ఇంటర్వ్యూలో 'తిరస్కరణ'ను ధీటుగా ఎదుర్కోవాలంటే ఇలా చేయండి!!

    ప్రతీసారీ గెలవడం ఏ ఒక్కరికి సాధ్యం కాదు. జీవితంలో ఓటమి నేర్పే పాఠాలు చాలా విలువైనవి. విజయానికి రాచబాటలు పరిచేది ఓటమే. జీవితంలో ఎదిగే క్రమంలో తగిలే ఎదురు దెబ్బలు , ఫెయిల్యూర్స్,  మనిషిని మరింత రాటుదేలేలా, ఏ విషయాన్ని అయినా సానుకూలంగా తీసుకునేలా తయారు చేస్తాయి. కాబట్టి ఓటమికి భయపడ్డారంటే మీకు గెలుపు దూరమైనట్టే. చాలా ఆశలతో ఇంటర్వ్యూకు వెళ్లారు..అయినా మీకు జాబ్ రాలేదు. ఇది చాలా కామన్ విష‍యం. ప్రస్తుతం చాలా మంది విద్యార్ధులు ఇలా ఇంటర్వ్యూలో తిరస్కరణను ఎదుర్కోగానే ఆత్మవిశ్వాసాన్ని కోల్పోవడం, తమను తాము తక్కువగా ఊహించుకోవడం చేస్తున్నారు. ఇది చాలా తప్పు. ఇంటర్వ్యూలో మీరు తిరస్కరణకు గురయ్యారంటే అందులో ఎన్నో విషయాలు ఇమిడి ఉంటాయి. కాబట్టి దీన్ని పాజిటివ్ గా తీసుకుని తర్వాతి ఇంటర్వ్యూకు మరింత ఉత్సాహంగా తయారు కావాలి. తిరస్కరణను ఏ విధంగా హ్యాండిల్ చేయాలో, ఓటమిని విజయానికి మెట్టుగా ఎలా వాడుకోవాలో అన్నదానిపై 'కెరీర్ టైమ్స్' ప్రత్యేక విశ్లేషణ. 

'నో' అనే మాటను వినడం నేర్చుకోండి! 

       ఈ తరం విద్యార్ధుల్లో చాలా మందికి 'నో' అనే మాటను వినడం ఇష్టం ఉండటం లేదు. ఇది సరైన పద్ధతి కాదు. 'నో' అనేది మీకు జీవితంలో చాలా సందర్భాల్లో, చాలా విషయాల్లో ఎదురవుతుందన్న విషయాన్ని గుర్తించాలి. 'ఎస్' అనే మాటను వినడానికి మీరు ఎంత ఆసక్తి చూపిస్తారో 'నో' అనే మాటను కూడా వినేందుకు అంతే ఆసక్తి చూపించాలి. 

• మీరు వెళ్లిన ఇంటర్వ్యూలో మీకు 'నో' అన్నారంటే మీలో సత్తా, సామర్ధ్యాలు లేవు అని కాదు. వాళ్ల జాబ్ కు మీరు సరిపోరు అంతే. 

• మీరు తిరస్కరణ గురైతే మీ అర్హతలు, నైపుణ్యాలపై అపనమ్మకాన్ని ప్రదర్శించుకోవద్దు.

• ఆత్మవిశ్వాసాన్ని కాపాడుకుంటేనే మీరు పోటీ ప్రపంచంలో నెగ్గుకు రాగలరు. 

• ఒక్కో తిరస్కరణ కూడా మీకు మేలు చేయవచ్చు. తర్వాతి ఇంటర్వ్యూలో మీరు మంచి  కంపెనీలో, మంచి ప్యాకేజీకి కుదురుకోవచ్చు. 

• కెరీర్ ప్రారంభంలో తిరస్కరణను ఒక అలెర్ట్ గా తీసుకుంటే తప్పులను సరిదిద్దుకుని మరింత మెరుగ్గా ఉండేందుకు సహాయపడుతుంది. 

సానుకూల ఆలోచనలను ఎప్పుడూ వదిలిపెట్టకండి! 

