ఈ 4 జాగ్రత్తలు తీసుకుంటే మీ 'హాస్టల్ లైఫ్' బ్యూటీఫుల్ గా ఉంటుంది!

     ప్ర‌పంచంలో మార్పు అనేది అత్యంత స‌హ‌జ‌మైన ప్ర‌క్రియ‌. ఈ భూమండ‌లంలో ప్రాణ‌మున్న జీవి, కాలంతో పాటు ప‌రిణామక్ర‌మం చెందాల్సిందే. ఈ మార్పుకు ఏ ప్రాణీ అతీతం కాదు. ముఖ్యంగా మ‌నిషి మార్పును ఎప్ప‌టికప్పుడు అంగీక‌రించాల్సిందే. మార్పే మ‌నిషి మ‌నుగడ‌కు మూలాధారం. అయితే ఈ ఆధునిక యుగంలో మ‌నిషి త‌న అభివృద్ధికి కార‌ణ‌మైన మార్పును నిర్ల‌క్ష్యం చేస్తున్నాడు. ముఖ్యంగా విద్యార్ధి జీవితంలో మార్పును స్వీక‌రించ‌క‌పోతే భ‌విష్య‌త్ లో చాలా ఇబ్బందులు ప‌డాల్సి వ‌స్తుంది. ఉన్న‌త చ‌దువులో భాగంగా ఇప్పుడు విద్యార్ధుల‌కు హాస్ట‌ల్స్ లో ఉండాల్సిన అవ‌స‌రం ఏర్ప‌డుతోంది. అనివార్య‌మైన‌ ఈ మార్పును అంగీక‌రించి విద్యార్ధులు హాస్ట‌ల్స్ ను విద్యార్ధులు త‌మ సొంత ఇళ్ళులానే భావించాల్సి ఉంది. కానీ ప్ర‌స్తుతం చాలా మంది విద్యార్ధులు హాస్ట‌ల్ అన‌గానే ఏహ్య భావం పెంచుకుని ఇంటిపై బెంగ‌పెట్టుకుని చ‌దువుపై శ్ర‌ద్ధ పెట్ట‌డం లేదు. విద్యార్ధి భ‌విష్య‌త్ ను ప్ర‌శ్నార్ధకం చేసే ఈ పరిణామాన్ని నివారించాలంటే త‌ల్లిదండ్రులు కొన్ని జాగ్ర‌త్త‌లు తీసుకోవాలి. అలానే విద్యార్ధులు కూడా ఈ మార్పును అంగీకరించి త‌మ‌ను తాము ప‌రిస్థితుల‌కు అనుగుణంగా మ‌లుచుకోవాల్సి ఉంటుంది.

1. కొత్త కుటుంబాన్ని క్రియేట్ చేసుకోండి! 

      అప్ప‌టి వ‌ర‌కూ త‌ల్లిదండ్రుల ద‌గ్గ‌ర ఉండి ఒక్క‌సారిగా హాస్ట‌ల్ అనే కొత్త ప్ర‌దేశానికి రావ‌డం ఎవ‌రికైనా కాస్త ఇబ్బందిగానూ, బాధ‌గానూ ఉంటుంది. అయితే కాలేజీ స్థాయి పిల్ల‌లు హాస్ట‌ల్స్ లో చేరాల‌న్న ఈ అనివార్య‌త‌ను ఒప్పుకుని తీరాల్సి ఉంటుంది. హాస్ట‌ల్ లో ఉండే మీ తోటి విద్యార్ధులు కూడా మీలానే త‌ల్లిదండ్రుల‌ను వ‌దిలి ఇక్క‌డ ఉండేందుకు వ‌చ్చారు. వారిని స్ఫూర్తిగా తీసుకుని వాళ్లు ఉండ‌గా లేనిది నేనేందుకు ఉండ‌లేను అని మీకు మీరే భ‌రోసా ఇచ్చుకుంటే హాస్ట‌ల్ లో మీ తొలి అడుగు విజ‌య‌వంత‌మ‌వుతుంది.

• త‌ల్లిదండ్రుల క‌ష్టాన్ని, భ‌విష్య‌త్ పై మీ క‌ల‌ల‌ను అనుక్ష‌ణం గుర్తుచేసుకోండి.

