'బెస్ట్ ఎంప్లాయీ అవార్డ్' కావాలా? అయితే 4 టిప్స్ పాటించండి!

     ప్ర‌స్తుతం చాలామంది తమ రోజువారీ జీవితంలో విప‌రీత‌మైన మాన‌సిక, శారీర‌క‌ ఒత్తిడికి గుర‌వుతున్నారు. ఇటువంటి ప‌రిస్థితుల్లో చేసే ప‌నిలో 100 శాతం మంచి ప‌నితీరును క‌న‌బ‌ర్చ‌డం ఎవ‌రికైనా అసాధ్య‌మే. దీంతో పాటు డెడ్ లైన్లు, టార్గెట్లు అంటూ నిరంతరం మెడ‌పై వేలాడే ఒత్తిడి క‌త్తి ప‌నిని దిన‌దిన‌గండంగా మారుస్తోంది. వీటికి తోడు కొన్ని రంగాల్లో ఆటోమేష‌న్ లు, సంక్షోభాలు ఉద్యోగ భ‌ద్ర‌త‌ను ప్ర‌శ్నార్ధకం చేస్తూ ఉద్యోగం అంటేనే విర‌క్తి క‌లిగేలా చేస్తున్నాయి. ఇలాంటి ప‌ని వాతావ‌ర‌ణం నేప‌థ్యంలో మంచి ప‌నితీరును క‌న‌బ‌ర్చి ఆఫీస్ లో బెస్ట్ ఎంప్లాయ్ అనిపించుకోవాలంటే ఏం చేయాలి? ఇప్పుడు మ‌నం చెప్పుకుంటున్న జాగ్ర‌త్తలు తీసుకుని ఒక ప్ర‌ణాళిక ప్ర‌కారం అన్ని ప‌నులు చేస్తే ఆఫీస్ ప‌ని ఒత్తిడిని జ‌యించ‌డం పెద్ద క‌ష్ట‌మేమీ కాదు. కొంచెం క్ర‌మ‌శిక్ష‌ణ‌, రోజువారీ జీవితంలో చిన్న‌పాటి మార్పులు మీ జీవితాన్ని మార్చేస్తాయి. అప్పుడు ఆఫీస్ లో కొండ‌లా తోచే టార్గెట్లు, డెడ్ లైన్లు మీ ప్రణాళిక ముందు కొట్టుకుపోతాయి. మ‌రింకెందుకాల‌స్యం ఆఫీస్ లో బాగా ప‌నిచేయాలంటే ఏమేం జాగ్ర‌త్తలు తీసుకోవాలో తెలుసుకుందాం రండి. 

మీ రోజును ఘ‌నంగా ప్రారంభించండి! 

    ఇంట్లో మీరే పెద్ద అయిన‌ప్పుడు మీరు చాలా బాధ్య‌త‌ల‌ను మోయాల్సి ఉంటుంది.  ఉద‌యాన్నే లేవ‌డం పిల్ల‌ల‌ను స్కూల్ కు త‌యారు చేయ‌డం, వంట చేయ‌డం ఇలా ఎన్నో ప‌నులు ఉంటాయి.  ఉద‌యం పూట ఇంట్లో ప‌నులు లేట్ కావ‌డంతో ఆఫీస్ కు హ‌డావుడిగా బ‌య‌లుదేరాల్సి వ‌స్తుంది. ఎప్పుడైతే ఆఫీస్ కు లేట్ గా స్టార్ట్ అయ్యారో అప్పుడే మీపై మీకే తెలియ‌ని ఒక ఒత్తిడి ప్ర‌భావం చూపుతూ ఉంటుంది. అలా కాకుండా రోజు కొంచెం ముందుగా లేచి ప‌నుల‌ను ప్రారంభిస్తే మీ రోజును ఘ‌నంగా ప్రారంభించ‌వ‌చ్చు. 

• ఆఫీస్ కు బ‌య‌లుదేరే ముందు ఎట్టి ప‌రిస్థితుల్లోనూ కోపం తెచ్చుకోకండి. 

