ‌మైన సంప‌ద‌. దేశ భాగ్య రేఖ‌ల‌ను మార్చే ఇనుప న‌రాలు, ఉక్కు కండ‌రాలు క‌లిగిన యువ‌కుల‌ను త‌యారు చేసుకోవ‌డ‌మే అస‌లైన అభివృద్ధి. దాదాపు 30 కోట్ల మంది యువ‌కుల‌తో ప్ర‌పంచంలోనే నవ య‌వ్వ‌న దేశంగా ఉన్న మ‌న దేశంలో ఇటీవ‌లి కాలంలో చోటుచేసుకుంటున్న ఘ‌ట‌న‌లు ఆందోళ‌న రేకెత్తిస్తున్నాయి. ఇనుప న‌రాల‌కు ఉక్క కండ‌రాల‌కు చెద‌లు ప‌ట్చించే డ్ర‌గ్స్ భూతం మ‌న దేశంలో స్వైర్య విహారం చేస్తోంది. గ‌తంలో సంప‌న్నుల‌కే ప‌రిమితిమైన ఈ డ్ర‌గ్స్ అల‌వాటు మెల్ల‌గా పాకుతూ యువ‌కుల‌కు , ఇప్పుడు స్కూల్ లో చ‌దువుతున్న విద్యార్ధుల‌కు కూడా చేరింది. తాజాగా హైద‌రాబాద్ లో బ‌య‌ట‌ప‌డిన డ్ర‌గ్స్ రాకెట్ దందా త‌ల్లిదండ్రుల గుండెల్లో రైళ్లు ప‌రిగెత్తించింది. పోలీసుల విచార‌ణ‌లో ఏడో త‌ర‌గ‌తి, ఎనిమిదో త‌ర‌గ‌తి చ‌దువుతున్న విద్యార్ధి, విద్యార్ధినులు డ్ర‌గ్స్ వాడుతున్నార‌ని తేలింది. ప్ర‌భుత్వాల నిర్ల‌క్ష్య వైఖ‌రికి తోడు త‌ల్లిదండ్ర‌లు ప‌ర్య‌వేక్ష‌ణ కొర‌వ‌డటం తాజా దుస్థితికి కార‌ణం. ప‌రిస్థితి ఇలానే కొన‌సాగితే త‌ల్లిదండ్రుల క‌ల‌లు కూలిపోవ‌డ‌మే కాదు దేశ పునాదులు కూడా క‌దిలిపోవ‌డం ఖాయం.

స్కూల్స్, కాలేజీల్లో విచ్చ‌ల‌విడిగా డ్ర‌గ్స్!

      గ‌డిచిన కొన్నేళ్లుగా డ్ర‌గ్స్ దందాకు హైద‌రాబాద్ ముఖ్య కేంద్రంగా ఎదుగుతోంది. న‌గ‌రంలో అధికంగా సంప‌న్నుల ఉండ‌టం, వ్యాపార, సినీ రంగాల‌కు కేంద్ర స్థానం కావ‌డంతో డ్ర‌గ్స్ ముఠాలు ఇక్క‌డే దృష్టి  కేంద్రీక‌రించాయి. ప‌నిలో ప‌నిగా న‌గరంలో ఉన్న స్కూళ్లు ,కాలేజీల్లో కూడా వ్యాపారాన్ని మొద‌లు పెట్టాయి. సంప‌న్నులు, ఇత‌ర వ్యాపార‌, సినీ వ‌ర్గాల వారి డ్ర‌గ్స్ వాడ‌కాన్ని ప‌క్క‌న పెడితే స్కూల్ స్థాయి పిల్లలు, కాలేజీ విద్యార్ధులు డ్ర‌గ్స్ కు బానిస‌ల‌య్యార‌న్న అన్న వార్త‌లు ఆందోళ‌న రేపుతున్నాయి. హైద‌రాబాద్ న‌గ‌రంలో ఉన్న ప‌లు ఇంట‌ర్నేష‌న‌ల్ స్కూల్స్ తో పాటు పేరుగాంచిన బ‌డా బ‌డా స్కూల్స్ అన్నింటిలోనూ డ్ర‌గ్స్ విచ్చ‌ల‌విడిగా దొరుకుతున్నాయ‌ని పోలీసులు చెప్ప‌డం త‌ల్లిదండ్రుల‌కు షాక్ నిచ్చింది. త‌మ విచార‌ణ‌లో 8 వ త‌ర‌గ‌తి పిల్ల‌లు డ్ర‌గ్స్ వాడుతున్నార‌ని తేలింద‌ని పోలీసులు ప్రెస్ కు చెప్ప‌డం ప‌రిస్థితి తీవ్ర‌త‌ను క‌ళ్ల‌కు క‌డుతోంది. దేశ భ‌విష్య‌త్ ను కూల్చేసే ఇంత‌టి ఘోరం జ‌రుగుతున్నా ఇన్నాళ్లు ఆ విష‌యం బ‌య‌ట‌కు రాక‌పోవ‌డం అటు త‌ల్లిదండ్రుల‌ను ఇటు పౌర స‌మాజాన్ని ఆందోళ‌న‌కు గురిచేసింది.