• మీ తోటి విద్యార్ధుల‌తో మెల్ల‌గా సాన్నిహిత్యం పెంచుకోండి.

• ప్రారంభంలో ఉన్న బెంగ‌ను పొగొట్టుకునేందుకు మీ సీనియ‌ర్స్ తో మాట్లాడండి.

• ఒక్క సంవ‌త్స‌రం గ‌డిస్తే హాస్ట‌ల్ అంటే మీకు ఎంత ఇష్టం ఏర్ప‌డుతుందో ముందుగా గుర్తించండి.

• అంద‌రితో కాక‌పోయినా మీ రూమ్మేట్స్ ఒక‌రిద్ద‌రితో మంచి సాన్నిహిత్యాన్ని పెంచుకోండి.

2. మార్పును స్వాగ‌తించండి!!

    మీరు హాస్ట‌ల్ లో చేర‌గానే విద్యార్ధులు ఒక విష‌యాన్ని గుర్తుపెట్టుకోవాల్సి ఉంటుంది. వ‌చ్చే నాలుగు లేదా ఐదేళ్లు ఇదే హాస్ట‌ల్ లో ఉండాల్సి వ‌స్తుంది. కాబ‌ట్టి అక్క‌డి నిబంధ‌న‌ల‌కు, ప‌ద్ధ‌తుల‌కు అనుగుణంగా మారాల్సి ఉంటుంది. ఇది ప్రారంభంలో కాస్త క‌ఠినంగా ఉన్నా ఏడాది గ‌డిచాక అక్క‌డి సిస్ట‌మ్ కు అనుగుణంగా మీరు మార‌డం పెద్ద క‌ష్ట‌మేమీ కాదు.

• హాస్ట‌ల్ లో విద్యార్ధి చేయ‌వ‌ల‌సిన ముఖ్య‌మైన ప‌ని స‌ర్దుకుపోవ‌డం.

• హాస్ట‌ల్ లో మీకు విభిన్న మ‌న‌స్త‌త్వాల ఉన్న వ్య‌క్తులు తార‌స‌ప‌డ‌తారు.

• కొంద‌రి ప్ర‌వ‌ర్త‌న మీకు ఇబ్బంది క‌లిగించినా స‌ర్దుకుపోవాల్సి ఉంటుంది. అన్నింటికి మీరు స్పందిస్తే అది గొడ‌వ‌ల‌కు దారి తీసి మీ స్ట‌డీస్ పై ప్ర‌బావం ప‌డుతుంది.

• అప్ప‌టివ‌ర‌కూ తార‌స‌ప‌డ‌ని విచిత్ర వ్యక్తులు, ఎదుర్కోని స‌మ‌స్య‌లు స్వాగ‌తం ప‌లుకుతాయి.

• ఎప్పుడూ స‌హ‌నం కోల్పోకుండా, వివాదాల‌కు దూరంగా ఉండాల‌న్న విష‌యాన్ని హాస్ట‌ల్ జీవితం మీకు నేర్పిస్తుంది.

3. బ‌య‌టి ప్ర‌పంచం భిన్న‌మని గుర్తించండి!

    రియ‌ల్ లైఫ్ లానే హాస్ట‌ల్ లైఫ్ లో కూడా విభిన్న అంశాలు స‌వాలు విసురుతూ ఉంటాయి. ముఖ్యంగా మీరు అల‌వాటు ప్రాంతం నుంచి కొత్త ప్ర‌దేశానికి, కొత్త సంస్కృతి ఉన్న ప్రాంతానికి వెళ్లాల్సి రావ‌చ్చు. అక్క‌డ భాష‌తో పాటు వాతావ‌ర‌ణం కూడా మీకు ఇబ్బందిని క‌లిగించ‌వ‌చ్చు. అయినా స‌రే ఆ కొత్త ప‌రిస్థితుల‌ను ఆస్వాదించ‌డం నేర్చుకుంటే మీ ప‌ని సులువ‌వుతుంది.

• కొత్త భాష‌, సంస్కృతి ఉన్న ప్ర‌దేశానికి వెళ్లడాన్ని ఆస్వాదించ‌డం నేర్చుకోండి.

• అక్క‌డి ప‌రిస్థితుల‌కు అనుగుణంగా మారేందుకు ప్ర‌య‌త్నించండి.