      మీరు ఒక ఇంటర్వ్యూలో ఎందుకు తిరస్కరణకు గురయ్యారో తెలుసుకోవడం ముఖ్యమే. ఎందుకంటే ఆ ఇంటర్వ్యూలో ఎక్కడ మీరు తప్పులు చేసారో, ఎందుకు ఆ కంపెనీ మిమ్మల్ని వద్దనుకుందో తెలుసుకుంటే మిమ్మల్ని మీరు మెరుగుపర్చుకునేందుకు అవకాశం ఏర్పడుతుంది. 

• ఓటమిని పాజిటివ్ మైండ్ తో స్వీకరించడం అలవాటు చేసుకోండి. 

• నేర్చుకోవడానికి దీన్ని ఓ చక్కని అవకాశంగా భావించండి. 

• తప్పు ఎక్కడ జరిగిందో మిమ్మల్ని మీరు ప్రశ్నించుకుని స్వీయ విశ్లేషణ చేసుకోండి. 

• తర్వాతి జాబ్ కు అప్లయ్ చేసేటప్పుడు తగినంత గ్రౌండ్ వర్క్ చేసేందుకు ప్రయత్నించండి.

• ముందు ఇంటర్వ్యూలో మీరు ఎక్కడ దెబ్బతిన్నారో ఓ పేపర్ పై రాసుకుని సదరు స్కిల్స్ ను పెంచుకునేందుకు ప్రయత్నించండి. 

విశాల దృక్ఫధంతో ఆలోచించడం నేర్చుకోండి! 

    ఇంటర్వ్యూలో నేను బాగా సమాధానాలు చెప్పాను. అన్ని అర్హతలు నాకున్నాయి. అయినా నాకెందుకు జాబ్ రాలేదు అని మథనపడటం ముందు ఆపేయండి. మీకంటే ఎక్కువ సామర్ధ్యాలు, ఎక్కువ అర్హతలు ఉన్నవాళ్లు ఇంటర్వ్యూకు వచ్చి ఉండొచ్చు. లేదా కంపెనీ వేరే విధంగా ఆలోచించి  ఉండవచ్చు. ఒక్కోసారి ఎక్కువ అర్హతలు ఉన్నా కంపెనీలు రిజెక్ట్ చేసే అవకాశం ఉంది. 

• జరిగిపోయిన విషయాన్ని ఆలోచించడం మానేయండి. 

• ఆ తిరస్కరణలో కేవలం మీకు పనికొచ్చే విశ్లేషణను మాత్రమే తీసుకుని మిగతా వాటిని వెంటనే డిలీట్ చేసేయండి. 

• మీ కంటే మెరుగైన అభ్యర్ధులు, అర్హతలు ఉన్నవాళ్లు ఉన్నారని గుర్తుంచుకోండి. 

• అదే సమయంలో మీ ఆత్మవిశ్వాసాన్ని కోల్పోకుండా చూసుకోండి.  

• మీకున్న నైపుణ‌్యాలతో మీకు మరింత మంచి జాబ్ వస్తుందన్న నమ్మకాన్ని సడలనీయకండి. 

'తిరస్కరణ'కు ఎవరూ అతీతులు కాదు! 

    ఇంటర్వ్యూలో మీరొక్కరే తిరస్కరణకు గురయ్యారు అనుకోవడం చాలా తప్పు. జీవితంలో ఎంతో ఉన్నతిని సాధించిన వ్యక్తులు కూడా గతంలో తిరస్కరణను ఎదుర్కొన్నవారే. అది వ్యక్తిగతంగా కావచ్చు. వృతిగతంగా కావచ్చు. తిరస్కరణకు ఎవరూ అతీతులు కాదని గుర్తించండి. 

•  తిరస్కరణ అనేది ఒక సహజ పరిణామం. 

•  జీవితంలో దీన్నో భాగంగా చూడటం అలవాటు చేసుకోండి. 

• ఇంటర్వ్యలో తిరస్కరణకు గురికావడం భాధాకరమే. కానీ అది అక్కడే వదిలేసి కొత్త అడుగులు వేయండి. 

• ప్రతీ ఓటమిని ఒక పాఠంగా స్వీకరించండి. 

• కిందపడ్డా వెంటనే పైకిలేస్తేనే మీకు భవిష్యత్ ఉంటుందని గుర్తుంచుకోండి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com