త‌ల్లిదండ్రులదే ఈ త‌ప్పు!

     స్కూల్ స్థాయిలోనే పిల్లలు డ్ర‌గ్స్ కు బానిస‌లుగా మారుతున్నారంటే ఆ త‌ప్పుకు బాధ్యులు క‌చ్చితంగా త‌ల్లిదండ్రులే. పిల్ల‌ల‌పై ప‌ర్య‌వేక్ష‌ణ కొర‌వ‌డిన‌ప్పుడే ఇటువంటి విప‌రిణామాలు సంభ‌విస్తాయి. బాగా డ‌బ్బులు సంపాదిస్తూ త‌మ పిల్ల‌ల‌ను మంచి స్కూళ్ల‌లో జాయిన్ చేస్తే త‌మ ప‌ని పూర్త‌యిన‌ట్టేన‌ని చాలా మంది త‌ల్లిదండ్రులు భావిస్తున్నారు. విచ్చ‌ల‌విడిగా పాకెట్ మ‌నీని అందివ్వ‌డం, వాళ్లు ఏం చేస్తున్నారో, ఎలా ఉంటున్నారో ప‌ట్టించుకోక‌పోవ‌డం కూడా పిల్ల‌ల డ్ర‌గ్స్ అల‌వాటుకు కార‌ణం. ప్ర‌స్తుత సామాజిక ప‌రిస్థితుల్లో పిల్ల‌ల‌ను ప్ర‌తీ క్ష‌ణం కంటికి రెప్ప‌లా కాపాడుకుంటేనే వాళ్లు మంచి పౌరులుగా ఎదిగేందుకు అవకాశం ఉంటుంది.

• పిల్ల‌ల‌కు అధికంగా పాకెట్ మనీ ఇవ్వ‌కండి. వాళ్ల అవ‌స‌రాల‌కు స‌రిప‌డ‌గానే డ‌బ్బును ఇవ్వండి.

• స్కూల్ లో, బ‌య‌ట పిల్ల‌లు ఏ విధంగా ప్ర‌వ‌ర్తిస్తున్నారో ఓ కంట క‌నిపెట్టండి.

• తోటి పిల్ల‌ల‌తో, పెద్ద‌ల‌తో, అమ్మాయిల‌తో వాళ్ల ప్ర‌వ‌ర్తన ఎలా ఉందో తెలుసుకోవ‌డం చాలా ముఖ్యం.

• వాళ్ల మూడ్స్ ను గ‌మ‌నించాలి. వాళ్లు మాటిమాటికీ ఉద్వేగాల‌కు గుర‌వుతుంటే ఎందుకు అలా జ‌రుగుతుందో తెలుసుకోవాలి.

• ఎక్కువ‌గా ఫోన్ మాట్లాడినా, ముభావంగా ఉన్నా ఎన్నో తేడా ఉన్న‌ట్టు అర్ధం చేసుకోవాలి.

• వాళ్ల‌తో స్నేహితుల్లా క‌లిసిపోయి వాళ్ల స‌మ‌స్య‌ల‌ను అడిగి తెలుసుకుని వాటిని ప‌రిష్క‌రించాలి.

ప్రభుత్వాల వైఖ‌రి మారాలి !