• ప్ర‌తీ రోజూ మీరు బైక్ పై ఆఫీస్ కు వెళ్తుంటే కొన్ని రోజులు బైక్ ను వ‌దిలేసి పబ్లిక్ ట్రాన్స్ పోర్ట్ ను ఉప‌యోగించండి. 

• మీ ఇంటి నుంచి బ‌స్టాప్ కు చేరేవ‌ర‌కూ హాయిగా న‌డుస్తూ మంచి విష‌యాల‌ను నెమ‌రు వేసుకోండి. 

• ఆఫీస్ కు స్టార్ అవుతూ ఇంటికి లాక్ చేసేట‌ప్పుడు మీ వ్య‌క్తిగ‌త స‌మ‌స్య‌ల‌ను ఇంటిలోనే వ‌దిలేయండి. నేను ప‌నిచేసేందుకు వెళుతున్నా, బాగా ప‌నిచేస్తాను అని ఒక‌టికి రెండు సార్లు అనుకుని బ‌య‌లుదేరండి. 

• దీర్ఘంగా శ్వాస తీసుకోండి. మీ ఇంటి చుట్టుప‌క్క‌ల ఉన్న ప‌క్షుల అరుపులు, గాలి చ‌ప్పుడు వీట‌న్నింటిని ఒక్క క్ష‌ణం ఆస్వాదించండి. 

• ఇలా చేసాక కొంచెం దూరం న‌డుచుకుంటూ వెళ్లి, ఆఫీస్ లోకి చ‌క్క‌ని చిరున‌వ్వుతో అడుగుపెట్టండి. 

ప‌నిచేసే చోటును ప‌రిశుభ్రంగా ఉంచుకోండి! 

     మీరు ప‌నిచేసే డెస్క్ ప‌రిశుభ్రంగా ఉంటే మీరు బాగా ప‌నిచేయ‌డంలో స‌గం టాస్క్ పూర్తయిన‌ట్టే. అలా కాకుండా మీ డెస్క్ అప‌రిశుభ్రంగా ఉందంటే మీ ప‌నితీరు తీవ్రంగా మంద‌గిస్తుంది. ఇది చాలా స‌ర్వేల్లో తేలిన విష‌యం. కాబ‌ట్టి మీరు ప‌నిచేసే టేబుల్ ను, మీ వ‌స్తువుల‌ను శుభ్రంగా ఉంచుకుంటే మీ ఫెర్ఫార్మెన్స్ ఆటోమేటిక్ గా పెరుగుతుంది. 

• ఒకవేళ మీకు  ఆధ్మాత్మిక భావాలు అధికంగా ఉన్న‌ట్ట‌యితే మీరు ప‌నిచేసే కంప్యూట‌ర్ స్క్రీన్ కింద ఒక దేవుని బొమ్మ‌ను పెట్టుకొండి. దీని వ‌ల‌న మీకు అదృష్ట భావ‌నతో పాటు ఒక మంచి ప్ర‌దేశానికి వ‌చ్చిన ఫీలింగ్ క‌లుగుతుంది. 

• మీ వ‌ర్క్ టేబుల్ పై ఒక అంద‌మైన ఫ్ల‌వ‌ర్ వాజ్ ను పెట్టి అందులో తాజా పూల‌ను పెట్టండి. ఈ ప‌ద్ధ‌తి మీకు చాలా మేలు చేస్తుంది. 

• కాస్త నిరాశ‌, అల‌స‌ట వ‌చ్చిన‌ప్పుడు పూల రంగులు, వాస‌న చూస్తే మీ కొత్త ఉత్సాహం వ‌స్తుంది. 

• మీ ఆఫీస్ కోలీగ్స్ కు కూడా ఈ ప‌ద్ధ‌తి పాటించ‌మ‌ని చెప్పండి. రోజూ మీకు కుదిరితే వాళ్ల‌కు కూడా పూల‌ను ఇవ్వండి, ఇది మీ మ‌ధ్య అనుబంధాన్ని మ‌రింత పెంచడానికి ఉప‌యోగ‌ప‌డుతుంది. 

• మీ డెస్క్ పై కొన్ని స్ఫూర్తినిచ్చే కోటేష‌న్ ల‌ను రాసిపెట్టుకోండి. అదే విధంగా క్యాలెండ‌ర్ లో మంచి ఆహ్లాద‌క‌ర‌మైన చిత్రాలు ఉండేలా చూసుకోండి. 