• అన్ని సంస్కృతుల‌ను, భాష‌ల‌ను గౌర‌వించాల‌ని అర్ధం చేసుకోండి.

• హాస్ట‌ల్ జీవితం నాకు జీవితంలో ఇన్ని మార్పుల‌ను ప‌రిచ‌యం చేసింద‌ని మ‌న‌నం చేసుకోండి.

• చ‌దువుతో పాటు మీ ప‌రిణితి చెంద‌ని వ్య‌క్తిగా మారేందుకు హాస్ట‌ల్ జీవితం ఉప‌యోగ‌ప‌డుతుంది.

4. చ‌దువుతో పాటు వ్య‌క్తిగా కూడా ఎద‌గండి!

    ఇంటికి దూరంగా మీరు హాస్ట‌ల్స్ ఉండి చ‌దువుకోవ‌డం కేవ‌లం మీ కెరీర్ కు ఉద్యోగానికి సంబంధించిన విష‌యం ఒక్క‌టే కాదు. మీ వ్యక్తిత్వానికి కూడా సంబంధించిన విష‌యం కూడా. హాస్ట‌ల్ లో  మీరు చ‌దువుతో పాటు సాటి మ‌నుష్యుల‌తో ఎలా వ్య‌వ‌హ‌రించాలి? స‌హ‌నంగా ఎలా ఉండాలి? ఇత‌ర భాష‌ల‌ను, సంస్కృతుల‌ను ఎలా గౌర‌వించాలి? అన్న విష‌యాలను తెలుసుకోవాలి.

• హాస్ట‌ల్  క్ర‌మంగా అల‌వాటు ప‌డ్డాక చ‌దువుతో పాటు మంచి వ్యక్తిత్వం కూడా అవ‌స‌ర‌మ‌ని గుర్తించాలి.
• భావోద్వేగాల‌ను అదుపు చేసుకోవ‌డం, వివాదాల‌కు దూరంగా ఉండ‌టం నేర్చుకోండి.
• అదుపు లేని స్వేచ్ఛ‌ను అన‌వ‌స‌రంగా దుర్వినియోగం చేసుకోకండి.
• హాస్ట‌ల్స్ లో బయ‌ట రాజ‌కీయాలు, విప్ల‌వ భావాల‌కు దూరంగా ఉండ‌టం మంచిద‌ని గుర్తించండి.
• సామాజిక చైత‌న్యం ముఖ్యమే కానీ అది అదుపు త‌ప్పి మీ అస‌లు ల‌క్ష్యం ప‌క్క‌దారి ప‌ట్ట‌కుండా చూసుకోవ‌డం మరింత ముఖ్యం.

     హాస్ట‌ల్ లో మొద‌ట కొత్త‌గానూ, క‌ష్టంగానూ ఉంటుంది. కానీ స్నేహితులు పెరిగాక‌, చ‌దువుపై ఆస‌క్తి పెరిగాక‌, ఎదైనా సాధించాల‌న్న ప‌ట్టుద‌ల పెరిగాక హాస్ట‌ల్ లైఫ్ చాలా బాగుంది అనిపిస్తుంది. ఎవ‌రిపై ఆధార‌ప‌డ‌కుండా త‌మ ప‌నుల‌ను తాము సొంతంగా చేసుకోవ‌డంతో పాటు స‌మాజంలో ఎలా ఉండాలి? సాటి వ్యక్తుల‌తో ఎలా వ్య‌వ‌హ‌రించాలి? అన్న విష‌యాల‌ను హాస్ట‌ల్ జీవితం నేర్పిస్తుంది. అదే విధంగా ఇన్నాళ్లు త‌ల్లిదండ్రులు త‌మ కోసం ఎన్ని త్యాగాలు చేసారో, ఎన్ని ప‌నులు చేసారో అన్న విష‌యంపై అవ‌గాహ‌న వ‌స్తుంది. మ‌నం ఇప్పుడు చెప్పుకున్న చిన్న చిన్న జాగ్ర‌త్త‌లు తీసుకుంటే హాస్ట‌ల్ లైఫ్ మీ లైఫ్ కు బ‌ల‌మైన పునాది వేస్తుంద‌న‌డంలో ఎటువంటి సందేహం లేదు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com