     మ‌నం ముందు చెప్పుకున్న‌ట్టు దేశానికి నిజ‌మైన సంప‌ద యువ‌త‌ర‌మే. అటువంటి యువ‌త‌రం చెడుదారి ప‌ట్ట‌కుండా చూడ‌వ‌ల‌సిన బాధ్య‌త ప్ర‌భుత్వంపై ఉంది. మాదక‌ద్ర‌వ్యాలు, మ‌త్తు ప‌దార్ధాలు అందుబాటులోకి రాకుండా పటిష్ఠ నిఘా ఏర్ప‌రచాలి. క‌ఠినమైన చ‌ట్టాల‌ను త‌యారు చేసి డ్ర‌గ్స్ ముఠాల‌కు అడ్డుక‌ట్ట వేయాలి. అయితే దుర‌దృష్ట‌వ‌శాత్తూ  మ‌న ప్ర‌భుత్వాలు ఇటువంటి ప‌నులు చేయ‌డంలో విఫ‌ల‌మ‌వుతూ వ‌స్తున్నాయి. అధిక ఆదాయం కోసం వైన్ షాప్ ల‌కు బార్ల‌కు అనుతుల‌ను పెంచుతూ యువ‌త‌ను మ‌ద్యానికి బానిస‌ల‌ను చేస్తున్నారు. ఎవ‌రికి వారు స్వీయ నియంత్ర‌ణతో ఉండాల్సిందే. కానీ ప్ర‌భుత్వాలు చేస్తున్న కొన్ని ప్ర‌క‌ట‌న‌లు చూస్తూ వీళ్లు యువ‌త‌రానికి ఏం చెప్పాల‌నుకుంటున్నారో అర్ధం కావ‌డం లేదు. రీసెంట్ ఏపీకి చెందిన ఒక మంత్రి బీరును హెల్త్ డ్రింక్ గా ప్ర‌మోట్ చేస్తానని చెప్ప‌డం అందర్నీ నివ్వెర‌పోయేలా చేసింది. అంటే బీరు ఆరోగ్యాన్ని పెంచే పానీయం అంద‌రూ తాగండి అని చెపుతున్న‌ట్టే క‌దా? ఇటువంటి ప్ర‌క‌ట‌న‌లు విద్యార్ధుల‌కు ఎటువంటి సందేశం ఇస్తాయి. విద్యార్ధుల‌ను మ‌త్తు ఊబిలోకి లాగే కేటుగాళ్ల ప‌నిప‌ట్టాల్సిన ప్ర‌భుత్వాలు తామే ఓ ప‌క్కా మ‌ద్యం వ్యాపారిలా మాట్లాడ‌టం ఎంత‌వ‌ర‌కు స‌మంజసం.

క‌ళ్లు తెర‌వ‌కుంటే మిగిలేది శూన్య‌మే!

      డ్ర‌గ్స్ ఎంత భ‌యంక‌ర‌మైన అలవాటో అంద‌రికీ తెలిసిన విష‌యమే. ఒక్క‌సారి దీనికి అల‌వాటు ప‌డితే జీవితం నాశ‌నం అయిన‌ట్టే. యువ‌త‌రం డ్ర‌గ్స్ కు బానిస‌లు కావ‌డంతో కొన్ని దేశాలు ఆర్థిక వ్య‌వ‌స్థ‌లు కుప్ప‌కూలిపోయిన ఉదంతాలున్నాయి. ఇప్ప‌టి వ‌ర‌కూ మ‌న దేశంలో క‌నీస స్థాయిలో ఉన్న డ్ర‌గ్స్ వాడ‌కం, స‌ర‌ఫ‌రా ఇటీవ‌లి కాలంలో బాగా పెరుగుతోంది. ఇప్ప‌టికే పంజాబ్ వంటి రాష్ట్రాలు డ్ర‌గ్స్ దెబ్బ‌కు అత‌లాకుత‌లం అవుతున్నాయి. మ‌న తెలుగు రాష్ట్రాల్లో కూడా అటువంటి ప‌రిస్థితి రాకూడ‌దు అంటూ ప్ర‌భుత్వాలు క‌ఠిన చ‌ర్య‌లు చేప‌ట్టాలి. డ్ర‌గ్స్ వ్యాపారులు ముందుగా విద్యార్ధుల‌నే టార్గెట్ చేస్తారు క‌నుక త‌ల్లిదండ్రులు చాలా అప్ర‌మ‌త్తంగా ఉండాల్సిన అవ‌స‌ర‌ముంది. త‌మ పిల్ల‌వాడి ప్ర‌తీ క‌ద‌లిక‌పై నిఘా ఉంచి వాళ్ల‌ను ఎటువంటి దుర‌ల‌వాట్ల‌కు లోనుకాకుండా కాపాడుకోవాల్సిన బాధ్య‌త పేరెంట్స్ పై ఉంది. యూనివ‌ర్సీటీల్లోనూ, కాలేజీల్లోనూ డ్ర‌గ్స్ స‌ర‌ఫ‌రా చేసినా వాడినా క‌ఠిన చ‌ర్య‌లు త‌ప్ప‌వంటూ చ‌ట్టాలు రూపొందిస్తే కొత్త ఫ‌లితం ఉండొచ్చు. ఈ విష‌యాన్ని సీరియ‌స్ గా తీసుకుని త‌గు చ‌ర్య‌లు చేప‌ట్ట‌కుండే ప్ర‌పంచంలో అత్య‌ధిక యువ‌కులు ఉన్న దేశం అన్న ఆనందం ఆవిరి కావ‌డానికి ఎక్కువ రోజులు ప‌ట్ట‌దు.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                                You can send your Educational related articles to  careertimes.online1@gmail.com