స్నేహితుల‌ను త‌యారు చేసుకోండి

    మీరు ఆఫీస్ లో ఒత్తిడి లేకుండా పనిచేయాల‌న్నా, మీ ల‌క్ష్యాల‌ను వేగంగా చేరుకోవాల‌న్నా అంద‌రితో మంచి సంబంధాలు అనేవి చాలా ముఖ్యం. ముఖ్యంగా స‌హోద్యోగుల‌తో ఎప్పుడూ మంచి రిలేష‌న్స్ ను మెయింటైన్ చేయండి. వాళ్ల‌తో స్నేహ‌పూర్వ‌కంగా ఉంటూ ఆఫీస్ లో అన్ని విష‌యాల‌ను షేర్ చేసుకుని వాళ్ల స‌హాయం తీసుకుంటూ అవ‌స‌ర‌మైతే వాళ్ల‌కు స‌హాయం చేయాలి.  

• మీ చుట్టూ ఎప్పుడూ గౌర‌వపూర్వ‌క‌మైన వ్య‌క్తులే ఉంటేట‌ట్టు చూసుకొండి. 

• మీ కోలీగ్స్ తో మంచి సంబంధాలు ఉండ‌టం వ‌ల‌న టీమ్ వ‌ర్క్ చేసేందుకు, వ్యక్తిగ‌తంగా మంచి ప‌నితీరు క‌న‌బ‌ర్చేందుకు వీలు క‌లుగుతుంది.

• టీ బ్రేక్ లోనే లేక ఖాళీ స‌మ‌యాల్లోనే మీ కోలీగ్స్ ను చిరున‌వ్వుతో ప‌లక‌రించ‌డం మ‌ర్చిపోవ‌ద్దు. 

• కానీ పుకార్ల‌ను ప్ర‌చారం చేసేవాళ్ల‌ను గుర్తించి వాళ్ల‌కు దూరంగా ఉండ‌టం కూడా చాలా ముఖ్యం. 

• ఆఫీస్ లో మంచి స్నేహితులు ఉంటే ఒత్తిడితో మీకు స‌హాయం చేయ‌డంతో పాటు కెరీర్ లో కూడా అండ‌గా ఉంటారు. 

ప్ర‌ణాళిక త‌యారు చేసుకోండి! 

    మీ ప‌నిని ఒక ప్ర‌ణాళిక ప్ర‌కారం విభ‌జించుకుని ప‌నిచేస్తే మంచి ఎంప్లాయ్ అనిపించుకోవ‌చ్చు. దీంతో పాటు మీరు నిర్దేశించుకున్న ల‌క్ష్యాల‌ను చేరుకునేందుకు కూడా వీలు క‌లుగుతుంది. 

• ప‌నిని ప్రారంభించే ముందు ఆరోజు చేయాల్సిన ప‌నిని ఒక నోట్ ప్యాడ్ పై నోట్ చేసుకుని ఎప్ప‌టిలోగా దాన్ని పూర్తి చేయాలో ఒక ప్లాన్ త‌యారు చేసుకోవాలి.

• అదే విధంగా సాయింత్రం ఆ రోజు పూర్తి చేసిన ప‌నికి సంబంధించి ఒక వ‌ర్క్ రిపోర్ట్ ను త‌యారు చేసుకుని, మ‌రుస‌టి రోజు చేయాల్సిన ప‌నిని కూడా పొందుప‌ర్చుకోవాలి. 

• ప్ర‌తీ రోజూ చేస్తున్న ప‌నిని స‌మీక్షించుకుని చిన్న చిన్న పాజిటివ్ మార్పుల‌ను చేస్తే ఉత్పాద‌క‌త మ‌రింత నాణ్యంగా ఉంటుంది. 

• మీ ప‌నితీరును మెరుగుపర్చుకుంటూనే అదే స‌మ‌యంలో ఒత్తిడిని అధిగ‌మించేందుకు ప్ర‌య‌త్నిస్తే మీరు మంచి ప‌నివంతులుగా గుర్తింపు సాధించ‌డం ఖాయం. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com